ഹേയ് ടെസ്‌ല കമോൺ..., പാർട്ടി മോഡിൽ ഇവിയുടെ വീഡിയോ വൈറൽ

അമേരിക്കൻ ഇലക്‌ട്രിക് വാഹന നിർമ്മാതാക്കളിൽ ഭീമനായ ടെസ്‌ല, ഇന്ത്യയിലേക്ക് കാലുകുത്താനുളള എല്ലാ ശ്രമങ്ങളും നടത്തുന്നത് എല്ലാവർക്കും അറിയാവുന്ന കാര്യമാണല്ലോ. അടുത്തിടെ, ഒരു ടെസ്‌ല മോഡൽ X EV എസ്‌യുവിയുടെ ഉടമ ഈ എസ്‌യുവിയുടെ "പാർട്ടി മോഡ് ഫീച്ചർ പ്രവർത്തിപ്പിക്കുന്നതിൻ്റെ ഒരു വീഡിയോ പങ്കിട്ടിരുന്നു. ടെസ്‌ല മോഡൽ എക്‌സിൻ്റെ ഫാൽക്കൺ ഡോറുകൾ തനിയെ തുറക്കുകയും നൃത്തം ചെയ്യുന്നത് പോലെ ഡോറുകൾ അടയുന്നതുമാണ് വീഡിയോയിൽ.

റോഡിൽ പാർക്ക് ചെയ്തിരിക്കുന്ന ചുവന്ന നിറമുള്ള ടെസ്‌ല മോഡൽ X ഇലക്ട്രിക് എസ്‌യുവിയിൽ നിന്നാണ് വീഡിയോ ആരംഭിക്കുന്നത്. എസ്‌യുവിയുടെ എൽഇഡി ഫോഗ് ലൈറ്റുകൾ മിന്നിമറയാൻ തുടങ്ങുകയും, സ്പീക്കറുകൾ ഫുൾ വോളിയത്തിലേക്ക് തിരിയുമ്പോൾ കാറിനുള്ളിൽ സംഗീതം പ്ലേ ചെയ്യാൻ തുടങ്ങുന്നു. ഇതിനുശേഷം, ഈ എസ്‌യുവിയുടെ ഏറ്റവും വലിയ ആകർഷണമായ ഫാൽക്കൺ ഡോറുകൾ തുറക്കുകയാണ്.

പെട്ടെന്ന് ഫാൽക്കൺ ഡോറുകൾ തുറക്കുന്നതും അടയ്ക്കുന്നതും കാണാം. എൽഇഡി ഹെഡ്‌ലൈറ്റുകളും വാഹനത്തിനുള്ളിൽ പ്ലേ ചെയ്യുന്ന സംഗീതത്തിൻ്റെ താളവുമായി പൊരുത്തപ്പെടുകയാണ്. വീഡിയോയിലെ കാർ അൾട്രാ റെഡ് നിറത്തിലുളള ടെസ്‌ല മോഡൽ X ആണ്. ഈ പ്രത്യേക കാർ രാജ്യത്ത് ഒന്നിലധികം തവണ കണ്ടിട്ടുണ്ട്, കൂടുതലും കർണാടകയിലാണ് വാഹനം കാണുന്നത്.

രണ്ട് ഇലക്ട്രിക് പവർട്രെയിനുകളുമായാണ് മോഡൽ X EV എസ്‌യുവി വാഗ്ദാനം ചെയ്യുന്നത്. ഒരു ലോംഗ് റേഞ്ച് വേരിയൻ്റും കൂടുതൽ ശക്തമായ പ്ലെയ്ഡ് വേരിയൻ്റും വാഹനത്തിന് ഉണ്ട്. ലോംഗ് റേഞ്ച് വേരിയൻ്റിനൊപ്പം, ടെസ്‌ല മോഡൽ എക്‌സിന് 579 കിലോമീറ്റർ ക്ലെയിം ചെയ്ത റേഞ്ച് ഉള്ള ഡ്യുവൽ മോട്ടോർ സെറ്റപ്പാണ് ലഭിക്കുന്നത്. അതേസമയം, പ്ലെയ്ഡ് വേരിയൻ്റിന് ട്രൈ-മോട്ടോർ സജ്ജീകരണവും ലഭിക്കുന്നു, എന്നാൽ ക്ലെയിം ചെയ്ത ശ്രേണി 547 കിലോമീറ്ററായി കുറയുന്നു.

2030-ഓടെ ഓരോ വർഷവും 20 ദശലക്ഷം കാറുകൾ നിർമ്മിക്കുക എന്ന വൻ അഭിലാഷ പദ്ധതികളോടെ, കമ്പനി അതിന്റെ ഏറ്റവും അടുത്ത എതിരാളികളേക്കാൾ ഇരട്ടി ഉൽപ്പാദന ശേഷി കൈവരിക്കാൻ ശ്രമിക്കുകയാണ്. ചൈനയും യുണൈറ്റഡ് സ്‌റ്റേറ്റ്‌സും അതിന്റെ ഏറ്റവും വലിയ വിപണികളാണ്. മൂന്നാം സ്ഥാനത്തുളള ഇന്ത്യൻ വിപണിയിൽ പക്ഷേ ഇന്ത്യയിൽ ആധിപത്യം സ്ഥാപിക്കാൻ കഴിയുന്നില്ല.

ഇറക്കുമതി തീരുവ ലോകത്തെവിടെയും ഏറ്റവും ഉയർന്ന നിരക്കാണ് ഇവിടെയുള്ളത്. രാജ്യത്തേക്ക് ഇവി ഇറക്കുമതി ചെയ്യുന്നതിന് തീരുവ ഇളവുകളും പ്രാദേശിക മൂല്യവർദ്ധനവിൽ നിന്ന് ഒഴിവാക്കലും സംബന്ധിച്ച നിർദ്ദേശങ്ങളൊന്നും പരിഗണിക്കുന്നില്ലെന്ന് ഇന്ത്യൻ സർക്കാർ വ്യക്തമാക്കിയിരുന്നു.ഇന്ത്യൻ വാഹന വിപണി വളരെ മികച്ചതാണ്, എന്നാൽ മൊത്തത്തിലുള്ള പാസഞ്ചർ വാഹനങ്ങളുടെ വിൽപ്പനയിൽ EV-കളുടെ കടന്നുകയറ്റം വെറും രണ്ട് ശതമാനം മാത്രമാണ്.

മൊത്തത്തിലുള്ള കാർ വിൽപ്പനയിൽ EV-കളുടെ പങ്ക് വരും വർഷങ്ങളിൽ ഗണ്യമായി വളരുമെന്നാണ് നിർമാതാക്കളും സർക്കാരും പ്രതീക്ഷിക്കുന്നത്. നിലവിൽ ടാറ്റ മോട്ടോഴ്‌സാണ് വിപണിയിൽ ലീഡർ, എന്നാൽ ഹ്യുണ്ടായ്, കിയ, മഹീന്ദ്ര, സിട്രോൺ, എംജി മോട്ടോർ ഇന്ത്യ, ഔഡി, മെർസിഡീസ് ബെൻസ്, ബിഎംഡബ്ല്യു, ജാഗ്വാർ തുടങ്ങിയ കമ്പനികൾക്ക് കുറഞ്ഞത് ഒരു പൂർണ-ഇലക്‌ട്രിക് മോഡലെങ്കിലും ലഭ്യമാണ്. ഇന്ത്യയിലെ ഏറ്റവും വലിയ കാർ നിർമ്മാതാക്കളായ മാരുതി സുസുക്കി പോലും 2024-ലെ ലോഞ്ചിനായി പൂർണ്ണമായും ബാറ്ററിയിൽ പ്രവർത്തിക്കുന്ന ആദ്യത്തെ മോഡലുമായി തയ്യാറായി നിൽക്കുകയാണ്.

ഇന്ത്യയിലെ ഇറക്കുമതി തീരുവ കണക്കിലെടുത്താൽ ഒരു ബെൻസിൻ്റെ കാശ് ആകും ടെസ്‌ലയുടെ മോഡലുകൾ ഇന്ത്യയിൽ എത്തണമെങ്കിൽ. ടെസ്‌ല മെക്‌സിക്കോയിലെ ന്യൂവോ ലിയോണിൽ അടുത്ത മെഗാ ഫാക്ടറി നിർമ്മിക്കുകയും ഇവിടെ 10 ബില്യൺ ഡോളർ പമ്പ് ചെയ്യാൻ പദ്ധതിയിടുകയും ചെയ്യുന്നുണ്ട്.

40,000 ഡോളറിന് മുകളിലുള്ള കാറുകള്‍ക്ക് 100 ശതമാനവും ബാക്കിയുള്ളവയ്ക്ക് 70 ശതമാനവുമാണ് നിലവില്‍ നികുതി. കുറഞ്ഞത് 40 ശതമാനം വാഹനങ്ങളെങ്കിലും പ്രാദേശികമായി നിര്‍മ്മിക്കാന്‍ പ്രതിജ്ഞാബദ്ധരാകുന്ന വാഹന നിര്‍മാതാക്കളുടെ ഇവി ഇറക്കുമതി തീരുവ 100 ശതമാനത്തില്‍ നിന്ന് 15 ശതമാനമായി കുറയ്ക്കാന്‍ സര്‍ക്കാര്‍ ആലോചിക്കുന്നുണ്ട്.

മറ്റ് രാജ്യങ്ങളും ഇവി നിര്‍മ്മാണ പ്രതിബദ്ധത വര്‍ദ്ധിപ്പിക്കുന്നതിന് സമാനമായ നടപടികള്‍ സ്വീകരിച്ചിട്ടുണ്ട്. ഉദാഹരണത്തിന്, ഇന്തോനേഷ്യ ഇവി നിര്‍മ്മാതാക്കളെ രാജ്യത്ത് നിക്ഷേപത്തിനായി ആകര്‍ഷിക്കാന്‍ ഇറക്കുമതി തീരുവ 50% ല്‍ നിന്ന് പൂജ്യം ശതമാനമായി കുറയ്ക്കാമെന്ന് വാഗ്ദാനം ചെയ്തിരുന്നു. ടെസ്ലയെ കൂടാതെ ചൈനീസ് ഇവി ഭീമനായ BYD-യെ കൂടി രാജ്യത്തേക്ക് ആകര്‍ഷിക്കാനുള്ള ശ്രമങ്ങളുടെ ഭാഗമാണിത്.