ഫീച്ചേഴ്സിൻ്റെ ഒരു നീണ്ടനിര; പുത്തൻ നെക്സോൺ ഫെയ്‌സ്‌ലിഫ്റ്റിൻ്റെ പരസ്യവീഡിയോ കാണാം

ടാറ്റ തങ്ങളുടെ നെക്‌സോൺ ഫെയ്‌സ്‌ലിഫ്റ്റ് പുറത്തിറക്കിയതോടെ സബ്-കോംപാക്റ്റ് എസ്‌യുവി വിഭാഗത്തെ ടാറ്റ മോട്ടോഴ്‌സ് ഒന്ന് പിടിച്ചു കുലുക്കിയെന്നുളളത് സത്യമാണ്. 8.09 ലക്ഷം രൂപ പ്രാരംഭ വിലയിലാണ് കമ്പനി ഈ പുതിയ മോഡൽ പുറത്തിറക്കിയിരിക്കുന്നത്. ഈ പുതിയ എസ്‌യുവിയെ കൂടുതൽ ജനകീയമാക്കുന്നതിനും ഫീച്ചേഴ്സ് എടുത്ത്കാണിക്കുന്നതിനുമായി, കമ്പനി ഒരു പുതിയ ടിവിസി പുറത്തിറക്കിയിട്ടുണ്ട്. നെക്‌സോൺ ഫെയ്‌സ്‌ലിഫ്റ്റിന്റെ പുതിയ ഡിസൈനും സവിശേഷതകളുമാണ് പരസ്യത്തിൽ എടുത്തുകാട്ടുന്നത്.

ഫിയർലെസ് പർപ്പിൾ നിറത്തിലുള്ള പുതിയ ടാറ്റ നെക്‌സോൺ ഫെയ്‌സ്‌ലിഫ്റ്റിൽ മൂന്ന് സുഹൃത്തുക്കൾ ഒരു കൂട്ടം ചിത്രങ്ങളും ഒരു പെട്ടി നിറയെ പേപ്പർ ക്ലിപ്പുകളും എടുക്കുന്നിടത്താണ് വീഡിയോ ആരംഭിക്കുന്നത്. ഈ പുതിയ സബ് കോംപാക്റ്റ് എസ്‌യുവിയുടെ ഏറ്റവും പുതിയതും സവിശേഷവുമായ കളർ ഓപ്ഷനുകളിലൊന്നാണിത്. സിംഗിൾ ഡോർ ഇലക്ട്രിക് സൺറൂഫ് ബട്ടണിന്റെ വശത്തുള്ള കാറിന്റെ പുതിയ SOS ബട്ടൺ ഫീച്ചറും പരസ്യത്തിൽ കാണിക്കുന്നുണ്ട്. കാറിന് പുതുതായി അവതരിപ്പിച്ച ടച്ച് സ്ക്രീനും ഫീച്ചേഴ്സും വീഡിയോയിൽ കാണാൻ സാധിക്കും.

ടാറ്റ നെക്‌സോൺ ഫെയ്‌സ്‌ലിഫ്റ്റിന്റെ ഡിസൈൻ കർവ് കൺസെപ്റ്റ് കാറിൽ നിന്നും കടമെടുത്തതാണ്. മുൻവശത്ത് ഇപ്പോൾ സ്‌ലീക്കർ എൽഇഡി ഡിആർഎല്ലുകളും ലംബമായി ക്രമീകരിച്ച എൽഇഡി ഹെഡ്‌ലൈറ്റുകളും പുത്തൻ ബമ്പറുമെല്ലാം സ്‌പോർട്ടി അപ്പീലാണ് എസ്‌യുവിയിലേക്ക് കൊണ്ടുവന്നിരിക്കുന്നത്. എൽഇഡി ഡേടൈം റണ്ണിംഗ് ലാമ്പ് ഇപ്പോൾ മുകളിലായി ഇടംപിടിച്ചപ്പോൾ പ്രധാന ഹെഡ്‌ലാമ്പ് യൂണിറ്റ് ബമ്പറിന് താഴെയാണ് സ്ഥാപിച്ചിരിക്കുന്നത്.

ഇലക്ട്രിക് വാഹനങ്ങളിൽ ഉപയോഗിക്കുന്ന എയ്‌റോ വീലുകളോട് സാമ്യമുള്ള പുതിയ അലോയ് വീലുകളാണ് പുതിയ നെക്സോൺ ഫെയ്‌സ്‌ലിഫ്റ്റിലേക്ക് ചേക്കേറിയെത്തിയിരിക്കുന്നത്. ഇതിനു പുറമെ വശക്കാഴ്ച്ച മുൻഗാമിക്ക് സമാനമായി തന്നെ കാണാനാവും. പിൻവശത്തേക്ക് നോക്കിയാൽ ലൈറ്റിംഗ് വിഭാഗത്തിന്റെ കാര്യത്തിൽ വലിയ മാറ്റമുണ്ട്. പണ്ട് പലരും വിമർശിച്ച റിയർ സ്റ്റൈലിംഗ് കുറച്ചുകൂടി മികവുറ്റതാക്കാൻ ടാറ്റ മോട്ടോർസ് ശ്രമിച്ചിട്ടുണ്ട്.

സ്ലീക്കർ ടെയിൽ ലാമ്പുകൾ, റിയർ ബമ്പറിൽ ലംബമായി സ്ഥാപിച്ചിരിക്കുന്ന റിവേഴ്‌സിംഗ് ലൈറ്റുകൾ എന്നിവയെല്ലാം പുതുരൂപം ആവാഹിക്കാൻ സഹായിച്ചിട്ടുണ്ട്. പഴയ നെക്‌സോണുമായി താരതമ്യപ്പെടുത്തുമ്പോൾ ഇന്റീരിയറും വലിയ പരിഷ്ക്കാരങ്ങളാണ് കൊണ്ടുവന്നിരിക്കുന്നത്. അകത്തേക്ക് കയറിയാൽ ഏതോ ഒരു പുതിയ എസ്‌യുവിയല്ലേ ഇതെന്ന് വരെ തോന്നിപോയേക്കാം. ഇലുമിനേറ്റഡ് ഫീച്ചറുള്ള ടൂ-സ്പോക്ക് മൾട്ടി-ഫംഗ്ഷൻ സ്റ്റിയറിംഗ് വീലാണ് ഫെയ്‌സ്‌ലിഫ്റ്റിന്റെ അകത്തളത്തെ വേറിട്ടുനിർത്തുന്നത്.

ഒരു പുതിയ വലിയ ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റവും ഹർമനിൽ നിന്നുള്ള മ്യൂസിക് സിസ്റ്റവും ഡിജിറ്റൽ ഡ്രൈവർ ഡിസ്‌പ്ലേയും എല്ലാം യാത്രകൾക്ക് ആഡംബരമേകുകയും ചെയ്യും. 360-ഡിഗ്രി പാർക്കിംഗ് ക്യാമറ, ഉയരം ക്രമീകരിക്കാവുന്ന ഡ്രൈവർ, കോ-ഡ്രൈവർ സീറ്റുകൾ, iRA കണക്റ്റഡ് കാർ സാങ്കേതികവിദ്യ, എയർ പ്യൂരിഫയർ, റിയർ എസി വെന്റുകൾ, വെന്റിലേറ്റഡ് സീറ്റുകൾ, ഓട്ടോമാറ്റിക് ക്ലൈമറ്റ് കൺട്രോൾ എന്നിവയും അതിലേറെയും ഫീച്ചറുകളുടെ അകമ്പടിയും വണ്ടിയിലുണ്ട്.

ഓഡിയോ, ക്രൂയിസ് നിയന്ത്രണങ്ങൾക്കായി ടോഗിളുകളാണ് നൽകിയിരിക്കുന്നത്. കോംപാക്‌ട് എസ്‌യുവി സെഗ്മെന്റിൽ ആദ്യമായി ഫ്യൂച്ചറിസ്റ്റിക് ടച്ച്-സെൻസിറ്റീവ് പാനൽ ഫീച്ചർ ചെയ്യുന്ന HVAC പാനലിലും സമാനമായ ടോഗിളുകൾ കാണാൻ കഴിയുമെന്നതും ശ്രദ്ധേയം. ടോപ്പ് വേരിയന്റുകളിലെ പർപ്പിൾ അപ്‌ഹോൾസ്റ്ററിയും പുതിയ ടാറ്റ നെക്സോൺ ഫെയ്‌സ്‌ലിഫ്റ്റിന്റെ പ്രീമിയം ഫീൽ ഉയർത്തും. ഫിയർലെസ് ട്രിമ്മിൽ മാത്രമാണ് കമ്പനി ഇത് വാഗ്‌ദാനം ചെയ്യുന്നത്.

1.2 ലിറ്റർ ടർബോ പെട്രോൾ എഞ്ചിനും 1.5 ലിറ്റർ ഡീസൽ എഞ്ചിനുമാണ് പുതിയ നെക്‌സോണിന്റെ ഹൃദയം. പെട്രോൾ എഞ്ചിൻ 118 bhp കരുത്തിൽ 170 Nm torque ഉത്പാദിപ്പിക്കുമ്പോൾ ഡീസൽ എഞ്ചിൻ പരമാവധി 113 bhp പവറിൽ 260 Nm torque വരെ നൽകും. പെട്രോൾ എഞ്ചിൻ മൂന്ന് ഗിയർബോക്‌സ് ഓപ്ഷനുകളിൽ വാഗ്ദാനം ചെയ്യും. 5-സ്പീഡ് മാനുവൽ, 6-സ്പീഡ് മാനുവൽ, പുതിയ 7-സ്പീഡ് ഡ്യുവൽ-ക്ലച്ച് ഓട്ടോമാറ്റിക് ട്രാൻസ്മിഷൻ എന്നിവയാണവ.

അതേസമയം നെക്സോൺ ഫെയ്‌സ്‌ലിഫ്റ്റിലെ ഡീസൽ എഞ്ചിനിൽ 6 സ്പീഡ് മാനുവൽ ഗിയർബോക്സും 6 സ്പീഡ് എഎംടിയും ട്രാൻസ്മിഷനുമാവും ഉണ്ടാവുക. ഇന്ത്യയിലെ ഹോട്ട്-സെല്ലിംഗ് കോംപാക്‌ട് എസ്‌യുവി സെഗ്മെന്റിൽ മാരുതി സുസുക്കി ബ്രെസയ്ക്ക് പുറമെ ഹ്യുണ്ടായി വെന്യു, കിയ സോനെറ്റ്, മഹീന്ദ്ര XUV300, നിസാൻ മാഗ്നൈറ്റ്, റെനോ കൈഗർ പോലുള്ള വമ്പൻമാരുമായാണ് പുതിയ നെക്സോണിന്റെ മത്സരം.