ഔദ്യോഗിക ലോഞ്ചിന് മുമ്പ് 2022 Toyota Glanza -യുടെ വേരിയന്റ് ഓപ്ഷനുകൾ പുറത്ത്

പുതിയ 2022 ടൊയോട്ട ഗ്ലാൻസയുടെ മാനുവൽ ട്രാൻസ്മിഷൻ വേരിയന്റുകൾ E, S, G, V എന്നിങ്ങനെ നാല് ട്രിം ലെവലുകളിൽ ലഭ്യമാണ്. അതേസമയം ഓട്ടോമാറ്റിക് ട്രാൻസ്മിഷൻ വേരിയന്റുകൾ മൂന്ന് ടോപ്പ് സ്പെക്ക് ട്രിം ലെവലുകളിൽ മാത്രമാണ് വരുന്നത്.

ഓഫറിലെ ട്രിം ലെവലുകളെ കുറിച്ച് പറയുമ്പോൾ, 'E' ആണ് അടിസ്ഥാന വേരിയന്റ്, ഇതിൽ അഞ്ച് സ്പീഡ് മാനുവൽ ഗിയർബോക്‌സ് മാത്രമാണ് സജ്ജീകരിച്ചിരിക്കുന്നത്.

ഈ ട്രിം ലെവലിൽ ABS, EBD, ഡ്യുവൽ എയർബാഗുകൾ, പ്രീ-ടെൻഷനറുകൾ, ഫോഴ്‌സ് ലിമിറ്ററുകൾ എന്നിവയുള്ള ഫ്രണ്ട് സീറ്റ് ബെൽറ്റുകൾ, സ്പീഡ് വാണിംഗ് ബസർ, ഇമോബിലൈസർ, ടിൽറ്റ് അഡ്ജസ്റ്റബിൾ സ്റ്റിയറിംഗ്, ഓട്ടോ എസി, പോളിൻ ഫിൽട്ടർ, കീലെസ് എൻട്രി, പാർക്കിംഗ് സെൻസറുകൾ തുടങ്ങിയ സവിശേഷതകളുണ്ട്. കൂടാതെ ഇലക്ട്രോണിക് ടെയിൽഗേറ്റ്, സ്പീഡ് സെൻസിംഗ് ഓട്ടോ ഡോർ ലോക്ക് മുതലായവയും ലഭിക്കുന്നു.

ഓഫറിലെ അടുത്ത ട്രിം ലെവൽ 'S' വേരിയന്റാണ്. അടിസ്ഥാന വേരിയന്റിൽ നിന്ന് വ്യത്യസ്തമായി, ഈ വേരിയന്റ് അഞ്ച് സ്പീഡ് AMT യൂണിറ്റിനൊപ്പം തെരഞ്ഞെടുക്കാം, കൂടാതെ സേഫ്റ്റി അലാറം, വെഹിക്കിൾ സ്റ്റെബിലിറ്റി കൺട്രോൾ, ഹിൽ-ഹോൾഡ് ഫംഗ്ഷൻ തുടങ്ങിയ അധിക ഫീച്ചറുകളുമുണ്ട്. എന്നിരുന്നാലും, അവസാനത്തെ രണ്ട് സവിശേഷതകൾ AMT വേരിയന്റിൽ മാത്രമേ ലഭ്യമാകൂ.

'G' വേരിയന്റ് കൂടുതൽ ഉദാരമായി സജ്ജീകരിച്ചിരിക്കുന്നു, കൂടാതെ AMT ഗിയർബോക്‌സ് ഉപയോഗിച്ച് ഇത് കോൺഫിഗർ ചെയ്യാനും കഴിയും. ഈ വേരിയന്റിൽ സൈഡ് കർട്ടൻ എയർബാഗുകളും ടിൽറ്റ് & ടെലിസ്കോപ്പിക് സ്റ്റിയറിംഗ് വീലും ചേർക്കുന്നു.

ടോപ്പ് എൻഡ് ട്രിം ലെവൽ 'V' വേരിയന്റാണ്. മുകളിൽ പറഞ്ഞിരിക്കുന്ന എല്ലാ ഫീച്ചറുകളും കൊണ്ട് സജ്ജീകരിച്ചിരിക്കുന്ന ഇത് മാനുവൽ വേരിയന്റിൽ പോലും വെഹിക്കിൾ സ്റ്റെബിലിറ്റി കൺട്രോളും ഹിൽ-ഹോൾഡ് ഫംഗ്ഷനും വാഗ്ദാനം ചെയ്യുന്നു.

മുകളിൽ സൂചിപ്പിച്ചതുപോലെ, പുതിയ 2022 ടൊയോട്ട ഗ്ലാൻസ മാനുവൽ, ഓട്ടോമാറ്റിക് വേരിയന്റുകളിൽ വാഗ്ദാനം ചെയ്യും. എന്നിരുന്നാലും, പുതിയ ഗ്ലാൻസ ഹാച്ച്ബാക്കിന്റെ ഓട്ടോമാറ്റിക് വേരിയന്റിൽ ഇപ്പോൾ ഔട്ട്ഗോയിംഗ് മോഡലിൽ നിന്നുള്ള CVT യൂണിറ്റിന് പകരം അഞ്ച് സ്പീഡ് AMT യൂണിറ്റ് വരുന്നു.

ഇവ കൂടാതെ, പുതിയ ഗ്ലാൻസയിൽ 16 ഫീച്ചറുകൾ കൂടി ചേർത്തിട്ടുണ്ടെന്നും ഈ ഫീച്ചറുകളിൽ 360 ഡിഗ്രി സറൗണ്ട് വ്യൂ ക്യാമറ, ക്രൂയിസ് കൺട്രോൾ, DCM അധിഷ്ഠിത ടെലിമാറ്റിക്സ്, ടിക്കറ്റ് ഹോൾഡറുള്ള സൺ വൈസർ, ഹെഡ്‌സ്-അപ്പ് ഡിസ്‌പ്ലേ, 9.0 ഇഞ്ച് ഇൻഫോടെയിൻമെന്റ് യൂണിറ്റ്, കർട്ടൻ എയർബാഗുകൾ, പിന്നിൽ രണ്ട് യുഎസ്ബികൾ, ESP, കൂടുതൽ ശക്തമായ എഞ്ചിൻ, പിൻ എസി വെന്റുകൾ, 'ഹേ ടൊയോട്ട' വോയ്‌സ് അസിസ്റ്റൻസ്, ഹിൽ ഹോൾഡ് കൺട്രോൾ, സ്റ്റാർട്ട്/സ്റ്റോപ്പ് ടെക്‌നോളജി, ആർക്കാമിസ് സൗണ്ട് സിസ്റ്റം, ഓഡിയോയ്‌ക്കായുള്ള റിമോട്ട് കൺട്രോൾ ആപ്പ് എന്നിവ ഉൾപ്പെടുന്നുവെന്നും ടൊയോട്ട അവകാശപ്പെടുന്നു.

ഇവ കൂടാതെ, ടൊയോട്ട 1.2 ലിറ്റർ ഡ്യുവൽ VVT എഞ്ചിൻ ഉപയോഗിക്കുമെന്ന് സ്ഥിരീകരിച്ചിട്ടുണ്ട്, ഇത് ഇൻടേക്ക്, എക്‌സ്‌ഹോസ്റ്റ് ക്യാംഷാഫ്റ്റുകളിൽ സമയം ക്രമീകരിക്കുന്നു. ഈ എഞ്ചിൻ പുതിയ ഗ്ലാൻസയ്ക്ക് കൂടുതൽ ശക്തി നൽകുന്നു.

കൃത്യമായി പറഞ്ഞാൽ, പുതിയ 2022 ഗ്ലാൻസ 6,000 rpm -ൽ 88.50 bhp പവറും 4,400 rpm -ൽ 113 Nm പീക്ക് torque ഉം സൃഷ്ടിക്കും. കൂടാതെ, പുതിയ ടൊയോട്ട ഗ്ലാൻസയുടെ ഭാരം 920-960 കിലോഗ്രാം വരെയായിരിക്കുമെന്നും സ്ഥിരീകരിച്ചിട്ടുണ്ട്.

അതോടൊപ്പം പുതിയ 2022 ടൊയോട്ട ഗ്ലാൻസയിൽ പുനർരൂപകൽപ്പന ചെയ്ത ഫ്രണ്ട് ഗ്രില്ലും വലിയ 14 ഇഞ്ച് ഡിസ്ക് ബ്രേക്കുകളും മെച്ചപ്പെട്ട സസ്പെൻഷൻ സംവിധാനവും ഉണ്ടാകും.