5.99 ലക്ഷം രൂപയ്ക്ക് 20 കി.മീ മൈലേജുള്ള എസ്‌യുവി! വാങ്ങാന്‍ 'അടികൂടേണ്ട' അവസ്ഥ

ഉത്സവ സീസണ്‍ തുടങ്ങിയതോടെ ഇന്ത്യന്‍ നിരത്തുകളില്‍ പുത്തന്‍ കാര്‍ ലോഞ്ചുകളുടെ ചാകരയാണ്. പുതിയ മോഡലുകള്‍ക്കൊപ്പം നിലവിലുള്ള മോഡലുകള്‍ മുഖംമിനുക്കിയെത്താനും തുടങ്ങിയിട്ടുണ്ട്. ഇന്ത്യയിലെ കാര്‍പ്രേമികള്‍ ആകാംക്ഷയോടെ കാത്തിരുന്ന ഒരു എസ്‌യുവി മോഡല്‍ ആയിരുന്നു നിസാന്‍ മാഗ്‌നൈറ്റ് ഫെയ്‌സ്‌ലിഫ്റ്റ്. കഴിഞ്ഞ വെള്ളിയാഴ്ച (04 ഒക്‌ടോബര്‍ 2024) ഈ സബ് 4 മീറ്റര്‍ എസ്‌യുവി ഔദ്യോഗികമായി ഇന്ത്യയില്‍ അവതരിപ്പിച്ചു. നേരത്തെ പ്രഖ്യാപിച്ചത് പോലെ തന്നെ ലോഞ്ചിന്റെ പിറ്റേ ദിവസം മുതല്‍ തന്നെ ഈ കാറിന്റെ വിതരണവും ജാപ്പനീസ് കമ്പനി ആരംഭിച്ചു. നിസാന്‍ മാഗ്നൈറ്റ് ഫെയ്സ്ലിഫ്റ്റ് മുന്‍കൂട്ടി ബുക്ക് ചെയ്തവര്‍ക്ക് ഈ വാര്‍ത്ത വളരെയധികം സന്തോഷം നല്‍കുന്നതാണ്.

നിസാന്‍ മാഗ്നൈറ്റ് ഫെയ്സ്ലിഫ്റ്റിന്റെ പ്രാരംഭ വില വെറും 5.99 ലക്ഷം രൂപയാണ്. മുഖം മിനുക്കലിന് ശേഷം സാധാരണയായി കാര്‍ നിര്‍മാതാക്കള്‍ വില ഉയര്‍ത്തുന്നത് സാധാരണമാണെങ്കിലും നിസാന്‍ ആ പാത സ്വീകരിച്ചിട്ടില്ല. ഈ കാറിന്റെ ടോപ് എന്‍ഡ് വേരിയന്റിന് 11.50 ലക്ഷം രൂപയാണ് വില. എക്‌സ്-ഷോറൂം വിലകളാണിത്.

മാത്രമല്ല ആദ്യത്തെ 10,000 ഉപഭോക്താക്കള്‍ക്ക് മാത്രമായിരിക്കും ഈ വിലയില്‍ കാര്‍ ലഭ്യമാകുക. 10,000 ഉപഭോക്താക്കള്‍ക്ക് വിതരണം ചെയ്ത് കഴിഞ്ഞാല്‍ വില വര്‍ധിക്കാന്‍ സാധ്യതയുണ്ട്. അതുകൊണ്ട് തന്നെ വണ്ടി വേണ്ടവര്‍ വേഗം ബുക്ക് ചെയ്യുന്നതാണ് നല്ലത്. നിസാന്‍ മാഗ്‌നൈറ്റിന്റെ രൂപകല്‍പ്പനയെ കുറിച്ച് പറയുമ്പോള്‍ മൊത്തത്തില്‍ കാറില്‍ പുതുമ കൊണ്ടുവരാന്‍ കമ്പനി ശ്രമങ്ങള്‍ നടത്തിയിട്ടുണ്ട്.

ക്രോം, ഗ്ലോസ്-ബ്ലാക്ക് ഘടകങ്ങള്‍ ഉള്ള വിശാലവും വലുതുമായ പുതിയ ഗ്രില്ലാണ് ഫ്രണ്ട് ഫാസിയയിലെ ശ്രദ്ധേയമായ ഘടകം. പഴയ രൂപമാണെങ്കിലും പാറ്റേണ്‍ നവീകരിച്ചു. ഫോഗ് ലാമ്പുകളോട് കൂടി ഫോക്‌സ് സ്‌കിഡ് പ്ലേറ്റുകളും മനോഹരമാക്കിയിട്ടുണ്ട്. സിഗ്‌നേച്ചര്‍ ശൈലിയിലാണ് എല്‍ഇഡി ഹെഡ്ലൈറ്റുകളും ഡിആര്‍എല്ലുകളും വരുന്നത്. പുതിയ ഡിസൈനില്‍ വരുന്ന 16 ഇഞ്ച് അലോയ് വീലുകള്‍ മാറ്റി നിര്‍ത്തിയാല്‍ വശങ്ങളില്‍ കാര്യമായ മാറ്റങ്ങളില്ല. പിന്നില്‍ ടെയില്‍ ലാമ്പുകളുടെ ആകൃതി ഒന്നാണെങ്കിലും ലൈറ്റിംഗില്‍ പുതുമയുണ്ട്.

ഫെയ്സ്ലിഫ്റ്റഡ് നിസാന്‍ മാഗ്നൈറ്റ് മോഡലിന് രണ്ട് എഞ്ചിന്‍ ഓപ്ഷനുകളുണ്ട്. 1.0 ലിറ്റര്‍ നാച്ചുറലി ആസ്പിറേറ്റഡ് (NA) പെട്രോള്‍ എഞ്ചിനും 1.0 ലിറ്റര്‍ ടര്‍ബോ പെട്രോള്‍ എഞ്ചിനും ഇതില്‍ ഉള്‍പ്പെടുന്നു. നാചുറലി ആസ്പിരേറ്റഡ് പെട്രോള്‍ എഞ്ചിന്‍ 72 PS പവറും 96 Nm ടോര്‍ക്കും സൃഷ്ടിക്കുന്നു.

ടര്‍ബോ പെട്രോള്‍ എഞ്ചിന്‍ മാനുവല്‍ ഗിയര്‍ബോക്സ് ഓപ്ഷന്‍ 100 PS പവറും 160 Nm ടോര്‍ക്കും നല്‍കുമ്പോള്‍ സിവിടി ഓപ്ഷന്‍ 100 PS പവറും 152 Nm ടോര്‍ക്കും നല്‍കുന്ന തരത്തിലാണ് ട്യൂണ്‍ ചെയ്തിരിക്കുന്നത്. നാചുറലി ആസ്പിരേറ്റഡ് എഞ്ചിന്‍ 5-സ്പീഡ് മാനുവല്‍ അല്ലെങ്കില്‍ 5-സ്പീഡ് എഎംടി ഗിയര്‍ബോക്സുകളുമായി ജോടിയാക്കിയിരിക്കുന്നു. നേരെമറിച്ച് ടര്‍ബോ പെട്രോള്‍ വേരിയന്റ് 5-സ്പീഡ് മാനുവല്‍, സിവിടി ഗിയര്‍ബോക്സ് ഓപ്ഷനുകള്‍ വാഗ്ദാനം ചെയ്യുന്നു.

മാഗ്‌നൈറ്റ് ഫെയ്സ്ലിഫ്റ്റിന്റെ ഔദ്യോഗിക മൈലേജ് കണക്കുകള്‍ നിസാന്‍ വെളിപ്പെടുത്തിയിട്ടുണ്ട്. 5-സ്പീഡ് മാനുവല്‍ ഗിയര്‍ബോക്സുള്ള നാച്ചുറലി ആസ്പിറേറ്റഡ് പെട്രോള്‍ മോഡല്‍ ലിറ്ററിന് 19.40 കിലോമീറ്റര്‍ മൈലേജ് വാഗ്ദാനം ചെയ്യുന്നു. ഇതേ എഞ്ചിന്‍ തന്നെ 5-സ്പീഡ് എഎംടി ഗിയര്‍ബോക്സുമായി വരുമ്പോള്‍ ലിറ്ററിന് 19.70 കിലോമീറ്റര്‍ ഇന്ധനക്ഷമത നല്‍കുമെന്നാണ് നിര്‍മാതാക്കള്‍ പറയുന്നത്. 5-സ്പീഡ് മാനുവല്‍ ഗിയര്‍ബോക്‌സുള്ള ടര്‍ബോ പെട്രോള്‍ വേരിയന്റ് ലിറ്ററിന് 19.90 കിലോമീറ്ററും സിവിടി പതിപ്പ് ലിറ്ററിന് 17.90 കിലോമീറ്ററുമാണ് മൈലേജ് നല്‍കുക.

ഫീച്ചറുകളുടെ കാര്യത്തിലും റിച്ചാണ് മാഗ്‌നൈറ്റ് ഫെയ്‌സ്‌ലിഫ്റ്റ്. 8 ഇഞ്ച് ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, 7 ഇഞ്ച് ഡിജിറ്റല്‍ ഇന്‍സ്ട്രുമെന്റ് ക്ലസ്റ്റര്‍, 4 കളര്‍ ആംബിയന്റ് ലൈറ്റിംഗ്, വയര്‍ലെസ് സെല്‍ഫോണ്‍ ചാര്‍ജര്‍, ആറ് എയര്‍ബാഗുകള്‍, ടയര്‍ പ്രഷര്‍ മോണിറ്ററിംഗ് സിസ്റ്റം, 360 ഡിഗ്രി ക്യാമറ എന്നീ സവിശേഷതകള്‍ കാറില്‍ ഉള്‍ക്കൊള്ളിച്ചിട്ടുണ്ട്. ഡ്രൈവിംഗ് എക്‌സ്പീരിയന്‍സ് മികച്ചതാക്കാന്‍ പോന്ന ഫീച്ചറുകളാണ് ഇവയെല്ലാം.

ഫീച്ചറുകള്‍, പെര്‍ഫോമന്‍സ്, വിലനിര്‍ണയം എന്നിവയുടെ സംയോജനം ഇതിനെ സെഗ്മെന്റില്‍ ശക്തമായ മത്സരാര്‍ത്ഥിയായി മാറ്റുന്നു. മാരുതി സുസുക്കി ബ്രെസ, കിയ സോനെറ്റ്, റെനോ കൈഗര്‍, മഹീന്ദ്ര XUV 3XO, ഹ്യുണ്ടായി വെന്യു, ടാറ്റ നെക്സോണ്‍ തുടങ്ങിയ മോഡലുകള്‍ക്കെതിരെയാണ് മാഗ്‌നൈറ്റ് മത്സരിക്കുന്നത്. മത്സരാധിഷ്ഠിത വിലനിര്‍ണയവും ആകര്‍ഷകമായ ഫീച്ചറുകളും ഓഫര്‍ ചെയ്യുന്ന ഈ കോംപാക്റ്റ് എസ്‌യുവി പണത്തിനൊത്ത മൂല്യം നല്‍കുന്ന ഒരു കാര്‍ തേടുന്നവരെ ആകര്‍ഷിക്കും.