പുത്തൻ Blackbird മിഡ് സൈസ് എസ്‌യുവിക്ക് കൂപ്പെ ശൈലി നൽകാനൊരുങ്ങി Tata

CY 2021 -ൽ നെക്‌സോൺ കോംപാക്ട് എസ്‌യുവിയാണ് കമ്പനിയുടെ ഏറ്റവും കൂടുതൽ വിൽപ്പന കരസ്ഥമാക്കിയത്, കൂടാതെ മൊത്തത്തിലുള്ള വിൽപ്പന പട്ടികയിൽ പത്താം സ്ഥാനത്തും വാഹനം എത്തി. നെക്സോൺ കൂടാതെ, നെക്‌സോൺ ഇവി, ഹാരിയർ, സഫാരി എന്നിവയും മികച്ച പ്രകടനം കാഴ്ചവയ്ക്കുന്നു.

നിലവിൽ രാജ്യത്ത് ഏറ്റവും കൂടുതൽ വിറ്റഴിക്കപ്പെടുന്ന പാസഞ്ചർ ഇലക്ട്രിക് വാഹനമാണ് നെക്‌സോൺ ഇവി. തങ്ങളുടെ എസ്‌യുവി റേഞ്ച് കൂടുതൽ ഏകീകരിക്കുന്നതിന്, ആഭ്യന്തര നിർമ്മാതാക്കൾ ബ്ലാക്ക്‌ബേർഡ് എന്ന് അറിയപ്പെടുന്ന ഒരു പുതിയ മിഡ് സൈസ് എസ്‌യുവി കൊണ്ടുവരുമെന്ന് റിപ്പോർട്ട് ചെയ്യുന്നു.

ഇത് 2018 -ൽ വിഭാവനം ചെയ്ത ഒരു കൺസെപ്റ്റാണ്. പ്രൊഡക്ഷന് പച്ചക്കൊടി കാണിക്കുന്നതിന് മുമ്പ് പദ്ധതി നിർത്തിവച്ചു, എന്നാൽ ഇപ്പോൾ ഇത് നെക്‌സോണിന്റെ രൂപഭാവം അടിസ്ഥാനമാക്കിയുള്ളതായിരിക്കും.

ഹ്യുണ്ടായി ക്രെറ്റ, കിയ സെൽറ്റോസ്, എംജി ആസ്റ്റർ, ഫോക്‌സ്‌വാഗണ്‍ ടൈഗൂൺ, സ്കോഡ കുഷാഖ്, നിസാൻ കിക്ക്‌സ്, റെനോ ഡസ്റ്റർ, മാരുതി സുസുക്കി, ടൊയോട്ട എന്നിവയിൽ നിന്ന് വരാനിരിക്കുന്ന മിഡ് സൈസ് എസ്‌യുവികൾ എന്നിവയ്‌ക്കെതിരെയാണ് വരാനിരിക്കുന്ന അഞ്ച് സീറ്റർ എസ്‌യുവി മത്സരിക്കുക.

എല്ലാ ബ്രാൻഡുകൾക്കും ഈ സെഗ്‌മെന്റിന് വളരെയധികം പ്രാധാന്യമുണ്ട്, കൂടാതെ 2021 -ൽ പാസഞ്ചർ വാഹന ബിസിനസ് യൂണിറ്റ് ആരംഭിച്ചതിന് ശേഷം ഏറ്റവും ഉയർന്ന വാർഷിക വരുമാനം രേഖപ്പെടുത്തിയ ടാറ്റ, അവസരം നഷ്‌ടപ്പെടുത്താൻ ആഗ്രഹിക്കുന്നില്ല.

ഇത് ഇൻഡിക്ക വിസ്റ്റയിൽ നിന്ന് ഉരുത്തിരിഞ്ഞ X1 പ്ലാറ്റ്‌ഫോമിനെ അടിസ്ഥാനമാക്കിയുള്ളതാണ്, പ്രത്യക്ഷമായ പരിഷ്‌ക്കരണങ്ങളോടെ, ഏകദേശം 4.3 m നീളവും നെക്‌സോണേക്കാൾ 50 mm നീളമുള്ള വീൽബേസും ഇതിന് ഉണ്ടായിരിക്കും.

B പില്ലറുകൾക്ക് പിന്നിൽ ധാരാളം മാറ്റങ്ങളുള്ള ഒരു എസ്‌യുവി കൂപ്പെ സ്‌റ്റൈലിംഗ് ഇതിന് ഉണ്ടായിരിക്കും, കൂടാതെ സ്‌റ്റൈലിംഗിന്റെ അടിസ്ഥാനത്തിൽ ഇത് നെക്‌സോണിൽ നിന്ന് വ്യത്യസ്തമായിരിക്കും.

പ്രകടനത്തെ സംബന്ധിച്ചിടത്തോളം, ടാറ്റ നെക്സോൺ കൂപ്പെ/ ബ്ലാക്ക്ബേർഡ്, നിലവിലുള്ള 1.2 ലിറ്റർ ടർബോ റെവൊട്രോൺ യൂണിറ്റിൽ നിന്ന് ഉരുത്തിരിഞ്ഞ 1.5 ലിറ്റർ ഫോർ സിലിണ്ടർ പെട്രോൾ എഞ്ചിൻ ഉപയോഗിക്കും, 160 bhp ശ്രേണിയിലാവും പവർ കണക്കുകൾ.

നിലവിലുള്ള 1.5 ലിറ്റർ ഫോർ സിലിണ്ടർ ടർബോചാർജ്ഡ് റെവോടോർക്ക് ഡീസൽ എഞ്ചിൻ കൂടുതൽ കരുത്തും torque ഉം ഉൽപ്പാദിപ്പിക്കുന്നതിനായി നവീകരിക്കും.

മാനുവൽ, ഓട്ടോമാറ്റിക് ട്രാൻസ്മിഷൻ വാഹനത്തിൽ നിർമ്മാതാക്കൾ വാഗ്ദാനം ചെയ്യുമെന്ന് പ്രതീക്ഷിക്കുന്നു. നെക്‌സോൺ കൂപ്പെയുടെ ഒരു ഇലക്ട്രിക് പതിപ്പും വിപണിയിൽ എത്താൻ സാധ്യതയാണ്.

കൂടാതെ നെക്‌സോൺ ഇവിയുമായി താരതമ്യപ്പെടുത്തുമ്പോൾ ഉയർന്ന ഡ്രൈവിംഗ് റേഞ്ച് പ്രാപ്‌തമാക്കുന്ന വലിയ ബാറ്ററി പായ്ക്കിനൊപ്പം ഇത് വരാം. ഇലക്‌ട്രിക് വേരിയന്റിന്റെ വരവിന് മുമ്പ് ടാറ്റ മിഡ്‌ സൈസ് എസ്‌യുവിയുടെ ലോഞ്ച് 2023 -ൽ പ്രതീക്ഷിക്കാം.