പണത്തിന് മേലെ ജീപ്പിൻ്റെ ഈ 'പരുന്ത്' പറക്കും, ജീപ്പ് കോമ്പസ് നൈറ്റ് ഈഗിൾ എഡീഷൻ്റെ വില അറിഞ്ഞോ

ലോകത്താകമാനം ആരാധകരുളള ഒരു ബ്രാൻഡാണ് ജീപ്പ്. ജീപ്പ് ഇന്ത്യ തങ്ങളുടെ ജീപ്പ് കോമ്പസ് ലിമിറ്റഡ് എഡിഷൻ നൈറ്റ് ഈഗിൾ എസ്‌യുവി പുറത്തിറക്കിയിരിക്കുകയാണ്. ഗ്രിൽ, ഗ്രിൽ വളയങ്ങൾ, ഡേലൈറ്റ് ഓപ്പണിംഗ്സ് (ഡിഎൽഒ) എന്നിവയുൾപ്പെടെയുള്ള വിവിധ എക്സ്റ്റീരിയർ ഘടകങ്ങളിലെല്ലാം ഗ്ലോസ് ബ്ലാക്ക് ഫിനിഷും ബ്ലാക്ക് റൂഫ് റെയിലുകളും ഉൾപ്പെടെ,ജീപ്പ് കോമ്പസ് നൈറ്റ് ഈഗിളിൻ്റെ പ്രത്യേകതയിൽ ഒരുങ്ങിയവയാണ്.

ജീപ്പ് കോമ്പസിൽ ഇപ്പോൾ 18 ഇഞ്ച് അലോയ് വീലുകളുണ്ട്. കോമ്പസ് നൈറ്റ് ഈഗിൾ ഡാഷ്‌ക്യാം / റിയർ എൻ്റർടെയ്ൻമെൻ്റ് യൂണിറ്റ്, പ്രീമിയം കാർപെറ്റ് മാറ്റുകൾ, അണ്ടർബോഡി ലൈറ്റിംഗ്, ആംബിയൻ്റ് ലൈറ്റുകൾ, എയർ പ്യൂരിഫയർ എന്നിവയ്‌ക്കൊപ്പം സ്റ്റാൻഡേർഡ് വരുന്നുണ്ട്. ജീപ്പ് കോമ്പസ് നൈറ്റ് ഈഗിൾ ആകർഷകമായ രണ്ട് പവർട്രെയിൻ ഓപ്ഷനുകൾ വാഗ്ദാനം ചെയ്യുന്നു. 2.0L മൾട്ടിജെറ്റ് ടർബോ ഡീസൽ 6-സ്പീഡ് മാനുവൽ ട്രാൻസ്മിഷനോ 9-സ്പീഡ് ഓട്ടോമാറ്റിക് ട്രാൻസ്മിഷനോ ആണ്. ഡ്രൈവിങ്ങ് അനുഭവം മറ്റൊരു തലത്തിലേക്ക് എത്തുമെന്ന കാര്യത്തിൽ ഒരു സംശയവുമില്ല.

ഡ്രൈവിംഗ് അനുഭവം കൂടുതൽ മെച്ചപ്പെടുത്തുന്നതിന്, ഈ ലിമിറ്റഡ് എഡിഷൻ പനോരമിക് സൺറൂഫ് പോലുള്ള പ്രീമിയം സവിശേഷതകളോടെയാണ് എത്തിയിരിക്കുന്നത്. വിപുലമായ കണക്റ്റുചെയ്‌ത സവിശേഷതകളും വയർലെസ് ചാർജറും എവിടെയായിരുന്നാലും തടസ്സമില്ലാത്ത കണക്റ്റിവിറ്റി വാഗ്ദാനം ചെയ്യുന്നു. മൊത്തത്തിൽ, ജീപ്പ് നൈറ്റ് ഈഗിളിൽ യാത്ര ചെയ്യുന്ന യാത്രക്കാർക്ക് പ്രത്യേക അനുഭവം ഉണ്ടാകുമെന്നാണ് കമ്പനിയുടെ അവകാശവാദം.

നൈറ്റ് ഈഗിളിന് സ്റ്റാൻഡേർഡായി ആകർഷകമായ ബ്ലാക്ക് ഡ്യുവൽ ടോൺ റൂഫ് ലഭിക്കുന്നു അതോടൊപ്പം തന്നെ, കറുപ്പ്, വെളുപ്പ്, ചുവപ്പ് എന്നീ മൂന്ന് ആകർഷകമായ ബാഹ്യ നിറങ്ങളിലും ലഭ്യമാണ്. രണ്ട് പവർട്രെയിൻ ഓപ്ഷനുകളുള്ള 2024 കോമ്പസ് നൈറ്റ് ഈഗിളിനുള്ള ബുക്കിംഗ് ഇപ്പോൾ ജീപ്പ് ഡീലർഷിപ്പുകളിലും ജീപ്പ് ഇന്ത്യ വെബ്‌സൈറ്റിലും (jeep-india.com) ആരംഭിച്ചിട്ടുണ്ട്. 20.49 ലക്ഷം മുതലാണ് വാഹനത്തിൻ്റെ വില ആരംഭിക്കുന്നത്.

ജീപ്പിൻ്റെ മറ്റ് അനുബന്ധ വാർത്തകളിലേക്ക് നോക്കിയാൽ 2024 ഏപ്രിൽ മാസത്തേക്കായി ജീപ്പ് അതിൻ്റെ മുഴുവൻ മോഡലുകളിലും ആകർഷകമായ ഓഫറുകളും ഡിസ്‌കൗണ്ടുകളും ആനുകൂല്യങ്ങളുമാണ് വാഗ്ദാനം ചെയ്യുന്നത്. ഒരു പുതിയ ജീപ്പ് എസ്‌യുവി വാങ്ങുമ്പോൾ നിങ്ങൾക്ക് എത്രത്തോളം പൈസ ലാഭിക്കാം എന്നകാര്യം വിശദീകരിച്ചു തരാം. പക്ഷേ ഇനി പറയുന്ന ഓഫറുകൾ സ്ഥലം, സംസ്ഥാനം, സ്റ്റോക്കിൻ്റെ ലഭ്യത എന്നിവയെ ആശ്രയിച്ചാണ് ഇരിക്കുന്നത്. കൃത്യമായ കാര്യങ്ങൾ അറിയാൻ അടുത്തുള്ള ജീപ്പ് ഡീലർഷിപ്പുമായി ബന്ധപ്പെടുന്നതാവും ഉചിതം.

ജീപ്പ് കോമ്പസിന് 2024 ഏപ്രിലിൽ 1.55 ലക്ഷം രൂപ വരെ ഓഫർ ലഭിക്കും. ഈ ആനുകൂല്യങ്ങളിൽ ക്യാഷ് ഡിസ്‌കൗണ്ടുകൾ, എക്‌സ്‌ചേഞ്ച് ബോണസ്, കോർപ്പറേറ്റ് ഓഫറുകൾ, 3 വർഷത്തെ സൗജന്യ മെയിൻ്റനൻസ് പാക്കേജ് എന്നിവയെല്ലാമാണ് ഉൾപ്പെടുന്നത്. കൂടാതെ 2 വർഷത്തെ എക്സ്റ്റൻഡഡ് വാറണ്ടിയും കമ്പനി ഒരുക്കിയിട്ടുണ്ട്. ടാറ്റ ഹാരിയർ, മഹീന്ദ്ര XUV700 എന്നിവയുമായി മത്സരിക്കുന്ന കോമ്പസിന് നിലവിൽ 20.69 ലക്ഷം മുതൽ 30.19 ലക്ഷം രൂപ വരെയാണ് എക്സ്ഷോറൂം വില വരുന്നത്.

കോമ്പസിനെ അടിസ്ഥാനമാക്കി നിർമിച്ച മൂന്ന്-വരി പതിപ്പായ ജീപ്പ് മെറിഡിയൻ ഈ മാസം 2.80 ലക്ഷം രൂപ വരെ വിലമതിക്കുന്ന ആനുകൂല്യങ്ങളോടെ സ്വന്തമാക്കാനുള്ള അവസരമാണ് കമ്പനി ഒരുക്കിയിരിക്കുന്നത്. ക്യാഷ് ഡിസ്കൗണ്ടുകൾ, എക്സ്ചേഞ്ച് ബോണസ്, കോർപ്പറേറ്റ് ഓഫറുകൾ, 3 വർഷത്തെ സൗജന്യ മെയിൻ്റനൻസ് പാക്കേജ്, 2 വർഷത്തെ എക്സ്റ്റൻഡഡ് വാറണ്ടി എന്നിവയാണ് മെറിഡിയന്റെ ഓഫറുകളിൽ ഉൾപ്പെടുന്നവയാണ്.

2.0 ലിറ്റർ ഡീസൽ എഞ്ചിൻ ഓപ്ഷനിൽ മാത്രം എത്തുന്ന മെറിഡിയൻ ഫുൾ-സൈസ് എസ്‌യുവി വിപണിയിൽ ടൊയോട്ട ഫോർച്യൂണർ, എംജി ഗ്ലോസ്റ്റർ പോലുള്ള വമ്പൻമാരുമായാണ് ഇതിന്റെ മത്സരം. പെർഫോമൻസ് കണക്കുകളിലേക്ക് നോക്കിയാൽ 171 bhp കരുത്തിൽ 350 Nm torque വരെ ഉത്പാദിപ്പിക്കാൻ ശേഷിയുള്ളതാണ് വാഹനം. 6-സ്പീഡ് മാനുവല്‍ അല്ലെങ്കില്‍ 9-സ്പീഡ് ടോര്‍ക്ക് കണ്‍വെര്‍ട്ടര്‍ ഓട്ടോമാറ്റിക് ട്രാന്‍സ്മിഷനുമായി മെറിഡിയൻ സ്വന്തമാക്കാം.