പവറിൽ ഗംഭീര മാറ്റങ്ങളുമായി ഫോർച്യൂണർ; 2024 -ൽ തകർത്തുവാരും

ഇന്ത്യൻ വിപണിയിലും മറ്റ് തെക്കുകിഴക്കൻ ഏഷ്യൻ വിപണികളിലും 7 സീറ്റർ എസ്‌യുവികളുടെ സെഗ്മെൻ്റിൽ ഒരു ഐക്കണായി മാറിയതും, വളരെ ജനപ്രിയമായ ടൊയോട്ട ഫോർച്യൂണർ, 2024-ലെ അപ്‌ഡേറ്റോടെ വലിയ മുന്നേറ്റം നടത്തുകയും ചെയ്യും. തായ്‌ലൻഡിൽ പുതുതായി അവതരിപ്പിച്ച, പുതിയ അപ്‌ഡേറ്റ് ഔട്ട്‌ഗോയിംഗ് മോഡലിന്റെ പവർ ഫിഗറുകളിലെ വ്യത്യാസം ഇതിനോടകം തന്നെ ജനങ്ങൾക്കിടയിൽ പ്രിയപ്പെട്ടതാക്കിയിരിക്കുകയാണ്

ടൊയോട്ട ഫോർച്യൂണറിന്റെ 2.8 ലിറ്റർ 1GD-FTV എഞ്ചിൻ ഗണ്യമായ 20 bhp പവർ കൂടി അധികം നൽകിയിരിക്കുകയാണ്. ഇപ്പോൾ ശക്തമായ 224 bhp പവർ വാഹനം നൽകുന്നു, ഒപ്പം ടോർക്കിൽ 50 Nm ന്റെ വർധനവുമുണ്ട്. അന്താരാഷ്ട്ര വിപണിയിൽ ശ്രദ്ധേയമായ 550 Nm. പവർ ബൂസ്റ്റിനപ്പുറം, ഈ വേരിയന്റിന് വയർലെസ് ആപ്പിൾ കാർപ്ലേയും ആൻഡ്രോയിഡ് ഓട്ടോയും അതിന്റെ 9 ഇഞ്ച് ഇൻഫോടെയ്ൻമെന്റ് സ്‌ക്രീനിലേക്ക് സംയോജിപ്പിച്ചിരിക്കുന്നു.

ഫോർച്യൂണറിന്റെ പുതിയ 2024 വർഷത്തെ അപ്‌ഡേറ്റിൽ ടയർ പ്രഷർ മോണിറ്ററിംഗ് സിസ്റ്റവും (TPMS) കമ്പനി ഉൾപ്പെടുത്തിയിട്ടുണ്ട്. തായ് വിപണിയിൽ LTD വേരിയന്റ് എന്ന് വിളിക്കപ്പെടുന്ന ഫോർച്യൂണർ ലെജൻഡറിന്, പവർ മാറ്റമില്ല, എന്നിട്ടും ഇൻഫോടെയ്ൻമെന്റിൽ മാറ്റം വരുത്തിയിട്ടുണ്ട്. വയർലെസ് ആപ്പിൾ കാർപ്ലേയും ആൻഡ്രോയിഡ് ഓട്ടോയും ടയർ പ്രഷർ സെൻസറുകളും വാഹനത്തിൽ ലഭിക്കുന്നു. ടൊയോട്ട സിൽവർ സ്കൈ മെറ്റാലിക് നിറത്തിന് പകരം തിളങ്ങുന്ന സിൽവർ ഷിമ്മറിംഗ് മെറ്റാലിക് ഷേഡിനൊപ്പം വാഹനത്തിൻ്റെ നിറത്തിലും പുതുമ കൊണ്ടുവന്നിരിക്കുകയാണ്.

ഇത്രയും മാറ്റങ്ങളുമായി അവതരിച്ച പുതിയ ഫോർച്യൂണർ എന്നാണ് ഇന്ത്യയിലേക്ക് വരുന്നതെന്നാണ് ഇന്ത്യൻ ആരാധകരുടെ ചോദ്യം. പുതിയ മോഡലിൽ ഹൈബ്രിഡ് അവതരിപ്പിക്കുമെന്നാണ് ലഭിക്കുന്ന സൂചനകൾ. 2024 ടൊയോട്ട ഫോർച്യൂണർ ഹൈബ്രിഡ് ഇന്ത്യൻ ഫുൾ സൈസ് എസ്‌യുവി സെഗ്‌മെന്റിൽ അതിന്റെ ആധിപത്യം നിലനിർത്താൻ ഒരുങ്ങുകയാണ് എന്ന കാര്യത്തിൽ ഒരു സംശയവുമില്ല. നിലവിൽ, ഫോർച്യൂണറിന്റെ എതിരാളി MG ഗ്ലോസ്റ്റർ മാത്രമാണ്.

കാരണം അതിന്റെ മുൻപുണ്ടായിരുന്ന എതിരാളികളായ ഫോർഡ് എൻഡവർ, മഹീന്ദ്ര ആൾട്ടുറാസ് G4 എന്നിവ ഇന്ത്യൻ വിപണിയിൽ നിന്ന് വിട്ടു പോയിരിക്കുന്നു. ടൊയോട്ട കിര്‍ലോസ്‌കര്‍ മോട്ടോര്‍സ് 2023 സെപ്റ്റംബറില്‍ മാരുതി സുസുക്കി എര്‍ട്ടിഗയുടെ റീബാഡ്ജ് പതിപ്പായ റൂമിയോണ്‍ പുറത്തിറക്കാന്‍ ഒരുങ്ങുകയാണ്. ആ മോഡലും കൂടി എത്തി കഴിയുമ്പോൾ ടൊയോട്ട എല്ലാ സെഗ്മെൻ്റിലും ആധിപത്യം പുലർത്തും.

ഇന്നോവ ഹൈക്രോസ്, ഇന്നോവ ക്രിസ്റ്റ, ഹൈറൈഡര്‍, ഫോര്‍ച്യൂണര്‍ എന്നിവ ഉള്‍പ്പെടെയുള്ള മോഡലുകള്‍ക്കും വമ്പന്‍ ഡിമാന്‍ഡാണ് അനുഭവപ്പെടുന്നത്. 2023 ജൂലൈയില്‍ ടൊയോട്ട മെത്തം 21,911 യൂണിറ്റ് വിറ്റഴിച്ചു. ആഭ്യന്തര വില്‍പ്പനയും കയറ്റുമതിയും അടക്കമുള്ള കണക്കാണിത്. ആഭ്യന്തര വില്‍പ്പന നോക്കുമ്പോള്‍ 2023 ജൂലൈയിലെ വില്‍പ്പന 20,759 യൂണിറ്റായി വര്‍ധിച്ചു. 2022 ജൂലൈയില്‍ 19,693 യൂണിറ്റുകളായിരുന്നു കമ്പനിക്ക് വില്‍ക്കാനായത്.

വളര്‍ച്ച 5.41 ശതമാനം. 1066 യൂണിറ്റ് ആണ് വോളിയം വളര്‍ച്ച. മുന്‍ മാസത്തേക്കാള്‍ 1151 യൂണിറ്റ് അധികം വില്‍ക്കാനും ഈ മാസമായി. 2023 ജൂണില്‍ ടൊയോട്ടക്ക് 19,608 യൂണിറ്റായിരുന്നു വില്‍പ്പന. പ്രതിമാസ വില്‍പ്പനയും 5.87 ശതമാനം മെച്ചപ്പെട്ടു. 2023 ജൂലൈയില്‍ മൊത്തം വില്‍പ്പന 21,911 യൂണിറ്റായിരുന്നു. ഇതില്‍ 20,759 യൂണിറ്റ് ആഭ്യന്തര വില്‍പ്പനയും 1,152 യൂണിറ്റ് കയറ്റുമതിയും ഉള്‍പ്പെടുന്നു.

2023 മേയ് മാസത്തെ 20,410 യൂണിറ്റുകളേക്കാള്‍ മികച്ച പ്രതിമാസ വില്‍പ്പനയാണ് ജൂലൈയില്‍ രേഖപ്പെടുത്തിയത്. ഈ കലണ്ടര്‍ വര്‍ഷത്തിലെ ആദ്യ 7 മാസത്തെ വില്‍പ്പന കണക്കുകളും ടൊയോട്ട പുറത്തുവിട്ടിട്ടുണ്ട്. 2023 ജനുവരി-ജൂലൈ വരെയുള്ള കാലയളവില്‍ മൊത്തം 1,24,282 യൂണിറ്റ് വാഹനങ്ങളാണ് കമ്പനി പുറത്തിറക്കിയത്. 2022 സാമ്പത്തിക വര്‍ഷത്തിലെ ഇതേ കാലയളവില്‍ 94,710 യൂണിറ്റുകളായിരുന്നു വില്‍പ്പന.

2023 സാമ്പത്തിക വര്‍ഷത്തെ വില്‍പ്പന നോക്കിയാലും വളര്‍ച്ചയാണ്. 2023 സാമ്പത്തിക വര്‍ഷത്തിന്റെ ആദ്യ പാദത്തില്‍ 77,439 യൂണിറ്റുകളാണ് കമ്പനിക്ക് വിറ്റഴിക്കാനായത്. 2022 സാമ്പത്തിക വര്‍ഷത്തില്‍ ഇതേ കാലയളവില്‍ വില്‍പ്പന 61506 യൂണിറ്റ് മാത്രമായിരുന്നു. ഗ്ലാന്‍സ, അര്‍ബന്‍ ക്രൂയിസര്‍ ഹൈറൈഡര്‍, ഇന്നോവ ക്രിസ്റ്റ, ഇന്നോവ ഹൈക്രോസ്, ഹൈലക്‌സ്, ഫോര്‍ച്യൂണര്‍, കാമ്രി, വെല്‍ഫയര്‍ എന്നീ മോഡലുകളാണ് ടൊയോട്ട വിപണിയില്‍ എത്തിക്കുന്നത്.