തള്ളല്ല... ഈ കാറിന് 33.73 കിലോമീറ്റര്‍ മൈലേജ് കിട്ടുമെന്ന് മാരുതി! ഇനി ആരെങ്കിലും ഇവി വാങ്ങുമോ?

ഇന്ത്യന്‍ വാഹന ലോകം ഏറെ ആകാംക്ഷയോടെ കാത്തിരിക്കുന്ന കാറാണ് മാരുതി സുസുക്കി ഡിസയര്‍ (Maruti Suzuki Dzire). കോംപാക്ട് സെഡാന്റെ നാലാം തലമുറ പതിപ്പ് ഏാതാനും ദിവസങ്ങള്‍ക്കുള്ളില്‍ പുറത്തിറങ്ങാന്‍ പോകുകയാണ്. മോഡേണ്‍ ഡിസൈന്‍, നൂതന ഫീച്ചറുകള്‍ എന്നിവ ഉള്‍ക്കൊള്ളിച്ചെത്തുന്ന കാര്‍ ഇതിനോടകം വാഹനപ്രേമികള്‍ക്കിടയില്‍ വലിയ പ്രതീക്ഷകള്‍ സൃഷ്ടിച്ചിട്ടുണ്ട്. നവംബര്‍ 11-ന് നടക്കാന്‍ പോകുന്ന ലോഞ്ചിന് മുന്നോടിയായി കാറിന്റെ ARAI ക്ലെയിംഡ് ഇന്ധനക്ഷമത (Maruti Dzire Mileage) വിവരങ്ങള്‍ വെളിപ്പെടുത്തിയിരിക്കുകയാണ് മാരുതി സുസുക്കി ഇപ്പോള്‍. അതിനെ കുറിച്ച് വിശദമായി ഈ ലേഖനത്തില്‍ വായിക്കാം.

ഈ വര്‍ഷം പുറത്തിറങ്ങി വമ്പന്‍ ഹിറ്റായി മാറിയ മാരുതി സ്വിഫ്റ്റ് ഹാച്ച്ബാക്കിനെ അടിസ്ഥാനമാക്കിയുള്ള കാറാണെങ്കിലും കാണാന്‍ രണ്ടും തമ്മില്‍ വലിയ വ്യത്യാസമുണ്ട്. ഡിസൈന്‍ വശം മൊത്തത്തില്‍ ഉടച്ച് വാര്‍ത്തിട്ടുണ്ടെങ്കിലും രണ്ടിന്റെയും ഹൃദയം ഒന്നാണ്. മാരുതി സ്വിഫ്റ്റിലൂടെ അരങ്ങേറിയ പുതിയ 1.2 ലിറ്റര്‍ Z സീരീസ് 3 സിലിണ്ടര്‍ പെട്രോള്‍ എഞ്ചിന്‍ തന്നെയാണ് ഡിസയറിനും തുടിപ്പേകുന്നത്.

82 bhp പവറും 112 Nm ടോര്‍ക്കും വികസിപ്പിക്കാന്‍ ശേഷിയുള്ള ഈ എഞ്ചിന്‍ 5 സ്പീഡ് മാനുവല്‍ അല്ലെങ്കില്‍ എഎംടി ട്രാന്‍സ്മിഷന്‍ ഓപ്ഷനുകളില്‍ വാങ്ങാനാകും. സ്വിഫ്റ്റില്‍ നിന്ന് വ്യത്യസ്തമായി ഡിസയറിന്റെ പെട്രോള്‍ പതിപ്പിനൊപ്പം തന്നെ സിഎന്‍ജി പതിപ്പും ലോഞ്ച് ചെയ്യും. സ്വിഫ്റ്റ് പെട്രോള്‍ പുറത്തിറങ്ങി മാസങ്ങള്‍ക്ക് ശേഷമായിരുന്നു സിഎന്‍ജി വേരിയന്റുകള്‍ വിപണിയില്‍ എത്തിയിരുന്നത്. ഡിസയര്‍ സിഎന്‍ജി മോഡില്‍ മാനുവല്‍ ഗിയര്‍ബോക്‌സ് ഓപ്ഷന്‍ മാത്രമേ ഉണ്ടായിരിക്കുകയുള്ളൂ.

മുന്‍ഗാമിയേക്കാള്‍ കൂടുതല്‍ മൈലേജ് പുതിയ ഡിസയര്‍ വാഗ്ദാനം ചെയ്യുമെന്നാണ് മാരുതിപറയുന്നത്. സെഡാന്റെ പെട്രോള്‍ വേരിയന്റുകള്‍ കുറഞ്ഞത് ലിറ്ററിന് 24.97 കിലോമീറ്റര്‍ ഇന്ധനക്ഷമത വാഗ്ദാനം ചെയ്യുന്നു. മുന്‍ തലമുറ ഡിസയറുമായി താരതമ്യപ്പെടുത്തുമ്പോള്‍ മൈലേജ് രണ്ട് കിലോമീറ്റര്‍ കൂടി. ലിറ്ററിന് 25 കിലോമീറ്ററാണ് എഎംടി വേരിയന്റുകളുടെ മൈലേജ് പറയുന്നത്. ഡിസയര്‍ സിഎന്‍ജി നിലവില്‍ 31 കിലോമീറ്റര്‍ മൈലേജ് വാഗ്ദാനം ചെയ്യുന്നു. പുത്തന്‍ അവതാരത്തില്‍ മൈലേജ് രണ്ട് കിലോമീറ്റര്‍ വര്‍ധിച്ച് കിലോഗ്രാമിന് 33.73 കിലോമീറ്ററായി.

കാഴ്ചയുടെ കാര്യത്തില്‍ ന്യൂ-ജെന്‍ ഡിസയര്‍ ഓള്‍ എല്‍ഇഡി ഘടകങ്ങളോടും കൂടിയ ചതുരാകൃതിയിലുള്ള ഹെഡ്ലാമ്പുകളുമായാണ് വരുന്നത്. ഈ ഹെഡ്ലാമ്പുകള്‍ വലിയ റേഡിയേറ്റര്‍ ഗ്രില്ലിന് മുകളില്‍ ഇരിക്കുന്ന കട്ടിയുള്ള ഒരു ക്രോം ബാര്‍ ഘടിപ്പിച്ചിരിക്കുന്നു. ഇരുവശത്തും വൃത്താകൃതിയിലുള്ള ഫോഗ് ലാമ്പുകളുള്ള മുന്‍ ബമ്പറും സ്‌പോര്‍ട്ടിയായി കാണപ്പെടുന്നു. വശങ്ങളിലേക്ക് നീങ്ങിയാല്‍ കാറിന്റെ റൂഫ്‌ലൈന്‍ ഇപ്പോള്‍ ബൂട്ട് ഏരിയയുമായി മികച്ച രീതിയില്‍ സംയോജിക്കുന്നു.

15 ഇഞ്ച് ഡയമണ്ട് കട്ട് അലോയ് വീലുകളിലാണ് ഇത് ഒാടുക. പിന്‍ഭാഗത്ത്, പുതിയ ഡിസയറിന് '3D ട്രിനിറ്റി എല്‍ഇഡി ഘടകങ്ങള്‍' ഉള്ള ചതുരാകൃതിയിലുള്ള ടെയില്‍ ലാമ്പുകള്‍ ഉണ്ട്. അവ ഔട്ട്ഗോയിംഗ് മോഡലിലുള്ളതിനേക്കാള്‍ ചെറുതാണെങ്കിലും സമാനമായ ആകൃതിയാണ്, ബൂട്ട്-ലിഡ് ഡിസൈനും പിന്‍ ബമ്പറും മുന്‍ഗാമികളുടേതിന് സമാനമാണ്,

പ്രീമിയം മോഡലുകളില്‍ നിന്ന് പ്രചോദനം ഉള്‍ക്കൊണ്ട നവീകരിച്ച ക്യാബിനാണ് ഡിസയറിന്റെ മറ്റൊരു ഹൈലൈറ്റ്. പുതിയ സ്വിഫ്റ്റും ഡിസയറും ഒരേ ഡാഷ്‌ബോര്‍ഡ് ലേഔട്ട് പിന്തുടരുന്നതെങ്കിലും സെഡാനില്‍ 4 ഷെയ്ഡ് ലേഔട്ട് ലഭിക്കുന്നു. മള്‍ട്ടിഫങ്ഷന്‍ സ്റ്റിയറിംഗ് വീല്‍, അനലോഗ് ഡയലുകള്‍, എച്ച്വിഎസി കണ്‍ട്രോളുകള്‍, എസി വെന്റുകള്‍, 9 ഇഞ്ച് സ്മാര്‍ട്ട്പ്ലേ പ്രോ പ്ലസ് ഇന്‍ഫോടെയ്ന്‍മെന്റ് സിസ്റ്റം, വയര്‍ലെസ് ആപ്പിള്‍ കാര്‍പ്ലേ, ആന്‍ഡ്രോയിഡ് ഓട്ടോ കണക്റ്റിവിറ്റി തുടങ്ങിയ സവിശേഷതകളും വരുന്നു.

സെഗ്‌മെന്റില്‍ ആദ്യമായി ഇലക്‌ട്രോണിക് സണ്‍റൂഫ് ലഭിക്കുന്ന ആദ്യത്തെ കാര്‍ കൂടിയാണ് ഡിസയര്‍. ക്രൂയിസ് കണ്‍ട്രോള്‍, റിയര്‍ എസി വെന്റുകള്‍, റിയര്‍ സെന്റര്‍ ആംറെസ്റ്റ്, ഉയര്‍ന്ന വേരിയന്റുകളില്‍ 360 ഡിഗ്രി ക്യാമറ എന്നിവ കൂടാതെ ഡിസയറിന്റെ എല്ലാ വേരിയന്റുകളിലും റിയര്‍ ഡീഫോഗര്‍ സ്റ്റാന്‍ഡേര്‍ഡായി വരും.

ആറ് എയര്‍ബാഗുകള്‍, ഇഎസ്പി, ഹില്‍ ഹോള്‍ഡ് അസിസ്റ്റ്, ഇബിഡിയുള്ള എബിഎസ്, ബ്രേക്ക് അസിസ്റ്റ്, എല്ലാ സീറ്റുകള്‍ക്കും ത്രീ-പോയിന്റ് സീറ്റ് ബെല്‍റ്റുകള്‍, ISOFIX മൗണ്ടുകള്‍ എന്നിവയാണ് ന്യൂജെന്‍ ഡിസയറിലെ സേഫ്റ്റി ഫീച്ചറുകള്‍. ഹോണ്ട അമേസ്, ഹ്യുണ്ടായി ഓറ, ടാറ്റ ടിഗോര്‍ എന്നിവയുമായി മത്സരിക്കുന്ന കാര്‍ അക്രമണാത്മകമായ വിലയില്‍ തന്നെ വരുമെന്ന് പ്രതീക്ഷിക്കാം. അത് അറിയാന്‍ ഏതാനും ദിവസങ്ങള്‍ കൂടി കാത്തിരുന്നാല്‍ മതി.