മാരുതി എന്ന സെന്റിമെൻസ് വിട്ടാൽ CNG ഓപ്ഷനിൽ ബ്രെസയേക്കാൾ കേമൻ നെക്സോൺ തന്നെ

ലോഞ്ച് ചെയ്ത കാലം മുതൽ ടാറ്റയുടെ സ്റ്റാർ മോഡലുകളിൽ ഒന്നാണ് നെക്സോൺ എന്നത്. കഴിഞ്ഞ വർഷം സെപ്റ്റംബറിൽ ടാറ്റ നെക്‌സോൺ കാര്യമായ മാറ്റത്തിനും അപ്പ്ഡേറ്റിനും വിധേയമായി, പുതുക്കിയ രൂപഭാവവും നിരവധി പുതിയ ഫീച്ചറുകളും മാത്രമല്ല, ടർബോ പെട്രോൾ എഞ്ചിനൊപ്പം ഏഴ് സ്പീഡ് ഡ്യുവൽ-ക്ലച്ച് ഓട്ടോമാറ്റിക് ട്രാൻസ്മിഷൻ്റെ ഓപ്ഷനും വാഹനത്തിന് ലഭിച്ചു. എന്നിരുന്നാലും, നെക്‌സോണിന് ഒരു CNG പവർട്രെയിനിൻ്റെ രൂപത്തിൽ മറ്റൊരു പ്രധാന അപ്‌ഡേറ്റും കൂടെ ഉടൻ ലഭിക്കും.

2024 ഭാരത് മൊബിലിറ്റി എക്‌സ്‌പോയിൽ ഒരു കൺസെപ്റ്റ് രൂപത്തിൽ ഇതിനെ പ്രദർശിപ്പിച്ചുകൊണ്ട് ടാറ്റ ഈ വികസനം സ്ഥിരീകരിച്ചിരുന്നു. CNG മോഡലുകൾക്ക് രാജ്യത്ത് വർധിച്ചു വരുന്ന ഡിമാൻഡ് മുതലെടുക്കാൻ കൂടിയാണ് ടാറ്റയുടെ ഈ ശ്രമം. നെക്‌സോണിൻ്റെ CNG പതിപ്പിന് ഏറ്റവും വെല്ലുവിളി ഉയർത്തുന്ന മാരുതി ബ്രെസ CNG -യേക്കാൾ ഒരുപടി മുന്നിലാണ് ടാറ്റ മോഡൽ എന്ന് വെളിപ്പെടുത്തുന്ന ചില കാര്യങ്ങൾ നോക്കാം.

ട്വിൻ സിലിണ്ടർ സാങ്കേതികവിദ്യ: മറ്റ് ടാറ്റ CNG കാറുകളിൽ കാണുന്നത് പോലെ, നെക്‌സോൺ CNG -ൽ ട്വിൻ സിലിണ്ടർ സാങ്കേതികവിദ്യ ഉണ്ടായിരിക്കും, ഒരു വലിയ സിലിണ്ടറിന് പകരം രണ്ട് ചെറിയ CNG സിലിണ്ടറുകൾ ഇത് ഉൾക്കൊള്ളുന്നു. ഈ സിലിണ്ടറുകൾ ബൂട്ട് ബെഡിനടിയിലാണ് സ്ഥാപിച്ചിരിക്കുന്നു.

ഇതിനു വേണ്ടി നെക്‌സോണിൻ്റെ ബോഡിക്ക് താഴെയായി സ്‌പെയർ വീൽ പ്ലേസ് ചെയ്യുകയും പുറമേ നിന്ന് ആക്‌സസ് ചെയ്യാൻ സാധിക്കുന്ന തരത്തിൽ ക്രമീകരിക്കുകയും ചെയ്തിരിക്കുന്നു. ഈ കോൺഫിഗറേഷൻ നെക്‌സോൺ CNG -ക്കുള്ളിൽ 230 ലിറ്റർ ബൂട്ട് സ്പേസ് വാഗ്ദാനം ചെയ്യുന്നു. മറുവശത്ത്, ബ്രെസയ്ക്ക് ബൂട്ടിനുള്ളിൽ തന്നെ ഒരു സിഎൻജി സിലിണ്ടർ സ്ഥാപിക്കുന്നു, ബൂട്ട് സ്പെയ്സിൻ്റെ ഭൂരിഭാഗവും ഇത് എടുക്കുന്നു.

ടർബോചാർജ്ഡ് പെട്രോൾ -CNG എഞ്ചിൻ: ടർബോചാർജ്ഡ് പെട്രോൾ എഞ്ചിനുമായി വരുന്ന ഇന്ത്യയിലെ ആദ്യത്തെ CNG മോഡലായിരിക്കും ടാറ്റ നെക്‌സോൺ iCNG. വാഹനത്തിന്റെ പവർ ഔട്ട്പുട്ട് കണക്കുകൾ ഇനിയും പ്രഖ്യാപിച്ചിട്ടില്ല എങ്കിലും, ബ്രെസ സിഎൻജിയേക്കാൾ ഇത് കൂടുതൽ പവർ നൽകും എന്ന് ഞങ്ങൾ വിശ്വസിക്കുന്നു.

പെട്രോൾ പരിവേഷത്തിൽ, ടാറ്റ 1.2 ലിറ്റർ ടർബോ യൂണിറ്റ് 120 PS പവറും 170 Nm torque ഉം ഉത്പാദിപ്പിക്കുന്നു. മറുവശത്ത്, ബ്രെസ CNG ഒരു നോൺ ടർബോ 1.5 ലിറ്റർ പെട്രോൾ -CNG പവർട്രെയിൻ ഉപയോഗിക്കുന്നു, ഇത് 87.8 PS പവറും 121.5 Nm torque ഉം (CNG മോഡിൽ) നൽകുന്നു. ബ്രെസ CNG -ക്കൊപ്പം നൽകാത്ത CNG മോഡ് ഫംഗ്‌ഷനിൽ ഡയറക്ട് സ്റ്റാർട്ട് നെക്‌സോൺ CNG -യ്ക്ക് വരാൻ സാധ്യതയുണ്ട്.

CNG ഓട്ടോമാറ്റിക് ഓപ്ഷൻ: AMT (ഓട്ടോമാറ്റിക്) ട്രാൻസ്മിഷൻ ഓപ്ഷനുമായി വരുന്ന ഇന്ത്യയിലെ ആദ്യത്തെ CNG സബ്കോംപാക്ട് എസ്‌യുവി കൂടിയാണ് നെക്‌സോൺ CNG. അടുത്തിടെ, ടാറ്റ ടിയാഗോയിലും ടാറ്റ ടിഗോറിലും CNG പവർട്രെയിനിനൊപ്പം AMT ട്രാൻസ്മിഷൻ ഓപ്ഷൻ വാഗ്ദാനം ചെയ്യുന്ന ആദ്യത്തെ ബ്രാൻഡായി ടാറ്റ മാറിയിരുന്നു. മറുവശത്ത്, ബ്രെസ സിഎൻജിയിൽ അഞ്ച് സ്പീഡ് മാനുവൽ ട്രാൻസ്മിഷൻ ഓപ്ഷനിൽ മാത്രമേ വരുന്നുള്ളൂ, മാരുതി ഒരു CNG ഓട്ടോമാറ്റിക് ഓപ്ഷൻ അവതരിപ്പിക്കുന്നതിൻ്റെ സൂചനകളൊന്നുമില്ല.

സ്റ്റൈലിഷ് ഡിസൈൻ എലമെന്റുകൾ: മാരുതി ബ്രെസയ്ക്ക് ശക്തവും പക്വവുമായ ഡിസൈൻ ശൈലി ഉണ്ടെങ്കിലും, നെക്‌സോൺ അതിൻ്റെ കൂടുതൽ സ്റ്റൈലിഷ് ഡിസൈൻ ഘടകങ്ങളാൽ ആൾക്കൂട്ടത്തിൽ വേറിട്ടുനിൽക്കുന്നു എന്ന് നിസംശയം പറയാം. വാഹനത്തിൻ്റെ പുതിയ LED DRL -കൾ, എയറോഡൈനാമിക് ശൈലിയിലുള്ള അലോയി വീലുകൾ, സ്ലോപ്പിംഗ് റൂഫിൽ നിന്നുള്ള സ്‌പോർട്ടി സിലൗട്ട് എന്നിവ ഇതിൽ ഉൾപ്പെടുന്നു. ഇതിനു വിപരീതമായി, ബ്രെസ കൂടുതൽ പരമ്പരാഗത ഡിസൈൻ സമീപനവും ഒരു ബോക്‌സി എസ്‌യുവി സ്റ്റൈലും സ്വീകരിക്കുന്നു.

വലിയ ഇൻഫോടെയിൻമെൻ്റ് സിസ്റ്റം ഉൾപ്പെടെ കൂടുതൽ ഫീച്ചറുകൾ: ടാറ്റ നെക്‌സോൺ CNG -യുടെ ടോപ്പ്-സ്പെക്ക് വേരിയൻ്റിൽ 10.25 ഇഞ്ച് ടച്ച്‌സ്‌ക്രീൻ ഇൻഫോടെയിൻമെൻ്റ് സിസ്റ്റം, ഒമ്പത് സ്പീക്കർ ജെബിഎൽ സൗണ്ട് സിസ്റ്റം, സിംഗിൾ പേൻ സൺറൂഫ് തുടങ്ങിയ സൗകര്യങ്ങൾ ടാറ്റ മോട്ടോർസ് ഉൾപ്പെടുത്താം. സുരക്ഷയുടെ കാര്യത്തിൽ, സ്റ്റാൻഡേർഡായി ആറ് എയർബാഗുകളും 360 ഡിഗ്രി ക്യാമറയും ഇതിൽ ഉണ്ടാവും എന്ന് പ്രതീക്ഷിക്കുന്നു.

അതേസമയം, ബ്രെസ സിഎൻജിക്ക് ചെറിയ 7.0 ഇഞ്ച് ടച്ച്‌സ്‌ക്രീൻ ഇൻഫോടെയിൻമെൻ്റ് സിസ്റ്റം, സിംഗിൾ പേൻ സൺറൂഫ്, ആറ് സ്പീക്കർ ആർക്കാമിസ് സൗണ്ട് സിസ്റ്റം എന്നിവ ലഭിക്കുന്നു. സുരക്ഷയുടെ കാര്യത്തിൽ, ബ്രെസ സിഎൻജിയിൽ ഡ്യുവൽ ഫ്രണ്ട് എയർബാഗുകളും റിയർ പാർക്കിംഗ് ക്യാമറയും മാത്രമാണ് മാരുതി സുസുക്കി വാഗ്ദാനം ചെയ്യുന്നത് എന്നത് ശ്രദ്ധിക്കണം.

പ്രതീക്ഷിക്കാവുന്ന വിലകൾ: ടാറ്റ നെക്‌സോൺ CNG -ക്ക് അതിൻ്റെ നോർമൽ പെട്രോൾ വേരിയൻ്റുകളേക്കാൾ ഒരു ലക്ഷം രൂപ വരെ കൂടുതൽ വില ലഭിച്ചേക്കാം. നെക്‌സോണിൻ്റെ ടർബോ പെട്രോൾ വേരിയൻ്റുകൾക്ക് 8.15 ലക്ഷം മുതൽ 15 ലക്ഷം രൂപ വരെയാണ് എക്‌സ്-ഷോറൂം വില. മാരുതി ബ്രെസ CNG -യുടെ വില 9.29 ലക്ഷം മുതൽ 12.10 ലക്ഷം രൂപ വരെയാണ്.