Kwid E-TECH! ജനപ്രിയ ഹാച്ചിന്റെ ഓൾ ഇലക്ട്രിക് മോഡൽ അവതരിപ്പിച്ച് Renault

തെക്കേ അമേരിക്കൻ രാജ്യത്ത് ലഭ്യമായ മോഡലിന് 142,990 ബ്രസീലിയൻ റിയൽ ഏകദേശം 23.20 ലക്ഷം രൂപയാണ് എക്സ്-ഷോറൂം വില. ഓൾ ഇലക്‌ട്രിക് എൻട്രി ലെവൽ ഹാച്ച്ബാക്ക് ആദ്യമായി K-ZE എന്ന കൺസെപ്റ്റ് 2020 ഓട്ടോ ഷോയിൽ അനാച്ഛാദനം ചെയ്‌തിരുന്നു.

യൂറോപ്പിൽ ഡാസിയ സ്പ്രിംഗ് ഇവി എന്ന പേരിലും ഇത് ലഭ്യമാണ്. JAC E-JS1 മോഡലിന് പകരമായി ബ്രസീലിൽ വിൽക്കുന്ന ഏറ്റവും വിലകുറഞ്ഞ ഇലക്ട്രിക് വാഹനമായി റെനോ ക്വിഡ് E-ടെക് മാറും.

ഡിസൈനിന്റെ കാര്യത്തിൽ, പുതിയ ക്വിഡ് E-ടെക് ഔട്ട്‌ഗോയിംഗ് ICE ക്വിഡിനോട് സാമ്യമുള്ളതാണ്, എന്നിരുന്നാലും ഇത് കുറച്ച് ഇവി നിർദ്ദിഷ്ട ഡിസൈൻ ഘടകങ്ങളെ അവതരിപ്പിക്കുന്നു.

മറ്റെല്ലാ ഇവികളെയും പോലെ മുൻവശത്ത് എഞ്ചിൻ ഇല്ലാത്തതിനാൽ, ലോഗോയ്ക്ക് താഴെയുള്ള രണ്ട് സ്ട്രിപ്പുകളുടെ രൂപത്തിൽ ക്രോം ഗാർണിഷുള്ള ഒരു ക്ലോസ്ഡ് ഓഫ് ഗ്രില്ലാണ് മോഡലിന് ലഭിക്കുന്നത്.

കൂടാതെ, പുതുതായി രൂപകൽപ്പന ചെയ്ത ഒരു കൂട്ടം അലോയി വീലുകളോടൊപ്പം ചുറ്റും E-ടെക് ബാഡ്‌ജിംഗും വാഹനത്തിന് ലഭിക്കുന്നു. ബ്രസീൽ സ്പെക്ക് ക്വിഡ് ഇവി തെക്കേ അമേരിക്കൻ വിപണിയിൽ നോറോണ ഗ്രീൻ, ഗ്ലേസിയർ പോളാർ വൈറ്റ്, ഡയമണ്ട് സിൽവർ എന്നിങ്ങനെ മൂന്ന് ഷേഡുകളിൽ ലഭ്യമാണ്.

വാഹനത്തിന്റെ ഇന്റീരിയറിനെ സംബന്ധിച്ചിടത്തോളം, ക്വിഡ് E-ടെക്കിന് ഇവി നിർദ്ദിഷ്ട ഇൻസ്ട്രുമെന്റ് ക്ലസ്റ്ററും ഫോർ സ്പോക്ക് സ്റ്റിയറിംഗ് വീലും ലഭിക്കുന്നു. ഇവ കൂടാതെ ഇന്റീരിയർ അതിന്റെ ICE എതിരാളിയിൽ നിന്ന് അത്ര വ്യത്യസ്തമല്ല. 7.0 ഇഞ്ച് ടച്ച്‌സ്‌ക്രീൻ ഇൻഫോടെയിൻമെന്റ് സിസ്റ്റവും ഇലക്ട്രിക് വിൻഡോകളും സഹിതം ഇന്ത്യ സ്പെക്ക് ക്വിഡിന്റെ അതേ സർക്കുലർ ഗിയർ സെലക്ടറും ഇതിന് ലഭിക്കുന്നു.

സുരക്ഷാ സവിശേഷതകളുടെ കാര്യത്തിൽ മോഡലിന് ഒരു മികച്ച ലിസ്റ്റ് ലഭിക്കുന്നു, ഇത് ഇന്ത്യ-സ്പെക്ക് ക്വിഡിനേക്കാൾ മെച്ചപ്പെട്ടതാണ്. E-ടെക് വേരിയന്റിലെ പട്ടികയിൽ ആറ് എയർബാഗുകൾ, ABS + EBD, ഇലക്ട്രോണിക് സ്റ്റെബിലിറ്റി കൺട്രോൾ, ഹിൽ-സ്റ്റാർട്ട് എയ്ഡ്, ടയർ പ്രഷർ മോണിറ്ററിംഗ് സിസ്റ്റം എന്നിവ ഉൾപ്പെടുന്നു.

പുതിയ ക്വിഡ് E-ടെക്കിൽ 26.8 kWh ബാറ്ററികൾ സജ്ജീകരിച്ചിരിക്കുന്നു, ഇതിന് സിറ്റി യൂസേജിൽ 298 കിലോമീറ്ററും സിറ്റി-ഹൈവേ ഡ്രൈവിംഗും സംയോജിപ്പിച്ചുള്ള മിക്സഡ് സൈക്കിളിൽ 265 കിലോമീറ്ററും ഡ്രൈവിംഗ് റേഞ്ച് നൽകാൻ കഴിയും.

20A, 220V ഗാർഹിക ഔട്ട്‌ലെറ്റിൽ നിന്ന് ചാർജ് ചെയ്യുമ്പോൾ, ഏകദേശം 9 മണിക്കൂറിനുള്ളിൽ 190 കിലോമീറ്റർ വരെ ചാർജ് കൈവരിക്കാൻ കാറിന് കഴിയും. പെർഫോമെൻസിന്റെ കാര്യത്തിൽ, ഫ്രഞ്ച് നിർമ്മാതാക്കൾ ബ്രസീലിലെ ഏറ്റവും വിലകുറഞ്ഞ ഇലക്ട്രിക് കാറിന് 65 bhp കരുത്ത് പുറപ്പെടുവിക്കാൻ സാധിക്കും.

അതോടൊപ്പം 4.1 സെക്കൻഡിനുള്ളിൽ പൂജ്യത്തിൽ നിന്ന് മണിക്കൂറിൽ 50 കിലോമീറ്റർ വരെ വേഗത കൈവരിക്കാൻ കഴിയുമെന്നും അവകാശപ്പെടുന്നു. ഏകദേശം 977 കിലോഗ്രാമാണ് വാഹനത്തിന്റെ ഭാരം.

ഫാസ്റ്റ് ചാർജിംഗ് സ്റ്റേഷനിൽ 40 മിനിറ്റിനുള്ളിൽ ഇവി ഹാച്ച്ബാക്കിന് ഇതേ 190 കിലോമീറ്റർ റേഞ്ച് നേടാനാകുമെന്ന് റെനോ അവകാശപ്പെടുന്നു, കൂടാതെ റെനോ ക്വിഡ് E-ടെക്കിന് 7.0 kW വാൾബോക്സ് ചാർജർ ഉപയോഗിച്ച് ചാർജ് ചെയ്യുമ്പോൾ 15 ശതമാനം ചാർജിൽ നിന്ന് 80 ശതമാനത്തിലെത്താൻ 2 മണിക്കൂർ 50 മിനിറ്റ് സമയം എടുക്കും.

കൂടാതെ, ബ്രസീലിലെ ഏറ്റവും വിലകുറഞ്ഞ ഇലക്ട്രിക് കാർ ഒരു ECO മോഡും റീജനറേറ്റീവ് ബ്രേക്കിംഗും അവതരിപ്പിക്കുന്നു, ഇവ രണ്ടും ഇത്തരത്തിലുള്ള കാറുകളുടെ ഊർജ ഉപഭോഗം കുറയുന്നതിന് പ്രധാനമാണ്, പ്രത്യേകിച്ച് നഗരത്തിനുള്ളിലുള്ള ഉപയോഗത്തിൽ.

വാഹനം മണിക്കൂറിൽ 30 കിലോമീറ്റർ വേഗത്തിലെത്തുന്നതുവരെ കാൽനടയാത്രക്കാർക്ക് കേൾക്കാവുന്ന മുന്നറിയിപ്പ് സിഗ്നൽ പുറപ്പെടുവിക്കുന്ന അക്കോസ്റ്റിക് വെഹിക്കിൾ അലേർട്ട് സിസ്റ്റവും (AVAS) മോഡലിൽ നിർമ്മാതാക്കൾ സജ്ജീകരിച്ചിരിക്കുന്നു.