കാറുകള്‍ ലക്ഷം രൂപ വരെ സബ്‌സിഡി; ഇലക്ട്രിക് വാഹന നയം പ്രഖ്യാപിച്ച് ഈ ഇന്ത്യന്‍ സംസ്ഥാനം

ഈ നിരക്കുകള്‍ ഒഴിവാക്കും

ഇ-വാഹന നയത്തിന് കീഴില്‍ യുപി സര്‍ക്കാര്‍ വമ്പന്‍ പ്രഖ്യാപനങ്ങളാണ് നടത്തിയത്. എല്ലാത്തരം ഇലക്ട്രിക് വാഹനങ്ങള്‍ക്കും രജിസ്‌ട്രേഷനിലും റോഡ് നികുതിയിലും 100% ഇളവ് നല്‍കുന്നു. ഇലക്ട്രിക് വാഹന നയം ആരംഭിച്ചതിന് ശേഷം മൂന്ന് വര്‍ഷത്തേക്ക് ഈ ആനുകൂല്യങ്ങള്‍ ലഭ്യമായിരിക്കും. ഇത് മാത്രമല്ല, യുപിയില്‍ നിര്‍മ്മിക്കുന്ന ഇലക്ട്രിക് വാഹനങ്ങള്‍ക്ക് നാലാമത്തെയും അഞ്ചാമത്തെയും വര്‍ഷത്തേക്ക് ഈ ഇളവ് ലഭിക്കും.

എത്ര സബ്സിഡി ലഭിക്കും?

യുപിയില്‍ ഒരു ഇലക്ട്രിക് ഇരുചക്ര വാഹനം വാങ്ങുമ്പോള്‍ വാഹനത്തിന്റെ എക്സ്ഷോറൂം വിലയില്‍ 15 ശതമാനം സബ്സിഡി ലഭിക്കും. ഇത് ഒരു വാഹനത്തിന് പരമാവധി 5,000 രൂപ വരെ കിട്ടും. 2 ലക്ഷം ഇരുചക്ര വാഹനങ്ങള്‍ വില്‍ക്കുന്നത് വരെ ഈ ആനുകൂല്യം ബാധകമായിരിക്കും.

അതേസമയം, ഇലക്ട്രിക് കാറുകള്‍ക്ക് പരമാവധി ഒരു ലക്ഷം രൂപ സബ്സിഡി നല്‍കും. ഇത് 25,000 കാറുകള്‍ വില്‍ക്കുന്നത് വരെയായിരിക്കും ബാധകമായിരിക്കുക. ഇലക്ട്രിക് ത്രീ വീലറുകള്‍ക്ക് 12,000 രൂപ സബ്സിഡി നിശ്ചയിച്ചിട്ടുണ്ട്. ഇത് ആദ്യത്തെ 50,000 യൂണിറ്റ് മുച്ചക്ര വാഹനങ്ങള്‍ വില്‍ക്കുന്നത് വരെ ബാധകമായിരിക്കും.

യുപി ഇലക്ട്രിക് വാഹന നയപ്രകാരം ഇലക്ട്രിക് ബസുകള്‍ക്കും സബ്സിഡി നല്‍കുന്നുണ്ട്. ഇലക്ട്രിക് ബസുകള്‍ക്ക് 20 ലക്ഷം രൂപ വരെ സബ്സിഡി നല്‍കും. ഇത് ആദ്യത്തെ 400 ഇലക്ട്രിക് ബസുകളുടെ വില്‍പ്പനയ്ക്ക് മാത്രമായി പരിമിതപ്പെടുത്തും.

ചാര്‍ജിംഗ് സ്റ്റേഷനുകള്‍ക്കും സബ്സിഡി

ഉത്തര്‍പ്രദേശില്‍ ഇലക്ട്രിക് വാഹനങ്ങള്‍ക്കായുള്ള അടിസ്ഥാന സൗകര്യങ്ങള്‍ വികസിപ്പിക്കുന്നതിനും ഇലക്ട്രിക് വാഹന നയത്തിലൂടെ ലക്ഷ്യം വെക്കുന്നുണ്ട്. സംസ്ഥാനത്ത് ആദ്യത്തെ 2,000 ചാര്‍ജിംഗ് സ്റ്റേഷനുകള്‍, ബാറ്ററി സ്വാപ്പിംഗ് സ്റ്റേഷനുകള്‍, ഇലക്ട്രിക് വാഹനങ്ങള്‍ക്കായി ചാര്‍ജിംഗ് പോയിന്റുകള്‍ എന്നിവ സ്ഥാപിക്കുന്ന കമ്പനികള്‍ക്ക് മൂലധന നിക്ഷേപത്തില്‍ 10 ലക്ഷം രൂപ സബ്സിഡി നല്‍കും. 1,000 ബാറ്ററി സ്വാപ്പിംഗ് സ്റ്റേഷനുകള്‍ക്ക് സംസ്ഥാന സര്‍ക്കാര്‍ 5 ലക്ഷം രൂപ മൂലധന സബ്സിഡി നല്‍കുന്നു.

പരിസ്ഥിതി സൗഹൃദ വാഹനങ്ങള്‍ പ്രോത്സാഹിപ്പിക്കുന്നതിനൊപ്പം തന്നെ യുപിയെ ഇലക്ട്രിക് വാഹനങ്ങളുടെ ആഗോള ഉല്‍പ്പാദന കേന്ദ്രമായി വികസിപ്പിക്കുക എന്നതും ഇലക്ട്രിക് വാഹന നയത്തിന്റെ പ്രധാന ലക്ഷ്യമെന്നാണ് സംസ്ഥാന സര്‍ക്കാര്‍ വ്യക്തമാക്കുന്നത്. സംസ്ഥാനത്തേക്ക് 30,000 കോടി രൂപയുടെ നിക്ഷേപം കൊണ്ടുവരാനും 10 ലക്ഷത്തിലധികം പേര്‍ക്ക് നേരിട്ടും അല്ലാതെയും തൊഴില്‍ ലഭിക്കാനുമാണ് ഇലക്ട്രിക് വാഹന നയത്തിലൂടെ സര്‍ക്കാര്‍ ലക്ഷ്യമിടുന്നത്.

ഇലക്ട്രിക് വാഹനങ്ങള്‍ പ്രോത്സാഹിപ്പിക്കുക വഴി മലിനീകരണം കുറക്കാനാണ് സര്‍ക്കാര്‍ ലക്ഷ്യമിടുന്നത്. ചാര്‍ജിംഗ് സ്റ്റേഷനുകളും ബാറ്ററി സ്വാപ്പ് സ്റ്റേഷനുകളും സ്ഥാപിക്കുന്നതിന് വിവിധ സംസ്ഥാനങ്ങളും സബ്സിഡി നല്‍കിയിട്ടുണ്ട്. ഇലക്ട്രിക് വാഹനങ്ങളുടെ വിഭാഗത്തില്‍ ഇരുചക്ര വാഹനങ്ങള്‍, കാറുകള്‍, മുച്ചക്ര വാഹനങ്ങള്‍, ബസുകള്‍ എന്നിവ ഉള്‍പ്പെടുന്നു. ഇ-വാഹന നയം ഒരു നിശ്ചിത സമയത്തേക്ക് പ്രാബല്യത്തിലുണ്ട്. അത് പൂര്‍ത്തിയാക്കിയ ശേഷം നയം തുടരുകയോ റദ്ദാക്കുകയോ ചെയ്യും.

ഇന്ത്യയില്‍ ഇലക്ട്രിക് വാഹന വിപണി വളര്‍ച്ചയുടെ പാതയിലാണ്. ഇതിനായി ചാര്‍ജിംഗ് സ്റ്റേഷനുകളുടെ ഒരു ശൃംഖല വികസിപ്പിക്കുകയാണ്. ഗതാഗത മന്ത്രാലയത്തിന്റെ വാഹന പോര്‍ട്ടല്‍ പ്രകാരം രാജ്യത്ത് 13 ലക്ഷത്തിലധികം ഇലക്ട്രിക് വാഹനങ്ങള്‍ രജിസ്റ്റര്‍ ചെയ്തിട്ടുണ്ട്. വിവിധ സംസ്ഥാനങ്ങളിലായി 2500-ലധികം ചാര്‍ജിംഗ് സ്റ്റേഷനുകളാണ് നിലവില്‍ പ്രവര്‍ത്തിക്കുന്നത്.