620 കി.മീ റേഞ്ച്, 7 പേര്‍ക്ക് ആടിപ്പാടി പോകാം! ക്രെറ്റ ഇവി മാത്രമല്ല 'വല്ല്യേട്ടനും' ജനുവരിയില്‍ ഇന്ത്യയിൽ

അടുത്ത മാസമാണ് ഭാരത് മൊബിലിറ്റി ഗ്ലോബല്‍ എക്‌സ്‌പോ 2025 അരങ്ങേറാന്‍ പോകുന്നത്. രാജ്യത്തെ മുന്‍നിര വാഹന നിര്‍മാതാക്കള്‍ അവരുടെ ഭാവി മോഡലുകളും സാങ്കേതികവിദ്യകളും ഈ ഇവന്റില്‍ വെച്ച് അവതരിപ്പിക്കും. ഇന്ത്യയിലെ ഏറ്റവും വലിയ രണ്ടാമത്തെ കാര്‍ നിര്‍മാതാക്കളായ ഹ്യുണ്ടായി വര്‍ഷങ്ങളായി ഓട്ടോ എക്‌സ്‌പോയിലെ സ്ഥിരം പങ്കാളികളാണ്. ഈ വര്‍ഷം ഓട്ടോ എക്‌സ്‌പോയില്‍ വെച്ച് ദക്ഷിണ കൊറിയന്‍ കമ്പനി രണ്ട് പുത്തന്‍ ഇലക്ട്രിക് കാറുകള്‍ അവതരിപ്പിക്കാന്‍ പോകുകയാണ്. അതില്‍ ഒന്ന് ഹ്യുണ്ടായി ക്രെറ്റ ഇവിയാണെന്ന് എല്ലാവര്‍ക്കും അറിയാം. രണ്ടാമത്തെ കാര്‍ ഏതാണെന്ന് നമുക്ക് നോക്കാം.

ഇന്ത്യന്‍ ഉപഭോക്താക്കള്‍ക്കിടയില്‍ ഇലക്ട്രിക് കാറുകളുടെ ഡിമാന്‍ഡ് തുടര്‍ച്ചയായി വര്‍ധിച്ചുവരികയാണ്. ഇത് കണക്കിലെടുത്ത് ഹ്യുണ്ടായി തങ്ങളുടെ പുതിയ ഫ്‌ലാഗ്ഷിപ്പ് ഇലക്ട്രിക് എസ്‌യുവിയായ അയോണിക് 9 പുറത്തിറക്കാന്‍ ഒരുങ്ങുകയാണ്. ഹ്യുണ്ടായി അയോണിക് 9 ഭാരത് മൊബിലിറ്റി ഗ്ലോബല്‍ എക്സ്പോ 2025-ല്‍ അരങ്ങേറ്റം കുറിക്കുമെന്ന് വിവിധ ഓട്ടോമൊബൈല്‍ വെബ്‌സൈറ്റുകള്‍ റിപ്പോര്‍ട്ട് ചെയ്യുന്നു.

E-GMP മോഡുലാര്‍ ബോണ്‍-ഇലക്ട്രിക് ആര്‍ക്കിടെക്ചറിനെ അടിസ്ഥാനമാക്കിയുള്ള ബ്രാന്‍ഡിന്റെ പുതിയ ഫ്‌ലാഗ്ഷിപ്പ് എസ്‌യുവിയാണ് ഹ്യുണ്ടായി അയോണിക് 9. അടുത്ത കലണ്ടര്‍ വര്‍ഷത്തിന്റെ ആദ്യ പകുതിയില്‍ ദക്ഷിണ കൊറിയയിലും വടക്കേ അമേരിക്കയിലും അയോണിക് 9 ഇവിയുടെ വില്‍പ്പന ആരംഭിക്കുമെന്നാണ് റിപ്പോര്‍ട്ട്. ഈ കാര്‍ എപ്പോള്‍ മുതല്‍ ഇന്ത്യയില്‍ വാങ്ങാനാകുമെന്നത് സംബന്ധിച്ച് ഔദ്യോഗിക പ്രഖ്യാപനം ഒന്നുമില്ല.

ഇവിയുടെ ഡിസൈനിനെക്കുറിച്ച് പറയുമ്പോള്‍ ഇതിന് ഹെഡ്ലാമ്പിനും ടെയില്‍-ലാമ്പിനും ഹ്യുണ്ടായിയുടെ പാരാമെട്രിക് പിക്‌സല്‍ ഇന്‍സെര്‍ട്ടുകള്‍ ഉണ്ട്. സ്റ്റാന്‍ഡേര്‍ഡ് ആയി 19 ഇഞ്ച് വീലുകളും കാറിന് ലഭിക്കും. ഹ്യുണ്ടായി അയോണിക് 9 രണ്ട് 6, 7 സീറ്റിംഗ് ലേഔട്ടുകളില്‍ വാഗ്ദാനം ചെയ്യുന്നു. പനോരമിക് സണ്‍റൂഫ്, 12 ഇഞ്ച് ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, 12 ഇഞ്ച് ഡിജിറ്റല്‍ ഇന്‍സ്ട്രുമെന്റ് ക്ലസ്റ്റര്‍, റൂഫ് മൗണ്ടഡ് എസി വെന്റുകള്‍ എന്നിവയടക്കം നിരവധി ഫീച്ചറുകള്‍ കാറില്‍ ഉണ്ടാകും.

ഇലക്ട്രിക് എസ്‌യുവിക്ക് 10-എയര്‍ബാഗുകളും ADAS സാങ്കേതികവിദ്യയും സുരക്ഷയൊരുക്കും. 110.3kWh ലിഥിയം-അയണ്‍ ബാറ്ററി പാക്കും RWD, AWD എന്നീ രണ്ട് ഡ്രൈവ്‌ട്രെയിന്‍ സജ്ജീകരണങ്ങളുമായാണ് ഹ്യുണ്ടായി അയോണിക് 9 വരുന്നത്. ഫുള്‍ചാര്‍ജില്‍ ഇവി 620 കിലോമീറ്റര്‍ ദൂരം വരെ സഞ്ചരിക്കുമെന്ന് WLTP സാക്ഷ്യപ്പെടുത്തുന്നു. 350kW ചാര്‍ജര്‍ ഉപയോഗിച്ച് 24 മിനിറ്റിനുള്ളില്‍ 10 മുതല്‍ 80 ശതമാനം വരെ ചാര്‍ജ് ചെയ്യാന്‍ ഹ്യുണ്ടായിയുടെ എസ്‌യുവിക്ക് കഴിയും. കൂടാതെ V2L (വാഹനം-ടു-ലോഡ്) ഫംഗ്ഷനെ പിന്തുണയ്ക്കുകയും ചെയ്യുന്നു.

ഭാരത് മൊബിലിറ്റി ഗ്ലോബല്‍ എക്സ്പോയില്‍ വെച്ച് ഹ്യുണ്ടായി ക്രെറ്റ ഇവിയും പുറത്തിറക്കിയേക്കും. ഡിസൈനിന്റെ കാര്യത്തില്‍ ചില ഇവി നിര്‍ദിഷ്ഠ മാറ്റങ്ങള്‍ മാറ്റി നിര്‍ത്തിയാല്‍ ഇത് ക്രെറ്റ ഫെയ്‌സ്‌ലിഫ്റ്റിന് സമാനമായിരിക്കുമെന്നാണ് പറയപ്പെടുന്നത്. പുതിയ ഹ്യുണ്ടായി ഇലക്ട്രിക് എസ്യുവിയില്‍ ക്ലോസ്ഡ് ഓഫ് ഫ്രണ്ട് ഗ്രില്‍, പുതുക്കിയ ഫ്രണ്ട്, റിയര്‍ ബമ്പറുകള്‍, പുതുതായി രൂപകല്‍പ്പന ചെയ്ത അലോയ് വീലുകള്‍ എന്നിവ ഉള്‍പ്പെടുത്തുമെന്ന് സ്‌പൈ ചിത്രങ്ങള്‍ സൂചിപ്പിക്കുന്നു.

ചില ഇവി-നിര്‍ദ്ദിഷ്ട ഘടകങ്ങളും ക്യാബിനിനുള്ളില്‍ കാണപ്പെടും. ഹ്യുണ്ടായി ക്രെറ്റ ഇവിക്ക് പുതിയ വൃത്താകൃതിയിലുള്ള 3-സ്പോക്ക് സ്റ്റിയറിംഗ് വീലും 'ക്രെറ്റ' എംബോസിംഗ് ഉള്ള സീറ്റ് അപ്ഹോള്‍സ്റ്ററിയും ഉണ്ടായിരിക്കും.ഹ്യുണ്ടായി ക്രെറ്റ ഇവിയുടെ പവര്‍ട്രെയിന്‍ വിശദാംശങ്ങള്‍ ഇതുവരെ വെളിപ്പെടുത്തിയിട്ടില്ല. ഈ ഇലക്ട്രിക് എസ്‌യുവി 45kWh ബാറ്ററിയും സിംഗിള്‍ മോട്ടോര്‍ സജ്ജീകരണവും വാഗ്ദാനം ചെയ്യുമെന്നാണ് പ്രതീക്ഷിക്കുന്നത്.

ക്രെറ്റ ഇവിയിലെ ഇലക്ട്രിക് മോട്ടോര്‍ 138 bhp പവറും 255 Nm ടോര്‍ക്കും നല്‍കാന്‍ ശേഷിയുള്ളതായിരിക്കും. ഹ്യുണ്ടായി ക്രെറ്റ ഇവിക്ക് ഫുള്‍ ചാര്‍ജില്‍ 350 കിലോമീറ്ററിലധികം റേഞ്ച് ലഭിക്കുമെന്ന് പ്രതീക്ഷിക്കുന്നു. പ്രധാന എതിരാളികളില്‍ ഒന്നായ ടാറ്റ കര്‍വ് ഇവിയുമായി താരതമ്യപ്പെടുത്തുമ്പോള്‍ ക്രെറ്റ ഇവിക്ക് ശക്തി കുറവായിരിക്കും. ലോഞ്ച് അടുക്കുന്നതോടെ വരും ആഴ്ചകളില്‍ കൊറിയന്‍ കമ്പനി പുത്തന്‍ ഇവികളുടെ ടീസറുകള്‍ പുറത്തുവിടും.