ബാറ്ററികൾ ഇവിടുന്ന് തന്നെയെങ്കിൽ ഇവികൾക്ക് വില കുറയുമല്ലോ! എക്സൈഡുമായി കൈകോർത്ത് കൊറിയൻ ഭീമന്മാർ

ലോകമെമ്പാടും ഇന്ന് വാഹന വിപണിയുടെ ഭൂരിഭാഗവും കൈയ്യടക്കി വരുന്നത് ഇവികളാണ്. നമ്മുടെ രാജ്യത്ത് ഇലക്ട്രിക് വാഹനങ്ങളിലേക്കുള്ള മാറ്റത്തിന് ഒരു വിലങ്ങു തടിയായി നിൽക്കുന്നത് അവയുടെ ഉയർന്ന വിലയാണ്. ഈ വിലയുടെ മുക്കാൽ ഭാഗവും ബാറ്ററി പായ്ക്കിനു വേണ്ടിയാണ് ചെലവാകുന്നത് എന്നതാണ് വാസ്തവം.

പ്രാദേശികമായി ഇത്തരം ബാറ്ററി പായ്ക്കുകൾ നിർമ്മിച്ചാൽ ഇക്കാര്യത്തിന് ഒരു പരിഹാരമാവില്ലേ? ഇതേ റൂട്ടിലാണ് ഇപ്പോൾ ദക്ഷിണ കൊറിയൻ വാഹന നിർമ്മാതാക്കളായ ഹ്യുണ്ടായി മോട്ടോർ കമ്പനിയും കിയ കോർപ്പറേഷനും ചിന്തിക്കുന്നത്. ഇരു കൂട്ടരും ചേർന്ന് ഇന്ത്യയിൽ ഇലക്ട്രിക് വാഹന ബാറ്ററിയുടെ പ്രൊഡക്ഷനിൽ പ്രാദേശികവൽക്കരണം വികസിപ്പിക്കുന്നതിനായി ബാറ്ററി നിർമ്മാതാക്കളായ എക്സൈഡ് എനർജി സൊല്യൂഷൻസ് ലിമിറ്റഡുമായി ഒരു സഖ്യത്തിൽ ഏർപ്പെട്ടിരിക്കുകയാണ്.

ഇന്ത്യൻ വിപണികളിൽ ഇലക്‌ട്രിക് വാഹനങ്ങളുടെ വിപുലീകരണത്തിനായി ലിഥിയം അയൺ ഫോസ്ഫേറ്റ് (LFP) സെല്ലുകളുടെ പ്രാദേശികവൽക്കരണത്തിൽ ശ്രദ്ധ കേന്ദ്രീകരിക്കുന്ന ഈ കൂട്ടുകെട്ട് പ്രഖ്യാപിച്ചുകൊണ്ട് മൂവരും ഒരു ധാരണാപത്രം (MoU) ഒപ്പുവച്ചു. ഹ്യുണ്ടായി മോട്ടോർ ഗ്രൂപ്പിൻ്റെ ദക്ഷിണ കൊറിയയിലെ നമ്യാങ് റിസർച്ച് ആൻഡ് ഡെവലപ്‌മെൻ്റ് സെൻ്ററിലാണ് എല്ലാവരും ചേർന്ന് ധാരണാപത്രം ഒപ്പുവെച്ചത്.

ഹ്യുണ്ടായി മോട്ടോറിൻ്റെയും കിയയുടെയും റിസർച്ച്-ഡെവലപ്മെന്റ് വിഭാഗത്തിൻ്റെയും പ്രസിഡൻ്റും മേധാവിയുമായ ഹ്യൂയി വോൺ യാങ്, ഇലക്‌ട്രിഫിക്കേഷൻ എനർജി സൊല്യൂഷൻസ് ടെക് യൂണിറ്റ് മേധാവി ചാങ് ഹ്വാൻ കിം, ഇലക്ട്രിക് വെഹിക്കിൾ പാർട്‌സ് പർച്ചേസിംഗ് സബ് ഡിവിഷൻ മേധാവി ഡക് ഗ്യോ ജിയോങ്, എക്സൈഡ് എനർജിയുടെ മാനേജിംഗ് ഡയറക്ടറും CEO -യുമായ ഡോ. മന്ദർ വി ദേവോ തുടങ്ങിയ പ്രമുഖർ ഈ ചടങ്ങിൽ പങ്കെടുത്തു.

വാഹനങ്ങളുടെ ഇലക്ട്രിഫിക്കേഷന് ഒരു പ്രധാന വിപണിയാണ് ഇന്ത്യ, സർക്കാരിൻ്റെ അനുകൂല നയങ്ങളും ഇതിന് കൂടുതൽ പ്രചോദനമാണ്. ഒരു കോംപറ്റീറ്റീവ് വിലനിർണ്ണയം നിലനിർത്തുന്നതിന്, ബാറ്ററി നിർമ്മാണത്തിൻ്റെ പ്രാദേശികവൽക്കരണം അത്യന്താപേക്ഷിതമായ ഘടകമാണ്, ഇതിനായി ഹ്യുണ്ടായി മോട്ടോറും കിയയും എക്സൈഡ് എനർജി സൊല്യൂഷൻസ് ലിമിറ്റഡുമായി ഈ സഖ്യത്തിൽ ഏർപ്പെട്ടിട്ടുണ്ട്.

ഇലക്ട്രിക് വാഹന മേഖലയിൽ, ഹ്യുണ്ടായി മോട്ടോർസ് നിലവിൽ ഇന്ത്യൻ വിപണിയിൽ അയോണിക് 5, കോന ഇവി എന്നിവ വിൽക്കുന്നു, അതേസമയം കിയ ഇന്ത്യയിൽ EV6 മാത്രമാണ് വിൽപ്പനയ്ക്ക് എത്തിക്കുന്നത്. പുതിയ വർഷത്തിൽ കൂടുതൽ ആകർഷകമായ പദ്ധതികൾ ആരംഭിക്കാൻ ഇരു കമ്പനികളും തയ്യാറാണ്.

ഈ പുതിയ പങ്കാളിത്തം 75 വർഷത്തെ പരിചയവും മാർക്കറ്റ് ലീഡർഷിപ്പുമായി ലെഡ് ആസിഡ് ബാറ്ററി വിതരണത്തിൽ മുൻനിരയിലുള്ള കൊൽക്കത്ത ആസ്ഥാനമായുള്ള എക്സൈഡ് ഇൻഡസ്ട്രീസ് ലിമിറ്റഡുമായുള്ള സഖ്യം വളരെ തന്ത്രപരമായ നീക്കമാണ്. മറുവശത്ത്, എക്സൈഡ് എനർജി സൊല്യൂഷൻസ് ലിമിറ്റഡ്, 2022 -ൽ സ്ഥാപിതമായ എക്സൈഡ് ഇൻഡസ്ട്രീസിൻ്റെ പൂർണ്ണ ഉടമസ്ഥതയിലുള്ള ഒരു സബ്സിഡിയറി കമ്പനിയാണ്.

ലിഥിയം അയൺ സെൽ, മൊഡ്യൂളുകൾ, പായ്ക്കുകൾ എന്നിവയിൽ ഒന്നിലധികം കെമിസ്ട്രികളുടെയും ഫോം ഘടകങ്ങളുടെയും ഒരു പോർട്ട്ഫോളിയോ ഉൾപ്പെടുത്തിയിട്ടുണ്ട്. ഈ കൂട്ടുകെട്ടിൻ്റെ ഭാഗമായി, ഹ്യുണ്ടായി, കിയ എന്നിവയിൽ നിന്നുള്ള നിലവിലുള്ളതും ഭാവിയിൽ വരാനിരിക്കുന്നതുമായ എല്ലാ ഇലക്ട്രിക് മോഡലുകൾക്കും പ്രാദേശികമായി ഉൽപ്പാദിപ്പിക്കുന്ന ലെഡ് ആസിഡ് ബാറ്ററികളുടെ പ്രയോജനം ലഭിക്കും എന്നത് ശ്രദ്ധേയമാണ്, ഇത് ലഭ്യതയിലും ചെലവിലും കൂടുതൽ നേട്ടമുണ്ടാക്കാൻ അനുവദിക്കുന്നു.

ഇന്ത്യൻ വിപണിയിൽ കൂടുതൽ ഇവികൾ അവതരിപ്പിക്കാനുള്ള ഒരുക്കത്തിലാണ് ഇരു കമ്പനികളും, ഹ്യുണ്ടായിയുടെ ക്രെറ്റ ഇവി രാജ്യത്ത് പരീക്ഷണ ഘട്ടത്തിലാണ്, മറുവശത്ത് കിയ തങ്ങളുടെ കാരെൻസിന്റെ ഇലക്ട്രിക് പതിപ്പും ക്ലാവിസ് ഇവിയും അധികം താമസിയാതെ വിൽപ്പനയ്ക്ക് എത്തിക്കും എന്നാണ് അടുത്തിടെ പുറത്തു വന്ന റിപ്പോർട്ടുകൾ സൂചിപ്പിക്കുന്നത്.