25000 രൂപയുണ്ടെങ്കില്‍ ഈ ബജാജ് ഓട്ടോ ഇറക്കാം! EMI അടയ്ക്കാനുള്ള പൈസ ഡീസല്‍ ചെലവില്‍ നിന്ന് ലാഭിക്കാം

നിലവില്‍ ഇന്ത്യയില്‍ ഏറ്റവും കൂടുതല്‍ വിറ്റഴിക്കപ്പെടുന്ന ഇലക്ട്രിക് ഇരുചക്ര വാഹനമാണ് ബജാജ് ചേതക്. ഇലക്ട്രിക് ത്രീവീലര്‍ വിഭാഗത്തിലും ബജാജ് ശക്തമായ സാന്നിധ്യമാണ്. കഴിഞ്ഞ ദിവസം സെഗ്‌മെന്റ് ഫസ്റ്റ് ഫീച്ചറുകളും താങ്ങാവുന്ന വിലയുമായി വരുന്ന ഉല്‍പ്പന്നങ്ങള്‍ അണിനിരക്കുന്ന ഒരു പുതിയ ത്രീ-വീലര്‍ ബ്രാന്‍ഡിന് തുടക്കം കുറിച്ചു. ബജാജ് ഗോഗോ (Bajaj GoGo) എന്നാണ് ഇതിന് പേരിട്ടിരിക്കുന്നത്. സാങ്കേതികവിദ്യകളും സുഖസൗകര്യങ്ങളും ഒരുമിച്ച് ചേരുന്നതാണ് ബജാജ് ഗോഗോയുടെ ഉല്‍പ്പന്നങ്ങള്‍ എന്നാണ് നിര്‍മാതാക്കള്‍ അവകാശപ്പെടുന്നത്. ബജാജ് ഗോഗോ കഴിഞ്ഞ ദിവസം പുറത്തിറക്കിയ പുത്തന്‍ ഇലക്ട്രിക് ത്രീവീലറുകളെ കുറിച്ച് വിശദമായി വായിക്കാം.

കഴിഞ്ഞ ദിവസം ലഖ്‌നൗവില്‍ വെച്ച് ബജാജ് ഗോഗോയുടെ ഡെലിവറി ആരംഭിച്ചു. P5009, P5012, P7012 എന്നിങ്ങനെ മൂന്ന് വേരിയന്റുകളിലായാണ് ബജാജ് ഗോഗോ നിലവില്‍ ഓഫര്‍ ചെയ്യുന്നത്. 'P' എന്നത് പാസഞ്ചറിനെ സൂചിപ്പിക്കുന്നു. '50', '70' എന്നിവ വാഹനത്തിന്റെ വലുപ്പത്തെ സൂചിപ്പിക്കുന്നതാണ്. '09', '12' എന്നിവ 9 kWh, 12 kWh ബാറ്ററി ശേഷികളെ സൂചിപ്പിക്കുന്നു. ഗോഗോയുടെ കാര്‍ഗോ പതിപ്പുകളും ഉടന്‍ എത്തുമെന്നാണ് ബജാജ് പറയുന്നത്.

3.26 ലക്ഷം രൂപ മുതലാണ് ഈ ഇലക്ട്രിക് ത്രീവീലറുകളുടെ വില ആരംഭിക്കുന്നത്. പ്രീമിയം വേരിയന്റിന് 3,83,004 രൂപയാണ് വില. എല്ലാ വിലകളും എക്‌സ്-ഷോറൂം ആണ്. മികച്ച റൈഡിംഗ് അനുഭവം ആഗ്രഹിക്കുന്നവര്‍ക്ക് 3200 രൂപയ്ക്ക് അധിക സവിശേഷതകള്‍ വാഗ്ദാനം ചെയ്യുന്നു. ആന്റി തെഫ്റ്റ് അലേര്‍ട്ട്, ഹീല്‍ ഹോള്‍ഡ് അസിസ്റ്റ്, പാര്‍ക്ക് അസിസ്റ്റ് ഫംഗ്ഷനുകള്‍ തുടങ്ങിയ വിവിധ നൂതന ഫംഗ്ഷനുകള്‍ ഉള്‍പ്പെടുന്ന ഓപ്ഷനല്‍ ടെക്പാക് ഉപയോഗപ്പെടുത്തിയാല്‍ മതി.

ഈ ഇലക്ട്രിക് ഓട്ടോ വാങ്ങാന്‍ താല്‍പര്യമുള്ളവര്‍ക്ക് ആകര്‍ഷകമായ ഫിനാന്‍സിംഗ് സൗകര്യങ്ങളും ബജാജ് ഒരുക്കുന്നു. 24,999 രൂപ ഡൗണ്‍ പേയ്മെന്റ് അടച്ച് ഈ ഇലക്ട്രിക് ഓട്ടോയുടെ P7012 വേരിയന്റ് ഇറക്കിക്കൊണ്ടുവരാം. ഇന്ത്യയിലുടനീളമുള്ള അംഗീകൃത ബജാജ് ത്രീവീലര്‍ ഷോറൂമുകള്‍ സന്ദര്‍ശിച്ച് ഉപഭോക്താക്കള്‍ക്ക് ഗോഗോ ബുക്ക് ചെയ്യാനും വാങ്ങാനുമുള്ള സൗകര്യം ലഭ്യമാണ്.

സാങ്കേതിക സവിശേഷതകള്‍ നോക്കുമ്പോള്‍ P5009 എന്ന് വിളിക്കപ്പെടുന്ന ഗോഗോയുടെ അടിസ്ഥാന മോഡലില്‍ ഒരു നൂതന PMS മോട്ടോര്‍ സജ്ജീകരിച്ചിരിക്കുന്നു. ഈ മോട്ടോര്‍ 4.5 kW പവറും 36 Nm ടോര്‍ക്കും ഉത്പാദിപ്പിക്കാന്‍ പ്രാപ്തമാണ്. കുറച്ചുകൂടി പവര്‍ ആഗ്രഹിക്കുന്നവര്‍ക്ക് ടോപ് വേരിയന്റ് മോഡല്‍ 5.5kW പവര്‍ ഔട്ട്പുട്ടും അതേ ടോര്‍ക്ക് ലെവലുമാണ് നല്‍കുന്നത്.

P5009 മോഡല്‍ ഒറ്റ ചാര്‍ജില്‍ 171 കിലോമീറ്റര്‍ റേഞ്ച് വാഗ്ദാനം ചെയ്യുന്നു. അതേസമയം ടോപ് സ്‌പെക് വേരിയന്റിന്റെ ക്ലെയിംഡ് റേഞ്ച് 251 കിലോമീറ്ററാണ്. സെഗ്‌മെന്റില്‍ ഏറ്റവും ഉയര്‍ന്ന റേഞ്ച് നല്‍കുന്ന വാഹനം ഇതാണെന്നാണ് നിര്‍മാതാക്കളുടെ അവകാശവാദം. ബജാജ് ഗോഗോ എളുപ്പത്തില്‍ ചാര്‍ജ് ചെയ്യാനും സാധിക്കും.

P5009 മോഡല്‍ വെറും 4.30 മണിക്കൂറിനുള്ളില്‍ പൂജ്യത്തില്‍ നിന്ന് 80 ശതമാനം വരെ ചാര്‍ജ് ചെയ്യാന്‍ കഴിയും. ഒരു ഓണ്‍-ബോര്‍ഡ് ചാര്‍ജര്‍ കൂടി ചേര്‍ത്തുകൊണ്ട് പെര്‍ഫോമന്‍സ് കൂടുതല്‍ മെച്ചപ്പെടുത്തിയിരിക്കുന്നു. ഈ ഇവി മോഡലില്‍ നൂതന സവിശേഷതകള്‍ക്കും കുറവില്ല. മുന്നിലും പിന്നിലും ഡ്രം ബ്രേക്കുകള്‍ ഇതില്‍ സജ്ജീകരിച്ചിരിക്കുന്നു. ഇത് വിശ്വസനീയമായ ബ്രേക്കിംഗ് പവര്‍ ഉറപ്പാക്കുന്നു.

മുന്നില്‍ ടെലിസ്‌കോപ്പിക് സസ്‌പെന്‍ഷനും പിന്നില്‍ ഒരു സ്‌പൈറല്‍ ട്യൂബുലാര്‍ സസ്‌പെന്‍ഷന്‍ സിസ്റ്റവും സന്തുലിതവും സുഖകരവുമായ യാത്ര പ്രദാനം ചെയ്യുന്നു. റീജനറേറ്റീവ് ബ്രേക്കിംഗ്, ഡ്യുവല്‍-ടോണ്‍ ഇന്റീരിയര്‍ ഡിസൈന്‍, മോഡേണ്‍ ടച്ച്സ്‌ക്രീന്‍ ഡിജിറ്റല്‍ എല്‍സിഡി ക്ലസ്റ്റര്‍, യുഎസ്ബി ടൈപ്പ് എ മൊബൈല്‍ ചാര്‍ജര്‍, ഗ്ലൗബോക്‌സ്, ടെക്പാക് കണക്റ്റിവിറ്റി ഓപ്ഷന്‍ തുടങ്ങിയവയാണ് മറ്റ് സവിശേഷതകള്‍.

ഇലക്ട്രിക് ത്രീവീലര്‍ വിഭാഗത്തില്‍ തങ്ങളുടെ നില കൂടുതല്‍ മെച്ചപ്പെടുത്താന്‍ ഗോഗായിലൂടെ സാധിക്കുമെന്നാണ് ബജാജ് കരുതുന്നത്. താങ്ങാവുന്ന വിലയില്‍ നൂതന ഫീച്ചറുകള്‍ മികച്ച റേഞ്ച് എന്നിവ നല്‍കുന്നതിനാല്‍ കൂടുതല്‍ പേര്‍ ഈ ഇലക്ട്രിക് ഓട്ടോ തിരഞ്ഞെത്തുമെന്നാത് കമ്പനിയുടെ പ്രതീക്ഷ. 25000 രൂപയുടെ ഡൗണ്‍പെയ്‌മെന്റ് ഓപ്ഷനാണ് ഇതിനെ ആകര്‍ഷകമാക്കുന്ന മറ്റൊരു ഘടകം. ഓട്ടോ ഉപജീവനമാര്‍ഗമാക്കുന്നവര്‍ക്ക് ഈ തുക നല്‍കി വണ്ടി നിരത്തിലിറക്കിയാല്‍ പിന്നീട് മാസാമാസം അടച്ച് തീര്‍ത്താല്‍ മതി.