മെയിന്റനന്‍സ് ചെലവുകളില്‍ ആശങ്കവേണ്ട; Slavia-യ്ക്ക് മെയിന്റനന്‍സ് പക്കേജ് അവതരിപ്പിച്ച് Skoda

ഇതിന് പിന്നാലെയാണ് ഇപ്പോള്‍ പ്രധാനപ്പെട്ട കുറച്ച് വിവരങ്ങള്‍ കൂടി കമ്പനി പങ്കുവെച്ചിരിക്കുന്നത്. സ്‌കോഡ വാഹനങ്ങള്‍ എടുത്താല്‍, അല്ലെങ്കില്‍ എടുക്കാന്‍ ആളുകള്‍ ആശങ്കപ്പെടുന്നതിന് പിന്നിലെ പ്രധാന കാരണങ്ങളില്‍ ഒന്ന് വാഹനം എടുത്തുകഴിഞ്ഞാല്‍ ഉള്ള മെയിന്റനന്‍സ് ചെലവുകള്‍ സംബന്ധിച്ച ആശങ്കകളാണ്.

എന്നാല്‍ വരാനിരിക്കുന്ന വാഹനത്തെകുറിച്ച് അത്തരത്തില്‍ ഒരു ആശങ്കയും വേണ്ടെന്നാണ് കമ്പനി പറയുന്നത്. സ്ലാവിയായുടെ മെയിന്റനന്‍സ് പാക്കേജ് സംബന്ധിച്ച വിവരങ്ങളാണ് കമ്പനി ഇപ്പോള്‍ പങ്കുവെച്ചിരിക്കുന്നത്.

പുതിയ സ്ലാവിയ സെഡാന് 24,999 രൂപ വിലയുള്ള നാല് വര്‍ഷത്തെ മെയിന്റനന്‍സ് പാക്കേജ് അവതരിപ്പിക്കുമെന്നാണ് സ്‌കോഡ പ്രഖ്യാപിച്ചിരിക്കുന്നത്. സ്‌പെയര്‍ പാര്‍ട്സുകളുടെ വില, എഞ്ചിന്‍ ഓയിലിന്റെ വില, ലേബര്‍ ചെലവ് എന്നിവ ഉള്‍പ്പെടുന്ന പാക്കേജിനൊപ്പം ഉടമസ്ഥാവകാശത്തിന്റെ മൊത്തത്തിലുള്ള ചെലവ് കിലോമീറ്ററിന് വെറും 0.46 പൈസയായിരിക്കുമെന്നും നിര്‍മാതാവ് വ്യക്തമാക്കി.

സ്‌കോഡ ആദ്യം സ്ലാവിയ 1.0 ലിറ്റര്‍ TSI പതിപ്പ് 2022 ഫെബ്രുവരി 28-ന് അവതരിപ്പിക്കും, അതേസമയം 1.5 ലിറ്റര്‍ TSI പതിപ്പ് ഈ വര്‍ഷം മാര്‍ച്ച് 3-ന് വില്‍പ്പനയ്ക്കെത്തുമെന്നാണ് അറിയിച്ചിരിക്കുന്നത്. രണ്ട് പതിപ്പുകള്‍ക്കുമായി ടെസ്റ്റ് ഡ്രൈവുകളും ഡെലിവറികളും അതത് തീയതികളില്‍ ആരംഭിക്കും.

ഇന്ത്യ 2.0 സ്ട്രാറ്റജിക്ക് കീഴിലുള്ള വാഹന നിര്‍മാതാക്കളുടെ രണ്ടാമത്തെ ഓഫറാണ് സ്ലാവിയ, ഇത് MQB A0 IN പ്ലാറ്റ്ഫോമിനെ അടിസ്ഥാനമാക്കിയുള്ളതാണ്. എഞ്ചിന്‍, ട്രാന്‍സ്മിഷന്‍ ചോയ്സുകള്‍, കൂടാതെ ഫീച്ചറുകള്‍ എന്നിവ കുഷാക്കുമായി പങ്കിടുകയും ചെയ്യും.

സ്ലാവിയയുടെ സീരീസ് നിര്‍മ്മാണം സ്‌കോഡ ഓട്ടോ ഇന്ത്യ ഇതിനകം തന്നെ ആരംഭിച്ചിട്ടുണ്ട്. സ്‌കോഡ ഓട്ടോ ഫോക്‌സ്‌വാഗണ്‍ ഇന്ത്യയുടെ മഹാരാഷ്ട്രയിലെ ചകനിലുള്ള പ്ലാന്റില്‍ ഇത് നിര്‍മ്മിക്കും, കൂടാതെ 95 ശതമാനം പ്രാദേശികവല്‍ക്കരണത്തോടെയാണ് കാര്‍ വരുന്നതെന്നാണ് കമ്പനി അവകാശപ്പെടുന്നത്.

ഇന്ത്യന്‍ വിപണിയില്‍ ശ്രദ്ധ കേന്ദ്രീകരിച്ചാണ് സ്ലാവിയ വികസിപ്പിച്ചതെന്ന് സ്‌കോഡ പറയുന്നു. ആക്റ്റീവ്, ആംബിഷന്‍, സ്‌റ്റൈല്‍ എന്നീ മൂന്ന് വേരിയന്റുകളില്‍ സ്ലാവിയ വാഗ്ദാനം ചെയ്യും, കൂടാതെ രണ്ട് എഞ്ചിന്‍ ഓപ്ഷനുകളിലാണ് ഇത് വരുന്നത് - 1.0 ലിറ്റര്‍ TSI ത്രീ സിലിണ്ടര്‍ എഞ്ചിനും 1.5 ലിറ്റര്‍ നാല് സിലിണ്ടര്‍ TSI യൂണിറ്റും.

ആദ്യത്തേത് 113 bhp കരുത്തും 175 Nm പീക്ക് ടോര്‍ക്കും സൃഷ്ടിക്കുന്നു, കൂടാതെ ഇത് 6-സ്പീഡ് മാനുവല്‍ ഗിയര്‍ബോക്‌സും ഓപ്ഷണല്‍ 6-സ്പീഡ് ഓട്ടോമാറ്റിക് ടോര്‍ക്ക് കണ്‍വെര്‍ട്ടറുമായി ജോടിയാക്കുകയും ചെയ്തിട്ടുണ്ട്.

വലിയ 1.5-ലിറ്റര്‍ മോട്ടോര്‍ 148 bhp കരുത്തും 250 Nm പീക്ക് ടോര്‍ക്കും ഉത്പാദിപ്പിക്കുന്നു, കൂടാതെ 6-സ്പീഡ് മാനുവല്‍ ഗിയര്‍ബോക്‌സും 7-സ്പീഡ് DSG ഓട്ടോമാറ്റിക് യൂണിറ്റും ഉള്‍ക്കൊള്ളുന്നു. 1.0-ലിറ്റര്‍ മൂന്ന് വേരിയന്റുകളിലും വാഗ്ദാനം ചെയ്യുമെന്ന് പ്രതീക്ഷിക്കുന്നു, അതേസമയം 1.5 TSI സ്‌റ്റൈല്‍ ട്രിമ്മില്‍ മാത്രമേ കമ്പനി വാഗ്ദാനം ചെയ്യുകയുള്ളൂ.

സെഗ്മെന്റില്‍ ഹോണ്ട സിറ്റി, ഹ്യുണ്ടായി വെര്‍ണ, മാരുതി സിയാസ് തുടങ്ങിയ കാറുകളോടാണ് സ്‌കോഡ സ്ലാവിയ മത്സരിക്കുക. റാപ്പിഡിന് പകരക്കാരനായിട്ടാണ് സ്ലാവിയ എത്തുന്നതെന്നാണ് കമ്പനി പറയുന്നത്. എന്നാല്‍ അളവുകളിലും, ഫീച്ചറുകളിലും റാപ്പിഡിനെക്കാള്‍ ഒരുപിടി മുന്നിലാണ് സ്ലാവിയ എന്ന് വേണം പറയാന്‍.

ഡിസൈനിന്റെ കാര്യത്തില്‍, സ്‌കോഡയുടെ മറ്റ് കാറുകളില്‍ നിന്ന് വളരെ വ്യത്യസ്തമല്ലാത്ത ഒരു ഡിസൈന്‍ ഭാഷ്യം തന്നെയാണ് സ്ലാവിയയ്ക്ക് ലഭിക്കുന്നത്. ഇതിന് ബോഡിയിലുടനീളം നിരവധി ഷാര്‍പ്പായിട്ടുള്ള ലൈനുകളും ക്രീസുകളും കാണാന്‍ സാധിക്കും.

മുന്‍വശത്ത് സ്‌കോഡയുടെ സിഗ്‌നേച്ചര്‍ ബട്ടര്‍ഫ്‌ലൈ ഗ്രില്‍ ലഭിക്കുന്നു. സ്‌കോഡ കുഷാക്ക് എസ്‌യുവിയില്‍ നമ്മള്‍ കണ്ടതിന് സമാനമായ ക്രോം ഔട്ട്ലൈനുകള്‍ ഉണ്ട്. സ്‌കോഡ സ്ലാവിയയ്ക്ക് ഭംഗിയുള്ള അലോയ് വീലുകളും എല്ലാ എല്‍ഇഡി ഹെഡ്‌ലാമ്പുകളും ടെയില്‍ ലാമ്പുകളും മറ്റ് സവിശേഷതകളും ലഭിക്കുന്നു.

സ്‌കോഡ കുഷാക്കിന്റെയും ഫോക്‌സ്‌വാഗണ്‍ ടൈഗൂണിന്റെയും അതേ പ്ലാറ്റ്ഫോമിലാണ് സ്‌കോഡ സ്ലാവിയ നിര്‍മ്മിച്ചിരിക്കുന്നത്. അകത്ത്, കാറിന് നിരവധി സവിശേഷതകളുള്ള പ്രീമിയം ലുക്ക് ക്യാബിന്‍ ലഭിക്കുന്നു.

ഡാഷ്ബോര്‍ഡില്‍ ഗ്ലോസ് ബ്ലാക്ക് എലമെന്റ്, ഫ്രണ്ട് യാത്രക്കാര്‍ക്കുള്ള വെന്റിലേറ്റഡ് സീറ്റുകള്‍, ഡ്യുവല്‍ ടോണ്‍ ലെതര്‍ അപ്ഹോള്‍സ്റ്ററി, ട്വിന്‍ സ്പോക്ക് സ്റ്റിയറിംഗ് വീല്‍, മള്‍ട്ടി-ഫംഗ്ഷന്‍ സ്റ്റിയറിംഗ് വീല്‍, ക്രൂയിസ് കണ്‍ട്രോള്‍, ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സ്‌ക്രീന്‍, ഓട്ടോമാറ്റിക് ക്ലൈമറ്റ് കണ്‍ട്രോളിനുള്ള ഗ്രോവുകളുള്ള ടച്ച് പാനലുകള്‍ തുടങ്ങിയവയുണ്ട്.

പിന്‍ എസി വെന്റുകള്‍, ഫോണിനുള്ള വയര്‍ലെസ് ചാര്‍ജിംഗ് സിസ്റ്റം, പൂര്‍ണമായും ഡിജിറ്റല്‍ ഇന്‍സ്ട്രുമെന്റ് ക്ലസ്റ്റര്‍, ഓട്ടോ സ്റ്റാര്‍ട്ട്-സ്റ്റോപ്പ്, ഇലക്ട്രിക് സണ്‍റൂഫ് തുടങ്ങിയവയും കാര്‍ വാഗ്ദാനം ചെയ്യുന്നു.