ഇലക്ട്രിക് ത്രീവീലറുകളുടെ രാജാവാകാൻ Piaggio Ape Auto

പിയാജിയോ വെഹിക്കിൾസ് പ്രൈവറ്റ് ലിമിറ്റഡ് രണ്ട് പുതിയ ഇലക്ട്രിക് 3 വീലറുകൾ പുറത്തിറക്കി. പാസഞ്ചർ സെഗ്‌മെന്റിൽ ആപ്പെ ഇ സിറ്റി എഫ്എക്സ് മാക്സ് (Ape E-City FX Max), കാർഗോ വിഭാഗത്തിൽ ആപ്പെ ഇ-എക്സ്‍ട്ര എഫ്എക്സ് മാക്സ് (Ape E-Xtra FX Max) എന്നിവയാണവ. ആപ്പെ ഇ-എക്സ്‍ട്ര എഫ്എക്സ് മാക്സ് രണ്ട് വേരിയന്‍റുകളിൽ ലഭ്യമാണ്.

പിയു മാക്സും ഡബ്ലുപി മാക്സും. യഥാക്രമം 3.46 ലക്ഷം രൂപയും 3.43 ലക്ഷം രൂപയുമാണ് ഇവയുടെ വില. ആപ്പെ ഇ സിറ്റി എഫ്എക്സ് മാക്സിന് 3.26 ലക്ഷം രൂപയാണ് പൂനെ എക്സ്-ഷോറൂം വില. പിയാജിയോ വെഹിക്കിൾസ് പ്രൈവറ്റ് ലിമിറ്റഡിന്റെ ചെയർമാനും എംഡിയുമായ ഡീഗോ ഗ്രാഫി, ഇലക്ട്രിക് വെഹിക്കിൾസ് ഇവിപിയും ബിസിനസ് ഹെഡുമായ സുധാൻഷു അഗർവാൾ എന്നിവരുടെ സാന്നിധ്യത്തിൽ ഇറ്റലിയിലെ ഇന്ത്യൻ അംബാസഡർ വിൻസെൻസോ ഡി ലൂക്കയാണ് ഇലക്ട്രിക് ത്രീ-വീലറുകൾ അവതരിപ്പിച്ചത്.

പുതിയ ശ്രേണിയുടെ സമാരംഭത്തിനുപുറമെ, ഇന്ത്യയിൽ ശക്തമായ ഇലക്ട്രിക്ക് വാഹന ഇൻഫ്രാസ്ട്രക്ചർ കെട്ടിപ്പടുക്കുന്നതിൽ തുടർ മുന്നേറ്റം ഉറപ്പാക്കുന്നതിന് പ്രധാന വ്യവസായ പങ്കാളികളുമായി പിയാജിയോ വെഹിക്കിൾസ് പ്രൈവറ്റ് ലിമിറ്റഡ് ധാരണാപത്രവും ഒപ്പുവച്ചു. പുതിയ വേരിയന്റുകളായ ആപ്പെ ഇ സിറ്റി , ആപ്പെ ഇ-എക്സ്‍ട്ര എന്നിവ ഒറ്റ ചാർജിൽ യഥാക്രമം 145 കിലോമീറ്ററും 115 കിലോമീറ്ററും റേഞ്ച് വാഗ്ദാനം ചെയ്യുന്നു. മികച്ച ഗ്രൗണ്ട് ക്ലിയറൻസിനായി 12 ഇഞ്ച് ടയർ വലുപ്പമുള്ളതാണ് ഈ ഇവികൾ.

പിയാജിയോയുടെ ബാരാമതി ഫാക്‌ടറിയിൽ മുഴുവൻ വനിതാ ടീമും ചേർന്നാണ് ഈ ഇവി ശ്രേണി പൂർണമായും അസംബിൾ ചെയ്‍തിരിക്കുന്നത്. സമീപഭാവിയിൽആപ്പെ ഇ സിറ്റി എഫ്എക്സ് മാക്സിന് സ്വാപ്പ് ചെയ്യാവുന്ന ബാറ്ററി സാങ്കേതികവിദ്യയും ലഭിക്കും. ഡ്രൈവിംഗ് സമയത്ത് മികച്ച ദൃശ്യപരതയ്ക്കും നിയന്ത്രണത്തിനും വേണ്ടി ഈ മുച്ചക്ര ഇവികളുടെ സീറ്റ് ഉയരം ക്രമീകരിച്ചിരിക്കുന്നു. ഡ്രൈവർമാർക്ക് മികച്ച നാവിഗേഷൻ നൽകുകയും ഫ്ലീറ്റ് ഉടമകളെ ഏറ്റവും കാര്യക്ഷമതയോടെ ട്രാക്ക് ചെയ്യാനും നിയന്ത്രിക്കാനും അനുവദിക്കുന്ന അഡ്വാൻസ്‍ഡ് ടെലിമാറ്റിക്‌സ് 2.0 സഹിതമാണ് പുതിയ മോഡലുകൾ വരുന്നത് എന്നും കമ്പനി പറയുന്നു.

24,000 വാണിജ്യ ഇവികൾ വിതരണം ചെയ്യുന്നതിനായി പിയാജിയോ വെഹിക്കിൾസ് പ്രൈവറ്റ് ലിമിറ്റഡ് സൺ മൊബിലിറ്റി, ത്രീ വീൽസ് യുണൈറ്റഡ്, സിങ്കോ, സിറ്റി ലിങ്ക്, ആംപ്ലസ് സോളാർ, മജന്ത മൊബിലിറ്റി, MoEVing, MBSI തുടങ്ങിയ പ്രധാന ഇവി കമ്പനികളുമായി തന്ത്രപരമായ ധാരണാപത്രം (എംഒയു) ഒപ്പുവച്ചു. 2023-ൽ ഇന്ത്യയിലുടനീളം ഘട്ടം ഘട്ടമായി. ഇതിൽ 10,000-ലധികം പേരെ ഇന്ത്യയിലെ 14-ലധികം നഗരങ്ങളിൽ കാർഗോ, പാസഞ്ചർ വിഭാഗങ്ങൾക്കായി SUN മൊബിലിറ്റിയുടെ പങ്കാളിത്തത്തോടെ വിന്യസിക്കും എന്നും കമ്പനി പറയുന്നു.

രാജ്യത്ത് 18 ലക്ഷത്തിലധികം ഇലക്ട്രിക് വാഹനങ്ങള്‍ രജിസ്റ്റര്‍ ചെയ്തിട്ടുണ്ടെന്ന് കേന്ദ്രമന്ത്രി റോഡ് ഗതാഗത ഹൈവേ വകുപ്പ് മന്ത്രി നിതിന്‍ ഗഡ്കരി ബുധനാഴ്ച പറഞ്ഞു. ഉത്തര്‍പ്രദേശ്, ഡല്‍ഹി, മഹാരാഷ്ട്ര എന്നീ സംസ്ഥാനങ്ങളാണ് ഇലക്ട്രിക് വാഹന വില്‍പ്പനയില്‍ മുന്‍നിരക്കാരായി നിലകൊള്ളുന്നത്. ഉത്തര്‍പ്രദേശും ഡല്‍ഹിയുമാണ് ഇലക്ട്രിക് വാഹനങ്ങള്‍ രജിസ്റ്റര്‍ ചെയ്തിട്ടുള്ള ഇന്ത്യയിലെ രണ്ട് മുന്‍നിര സംസ്ഥാനങ്ങള്‍. ഏറ്റവും കൂടുതല്‍ ഇലക്ട്രിക് വാഹനങ്ങള്‍ രജിസ്റ്റര്‍ ചെയ്തിരിക്കുന്നത് ഉത്തര്‍പ്രദേശിലാണ്. 4,14,978 ഇവികളാണ് സംസ്ഥാനത്തെ നിരത്തുകളില്‍ ഇപ്പോള്‍ ഉള്ളത്.

1,83,074 ഇലക്ട്രിക് വാഹനങ്ങളുമായി ഡല്‍ഹി രണ്ടാമതാണ്. 1,79,087 ഇവികള്‍ രജിസ്റ്റര്‍ ചെയ്ത് മഹാരാഷ്ട്ര മൂന്നാമതെത്തിയതായും റോഡ് ഗതാഗത, ഹൈവേ മന്ത്രി രാജ്യസഭയില്‍ രേഖാമൂലം മറുപടി നല്‍കി. വിവിധ സംസ്ഥാനങ്ങളുടെ ചുവടുപിടിച്ച് ഉത്തര്‍പ്രദേശ് കുറച്ച് കാലം മുമ്പാണ് ഇലക്ട്രിക് വാഹന നയം പ്രഖ്യാപിച്ചത്. ഇലക്ട്രിക് വാഹനങ്ങള്‍ വാങ്ങുന്ന ഉപഭോക്താക്കള്‍ക്ക് വന്‍ കിഴിവുകള്‍ പ്രയോജനപ്പെടുത്താനാകും. ഇലക്ട്രിക് വാഹന നയത്തിലൂടെ ഇലക്ട്രിക് വാഹനങ്ങളുടെ വില്‍പ്പന മാത്രമല്ല, ഇലക്ട്രിക് വാഹനങ്ങളുടെ ഉല്‍പ്പാദനവും യുപി ലക്ഷ്യമിടുന്നു.

ചാര്‍ജിംഗ് സ്റ്റേഷനുകളുടെ വികസനവും ഉത്തര്‍പ്രദേശിലെ യോഗി ആദിത്യനാഥ് സര്‍ക്കാര്‍ ലക്ഷ്യമിടുന്നു. ഇ-വാഹന നയത്തിന് കീഴില്‍ യുപി സര്‍ക്കാര്‍ വമ്പന്‍ പ്രഖ്യാപനങ്ങളാണ് നടത്തിയത്. എല്ലാത്തരം ഇലക്ട്രിക് വാഹനങ്ങള്‍ക്കും രജിസ്ട്രേഷനിലും റോഡ് നികുതിയിലും 100% ഇളവ് നല്‍കുന്നു. ഇലക്ട്രിക് വാഹന നയം ആരംഭിച്ചതിന് ശേഷം മൂന്ന് വര്‍ഷത്തേക്ക് ഈ ആനുകൂല്യങ്ങള്‍ ലഭ്യമായിരിക്കും. ഇത് മാത്രമല്ല, യുപിയില്‍ നിര്‍മ്മിക്കുന്ന ഇലക്ട്രിക് വാഹനങ്ങള്‍ക്ക് നാലാമത്തെയും അഞ്ചാമത്തെയും വര്‍ഷത്തേക്ക് ഈ ഇളവ് ലഭിക്കും.