Click it and Unblock the Notifications
അകത്ത് ഫുട്ബോള് കളിക്കാനുള്ള സ്ഥലം! ഥാര് റോക്സിന്റെ ഇന്റീരിയറും ഫീച്ചറുകളും ലോഞ്ചിന് മുമ്പേ ലീക്കായി
ഈ വര്ഷം ഇന്ത്യയിലെ വാഹനപ്രേമികള് ഏറ്റവും കൂടുതല് കാത്തിരിക്കുന്ന കാറുകളില് ഒന്നാണ് മഹീന്ദ്ര ഥാര് റോക്സ്. ലൈഫ്സ്റ്റൈല് എസ്യുവി വിഭാഗം ഭരിക്കുന്ന ഥാറിന്റെ 5 ഡോര് പതിപ്പാണ് ഥാര് റോക്സ് എന്ന പേരില് 2024 ഓഗസ്റ്റ് 15-ന് അവതരിപ്പിക്കാന് പോകുന്നത്. ഇതിനോടകം വലിയ പ്രതീക്ഷകള് സൃഷ്ടിച്ച ഓഫ്റോഡര് എസ്യുവിയുടെ പുതിയ ടീസറുകള് ആവേശം ഇരട്ടിയാക്കിയിരുന്നു. അവതരണത്തിന് മുമ്പ് എസ്യുവിയുടെ എക്സ്റ്റീരിയര് വെളിപ്പെടുത്തുന്ന ടീസര് ആയിരുന്നു കമ്പനി പുറത്തുവിട്ടിരുന്നത്. എന്നാല് ഇപ്പോള് എസ്യുവിയുടെ അകക്കാഴ്ചകളിലേക്ക് വെളിച്ചം വീശുന്ന പുതിയ സ്പൈ ചിത്രങ്ങള് പുറത്തുവന്നിട്ടുണ്ട്. അതിനെ കുറിച്ച് വിശദമായി നോക്കാം.
എക്സ്റ്റീരിയര്, ഇന്റീരിയര് ഡിസൈനും ഫീച്ചര് ലിസ്റ്റും ഉള്പ്പെടെ ഥാര് 3 ഡോറില് നിന്ന് നിരവധി മാറ്റങ്ങളോടെയാണ് ഥാര് റോക്സ് വരുന്നത്. ഥാര് 3 ഡോര് നേരിട്ട പ്രധാന വിമര്ശനങ്ങളിലൊന്ന് അകത്തളത്തിലെ സ്പെയ്സിന്റെ കുറവായിരുന്നു. രണ്ടാം നിരയിലെ യാത്രക്കാര്ക്ക് ആയിരുന്നു പ്രായോഗിക വെല്ലുവിളികള് നേരിട്ടത്. നീളമേറിയ വീല്ബേസ് ലഭിച്ചതോടെ ഥാര് റോക്സിന്റെ അകത്തളം എങ്ങനെയുണ്ടെന്ന് പുതിയ സ്പൈ ചിത്രം വ്യക്തമായി കാണിച്ച് തരുന്നു.
ഥാര് റോക്സിന്റെ ഇന്റീരിയറില് ആദ്യം വേറിട്ടുനില്ക്കുന്നത് അതിന്റെ പുതിയ വെള്ള നിറത്തിലുള്ള അപ്ഹോള്സ്റ്ററിയാണ്. ഈ ഡിസൈന് XUV700-ന് സമാനമാണ്. എല്ലാ യാത്രക്കാര്ക്കും ക്രമീകരിക്കാവുന്ന ഹെഡ്റെസ്റ്റുകളുള്ള രണ്ടാമത്തെ നിരയില് മൂന്ന് സീറ്റുകളും ഇതിന് ലഭിക്കുന്നു. കൂടാതെ ഫ്രണ്ട് സീറ്റുകളില് വെന്റിലേഷന് ഫീച്ചറും ഉള്പ്പെട്ടേക്കാം. എസ്യുവിയുടെ പരുക്കന് സ്വഭാവം കണക്കിലെടുക്കുമ്പോള് ഇളം നിറത്തിലുള്ള സീറ്റുകള് പരിപാലിക്കുന്നത് വെല്ലുവിളി നിറഞ്ഞതായിരിക്കുമെന്നാണ് ഞങ്ങള്ക്ക് തോന്നുന്നത്.
ത്രീ-പോയിന്റ് സീറ്റ് ബെല്റ്റുകള്, സ്പ്ലിറ്റ് സെന്റര് ആംറസ്റ്റ്, റിയര് എസി വെന്റുകള്, പവര് വിന്ഡോകള്, റൂഫ് മൗണ്ടഡ് റിയര് സ്പീക്കറുകള് എന്നിവയും കാണാവുന്ന മറ്റ് സവിശേഷതകളില് ഉള്പ്പെടുന്നു. ഥാര് റോക്സിന് പനോരമിക് സണ്റൂഫ് ലഭിക്കുമെന്ന് കഴിഞ്ഞ ദിവസം പുറത്തുവന്ന ടീസറുകള് സൂചിപ്പിച്ചിരുന്നു. എന്നാല് സ്പൈ ചിത്രങ്ങളില് സിംഗിള് പേന് സണ്റൂഫ് ആയതിനാല് ഇത് എസ്യുവിയുടെ ലോവര് അല്ലെങ്കില് മിഡ്സ്പെക്ക് വേരിയന്റ് ആണെന്ന് അനുമാനിക്കാം.
ഥാര് റോക്സിന്റെ അകത്തളത്തിന്റെ മുന്വശത്തായി അപ്ഡേറ്റ് ചെയ്ത ഡാഷ്ബോര്ഡ്, വലിയ ഇന്ഫോടെയ്ന്മെന്റ് സ്ക്രീന് എന്നിവ കാണാം. എസി വെന്റുകള് ഥാര് 3 ഡോറിന് സമാനമായി തുടരുമ്പോള് ഥാര് റോക്സ് 10.25 ഇഞ്ച് ഇന്ഫോടെയ്ന്മെന്റ് സ്ക്രീനുമായി വരുന്നു. അടുത്തിടെ പുറത്തിറങ്ങിയ XUV 3XO എസ്യുവിയിലും ഇതേ ഇന്ഫോടെയിന്മെന്റ് സ്ക്രീനാണുള്ളത്.
XUV700 എസ്യുവിയില് കാണമപ്പെടുന്ന അപ്ഡേറ്റഡ് ഡിജിറ്റല് ഡ്രൈവര് ഡിസ്പ്ലേ, മൗണ്ടഡ് കണ്ട്രോളുകളുള്ള 3 സ്പോക്ക് സ്റ്റിയറിംഗ് വീല് എന്നിവയും ഥാര് റോക്സിന് ലഭിച്ചേക്കും. ലെവല്-2 ADAS, 360 ഡിഗ്രി ക്യാമറ തുടങ്ങിയ സവിശേഷതകളും എസ്യുവി വാഗ്ദാനം ചെയ്യും. ലൈഫ്സ്്റ്റൈല് എസ്യുവി വിഭാഗത്തിലെ സെഗ്മെന്റ് ഫസ്റ്റ് ഫീച്ചറുകളായി സണ്റൂഫും ADAS സാങ്കേതികവിദ്യയും റോക്സില് ഇടംപിടിക്കും.
പുറമെ നിന്ന് നോക്കുമ്പോഴും ഥാര് റോക്സ് 3 ഡോര് ഥാറില് നിന്ന് വ്യത്യസ്തമായാണ് കാണപ്പെടുന്നത്. വൃത്താകൃതിയിലുള്ള എല്ഇഡി ഹെഡ്ലൈറ്റുകള്ക്ക് ചുറ്റുമുള്ള C-ആകൃതിയിലുള്ള എല്ഇഡി ഡിആര്എല്ലുകള്, 6 സ്ലാറ്റുകള് ഉള്ള ഒരു പുതിയ വെര്ട്ടിക്കല് ഗ്രില്, പുതുതായി രൂപകല്പ്പന ചെയ്ത അലോയ് വീലുകള്, C ആകൃതിയിലുള്ള എല്ഇഡി ടെയില്ലൈറ്റുകള് എന്നിവയാണ് പ്രധാന എക്സ്റ്റീരിയര് ഹൈലൈറ്റുകള്. ഇരുവശത്തുമുള്ള വീല് ആര്ച്ചുകളിലാണ് ഇന്ഡിക്കേറ്ററുകള് വരുന്നത്. പിന്നിലെ ഡോര് ഹാന്ഡിലുകള് C-പില്ലറില് ഘടിപ്പിച്ചിരിക്കുന്നു.
മെക്കാനിക്കലായി ഥാര് റോക്സ് നിലവിലുള്ള പവര്ട്രെയിന് ഓപ്ഷനുകള് ഉപയോഗിച്ചേക്കാം. മഹീന്ദ്ര ഥാര് റോക്സ് 2.2 ലിറ്റര് ഡീസല്, 2.0 ലിറ്റര് പെട്രോള് എഞ്ചിനുകള് നല്കാനാണ് സാധ്യത. രണ്ട് എഞ്ചിനുകളും മാനുവല്, ഓട്ടോമാറ്റിക് ട്രാന്സ്മിഷന് യൂണിറ്റുകളുമായി ജോടിയാക്കുമെന്ന് പ്രതീക്ഷിക്കുന്നു. ഉയര്ന്ന വേരിയന്റുകളില് ഓള്-വീല് ഡ്രൈവ് ഓപ്ഷനുകള് വാഗ്ദാനം ചെയ്യുമെങ്കിലും ഥാര് റോക്സിന് റിയര്-വീല് ഡ്രൈവ് പതിപ്പുകളും ലഭിച്ചേക്കുമെന്നാണ് റിപ്പോര്ട്ടുകള്.
ഥാര് റോക്സ് RWD പതിപ്പിന് ട്രാക്ഷന് കണ്ട്രോള് മോഡുകള് ഓപ്ഷണലായി ലഭിക്കുമെന്ന് പ്രതീക്ഷിക്കുന്നു. ലോഞ്ച് ചെയ്തുകഴിഞ്ഞാല് മാരുതി സുസുക്കി ജിംനി, ഫോഴ്സ് ഗൂര്ഖ എന്നീ 5 ഡോര് എസ്യുവികളുമായി ഥാര് റോക്സ് എതിരിടും. 3 ഡോര്, 5 ഡോര് പതിപ്പുകളില് വാഗ്ദാനം ചെയ്യുന്ന ലൈഫ്സ്റ്റൈല് സെഗ്മെന്റിലെ രണ്ടാമത്തെ എസ്യുവിയായി മഹീന്ദ്ര ഥാര് റോക്സ് മാറും. ഈ വര്ഷം ഫോഴ്സ് മോട്ടോര്സ് രണ്ട് വേരിയന്റുകളിലായി പുതിയ ഗൂര്ഖ പുറത്തിറക്കിയിരുന്നു.
Continue with Google