ഇത്രേയുള്ളൂ മാറ്റങ്ങളൊക്കെ! ജിംനി ത്രീ ഡോർ vs ഫൈവ് ഡോർ; അകത്തും പുറത്തും കമ്പനി ചെയ്തിരിക്കുന്നത് ഇവയൊക്കെ

മാരുതി സുസുക്കിയിൽ നിന്നുള്ള ഏറ്റവും പുതിയ ലൈഫ്‌സ്‌റ്റൈൽ ഓഫ് റോഡ് മോഡലാണ് ജിംനി, ഇന്ത്യയിൽ ഒരു ജനപ്രിയ ചോയിസായി മാറിയിരിക്കുകയാണ്. ഐതിഹാസികമായ ഈ എസ്‌യുവിയുടെ ഫൈവ് ഡോർ പതിപ്പ് കമ്പനി ഇന്ത്യയിൽ അവതരിപ്പിച്ചിരിക്കുകയാണ്. എന്നിരുന്നാലും, അന്താരാഷ്ട്ര വിപണികളിൽ, കമ്പനി കാലങ്ങളായി ഇതിന്റെ ത്രീ-ഡോർ പതിപ്പ് വിൽക്കുന്നു. ത്രീ ഡോർ ജിംനിയും പുതിയ ഫൈവ് ഡോർ ജിംനിയുമായി ഒന്നു താരതമ്യം ചെയ്തു നോക്കിയാലോ.

ഇരു ജിംനികളും തമ്മിലുള്ള ഈ കംപാരിസൺ വീഡിയോ FE ബിൽഡ്‌സ് എന്ന ചാനലാണ് യൂട്യൂബിൽ പങ്കുവെച്ചിരിക്കുന്നത്. പുറത്ത് നിന്ന് നോക്കിയാൽ രണ്ട് കാറുകളും ഒരേ ഡിസൈൻ ശൈലിയോടെയാണ് വരുന്നത് എന്ന് നമുക്ക് കാണാനാവും. രണ്ടിനും ഒരേ ഫ്രണ്ട് & റിയർ പ്രൊഫൈൽ ലഭിക്കുന്നു. സൈഡ് പ്രൊഫൈലിൽ മാത്രമാണ് പ്രധാന വ്യത്യാസമെന്ന് വീഡിയോ പരാമർശിക്കുന്നു.

ജിംനി ത്രീ ഡോറിന് കുറഞ്ഞ വീൽബേസും നീളവും ലഭിക്കുന്നു എന്ന് വ്ലോഗർ തന്റെ വീഡിയോയിൽ കാണിക്കുകയും പരാമർശിക്കുകയും ചെയ്യുന്നു. ജിംനി ത്രീ ഡോറിന്റെ നീളം അവസാനിക്കുന്നത് ജിംനി ഫൈവ് ഡോറിന്റെ റിയർ ക്വാർട്ടർ ഗ്ലാസിന്റെ പകുതിയിൽ ആണ് എന്ന് അദ്ദേഹം എടുത്തുകാണിക്കുന്നു.

കൃത്യമായ അളവുകൾ പറയുകയാണെങ്കിൽ, ജിംനി ഫൈവ് ഡോർ മോഡലിന് 3,985 mm നീളമുണ്ട്, അതേസമയം ജിംനി ത്രീ ഡോർ മോഡലിന്റെ നീളം 3,645 mm ആണ്. ഇരു മോഡലുകളുടെയും നീളത്തിൽ 340 mm -ന്റെ ഗണ്യമായ വ്യത്യാസമുണ്ട്. ഇതുകൂടാതെ, രണ്ട് കാറുകളും ഒരേ ഉയരവും വീതിയുമായി വരുന്നു.

ഇവ യഥാക്രമം 1,720 മില്ലീമീറ്ററും (mm) 1,645 മില്ലീമീറ്ററുമാണ്. അതോടൊപ്പം രണ്ട് കാറുകൾക്കും 210 mm എന്ന ഒരേ ഗ്രൗണ്ട് ക്ലിയറൻസുമാണ് ലഭിക്കുന്നത്. എന്നിരുന്നാലും, ഇവ തമ്മിലുള്ള മറ്റൊരു പ്രധാന വ്യത്യാസം രണ്ട് മോഡലുകളുടെയും വീൽബേസിന്റെ കാര്യത്തിലാണ്. ഫൈവ് ഡോർ ജിംനി 2,590 mm വീൽബേസ് വാഗ്ദാനം ചെയ്യുന്നു. അതേസമയം, ത്രീ ഡോർ ജിംനി 2,250 mm വീൽബേസുമായി വരുന്നു. രണ്ടും തമ്മിലുള്ള വ്യത്യാസം വീണ്ടും 340 mm ആണ്.

അടുത്തതായി, ഇരു മോഡലുകളുടേയും ഇന്റീരിയറുകൾ തമ്മിൽ ഒന്നു മാറ്റുരയ്ക്കാം. ആദ്യം, അവൻ വാഹനത്തിന്റെ പിന്നിൽ നിന്ന് ആരംഭിക്കുമ്പോൾ, അധിക ലഗേജ് സ്പെയ്സ് നൽകുന്നതിനായി ജിംനി ഫൈവ് ഡോർ പിൻ സീറ്റുകൾ മടക്കാനാവും എന്ന് വീഡിയോ കാണിക്കുന്നു. ത്രീ ഡോർ മോഡലിൽ നിന്ന് വ്യത്യസ്തമായി, ഈ സീറ്റുകൾ പൂർണ്ണമായും ഫോൾഡ് ആവില്ലെന്നും വ്ലോഗർ കൂട്ടിച്ചേർക്കുന്നു.

ജിംനി ഫൈവ് ഡോർ 208 ലിറ്റർ റിയർ ബൂട്ട് കപ്പാസിറ്റി വാഗ്ദാനം ചെയ്യുന്നു, അതേസമയം, ജിംനി ത്രീ ഡോർ വെറും 85 ലിറ്റർ ബൂട്ട് കപ്പാസിറ്റിയാണ് നൽകുന്നത്. രണ്ടും തമ്മിലുള്ള വ്യത്യാസം 123 ലിറ്ററാണ്. അടുത്തതായി, ജിംനി ഫൈവ് ഡോർ മോഡലിൽ റിയർ റൂഫ് ലൈറ്റുകൾ അറ്റത്ത് നിന്ന് മധ്യഭാഗത്തേക്ക് മാറ്റിയതായി കാണാം.

ബൂട്ട് ഏരിയയ്ക്ക് വെട്ടം നൽകുന്നതിന് പിന്നിൽ ഇടതുവശത്ത് ഒരു ചെറിയ ലാമ്പും ഇതിന് ലഭിക്കുന്നു. ജിംനി ത്രീ ഡോറിന്റെ പൂർണ്ണമായും പരന്ന പിൻഭാഗം വ്ലോഗർ കാണിക്കുന്നു.ഇരു മോഡലുകളിലേയും റിയർ സീറ്റ് എക്സ്പീരിയൻസ് അദ്ദേഹം വ്യക്തമാക്കുന്നു, അതോടൊപ്പം ത്രീ, ഫൈവ് ഡോർ മോഡലുകളിൽ രണ്ട് സീറ്റ് അഡ്ജസ്റ്റ്മെന്റ് ലെവലുകൾ ലഭിക്കുന്നതായും കാണിക്കുന്നു.

റിയർ സീറ്റുകൾക്ക് ശേഷം, അവതാരകൻ കാറിന്റെ മുൻ വശത്തേക്ക് നീങ്ങുകയും വ്യത്യാസങ്ങളെയും മാറ്റങ്ങളേയും കുറിച്ച് സംസാരിക്കുകയും ചെയ്യുന്നു. ജിംനി ത്രീ ഡോർ, ഫൈവ് ഡോർ എന്ന രണ്ട് മോഡലുകളിലും മൊത്തത്തിലുള്ള ഇന്റീരിയർ ലേയൗട്ടും എക്യുപ്മെന്റുകളും ഒന്നുതന്നെയാണെന്ന് നമുക്ക് വീഡിയോയിൽ നിന്ന് കാണാനാവും.

ഇൻസ്ട്രുമെന്റ് ക്ലസ്റ്ററിന്റെ രണ്ട് ഡയലുകൾക്കിടയിൽ സ്ഥാപിച്ചിരിക്കുന്ന ഡിജിറ്റൽ MID സ്‌ക്രീനിനൊപ്പം വാഹനത്തിന്റെ ECU -വുമായി കണക്ട് ചെയ്തിരിക്കുന്ന 9.0 ഇഞ്ച് ടച്ച്‌സ്‌ക്രീൻ ഇൻഫോടെയിൻമെന്റ് സിസ്റ്റം മാത്രമാണ് തനിക്ക് ശ്രദ്ധിക്കാൻ കഴിയുന്ന പ്രധാന വ്യത്യാസം എന്ന് വ്ലോഗർ പരാമർശിക്കുന്നു. ആകെ മൊത്തത്തിൽ വിരലിൽ എണ്ണാവുന്ന മാറ്റങ്ങൾ മാത്രമാണ് ഇരു മോഡലുകളും തമ്മിലുള്ളത്.