മാരുതിയും ടാറ്റയുമെല്ലാം ഒരുങ്ങിക്കോ; ഒരുപിടി കാറുകളുമായി ഹോണ്ട പടയൊരുക്കുന്നു,ലിസ്റ്റിൽ ഇവി - 7-സീറ്റർ വരെ

കാലങ്ങളായി ഇന്ത്യൻ വാഹന വിപണിയിലെ ജനപ്രിയ ബ്രാൻഡുകളിൽ ഒന്നാണ് ഹോണ്ട. ഒരു കാലത്ത് പ്രൗഡിയോടെ നിലകൊണ്ടിരുന്ന ജാപ്പനീസ് ബ്രാൻഡിന് ഇടക്കാലത്ത് ഒരല്പം മങ്ങലേറ്റു. എന്നിരുന്നാലും ഇപ്പോൾ പൂർവ്വാധികം ശക്തിയോടെ തിരികെ എത്താനുള്ള ശ്രമത്തിലാണ് നിർമ്മാതാക്കൾ.

ഇന്ത്യയിലെ വാഹന വിപണി ആവേശകരമായ പരിവർത്തനത്തിന് സാക്ഷ്യം വഹിക്കാൻ പോവുകയാണ്. ഹോണ്ട, ആകർഷകമായ പുതിയ വാഹനങ്ങളുടെ ഒരു നിര തന്നെ അവതരിപ്പിക്കാനുള്ള ഒരുക്കത്തിലാണ്. നിലവിൽ അമേസ്, സിറ്റി, എലിവേറ്റ് എന്നീ മോഡലുകൾ മാത്രമാണ് ഹോണ്ടയ്ക്ക് ഇന്ത്യൻ വിപണിയിലുള്ളത്.

സുസ്ഥിരത (സസ്റ്റെയിനബിലിറ്റി), പെർഫോമെൻസ്, സ്റ്റൈൽ എന്നിവയോടുള്ള പ്രതിബദ്ധതയെ പ്രതിധ്വനിപ്പിക്കുന്ന തന്ത്രപരമായ കാഴ്ചപ്പാടോടെ, ഇന്ത്യൻ ഉപഭോക്താക്കളുടെ ഹൃദയം കവർന്നെടുക്കാൻ സജ്ജമായ വരാനിരിക്കുന്ന കാറുകളുടെ ഒരു കൂട്ടം തന്നെയാണ് ഹോണ്ടയുടെ അണിയറിൽ ഒരുങ്ങുന്നത്. പുത്തൻ എസ്‌യുവി മോഡലുകൾ മുതൽ ഇവികൾ വരെ അടങ്ങുന്ന, ഇന്ത്യൻ വിപണി വളരെ ആകാംക്ഷയോടെ കാത്തിരിക്കുന്ന ഹോണ്ടയുടെ ഈ മോഡലുകളെ നമുക്ക് അടുത്ത് നോക്കാം.

1. ഹോണ്ട എലിവേറ്റ് ഇവി: എലിവേറ്റ് ഇവിക്കൊപ്പം തങ്ങളുടെ പ്യുവർ-ഇലക്‌ട്രിക് ഡ്രൈവിന് നേതൃത്വം നൽകാൻ ഹോണ്ട പദ്ധതിയിടുന്നു. 2030 -ഓടെ ഇന്ത്യയിൽ അഞ്ച് എസ്‌യുവി മോഡലുകൾ അവതരിപ്പിക്കാനുള്ള ഹോണ്ടയുടെ മഹത്തായ പദ്ധതിയുടെ ഒരു പ്രധാന ഭാഗമാണ് ഈ ഇലക്ട്രിക് എസ്‌യുവി എന്നത്.

ഇത് എസ്‌യുവി സെഗ്മെന്റിൽ ഹോണ്ടയുടെ പുനരുജ്ജീവനത്തെ അടയാളപ്പെടുത്തുക മാത്രമല്ല, ഗ്രീൻ മൊബിലിറ്റിയോടുള്ള ഹോണ്ടയുടെ പ്രതിബദ്ധത എടുത്തു കാട്ടുകയും ചെയ്യുന്നു. എലിവേറ്റ് ഇവിയുടെ ലോഞ്ച് ഹോണ്ട 2025 -ൽ പ്ലാൻ ചെയ്തിട്ടുണ്ട്. എന്നിരുന്നാലും വാഹനത്തിന്റെ ഫീച്ചറുകളേയും മറ്റ് സ്‌പെസിഫിക്കേഷനുകളേയും കുറിച്ചുള്ള വിശദാംശങ്ങളൊന്നും കമ്പനി ഇതുവരെ ഔദ്യോഗികമായി വെളിപ്പെടുത്തിയിട്ടില്ല.

2. ഒരു പുതിയ കോംപാക്ട് എസ്‌യുവി: WR-V നിർത്തലാക്കിയതിന് ശേഷം, വൻ ജനപ്രീതിയുള്ള സബ് ഫോർ-മീറ്റർ എസ്‌യുവി സെഗ്‌മെന്റിൽ തങ്ങളുടെ സാന്നിധ്യം പുനഃസ്ഥാപിക്കാനുള്ള ഒരുക്കത്തിലാണ് ഹോണ്ട ഇപ്പോൾ. ജാപ്പനീസ് വാഹന നിർമ്മാതാക്കൾ ഈ സെഗ്മെന്റിൽ തികച്ചും പുതിയ മോഡലുമായി ശക്തമായ ഒരു തിരിച്ചുവരവ് നടത്തുമെന്ന് ഞങ്ങൾ പ്രതീക്ഷിക്കുന്നു.

അമേസിന്റെ പ്ലാറ്റ്‌ഫോമിനെ അടിസ്ഥാനമാക്കിയുള്ള ഒരു മോഡലിനാണ് ഇവിടെ സാധ്യത. ഫ്യൂച്ചറിസ്റ്റിക് സ്റ്റൈലിംഗും മികവുള്ള ഒട്ടനവധി ഫീച്ചറുകളും നമുക്ക് ഇതിൽ പ്രതീക്ഷിക്കാം. എന്നിരുന്നാലും, ലോഞ്ച് തീയതിയും മറ്റ് സ്ങ്കേതിക വിശദാംശങ്ങളും സംബന്ധിച്ച് ഔദ്യോഗിക അറിയിപ്പുകളൊന്നും ഇല്ലെങ്കിലും, അടുത്ത ഒന്നോ രണ്ടോ വർഷത്തിനുള്ളിൽ ഇത് അരങ്ങേറ്റം കുറിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.

3. നെക്സ്റ്റ് ജെൻ ഹോണ്ട അമേസ്: ഇന്ത്യയിലെ പ്രിയപ്പെട്ട ഹോണ്ട അമേസ് അതിന്റെ മൂന്നാം തലമുറ മോഡൽ അവതരിപ്പിക്കുന്നതോടെ കാര്യമായ പരിവർത്തനത്തിന് വിധേയമാകാൻ ഒരുങ്ങുകയാണ്. 2024 -ൽ ആഗോളതലത്തിൽ അരങ്ങേറ്റം കുറിക്കുമെന്ന് പ്രതീക്ഷിക്കുന്ന, പുതിയ അമേസ് ഒരു ഇവോൾവ്ഡ് പ്ലാറ്റ്ഫോം അവതരിപ്പിക്കും.

സിറ്റി, അക്കോർഡ് തുടങ്ങിയ ഹോണ്ടയുടെ ഏറ്റവും പുതിയ സെഡാനുകളുടെ ശൈലിയും സിമ്പിൾ ലൈനുകളിൽ നിന്നും പ്രചോദനം ഉൾക്കൊണ്ട്, വാഹനത്തിന്റെ എക്സ്റ്റീരിയർ ആധുനികത പ്രസരിപ്പിക്കുന്നതാണ്. അകത്ത്, നവീകരിച്ച ഇന്റീരിയർ ലേയൗട്ടും പരിഷ്കരിച്ച ഇൻഫോടെയിൻമെന്റ് ഓപ്ഷനുകളും മൊത്തത്തിലുള്ള ഡ്രൈവിംഗ് എക്സ്പീരിയൻസ് ഉയർത്തുമെന്ന് പ്രതീക്ഷിക്കുന്നു.

അടുത്ത തലമുറ അമേസ് ഹോണ്ടയുടെ വിശ്വസനീയമായ 1.2 ലിറ്റർ പെട്രോൾ എഞ്ചിൻ നിലനിർത്തുമെന്ന് പ്രതീക്ഷിക്കുന്നു, ഇത് അഞ്ച് സ്പീഡ് മാനുവൽ, CVT ഓപ്ഷനുകളിൽ വാഗ്ദാനം ചെയ്യുന്നു. ഖേദകരമെന്നു പറയട്ടെ, കർശനമായ എമിഷൻ മാനദണ്ഡങ്ങൾക്കനുസൃതമായി ഡീസൽ എഞ്ചിൻ ഓപ്ഷനുകൾ ഇനി ഹോണ്ട ഇന്ത്യയിൽ എത്തിക്കില്ല.

4. ഒരു ഏഴ്-സീറ്റർ എസ്‌യുവി: കാര്യമായ വിശദാംശങ്ങൾ നിഗൂഢതയിൽ മറഞ്ഞിരിക്കുമ്പോൾ, ഹോണ്ടയുടെ പ്ലാനിൽ ഒരു ഏഴ് സീറ്റർ എസ്‌യുവി ഉണ്ടെന്ന് അഭ്യൂഹങ്ങ ഉയരുന്നുണ്ട്. ടാറ്റ സഫാരി, ഹ്യുണ്ടായി അൽകസാർ, മഹീന്ദ്ര XUV700, മുതലായവയ്ക്ക് എതിരെയുള്ള ഹോണ്ട ഫാമിലിയുടെ ശക്തമായ ഒരു എതിരാളിയായിരിക്കും ഇത്. വാഹനത്തെക്കുറിച്ചുള്ള വിശദാംശങ്ങൾ വളരെ കുറവാണെങ്കിലും, ഈ നിഗൂഢമായ മോഡലിന്റെ അനാച്ഛാദനം അധികം താമസിയാതെ ഉണ്ടാവും എന്ന പ്രതീക്ഷയിലാണ് വാഹന പ്രേമികൾ.