മഹീന്ദ്രയ്ക്ക് ഡിസ്‌കൗണ്ടിട്ട് പണിയുമായി ടാറ്റ! നെക്സോണിന്റെ 7-ാം വാർഷികത്തിന് ലക്ഷങ്ങളുടെ ഓഫറുകൾ

വളരെ ചുരുങ്ങിയ കാലയഴവ് കൊണ്ട് ഇന്ത്യൻ ജനതയുടെ മനസിൽ വലിയൊരും സ്ഥാനം കൈവരിച്ച ടാറ്റ മോഡലാണ് നെക്സോൺ എന്ന് നിസംശയം പറയാം. ടാറ്റയെ പുതിയ മാനങ്ങളിലേക്ക് പിടിച്ച് ഉയർത്താനും ഈ മോഡലിന് സാധിച്ചു. ഇപ്പോൾ ടാറ്റ മോട്ടോർസ്, തങ്ങളുടെ ജനപ്രിയ എസ്‌യുവിയായ ടാറ്റ നെക്‌സോണിൻ്റെ ഏഴാം വാർഷികം ആഘോഷിക്കുകയാണ്. ഈ ആഘോഷങ്ങൾക്ക് മാറ്റു കൂട്ടുന്നതിനായി വിവിധ നെക്‌സോൺ വേരിയൻ്റുകളിൽ ഗണ്യമായ വിലക്കുറവും കമ്പനി പ്രഖ്യാപിച്ചിരിക്കുകയാണ്, ഒരു ലക്ഷം രൂപ വരെ കിഴിവുകളാണ് ടാറ്റ വാഗ്ദാനം ചെയ്യുന്നത്. ഈ പ്രത്യേക ഓഫർ 2024 ജൂൺ 15 മുതൽ ജൂൺ 30 വരെ ലഭ്യമാകും എന്നത് ശ്രദ്ധിക്കണം.

ലോഞ്ച് ചെയ്തതുമുതൽ, ടാറ്റ നെക്‌സോൺ ഇന്ത്യയിൽ ഏറ്റവുമധികം വിറ്റഴിക്കപ്പെടുന്ന എസ്‌യുവികളിലൊന്നാണ് എന്നത് വ്യക്തമാണ്, ഇതു വരെ ഏഴ് ലക്ഷം യൂണിറ്റ് വിൽപ്പന എന്ന നാഴികക്കല്ലും വാഹനം പിന്നിട്ടു. എന്നിരുന്നാലും, കഴിഞ്ഞ കുറച്ചു മാസങ്ങളായി, നെക്‌സോണിൻ്റെ വിൽപ്പന കുറഞ്ഞു, കഴിഞ്ഞ രണ്ട് മാസമായി ഈ മോഡൽ ടോപ്പ് 10 കാറുകളുടെ പട്ടികയിൽ ഇടം പിടിച്ചതുമില്ല.

പുതുതായി വിപണിയിൽ എത്തിയ മഹീന്ദ്ര XUV 3XO -യുടെ വർധിച്ചുവരുന്ന ജനപ്രീതിയാണ് ഈ ഇടിവിന് കാരണമായി മാർക്കറ്റ് അനലിസ്റ്റുകൾ ചൂണ്ടിക്കാട്ടുന്നത്, ഇത് നെക്‌സോണിൻ്റെ വിപണി വിഹിതത്തെ സാരമായി ബാധിച്ചു എന്നത് കണക്കുകൾ വ്യക്തമാക്കുന്നു. എന്നാൽ ഇതിനു മറുപടിയായി, നെക്‌സോണിൻ്റെ വിൽപ്പന പുനരുജ്ജീവിപ്പിക്കാൻ ടാറ്റ മോട്ടോർസ് വളരെ ആകർഷകമായ ഡിസ്‌കൗണ്ട് പദ്ധതികൾ അവതരിപ്പിച്ചിരിക്കുകയാണ്.

നെക്സോണിന്റെ ക്രിയേറ്റീവ് + S വേരിയൻ്റിൽ ഒരു ലക്ഷം രൂപയുടെ ഏറ്റവും ഉയർന്ന കിഴിവ് ഇപ്പോൾ ലഭ്യമാണ്, ഇത് ഉപഭോക്താക്കൾക്ക് വളരെ ആകർഷകമായ ഒരു ഓപ്ഷനായി മാറുന്നു. ക്രിയേറ്റീവ് + S -ൻ്റെ പെട്രോൾ, ഡീസൽ വേരിയന്റുകൾ ഈ ഓഫറിൽ ഉൾപ്പെടുത്തിയിട്ടുണ്ട്. വിവിധ ടാറ്റ നെക്‌സോൺ വേരിയൻ്റുകളുടെ വിശദമായ ഡിസ്കൗണ്ടുകൾ ഇങ്ങനെ:

വിവിധ വേരിയന്റുകളിൽ ഗണ്യമായ കിഴിവുകൾ നൽകാനുള്ള ടാറ്റ മോട്ടോർസിൻ്റെ തന്ത്രപരമായ നീക്കം നെക്‌സോണിൻ്റെ വിൽപ്പന പുനരുജ്ജീവിപ്പിക്കുകയും വളരെ മത്സരാധിഷ്ഠിതമായ എസ്‌യുവി വിപണിയിൽ അതിൻ്റെ സ്ഥാനം വീണ്ടെടുക്കുകയും ചെയ്യും എന്ന് പ്രതീക്ഷിക്കുന്നു. ഉപഭോക്താക്കൾ ഈ ഡീലുകൾ കാര്യമായി മുതലാക്കാൻ സാധ്യത ഉള്ളതിനാൽ ഈ പ്രമോഷൻ്റെ സമയം നിലവിലുള്ള ഓട്ടോമോട്ടീവ് മാർക്കറ്റ് ട്രെൻഡുകളുമായി തികച്ചും യോജിക്കുന്നു എന്ന് നിസംശയം പറയാം.

കാറുകളിൽ പനോരമിക് സൺറൂഫുകൾ അവതരിപ്പിക്കുന്നത് ഇന്ത്യൻ വാഹന വിപണിയിലെ ഒരു പ്രധാന ആകർഷണമായി മാറിയിരിക്കുകയാണ്, അടുത്തിടെ നടത്തിയ പല സർവ്വേകളിലും ഇന്ത്യക്കാർ സർച്ച് ചെയ്തത് ഈ ഫീച്ചറിനാണ് എന്നും റിപ്പോർട്ടുകളുണ്ട്. ഈ എക്സ്പാൻസീവ് സൺറൂഫ് അടുത്തിടെ മഹീന്ദ്ര അവതരിപ്പിച്ച പുതിയ XUV 3XO -ൽ ഫീച്ചർ ചെയ്തിരുന്നു.

ഇത്തരം ഒരു ഫീച്ചർ വാഗ്ദാനം ചെയ്യുന്ന സബ് ഫോർ മീറ്റർ എസ്‌യുവി വിഭാഗത്തിലെ ആദ്യ മോഡലായി ഇത് മാറി. ഈ പുതുമ മഹീന്ദ്രയുടെ ബുക്കിംഗിൽ കാര്യമായ കുതിച്ചുചാട്ടത്തിന് കാരണമായി എന്ന് വ്യക്തമാണ്. ഇതിനെ പിന്തുടർന്ന്, ടാറ്റ മോട്ടോർസ് വരും മാസങ്ങളിൽ പനോരമിക് സൺറൂഫുമായി നെക്‌സോണിനെ അവതരിപ്പിക്കാൻ ഒരുങ്ങുകയാണ്.

120 PS മാക്സ് പവറും 170 Nm പീക്ക് torque ഉം പുറപ്പെടുവിക്കുന്ന 1.2 ലിറ്റർ ടർബോ പെട്രോൾ എഞ്ചിനും 115 PS പവറും 260 Nm പീക്ക് torque ഉം ഉൽപ്പാദിപ്പിക്കുന്ന 1.5 ലിറ്റർ ടർബോ ഡീസൽ യൂണിറ്റും ഉൾപ്പെടെയുള്ള എൻജിൻ ഓപ്ഷനുകളോടെയാണ് ടാറ്റ മോട്ടർോസ് നെക്സോൺ സജ്ജീകരിച്ചിരിക്കുന്നത്.

അഞ്ച് -സ്പീഡ് മാനുവൽ, ആറ് -സ്പീഡ് മാനുവൽ, ആറ് -സ്പീഡ് ഓട്ടോമേറ്റഡ് മാനുവൽ ട്രാൻസ്മിഷൻ (AMT), പെട്രോൾ വേരിയൻ്റിന് ഏഴ് -സ്പീഡ് ഡ്യുവൽ -ക്ലച്ച് ഓട്ടോമാറ്റിക് (DCA) എന്നിങ്ങനെയുള്ള ട്രാൻസ്മിഷൻ ചോയിസുകൾ ലഭിക്കുന്നു. ഡീസൽ വേരിയൻ്റിൽ ആറ് -സ്പീഡ് മാനുവൽ, ആറ് -സ്പീഡ് AMT ഓപ്ഷനുകൾ വാഗ്ദാനം ചെയ്യുന്നു.

ഉയർന്ന തരത്തിലുള്ള സുരക്ഷാ മാനദണ്ഡങ്ങൾ, നവീന ഫീച്ചറുകൾ, മത്സരാധിഷ്ഠിത വിലനിർണ്ണയം എന്നിവ ഉറപ്പാക്കിക്കൊണ്ട് ടാറ്റ മോട്ടോർസ് തങ്ങളുടെ വാഹന നിരയെ നിരന്തരം നവീകരിക്കുകയും മെച്ചപ്പെടുത്തുകയും ചെയ്യുകയാണ്. അടുത്തിടെ നെക്സോണിന്റെ ടർബോ പെട്രോൾ എഞ്ചിനുമായി പെർഫോമെൻസ് സ്പെക്ക് ആൾട്രോസ് റേസറും നിർമ്മാതാക്കൾ പുറത്തിറക്കിയിരുന്നു. നെക്‌സോൺ വേരിയൻ്റുകളിലെ നിലവിലെ ഓഫർ, ഉപഭോക്താക്കൾക്ക് മൂല്യം നൽകുന്നതിനും ഇന്ത്യൻ വാഹന വ്യവസായത്തിൽ അതിൻ്റെ പാരമ്പര്യം നിലനിർത്തുന്നതിനുമുള്ള ടാറ്റ മോട്ടോഴ്‌സിൻ്റെ പ്രതിബദ്ധത അടിവരയിടുന്നു.