ഇതോടെ ഒന്നേൽ നേടും ഇല്ലേൽ മൂടും! പുത്തൻ അദ്യായം തുറക്കാൻ മാരുതി; e-വിറ്റാരയുടെ വരവ് വ്യക്തമാക്കി മാരുതി

മാരുതി സുസുക്കി തങ്ങളുടെ ആദ്യത്തെ ഇലക്ട്രിക് കാർ മോഡലായ e-വിറ്റാരയെ 2025 ജനുവരിയിൽ ഭാരത് മൊബിലിറ്റി എക്‌സ്‌പോയിൽ അവതരിപ്പിക്കാനുള്ള ഒരുക്കത്തിലാണ്. പ്രാദേശിക വിപണിയിക്കും, കയറ്റുമതി ആവശ്യങ്ങൾക്കുമായി സുസുക്കിയുടെ ഗുജറാത്ത് നിർമ്മാണ കേന്ദ്രത്തിലാവും e-വിറ്റാര ഇവി ഇന്തോ ജാപ്പനീസ് ബ്രാൻഡ് നിർമ്മിക്കുന്നത്. അടിസ്ഥാനപരമായി e-വിറ്റാരയുടെ ബാഡ്ജ് എഞ്ചിനീയറിംഗ് മോഡലായ സുസുക്കി ടൊയോട്ട അർബൻ ഇലക്ട്രിക് എസ്‌യുവിയും ഇവിടെ തന്നെ നിർമ്മിക്കും. ഒരേ ഫാക്ടറിയിൽ നിന്ന് ഇന്ത്യൻ, ആഗോള വിപണികൾക്കായി. e-വിറ്റാര നിർമ്മിക്കപ്പെടും. അത് കൂടാതെ ഏതാനും മാസങ്ങൾക്ക് ശേഷം ടൊയോട്ട ഇവിയും എത്തും എന്ന് പ്രതീക്ഷിക്കുന്നു.

ഈ വർഷം ആദ്യം തന്നെ e-വിറ്റാര കമ്പനി അനാച്ഛാദനം ചെയ്‌തിരുന്നു, ഈ അവതരണത്തിൽ വാഹനത്തിൻ്റെ മിക്ക സവിശേഷതകളും കമ്പനി വെളിപ്പെടുത്തിയിരുന്നു. എന്നിരുന്നാലും, കാറിൻ്റെ വില മത്സരാധിഷ്ഠിതമായി നിലനിർത്തുന്നതിനും രാജ്യത്തെ വിപണി സാഹചര്യങ്ങൾക്ക് അനുയോജ്യമാക്കുന്നതിനും ഇന്ത്യ-നിർദ്ദിഷ്ട മാറ്റങ്ങൾ ഉൾക്കൊള്ളും എന്നത് പ്രത്യേകം ശ്രദ്ധിക്കണം.

ഭാരത് മൊബിലിറ്റി എക്‌സ്‌പോയിൽ ഇന്ത്യൻ സ്പെക്ക് കാർ പ്രദർശിപ്പിക്കും. വില പ്രഖ്യാപനത്തോടൊപ്പം ഏകദേശം അതേ സമയം തന്നെ ബുക്കിംഗും ആരംഭിക്കും എന്ന് പ്രതീക്ഷിക്കുന്നു. ഓരോ മാസവും ഏകദേശം 1,000 യൂണിറ്റ് e-വിറ്റാര ഇന്ത്യയിൽ വിൽക്കാനാണ് മാരുതി സുസുക്കി തുടക്കത്തിൽ ലക്ഷ്യമിടുന്നത് എന്നാണ് റിപ്പോർട്ടുകൾ സൂചിപ്പിക്കുന്നത്.

മാരുതി സുസുക്കി e-വിറ്റാരയുടെ വില 20 ലക്ഷം മുതൽ 25 ലക്ഷം രൂപയ്ക്ക് ഇടയിലായിരിക്കും എന്നാണ് പൊതുവെയുള്ള പ്രതീക്ഷ. എന്നിരുന്നാലും, മഹീന്ദ്ര BE 6, XEV 9e എന്നിവയും അവയുടെ സൂപ്പർ കോംപറ്റിറ്റീവ് പ്രൈസ് ടാഗുകൾ, മറ്റ് ഇലക്ട്രിക് കാറുകളുടെ നിർമ്മാതാക്കളെ വിലയുടെ കാര്യത്തിൽ ശരിക്കും അസ്വസ്ഥമാക്കിയിരിക്കുന്നു.

അതിനാൽ, e-വിറ്റാരയെ വളരെ ശ്രദ്ധേയമായ ഒരു ചോയിസാക്കി മാറ്റുന്ന ഒരു വിലയുമായി വരാനുള്ള സമ്മർദ്ദം വ്യക്തമായും മാരുതി സുസുക്കിയിൽ തന്നെയാണ്. ഇലക്‌ട്രിക് കാറിൻ്റെ വില ഏകദേശം 15 ലക്ഷം രൂപയായിരിക്കണം എന്നാണ് ജനങ്ങൾ ആഗ്രഹിക്കുന്നത്. ഇന്ത്യയിലെ ചെറുതും എന്നാൽ അതിവേഗം വളരുന്നതുമായ ഇലക്ട്രിക് വാഹന സെഗ്മെന്റിൽ ഗണ്യമായ ഒരു കോളിളക്കമുണ്ടാക്കാൻ ഇത് ആവശ്യമാണ്.

e-വിറ്റാരയുടെ മെക്കാനിക്കൽ സൈഡിലേക്ക് വരുമ്പോൾ, ഇലക്ട്രിക് എസ്‌യുവിക്ക് 49 kWh, 60 kWh എന്നിങ്ങനെ രണ്ട് ബാറ്ററി പായ്ക്കുകൾ ലഭിക്കുമെന്ന് പ്രതീക്ഷിക്കുന്നു. ഈ രണ്ട് ബാറ്ററി പാക്കുകളുടെയും ഹൈലൈറ്റ് അവ BYD -യിൽ നിന്നുള്ള ബ്ലേഡ് ടൈപ്പാണ് എന്നതാണ്. ഇത് വളരെ കരുത്തുറ്റതും ദീർഘകാലം നിലനിൽക്കുന്നതും ഉയർന്ന ഡ്രൈവിംഗ് റേഞ്ച് വാഗ്ദാനം ചെയ്യുന്നതുമായ യൂണിറ്റുകളാണ്.

സിംഗിൾ ചാർജിൽ ലഭിക്കുന്ന ഡ്രൈവിംഗ് റേഞ്ചിനെക്കുറിച്ച് പറയുകയാണെങ്കിൽ, ചെറിയ ബാറ്ററി പായ്ക്ക് 300 മുതൽ 320 കിലോമീറ്റർ റിയൽ വേൾഡ് റേഞ്ച് വാഗ്ദാനം ചെയ്യും എന്ന് പ്രതീക്ഷിക്കുന്നു, അതേസമയം വലിയ ബാറ്ററി പായ്ക്ക് e-വിറ്റാരയിൽ 400 കിലോമീറ്റർ റിയലിസ്റ്റിക് റേഞ്ച് നൽകും എന്നത് പ്രതീക്ഷിക്കാം.

അന്താരാഷ്ട്രതലത്തിൽ, ഇലക്ട്രിക് എസ്‌യുവിക്ക് ഒന്നിലധികം പവർട്രെയിനുകൾ ലഭിക്കുന്നു. എൻട്രി ലെവൽ യൂണിറ്റ് ഫ്രണ്ട് വീൽ ഡ്രൈവ് സിസ്റ്റത്തോടെയാണ് വരുന്നത്, 142 bhp പവറും 189 Nm ടോർക്കും മോട്ടോർ സൃഷ്ടിക്കുന്നു. ഉയർന്ന പവർ പുറപ്പെടുവിക്കുന്ന ഫ്രണ്ട് വീൽ ഡ്രൈവ് വേരിയൻ്റിന് 172 bhp മാക്സ് പവറും 189 Nm ടോർക്കും ലഭിക്കുന്നു. ഓൾ വീൽ ഡ്രൈവ് സിസ്റ്റവുമായി ഒരു ടോപ്പ് ഓഫ് ദി ലൈൻ ട്രിമ്മും നിർമ്മാതാക്കൾ വാഗ്ദാനം ചെയ്യാറുണ്ട്, ഓരോ ആക്സിലിലും ഒന്നു വീതം രണ്ട് ഇലക്ട്രിക് മോട്ടോറുകൾ ഇതിൽ ഉണ്ട്.

ഓൾ വീൽ ഡ്രൈവ് പതിപ്പ് 184 bhp പരമാവധി പവറും 300 Nm ടോർക്കും പുറപ്പെടുവിക്കുന്ന, ഈ വേരിയൻറ് പവർ ഔട്ട്പുട്ട് കണക്കുകളും അതിൻ്റെ എവിടേയും പോകാനുള്ള കഴിവും കണക്കിലെടുക്കുമ്പോൾ ഡ്രൈവ് ചെയ്യാൻ ഏറ്റവും ആവേശകരമായ ഒന്നായിരിക്കും എന്ന് നിസംശയം പറയാം. എന്നിരുന്നാലും, ഇവിടെ ഓൾ വീൽ ഡ്രൈവ് കാറുകൾക്കുള്ള കുറഞ്ഞ ഡിമാൻഡ് കണക്കിലെടുത്ത് മാരുതി ഇന്ത്യയിൽ മൂന്ന് വകഭേദങ്ങളും വാഗ്ദാനം ചെയ്യുമോ എന്നത് കണ്ടറിയണം.