ഓഫ്‌റോഡ് പ്രേമികൾ കമോൺ ...ഹൈലക്‌സ് ഓഫ്‌റോഡ് കണ്‍സപ്റ്റിലൂടെ മനംകവര്‍ന്ന് ടൊയോട്ട

ഇന്ത്യയില്‍ പ്രത്യേകിച്ച് നമ്മുടെ കൊച്ചു കേരളത്തില്‍ ഓഫ് റോഡിംഗിനോടുള്ള പ്രിയം നാള്‍ക്ക് നാള്‍ വര്‍ധിക്കുകയാണ്. മഹീന്ദ്ര ഥാര്‍ പോലുള്ള മോഡലുകള്‍ക്ക് ലഭിച്ച സ്വീകാര്യതയും കഴിഞ്ഞ ദിവസം ഓട്ടോ എക്‌സ്‌പോയില്‍ മാരുതി സുസുക്കി ജിംനി അവതരിപ്പിച്ചപ്പോള്‍ ലഭിച്ച വരവേല്‍പ്പുമെല്ലാം അതിനുള്ള ചെറിയ ഉദാഹരണങ്ങള്‍ മാത്രമാണ്.

ഇപ്പോള്‍ ടൊയോട്ട ഹൈലക്സ് എക്സ്ട്രീം ഓഫ് റോഡ് കണ്‍സെപ്റ്റ് പ്രദര്‍ശിപ്പിച്ചുകൊണ്ട് 2023 ഓട്ടോ എക്സ്പോയില്‍ ടൊയോട്ട ഓഫ്-റോഡ് പ്രേമികളുടെ മനം കീഴടക്കുകയാണ്. ടൊയോട്ട ഹിലക്സ് ഓഫ് റോഡ് കണ്‍സെപ്റ്റിനെക്കുറിച്ച് പറയുമ്പോള്‍ ഓട്ടോ എക്‌സ്‌പോയില്‍ പ്രദര്‍ശിപ്പിച്ച പിക്ക്-അപ്പ് എസ്‌യുവി, ഓഫ്-റോഡ് ലക്ഷ്യംവെച്ച് നടപ്പാക്കിയ പരിഷ്‌ക്കരണങ്ങളിലൂടെ കാഴ്ചക്കാരോട് തന്റെ നിലപാട് വ്യക്തമാക്കുകയാണ്. ടൊയോട്ട 6 ഇഞ്ച് ലിഫ്റ്റ് കിറ്റ് ഉപയോഗിച്ച് ഹൈലക്‌സ് എക്‌സ്ട്രീം കണ്‍സെപ്റ്റ് ഉയര്‍ത്തിയിട്ടുണ്ട്.

ഇത് വീല്‍ ആര്‍ച്ചുകള്‍ക്ക് കീഴിലുള്ള ധാരാളം സ്ഥലം ഫ്രീയാക്കി വിട്ടു. എന്നാല്‍ 5-സ്‌പോക്ക് അലോയ് വീലുകളും ഭീമന്‍ ഓഫ്‌റോഡ് ടയറുകളും ഉപയോഗിച്ച് ടൊയോട്ട ഈ വിടവ് സമര്‍ത്ഥമായി നികത്തി. ഓഫ്‌റോഡിങ്ങിന് വേണ്ടി പ്രത്യേകം രൂപപ്പെടുത്തിയ ട്രെഡ് പാറ്റേണുള്ള ടയറുകളാണിത്. കൂടാതെ, ഹൈലക്സ് എക്സ്ട്രീം കണ്‍സെപ്റ്റ് പിക്ക്-അപ്പ് എസ്‌യുവിയിലെ സസ്പെന്‍ഷനും ടൊയോട്ട അപ്ഗ്രേഡ് ചെയ്തിട്ടുണ്ട്.

പിക്ക്-അപ്പ് എസ്‌യുവിയുടെ നാല് കോണുകളിലും ഗ്യാസ് ചാര്‍ജുള്ള ഡാംപറുകള്‍ ഉള്ള കട്ടിയുള്ള കോയിലോവര്‍ സ്പ്രിംഗുകള്‍ കൂടാതെ അധികമായി കസ്റ്റം മെയിഡ് അണ്ടര്‍ബോഡി പ്രെട്ടക്ഷനുമെല്ലാം ഹൈലക്‌സ് കണ്‍സപ്റ്റിലെ ശ്രദ്ധേയമായ ചില മാറ്റങ്ങളില്‍ ഉള്‍പ്പെടുന്നു.കൂടാതെ, ഹൈലക്‌സ് എക്‌സ്ട്രീം ഓഫ്‌റോഡ് കണ്‍സപ്റ്റ് പിക്ക്-അപ്പ് എസ്‌യുവിയുടെ മുന്നിലും പിന്നിലും ടൊയോട്ട ഓഫ്-റോഡ് ബമ്പറുകളും ഉപയോഗിച്ചിട്ടുണ്ട്. പുതിയ ഫ്രണ്ട് ബമ്പറില്‍ ഒരു സംയോജിത വിഞ്ച്, ഒരു ജോഡി ഫോഗ് ലാമ്പുകള്‍, അധിക ടോ ഹുക്കുകള്‍ എന്നിവയും വരുന്ന വിവരം എടുത്തുപറയേണ്ടതാണ്.

കൂടാതെ, ഹൈലക്സ് എക്സ്ട്രീം ഓഫ് റോഡ് പിക്ക്-അപ്പ് എസ്‌യുവിയില്‍ ടൊയോട്ട പതിനൊന്ന് അധിക ഓക്‌സിലറി ലൈറ്റുകള്‍ സ്ഥാപിച്ചിട്ടുണ്ട്. ഇതില്‍ രണ്ട് എല്‍ഇഡി സ്‌പോട്ട് ലൈറ്റുകളും മുന്‍ ബമ്പറില്‍ ഒരു എല്‍ഇഡി ഫ്‌ലഡ് ലൈറ്റും ബോണറ്റില്‍ രണ്ട് എല്‍ഇഡി ഓക്‌സിലറി ലൈറ്റുകളും റൂഫ് റാക്കില്‍ ആറ് എല്‍ഇഡി ഓക്‌സിലറി ലൈറ്റുകളും ഉള്‍പ്പെടുന്നു. സ്‌നോര്‍ക്കല്‍, വിപുലീകൃത ORVM-കള്‍, എളുപ്പത്തില്‍ കയറുന്നതിനും ഇറങ്ങുന്നതിനുമുള്ള ഒരു ജോടി ഫുട്റെസ്റ്റ് എന്നിവ പ്രധാന കൂട്ടിച്ചേര്‍ക്കലുകളില്‍ ഉള്‍പ്പെടുന്നു.

കടുത്ത പരിഷ്‌കരണങ്ങളാണ് ടൊയോട്ട ഹൈലക്‌സ് എക്സ്ട്രീം ഓഫ് റോഡ് കണ്‍സെപ്റ്റ് പിക്ക്-അപ്പ് എസ്‌യുവിയില്‍ നടത്തിയത്. കൂടാതെ, ടൊയോട്ട ഫോര്‍ച്യൂണറില്‍ പരീക്ഷിച്ച 2.8 ലിറ്റര്‍, 4-സിലിണ്ടര്‍, ടര്‍ബോചാര്‍ജ്ഡ് ഡീസല്‍ എഞ്ചിന്‍ അടങ്ങുന്ന പവര്‍ട്രെയിന്‍ ഇതിന് നല്‍കുമെന്ന് ഞങ്ങള്‍ പ്രതീക്ഷിക്കുന്നു. 2023 ഓട്ടോ എക്സ്പോയില്‍ ടൊയോട്ട ഹൈലക്സ് എക്സ്ട്രീം ഓഫ് റോഡ് കണ്‍സെപ്റ്റ് പ്രദര്‍ശിപ്പിക്കുന്നതിലൂടെ, ജാപ്പനീസ് വാഹന നിര്‍മ്മാതാവ് ഇന്ത്യയിലെ നിരവധി ഓഫ്-റോഡ് പ്രേമികളെ ആകര്‍ഷിക്കുമെന്നുറപ്പാണ്.

കൂടാതെ, പിക്ക്-അപ്പ് എസ്‌യുവിയിലെ ഈ പരിഷ്‌കാരങ്ങള്‍ ഇന്ത്യയിലെ നിരവധി ഹൈലക്സ് ഉടമകള്‍ക്കും ഒരു പ്രചോദനമായി മാറും. ഓട്ടോ എക്‌സ്‌പോ വേദിയിലെ ടൊയോട്ട പവലിയനിലെ മറ്റൊരു പ്രധാന ആകര്‍ഷണമായിരുന്നു ടൊയോട്ട LC300. ഇന്ത്യക്കാര്‍ ഏറെ നാളായി കാത്തിരിക്കുന്ന ഈ ഭീമന്‍ എസ്‌യുവിയെ ടൊയോട്ട ഓട്ടോ എക്‌സ്‌പോയിലൂടെ പരിചയപ്പെടുത്തി. 2021 വിദേശ വിപണികളില്‍ അരങ്ങേറ്റം കുറിച്ച അന്ന് മുതല്‍ ലാന്‍ഡ് ക്രൂയിസര്‍ 300 എസ്‌യുവി പ്രേമികളുടെ മനം കവര്‍ന്നിരുന്നു.

അന്ന് മുതല്‍ ഇന്ത്യയിലെ ടൊയോട്ട പ്രേമികള്‍ LC300 ഇന്ത്യയില്‍ എത്താന്‍ കണ്ണില്‍ എണ്ണ ഒഴിച്ച് കാത്തിരിക്കുകയാണ്. ലാന്‍ഡ് ക്രൂയിസര്‍ 300 മോഡലിനായുള്ള ബുക്കിംഗ് നേരത്തെ തന്നെ ആരംഭിച്ചിരുന്നു. ഏകദേശം 2 കോടി രൂപയാണ് (എക്‌സ്‌ഷോറൂം) വില പ്രതീക്ഷിക്കുന്നത്.