ഇത് വിജയിച്ചാൽ കുറ്റം പറയുന്നവർ പോലും ഒരു മാരുതി വാങ്ങും! പുത്തൻ പദ്ധതിയിൽ 30 കി.മീ മൈലേജ് മിനിമം ഗ്യാരന്റി

സപ്പോർട്ടിംഗ് റോളിൽ എത്തി പിന്നീട് നായകരായ ഒട്ടനവധി താരങ്ങളെ നാം സിനിമയിൽ കണ്ടിട്ടുണ്ട്, എന്നാൽ വാഹന ലോകതത്ത് അവ അത്ര സാധാരണമല്ല. ജിംനി വരും എന്ന കോളിളക്കങ്ങൾ എല്ലാം നടക്കുന്ന സമയത്ത് ഈ മോഡലിനെ ആരും ശ്രദ്ധിച്ചു പോലുമില്ല എന്നതാണ് വാസ്തവം. 2023 ഓട്ടോ എക്‌സ്‌പോയിൽ മാരുതി പവലിയനിൽ എല്ലാവരും ജിംനിയ്ക്കായിട്ടാണ് കാത്തിരുന്നത്, അവിടെ അന്ന് ഞങ്ങളും ഉണ്ടായിരുന്നു. ജിനിംയ്ക്ക് ഒപ്പം തന്നെ അന്ന് ആ വേദിയിൽ അവതരിപ്പിച്ച ഫ്രോങ്ക്സിന് കാര്യമായ പരിഗണന ഒന്നും തന്നെ കിട്ടിയിരുന്നില്ല.

ജിംനിയ്ക്ക് അടുത്തു നിന്ന് ഫോട്ടോ എടുക്കാൻ ജനം തിക്കും തിരക്കും കൂട്ടിയപ്പോൾ പ്രത്യേകിച്ച് ആരും തന്നെ ഫ്രോങ്ക്സിനെ നോക്കി പോലുമില്ല. എന്നാൽ പണിക്കാർ ഉപേക്ഷിച്ച കല്ല് മൂലക്കല്ലായി എന്ന ബൈബിൾ വചനം പോലെ തന്നെ മാരുതിയുടെ ഒരു മൂലക്കല്ലായി ഇന്ന് ഫ്രോങ്ക്സ് തീർന്നിരിക്കുകയാണ്.

മുകളിൽ സൂചിപ്പിച്ചതു പോലെ 2023 അവതരിപ്പിച്ച, മാരുതി സുസുക്കി ഫ്രോങ്ക്‌സ് വളരെ വേഗത്തിലാണ് ട്രാക്ഷൻ നേടിയത്, വെറും 10 മാസത്തിനുള്ളിൽ ഏറ്റവും വേഗത്തിൽ ഒരു ലക്ഷം ആഭ്യന്തര വിൽപ്പന നേടിയ ബ്രാൻഡിൻ്റെ ചരിത്രത്തിലെ മോഡലായി മാറി ഈ ക്രോസ്ഓവർ മാറി എന്നത് ശ്രദ്ധേയമാണ്.

ഈ ആക്കം കൂട്ടിക്കൊണ്ട്, അടുത്ത ഏഴ് മാസത്തിനുള്ളിൽ ഫ്രോങ്ക്സ് അതിൻ്റെ വിൽപ്പന ഇരട്ടിയാക്കി എന്നതും ശ്രദ്ധേയമാണ്. മാരുതി സുസുക്കി അതിൻ്റെ ജനപ്രീതിയുടെ അടിസ്ഥാനത്തിൽ വിവിധ രാജ്യാന്തര വിപണികളിലേക്കും ഫ്രോങ്ക്സിനെ കയറ്റുമതി ചെയ്യാൻ തുടങ്ങി. 2016 -ൽ ജാപ്പനീസ് വിപണിയിലെത്തിയ ബലേനോയ്ക്ക് പിന്നാലെ ജപ്പാനിലേക്ക് കയറ്റുമതി ചെയ്യുന്ന രണ്ടാമത്തെ മാരുതി സുസുക്കി മോഡലാണ് ഫ്രോങ്ക്സ്.

ഫ്രോങ്ക്സിന്റെ മഹിമ ഊതി പെരുപ്പിക്കാൻ അല്ല ഞങ്ങൾ ഈ ലേഖനം എഴുതുന്നത്, മറിച്ച് മാരുതിയുടെ പുതിയ ഹൈബ്രിഡ് പദ്ധതികളെക്കുറിച്ച് വ്യക്തമാക്കാനാണ്. ജാപ്പനീസ് ഭീമനായ ടൊയോട്ടയുമായി സഹകരിച്ച് ഗ്രാൻഡ് വിറ്റാര, അർബൻ ക്രൂയിസർ ഹൈറൈഡർ തുടങ്ങിയ മോഡലുകളുടെ സ്ട്രോംഗ് ഹൈബ്രിഡ് പതിപ്പുകൾ വിപണിയിൽ എത്തിച്ചതിലൂടെ മാരുതി സുസുക്കി ശ്രദ്ധേയമായ വിജയം കൈവരിച്ചു.

ഇവയ്ക്ക് ജനങ്ങളിൽ നിന്ന് ലഭിച്ച വരവേല്പ്പിനെ അടിസ്ഥാനമാക്കിയും ഫ്രോങ്ക്സിന്റെ ജനപ്രീതിയും കണക്കിലെടുത്ത്, വരാനിരിക്കുന്ന ഫ്രോങ്ക്സ് ഫെയ്‌സ്‌ലിഫ്റ്റിലൂടെ മാരുതി സുസുക്കി തങ്ങളുടെ മാസ് -മാർക്കറ്റ് ലൈനപ്പിലേക്ക് സ്ട്രോംഗ് ഹൈബ്രിഡ് സാങ്കേതികവിദ്യ അവതരിപ്പിക്കും എന്ന് ഞങ്ങൾ പ്രതീക്ഷിക്കുന്നു. മാരുതി സുസുക്കിയും ടൊയോട്ടയും 2025 -ൽ ഇലക്‌ട്രിക് മൊബിലിറ്റിയിലേക്ക്ചുവടു വെയ്ക്കാനുള്ള ഒരുക്കത്തിലാണ്.

ഇതോടൊപ്പം, മാരുതി സുസുക്കി തങ്ങളുടെ ബദൽ ഫ്യുവൽ സാങ്കേതികവിദ്യകൾ വിപുലീകരിക്കാനും വിവിധ വില വിഭാഗങ്ങളിൽ ഹൈബ്രിഡ് ഓപ്ഷനുകൾ അവതരിപ്പിക്കാനുമുള്ള ശ്രമങ്ങൾ മുമ്പത്തേക്കാൾ കൂടുതൽ ശക്തമാക്കുകയാണ്. ഇന്ത്യയുടെ അനുദിനം വികസിച്ചു കൊണ്ടിരിക്കുന്ന ഹൈബ്രിഡ് വാഹന വിപണിയിൽ ഒരു പ്രധാന പ്ലെയറായി നിലകൊള്ളുന്ന ഫ്രോങ്ക്സ് ഈ തന്ത്രത്തിൽ നിർണായക പങ്ക് വഹിക്കും എന്ന് വ്യക്തവും ശക്തവുമായ റിപ്പോർട്ടുണ്ട്.

വരാനിരിക്കുന്ന ഫ്രോങ്ക്‌സ് ഫെയ്‌സ്‌ലിഫ്റ്റ്, അടുത്ത വർഷം വിപണിയിൽ എത്താൻ സാധ്യതയുണ്ട്, Z12E എഞ്ചിൻ വാഗ്ദാനം ചെയ്യുന്ന മാരുതി സുസുക്കിയുടെ ഇൻ -ഹൗസ് സ്ട്രോംഗ് ഹൈബ്രിഡ് സിസ്റ്റം ഇത് അവതരിപ്പിക്കും. ഈ നൂതന ഹൈബ്രിഡ് സജ്ജീകരണം ഇന്തോ ജാപ്പനീസ് ബ്രാൻഡിന്റെ മറ്റു ജനപ്രിയ മോഡലുകളായ ബലേനോ ഉൾപ്പെടെയുള്ളവയുടെ നിലവിലെ മോഡലുകളുടെ ജനറേഷൻ അപ്പ്ഡേറ്റുകളിലും ഭാവി മോഡലുകളിലും ഉൾപ്പെടുത്തും എന്ന് പ്രതീക്ഷിക്കുന്നു.

പ്രാദേശികവൽക്കരിച്ച ഹൈബ്രിഡ് സാങ്കേതികവിദ്യ വികസിപ്പിക്കാനുള്ള ശ്രമങ്ങൾ മാരുതി സുസുക്കി ഇതിനോടകം തന്നെ പ്രഖ്യാപിച്ചിട്ടുണ്ട്, ഇത് വിജയിച്ചാൽ, 30 കിലോമീറ്ററിലധികം മൈലേജ് നൽകുന്ന ഈ നൂതന ശക്തമായ ഹൈബ്രിഡ് സിസ്റ്റം അവതരിപ്പിക്കുന്ന ആദ്യത്തെ കോംപാക്ട് ക്രോസ്ഓവർ എസ്‌യുവി മോഡലായി 2025 ഫ്രോങ്ക്സ് മാറിയേക്കാം.

ഇവിടെ സൂചിപ്പിച്ച ഹൈബ്രിഡ് പവർട്രെയിനിന് പുറമേ, പുതുക്കിയ ഫ്രോങ്ക്‌സിന് അതിൻ്റെ ആകർഷണവും അപ്പീലും കൂടുതൽ വർധിപ്പിക്കുന്നതിന് സൂക്ഷ്മമായ സൗന്ദര്യവർധക മാറ്റങ്ങളും അപ്പ്ഡേറ്റുകളും ഇൻ്റീരിയർ മെച്ചപ്പെടുത്തലുകളും ലഭിക്കും എന്ന് ഞങ്ങൾ പ്രതീക്ഷിക്കുന്നു.മാരുതി സുസുക്കിയുടെ വരാനിരിക്കുന്ന പ്രാദേശികമായി ഉൽപ്പാദിപ്പിക്കുന്ന HEV സിസ്റ്റം താങ്ങാനാവുന്ന വിലയ്ക്കും ഉയർന്ന മൈലേജിനും കാര്യമായ മുൻഗണന നൽകും.