ലാഭമല്ല പ്രധാന ലക്ഷ്യമെന്ന് സ്കോഡ, കിടിലൻ പ്ലാനിങ്ങുമായി ബ്രാൻഡ്

ചെക്ക് കാർ നിർമ്മാതാക്കളായ സ്കോഡ ഓട്ടോ, 20 വർഷത്തിലേറെയായി ഇന്ത്യൻ വിപണിയിൽ സജീവമായി ഉണ്ട്, എന്നാലും വിൽപ്പനയുടെ കാര്യത്തിലും ലാഭത്തിൻ്റെ കാര്യത്തിലും കമ്പനി അൽപ്പം പിന്നിലാണ് എങ്കിലും തങ്ങളുടെ മോഡലുകൾ എല്ലാ ജനപ്രിയമാണ് എന്നാണ് കമ്പനി അവകാശപ്പെടുന്നത്.

ഇന്ത്യയിലെ ഗ്രൂപ്പ് സ്ട്രാറ്റജിക്ക് നേതൃത്വം നൽകുന്ന ഫോക്‌സ്‌വാഗൺ ഗ്രൂപ്പ് കമ്പനി, മത്സരാധിഷ്ഠിത സബ്-ഫോർ മീറ്റർ കോംപാക്റ്റ് എസ്‌യുവി സെഗ്‌മെൻ്റിലേക്കുള്ള പ്രവേശനത്തിലൂടെയും ഇലക്ട്രിക് വാഹനങ്ങൾ പുറത്തിറക്കുന്നതിലൂടെയും നിക്ഷേപത്തിൻ്റെ അടുത്ത ഘട്ടത്തിലേക്ക് കടക്കുന്നതിലൂടെ പുത്തൻ മേഖലകൾ കീഴടക്കാന ഒരുങ്ങുകയാണ്.

ഇന്ത്യയിലെ പ്രധാന ലക്ഷ്യം ലാഭമല്ല. നമുക്ക് കുറച്ച് ലാഭമുണ്ടാകണം, പക്ഷേ ലാഭത്തിൻ്റെ തോത് പ്രധാനമല്ല. ഈ വിപണിയിലും അതിൻ്റെ ദീർഘകാല സാധ്യതയിലും കമ്പനിക്ക് വിശ്വാസമുണ്ട് എന്നാണ് ബോർഡ് ഓഫ് മാനേജ്‌മെൻ്റ് ഫോർ സെയിൽസ് ആൻഡ് മാർക്കറ്റിംഗ് അംഗം മാർട്ടിൻ ജാൻ പറഞ്ഞത്.
2025 ൻ്റെ ആദ്യ പകുതിയിൽ പ്ലാൻ ചെയ്തിരിക്കുന്ന CSUV സ്കോഡയുടെ വരവോടെ ആവശ്യമായ വോളിയം നൽകുമെന്നും ജാൻ കൂട്ടിച്ചേർത്തു. കമ്പനിയുടെ 260 ഡീലർമാരുടെ ശൃംഖല മികച്ച രീതിയിൽ ഉപയോഗിക്കാൻ ഇത് സഹായിക്കുമെന്നാണ് അദ്ദേഹത്തിൻ്റെ അഭിപ്രായം.

ഈ വർഷം ഇന്ത്യയിലെ ഇലക്ട്രിക് വാഹന വിഭാഗത്തിലേക്ക് പ്രവേശിക്കാൻ കമ്പനി തയ്യാറെടുക്കുന്നതിന് വേണ്ടി, ബ്രാൻഡിൻ്റെ പ്രീമിയം ഇലക്ട്രിക് എസ്‌യുവി എൻയാക് പരീക്ഷിക്കുകയാണ്. ഇന്ത്യയിലെ ഇലക്ട്രിക് വാഹനങ്ങളുടെ ലിസ്റ്റിലേക്ക് തങ്ങൾ ചുവടുവയ്ക്കുകയാണെങ്കിലും ഇത് എങ്ങനെ, എപ്പോൾ പൂർത്തിയാകുമെന്ന് ഇപ്പോൾ പറയാൻ സാധിക്കില്ല എന്നാണ് മാർട്ടിൻ ജാൻ പറഞ്ഞത്.

സ്കോഡയിൽ നിന്നുള്ള ഇലക്ട്രിക് എസ്‌യുവി തുടക്കത്തിൽ കംപ്ലീറ്റ്ലി ബിൽറ്റ് യൂണിറ്റായി (CBU) ഇന്ത്യയിൽ അവതരിപ്പിക്കും. എന്നാൽ പിന്നീട് ആവശ്യങ്ങൾക്കനുസരിച്ച് സ്കോഡ പ്രാദേശികമായി വാഹനത്തെ അസംബിൾ ചെയ്യുന്ന കാര്യവും പരിഗണിക്കുന്നുണ്ട്. എന്നാൽ ഇവിക്ക് കിട്ടുന്ന ഡിമാന്റിന് അനുസരിച്ചായിരിക്കും തീരുമാനമെടുക്കുകയെന്ന് മാത്രം. സ്‌കോഡ ഓട്ടോയുടെ MEB പ്ലാറ്റ്‌ഫോമിനെ അടിസ്ഥാനമാക്കിയാണ് എന്യാക് ഇലക്ട്രിക് എസ്‌യുവി പണികഴിപ്പിച്ചിരിക്കുന്നത്.

ഔഡി Q4 ഇ-ട്രോൺ, ഫോക്‌സ്‌വാഗൺ ID.4 എന്നിവയ്ക്കും ഇതേ പ്ലാറ്റ്‌ഫോം തന്നെയാണ് അടിസ്ഥാനമായിരിക്കുന്നത്. 2022 മുതൽ വിദേശ രാജ്യങ്ങളിൽ എത്തിയ ഇവി അവർക്ക് സുപരിചിതനാണെങ്കിലും ഇന്ത്യയിലേക്ക് എത്താൻ ഏകദേശം 2 വർഷത്തോളം കാത്തിരിക്കേണ്ടി വന്നുവെന്നതാ് സത്യം. 4,648 മില്ലീമീറ്റർ നീളവും 1,877 മില്ലീമീറ്റർ വീതിയും 1,618 മില്ലീമീറ്റർ ഉയരവും 2,765 മില്ലീമീറ്റർ വീൽബേസുമാണ് സ്കോഡ എന്യാക് ഇവിക്കുള്ളത്.

അതായത് വലിപ്പത്തിലെ ഈ സമ്പന്നത വിശാലമായ ഇന്റീരിയർ സ്പേസിലേക്കാണ് നയിച്ചിരിക്കുന്നത്. മൊത്തത്തിൽ നോക്കുമ്പോൾ ആഡംബരമായ യാത്ര തന്നെയാവും വണ്ടി സമ്മാനിക്കുകയെന്ന് വിലയിരുത്താം. പോരാത്തതിന് നിരവധി നൂതന ഫീച്ചറുകളുമായാണ് സ്‌കോഡ എന്യാക് എത്തുന്നത്. അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം (ADAS), 360-ഡിഗ്രി ക്യാമറ, ഇൻസ്ട്രുമെൻ്റ് കൺസോളിനുള്ള ഡിജിറ്റൽ സ്ക്രീനുകൾ, ഇൻഫോടെയ്ൻമെൻ്റ് സിസ്റ്റം, ലെതറെറ്റ് അപ്ഹോൾസ്റ്ററി എന്നിവ പോലുള്ള പ്രീമിയം ഫീച്ചറുകളും അകമ്പടിയേകാനെത്തും.

ഡിസൈനിനെ സംബന്ധിച്ചിടത്തോളം അതും ആഡംബര ശൈലി തന്നെയായിരിക്കുമെന്ന് ഊഹിക്കാമല്ലോ. ഒരു ഇൽയുമിനേറ്റഡ് ഗ്രിൽ, സ്വീപ്‌ബാക്ക് എൽഇഡി ഹെഡ്‌ലാമ്പുകൾ, കോൺട്രാസ്റ്റ് ബ്ലാക്ക് ഇൻസെർട്ടുകൾ, എയ്‌റോ-പ്രചോദിത അലോയ് വീലുകൾ എന്നിവയ്‌ക്ക് പുറമെ ടൂ പീസ് എൽഇഡി ടെയിൽ ലൈറ്റുകൾ, സ്‌കോഡ ലെറ്ററിംഗ്, ടെയിൽഗേറ്റിൽ ഒരു നമ്പർ പ്ലേറ്റ് റീസെസ്, ഇന്റഗ്രേറ്റഡ് സ്‌പോയിലർ, ഷാർക്ക്-ഫിൻ ആൻ്റിന പോലുള്ളവയെല്ലാം കാഴ്ച്ചയിൽ ആഡംബരത്തം തുളുമ്പുന്ന കാര്യങ്ങളാണ്.

സ്കോഡയുടെ ഫ്ലാഗ്ഷിപ്പ് എസ്‌യുവിയായ കൊഡിയാക്കിന്റെ രൂപം അവിടിവിടെയായി കാണാനാവുമെങ്കിലും ശരിക്കും വ്യത്യസ്‌തമായാണ് ഇവി നിർമിച്ചിരിക്കുന്നത്. സ്‌കോഡ എന്യാക് ഇവി ലോകമെമ്പാടുമുള്ള വിപണികളിൽ ഒന്നിലധികം വേരിയൻ്റുകളിലാണ് വാഗ്ദാനം ചെയ്യുന്നത്. എന്നാൽ ഇന്ത്യയിൽ ഇലക്ട്രിക് എസ്‌യുവിയുടെ 80 എന്ന മോഡൽ അവതരിപ്പിക്കാനാണ് സാധ്യത. 282 bhp പവറിൽ പരമാവധി 310 Nm torque ഉത്പാദിപ്പിക്കാൻ കഴിയുന്ന റിയർ ആക്‌സിൽ സിഗിൾ ഇലക്ട്രിക് മോട്ടോറുമായാണ് എന്യാക് വരുന്നത്.