Renault Kiger-ന്റെ പ്രൊഡക്ഷന്‍ 50,000 പിന്നിട്ടു; ആഘോഷങ്ങള്‍ക്ക് മാറ്റ് കൂട്ടാന്‍ പുതിയ കളര്‍ ഓപ്ഷനും

2021 ഫെബ്രുവരിയിലാണ് കൈഗര്‍ ആദ്യമായി പുറത്തിറക്കിയത്, 17 മാസത്തിനുള്ളില്‍ ഈ നാഴികക്കല്ല് കൈവരിക്കാന്‍ ഇതിന് കഴിഞ്ഞുവെന്നും കമ്പനി വ്യക്തമാക്കി. റെനോ ഇന്ത്യ ഈ സബ്-കോംപാക്ട് എസ്‌യുവിയുടെ 50,000-ാമത്തെ യൂണിറ്റ് തമിഴ്നാട്ടിലെ ചെന്നൈയ്ക്ക് സമീപം സ്ഥിതി ചെയ്യുന്ന ഒറഗഡം നിര്‍മ്മാണ കേന്ദ്രത്തില്‍ നിന്ന് പുറത്തിറക്കി.

മാത്രമല്ല, ഈ അവസരം ആഘോഷിക്കുന്നതിനായി, കൈഗറിന്റെ ലൈനപ്പില്‍ കമ്പനി ഒരു പുതിയ സ്റ്റെല്‍ത്ത് ബ്ലാക്ക് എക്സ്റ്റീരിയര്‍ കളര്‍ ഓപ്ഷന്‍ അവതരിപ്പിക്കുകയും ചെയ്തു. ഏഴ് മോണോ-ടോണുകളും നാല് ഡ്യുവല്‍-ടോണ്‍ പതിപ്പുകളും ഉള്‍പ്പെടെ ആകെ പതിനൊന്ന് കളര്‍ വേരിയന്റുകളില്‍ റെനോ കൈഗര്‍ ഇപ്പോള്‍ ലഭ്യമാണ്.

71 bhp കരുത്തും 96 Nm torque ഉം ഉത്പാദിപ്പിക്കുന്ന 1.0 ലിറ്റര്‍ നാച്ചുറലി ആസ്പിറേറ്റഡ് പെട്രോള്‍ എഞ്ചിനാണ് ഈ സബ്-കോംപാക്ട് എസ്‌യുവിക്ക് കരുത്ത് പകരുന്നത്.

98 bhp കരുത്തും 160 Nm torque ഉം നല്‍കുന്ന 1.0 ലിറ്റര്‍ ടര്‍ബോ പെട്രോള്‍ മോട്ടോറും ഇതിന് ലഭിക്കുന്നു. രണ്ട് എഞ്ചിനുകളും സ്റ്റാന്‍ഡേര്‍ഡായി 5-സ്പീഡ് മാനുവല്‍ ഗിയര്‍ബോക്‌സുമായിട്ടാണ് ജോടിയാക്കുന്നത്. അവയ്ക്ക് യഥാക്രമം AMT & CVT ഓട്ടോമാറ്റിക് ട്രാന്‍സ്മിഷനും ലഭിക്കും.

നിലവില്‍ 5.99 ലക്ഷം മുതല്‍ 10.62 ലക്ഷം വരെയാണ് റെനോ കൈഗറിന്റെ എക്സ്ഷോറൂം വില.

വ്യതിരിക്തമായ ഡിസൈന്‍, സ്മാര്‍ട്ട് ഫീച്ചറുകള്‍, മുന്‍നിര സുരക്ഷ, ഗുണമേന്മ, പ്രകടനം എന്നിവയില്‍ ശക്തമായ മൂല്യനിര്‍ണ്ണയം വാഗ്ദാനം ചെയ്യുന്ന റെനോ കൈഗര്‍ അതിന്റെ ഉപഭോക്താക്കള്‍ക്കിടയില്‍ വ്യാപകമായ സ്വീകാര്യത കണ്ടെത്തിയതായി റെനോ ഇന്ത്യ സിഇഒയും മാനേജിംഗ് ഡയറക്ടറുമായ വെങ്കട്റാം മാമില്ലപ്പള്ളി പറഞ്ഞു.

ഇന്ത്യയിലെ ഏറ്റവും മത്സരാധിഷ്ഠിതമായ കോംപാക്ട് എസ്‌യുവി സെഗ്മെന്റില്‍ ഇത് അതിന്റെ കഴിവ് തെളിയിച്ചു, പകര്‍ച്ചവ്യാധിയും നിലവിലുള്ള സെമികണ്ടക്ടര്‍ ചിപ്പ് പ്രതിസന്ധിയും ഉണ്ടായിരുന്നിട്ടും 50,000-ാമത്തെ പ്രൊഡക്ഷന്‍ നാഴികക്കല്ല് ഈ വെല്ലുവിളി നിറഞ്ഞ സെഗ്മെന്റില്‍ റെനോ കൈഗറിന്റെ വിജയത്തിന്റെ മറ്റൊരു തെളിവാണെന്നും അദ്ദേഹം കൂട്ടിച്ചേര്‍ത്തു.

ഈ സ്പോര്‍ടി, സ്മാര്‍ട്ട്, അതിശയിപ്പിക്കുന്ന എസ്‌യുവി, ഇന്ത്യയിലെ ഞങ്ങളുടെ പുരോഗതിയില്‍ ഒരു പ്രധാന സംഭാവനയാണ്, കൂടാതെ ഇന്ത്യയെ റെനോയുടെ മികച്ച അഞ്ച് ആഗോള വിപണികളില്‍ ഉള്‍പ്പെടുത്തുന്നതില്‍ നിര്‍ണായക പങ്കുവഹിച്ചു.

മികച്ച ഉപഭോക്തൃ പ്രതികരണം റെനോ കൈഗര്‍ തുടര്‍ന്നും നേടുമെന്നും ഇന്ത്യയിലും വിദേശത്തും ബ്രാന്‍ഡിന്റെ വളര്‍ച്ചയെ കൂടുതല്‍ ശക്തിപ്പെടുത്തുമെന്നും തങ്ങള്‍ക്ക് ഉറപ്പുണ്ടെന്നും വെങ്കട്റാം മാമില്ലപ്പള്ളി കൂട്ടിച്ചേര്‍ത്തു.

അടുത്തിടെയാണ് കൈഗറിന്റെ നവീകരിച്ച് 2022 പതിപ്പിനെ കമ്പനി അവതരിപ്പിക്കുന്നത്. ഇതുവഴി കോംപാക്ട് എസ്‌യുവിക്ക് നിരവധി അപ്ഡേറ്റുകളും ലഭിച്ചിരുന്നു. ഈ അപ്ഡേറ്റുകളില്‍ ഒരു പുതിയ ഡ്യുവല്‍ ടോണ്‍ കളര്‍ ഓപ്ഷന്‍ ഉള്‍പ്പെടുന്നു - മസ്റ്റാര്‍ഡ് വിത്ത് മിസ്റ്ററി ബ്ലാക്ക് സഹിതം പുതിയ 16 ഇഞ്ച് അലോയ് വീലുകള്‍, ഫ്രണ്ട് ഫാക്സ് ബാഷ് പ്ലേറ്റ്, ടര്‍ബോചാര്‍ജ്ഡ് എഞ്ചിന്‍ ഉള്ള മോഡലുകള്‍ക്കുള്ള ടര്‍ബോ ഡീക്കലുകള്‍, പിന്നില്‍ കൂടുതല്‍ ക്രോം.

ഡാഷിന് റെഡ് ഫേഡ് ആക്സന്റും റെഡ് സ്റ്റിച്ചിംഗോടുകൂടിയ സീറ്റുകള്‍ക്കായി ക്വില്‍റ്റഡ് എംബോസ്ഡ് അപ്ഹോള്‍സ്റ്ററിയും ഉപയോഗിച്ച് ഇന്റീരിയര്‍ അപ്ഡേറ്റുചെയ്തു. കൈഗര്‍ കോംപാക്ട് എസ്‌യുവിക്ക് ക്രൂയിസ് കണ്‍ട്രോള്‍, വയര്‍ലെസ് ഫോണ്‍ ചാര്‍ജര്‍ തുടങ്ങിയ പുതിയ ഓപ്ഷണല്‍ ഉപകരണങ്ങള്‍ക്കൊപ്പം പുതിയ PM2.5 അഡ്വാന്‍സ്ഡ് അറ്റ്മോസ്‌ഫെറിക് ഫില്‍ട്ടറും സ്റ്റാന്‍ഡേര്‍ഡായി ലഭിക്കുന്നുണ്ട്.

കൈഗര്‍ അടുത്തിടെ ഗ്ലോബല്‍ NCAP-ല്‍ പരീക്ഷിക്കുകയും അന്താരാഷ്ട്ര കാര്‍ സുരക്ഷാ ബോഡിയില്‍ നിന്ന് 4-സ്റ്റാര്‍ സുരക്ഷാ റേറ്റിംഗ് നേടുകയും ചെയ്തിരുന്നു. കൈഗറില്‍ 4 വരെ എയര്‍ബാഗുകള്‍, EBD ഉള്ള എബിഎസ്, ചൈല്‍ഡ് സീറ്റുകള്‍ക്കുള്ള ISOFIX ആങ്കറുകള്‍, സ്പീഡ് സെന്‍സിംഗ് ഡോര്‍ ലോക്കുകള്‍, പാര്‍ക്കിംഗ് സെന്‍സറുകള്‍ എന്നിവ റെനോ വാഗ്ദാനം ചെയ്യുന്നു.

വിപണിയില്‍ ടാറ്റ പഞ്ച്, മാരുതി സുസുക്കി ബ്രെസ, ഹ്യുണ്ടായി വെന്യു, ടാറ്റ നെക്‌സോണ്‍, മഹീന്ദ്ര XUV300, കിയ സോനെറ്റ്, നിസാന്‍ മാഗ്നൈറ്റ്, ടൊയോട്ട അര്‍ബന്‍ ക്രൂയിസര്‍ എന്നീ മോഡലുകളുമായാണ് നിലവില്‍ റെനോ കൈഗര്‍ മത്സരിക്കുന്നതെന്ന് വേണം പറയാന്‍.