ഇനി പഞ്ചിനെ തോൽപ്പിക്കാനാവില്ല മക്കളേ; ആറ് എയർബാഗിൻ്റെ സുരക്ഷ ഉറപ്പിച്ച് ടാറ്റ

ടാറ്റയുടെ ഏറ്റവും ജനപ്രിയ മോഡലുകളിൽ ഒന്നാണ് പഞ്ച്. ഇന്ത്യയുടെ സ്വന്തം ക്രാഷ് ടെസ്റ്റ് പ്രോഗ്രാമായ ഭാരത് എൻസിഎപിക്ക് കീഴിൽ ടാറ്റ തങ്ങളുടെ പഞ്ചിന് ആറ് എയർബാഗുകൾ നൽകുന്നുവെന്ന് വ്യക്തമാക്കുന്ന ചിത്രങ്ങൾ പുറത്തു വന്നിരിക്കുകയാണ്. ഔദ്യോഗിക സ്ഥിരീകരണം ഇതു വരെ ലഭ്യമായിട്ടില്ല എങ്കിലും ഭാരത് എൻസിഎപി പുറത്തു വിട്ട ചിത്രങ്ങളിൽ ഇത് വ്യക്തമാക്കുന്നുണ്ട്.

ലവിൽ ടാറ്റ പഞ്ച് രണ്ട് എയർബാഗുകളാണ് നൽകുന്നത്. എല്ലാ വേരിയൻ്റുകൾക്കും ആറ് എയർബാഗുകൾ നൽകുമോ അതോ ടോപ്പ് എൻ്റിന് മാത്രമാണോ ലഭിക്കുക എന്ന കാര്യത്തിൽ സ്ഥിരീകരണം ലഭിച്ചിട്ടില്ല. എതിരാളിയായ ഹ്യുണ്ടായി എക്സ്റ്റർഡ ആറ് എയർബാഗുകൾ നൽകുമ്പോൾ എതിരാളിക്ക് ഒരു തിരിച്ചടി നൽകാൻ ടാറ്റ ആറ് എയർബാഗുകൾ നൽകുന്നു എന്നത് മത്സരം കൊഴുപ്പിക്കാൻ ഉളള എല്ലാ സാധ്യതകളും കാണുന്നുണ്ട്.

പഞ്ച് മൈക്രോ എസ്‌യുവിയുടെ ലോ സ്പെക്ക് വേരിയന്റുകളിൽ 4.0 ഇഞ്ച് ഡിജിറ്റൽ ഇൻസ്ട്രുമെന്റ് ഗേജ് ക്ലസ്റ്റർ സജ്ജീകരിക്കുന്നുവെന്ന റിപ്പോർട്ട് കഴിഞ്ഞ മാസം പുറത്തു വന്നിരുന്നു. അതിന് പിന്നാലെയാണ് ഈ എയർബാഗുകളുടെ കാര്യവും പുറത്തു വരുന്നത്. നിലവിൽ, ടാറ്റ പഞ്ച് ഇന്ത്യയിൽ പ്യുവർ, അഡ്വഞ്ചർ, അക്‌പ്ലിഷ്ഡ്, ക്രിയേറ്റീവ് എന്നിങ്ങനെ നാല് പ്രധാന വേരിയന്റുകളിൽ കമ്പനി വാഗ്ദാനം ചെയ്യുന്നു. ഈ പ്രധാന വകഭേദങ്ങൾക്കിടയിൽ തന്നെ ഒരു ടൺ കൂടുതൽ ട്രിമ്മുകൾ/ വേരിയ്റുകൾ ഉണ്ട് എന്നതും ശ്രദ്ധേയമാണ്.

വിലനിർണ്ണയത്തെ സംബന്ധിച്ചിടത്തോളം, ടാറ്റ പഞ്ചിന്റെ എക്സ്-ഷോറൂം വില 5.99 ലക്ഷം രൂപയിൽ ആരംഭിക്കുകയും ടോപ്പ് സ്പെക്ക് മോഡലിന് 10.10 ലക്ഷം രൂപ വരെ ഉയരുകയും ചെയ്യുന്നു. പവർട്രെയിനിന്റെ കാര്യത്തിൽ, പഞ്ചിന് 1.2 ലിറ്റർ ത്രീ സിലിണ്ടർ പെട്രോൾ എഞ്ചിനിലാണ് ടാറ്റ മോട്ടോർസ് വാഗ്ദാനം ചെയ്യുന്നത്. ഈ മോട്ടോർ പരമാവധി 84 bhp പവറും 113 Nm പീക്ക് torque ഉം സൃഷ്ടിക്കുന്നു.

ട്രാൻസ്മിഷൻ ചോയിസുകളെ സംബന്ധിച്ചിടത്തോളം, അഞ്ച് സ്പീഡ് മാനുവൽ അല്ലെങ്കിൽ അഞ്ച് സ്പീഡ് AMT യൂണിറ്റാണ് ഇതിൽ വരുന്നത്. കമ്പനി അടുത്തിടെ പഞ്ച് iCNG വേരിയന്റും പുറത്തിറക്കി. ഈ CNG വേരിയന്റ് ട്വിൻ സിലിണ്ടർ സാങ്കേതികവിദ്യയുമായി സജ്ജീകരിച്ചിരിക്കുന്നു, ഈ സെറ്റപ്പിൽ, വാഹനം 76 bhp പവറും 97 Nm പീക്ക് torque ഉം പുറപ്പെടുവിക്കുന്നു. നിലവിൽ ഡിമാൻഡ് ഏറി വരുന്ന CNG സെഗ്മെന്റിൽ കാര്യമായ ഒരു വിഹിതം കൈക്കലാക്കാനാണ് കമ്പനിയുടെ പ്ലാൻ.

ടാറ്റ പഞ്ചിൻ്റെ ഇവി മോഡൽ ഡിസംബർ 21 -ന് അവതരിപ്പിക്കുമെന്ന് ടാറ്റ അറിയിച്ചിട്ടുണ്ട്. ഇന്ത്യൻ വിപണിയിൽ സിട്രൺ eC3, വരാനിരിക്കുന്ന ഹ്യുണ്ടായി എക്‌സ്‌റ്റർ ഇവി എന്നിവയ്‌ക്കൊപ്പം മത്സരിക്കുന്ന ടാറ്റ ഇലക്ട്രിക് മൈക്രോ എസ്‌യുവിയുടെ അടിസ്ഥാന വേരിയന്റിന് ഏകദേശം 10 - 11 ലക്ഷം രൂപ മുതൽ ടോപ്പ് എൻഡ് വേരിയന്റിന് ഏകദേശം 12.50 ലക്ഷം രൂപ വരെ മത്സരാധിഷ്ഠിത വില നമുക്ക് പ്രതീക്ഷിക്കാം.

നെക്‌സോൺ ഇവിക്ക് സമാനമായി മീഡിയം റേഞ്ച് (MR), ലോംഗ് റേഞ്ച് (LR) എന്നീ രണ്ട് വകഭേദങ്ങളിൽ പഞ്ച് ഇവി ലഭ്യമാകും എന്ന് ഞങ്ങൾ പ്രതീക്ഷിക്കുന്നു. പവർട്രെയിൻ സജ്ജീകരണത്തിൽ ലിക്വിഡ് കൂൾഡ് ബാറ്ററിയുമായി ചേർന്ന് ഒരു പെർമനന്റ് മാഗ്നറ്റ് സിൻക്രണസ് മോട്ടോറും കമ്പനി വാഗ്ദാനം ചെയ്യും. ആൽഫ ആർക്കിടെക്ചറിന്റെ പരിഷ്കരിച്ച പതിപ്പായ ടാറ്റയുടെ ജെൻ 2 ഇവി പ്ലാറ്റ്‌ഫോമിലാവും (സിഗ്മ) ടാറ്റ പഞ്ച് ഇവി ഒരുങ്ങുന്നത്.

പുതിയ 10.25 ഇഞ്ച് ടച്ച്‌സ്‌ക്രീൻ ഇൻഫോടെയിൻമെന്റ് സിസ്റ്റം, സർക്കുലർ ഡിസ്‌പ്ലേ-ഇന്റഗ്രേറ്റഡ് ഗിയർ സെലക്ടർ ഡയൽ, ഇലക്‌ട്രോണിക് പാർക്കിംഗ് ബ്രേക്ക്, ഒരു ആംറെസ്റ്റ്, LED ഹെഡ്‌ലാമ്പുകൾ, റിയർ ഡിസ്‌ക് ബ്രേക്കുകൾ എന്നിവ ഉൾപ്പെടെയുള്ള എക്‌സ്‌ക്ലൂസീവ് സവിശേഷതകൾ നിർമ്മാതാക്കൾ മൈക്രോ എസ്‌യുവിയിൽ സജ്ജീകരിച്ചിരിക്കുന്നു.

വാഹനത്തിന്റെ ഡിസ്റ്റിംഗ്റ്റീവായ സവിശേഷതകളിൽ, ബമ്പറിൽ മുൻവശത്ത് ഘടിപ്പിച്ചിരിക്കുന്ന ചാർജിംഗ് സോക്കറ്റ് ഫൾപ്പെടുന്നു. ടാറ്റ ഇലക്ട്രിക് കാറുകളിൽ ഈ ഫീച്ചർ വാഗ്ദാനം ചെയ്യുന്ന ആദ്യ മോഡലാവും പഞ്ച് ഇവി. കൂടാതെ, സൺറൂഫുള്ള ഇന്ത്യയിലെ ഏറ്റവും താങ്ങാനാവുന്ന ഇലക്ട്രിക് കാറായി ഇത് ഉയർന്നു വന്നേക്കാം.