Click it and Unblock the Notifications
30+ കി.മീ മൈലേജുള്ള ഇന്നോവ! ടൊയോട്ടക്ക് വരെ വഴികാട്ടിയാവുകയാണല്ലോ ഇന്ത്യക്കാര്
ഇന്ത്യയിലെ മള്ട്ടി പര്പ്പസ് വാഹന വിഭാഗത്തിലെ രാജാക്കന്മാരാണ് ടൊയോട്ട ഇന്നോവ. യാത്രാസുഖത്തിന് പേരുകേട്ട കാര് മൂന്നാം തലമുറ മോഡലായ ഹൈക്രോസിലെത്തിയപ്പോള് (Toyota Innova Hycross) ഇന്ധനക്ഷമതയുടെ കാര്യത്തിലും കേമനായി. സ്ട്രോംഗ് ഹൈബ്രിഡ് സാങ്കേതികവിദ്യയുമായി വരുന്ന ഇന്നോവ ഹൈക്രോസിന് ലിറ്ററിന് 23 കിലോമീറ്റര് വരെയാണ് മൈലേജ് പറയുന്നത്. നമ്മുടെ നാട്ടില് ഇന്ന് പല കാറുകളിലും കമ്പനികള് തന്നെ ഫാക്ടറി ഫിറ്റഡ് സിഎന്ജി കിറ്റുകള് ഓഫര് ചെയ്യുന്നുണ്ട്. പേരാത്തതിന് മൈലേജ് കുറവുള്ള പഴയ കാറുകളില് ആഫ്റ്റര് മാര്ക്കറ്റ് സിഎന്ജി കിറ്റ് ഇന്സ്റ്റാള് ചെയ്യുന്നയാളുകളെയും കാണാം.
എന്നാല് ഒരു ഇന്ത്യക്കാരന് ഇപ്പോള് മികച്ച മൈലേജുള്ള ഇന്നോവ ഹൈക്രോസില് സിഎന്ജി കിറ്റ് ഘടിപ്പിച്ച് മൈലേജ് വീണ്ടും കൂട്ടാന് ശ്രമിച്ച സംഗതി ശ്രദ്ധേയമാകുകയാണ്. സിഎന്ജി ഫിറ്റ്മെന്റുകളില് വിദഗ്ധരായ സായ് ഫ്യൂവല് വഡോദരയാണ് ഈ പരിഷ്ക്കരണം നടത്തിയത്. ഇന്നോവ ഹൈക്രോസില് സിഎന്ജി കിറ്റ് ഘടിപ്പിക്കുന്ന ലോകത്തിലെ തന്നെ ആദ്യത്തെ സംഭവമാണ് ഇതെന്നാണ് പറയപ്പെടുന്നത്.
യൂറോ ഗ്യാസ് പോളണ്ടില് നിന്നാണ് സായ് ഫ്യുവല്സ് സിഎന്ജി കിറ്റ് ഓര്ഡര് ചെയ്തത്. ഈ കിറ്റില് ഇസിയു, ഇസിഎം, സിഎന്ജി ബെയറിംഗ്, റിഡ്യൂസര് എന്നിവ ഉള്പ്പെടുന്നു. എന്നിരുന്നാലും ടൊയോട്ട ഇന്നോവ ഹൈക്രോസില് സിഎന്ജി കിറ്റ് ഘടിപ്പിക്കുന്നതില് നിരവധി വെല്ലുവിളികള് ഉണ്ടായിരുന്നു. മൂന്നാം നിര സീറ്റുകള് വരുന്നതിനാല് ഹൈക്രോസിന് ഇപ്പോള് തന്നെ പരിമിതമായ ബൂട്ട് സ്പേസ് മാത്രമേ ലഭിക്കുന്നുള്ളൂ.
ഒരു സിഎന്ജി കിറ്റ് കൂടി ചേര്ത്തതോടെ ഇതിന്റെ ലഭ്യമായ കാര്ഗോ ഏരിയ കൂടുതല് കുറഞ്ഞു. മോഡിഫിക്കേഷന് പ്രക്രിയ വിശദമായി വിവരിക്കുന്ന ഒരു വീഡിയോ സായ് ഫ്യുവല്സ് വഡോദര തങ്ങളുടെ സോഷ്യല് മീഡിയ പ്ലാറ്റ്ഫോമുകളില് പങ്കുവെച്ചിട്ടുണ്ട്. വാഹനത്തിന്റെ ഫ്യുവല് ഓപ്ഷന് സിഎന്ജിയിലേക്ക് മാറ്റുന്നതിനുള്ള ബട്ടണ് ഡാഷ്ബോര്ഡിലാണ് നല്കിയിരിക്കുന്നത്. കാര് സിഎന്ജിയില് പ്രവര്ത്തിക്കുമ്പോള് അത് സൂചിപ്പിക്കുന്നതിനായുള്ള ഒരു ഇന്ഡിക്കേറ്ററും ഇതില് പ്രദര്ശിപ്പിച്ചിരുന്നു.
സിഎന്ജിയിലേക്ക് മാറിയെങ്കിലും ഇത് കാറിന്റെ പെര്ഫോമന്സിനെ ബാധിച്ചിട്ടില്ലെന്നാണ് റിപ്പോര്ട്ട്. ഇത് ഇന്സ്റ്റലേഷന് ജോലിയുടെ ഗുണനിലവാരത്തിന്റെ തെളിവാണ്. എന്നാല് സിഎന്ജി കിറ്റ് ഇന്സ്റ്റാള് ചെയ്തതോടെ ഹൈക്രോസിന് എത്ര മൈലേജ് ലഭിക്കുന്നുവെന്ന വിവരങ്ങള് വീഡിയോയില് പരാമര്ശിക്കുന്നില്ല. ഏതായാലും 23 കി.മീ മൈലേജ് കിട്ടുന്ന കാറിന് സിഎന്ജി കിറ്റ് കൂടി വന്നതിനാല് 30+ കി.മീ മൈലേജ് ലഭിക്കുമെന്ന് പ്രതീക്ഷിക്കാം.
വിശാലവും പ്രീമിയവുമായ ഇന്റീരിയറിനൊപ്പം നിരവധി സുരക്ഷാ, സുഖസൗകര്യ സവിശേഷതകളും വാഗ്ദാനം ചെയ്യുന്ന ടൊയോട്ട ഇന്നോവ ഹൈക്രോസ് അതിന്റെ സെഗ്മെന്റില് വേറിട്ടുനില്ക്കുന്നു. ലെവല് 2 ADAS, അഡാപ്റ്റീവ് ക്രൂയിസ് കണ്ട്രോള്, ബ്ലൈന്ഡ് സ്പോട്ട് മോണിറ്റര് എന്നിവയാണ് കാറിന്റെ പ്രധാന സേഫ്റ്റി ഫീച്ചറകള്. ക്യാബിനില് ഒരു പനോരമിക് സണ്റൂഫ്, 10.1 ഇഞ്ച് ഇന്ഫോടെയ്ന്മെന്റ് ഡിസ്പ്ലേ, ആംബിയന്റ് ലൈറ്റിംഗ്, ഒരു പവര്ഡ് ടെയില്ഗേറ്റ് എന്നീ ഫീച്ചറുകളും കാറിലുണ്ട്.
ഹൈക്രോസിന് കരുത്ത് പകരുന്ന 2.0 ലിറ്റര് പെട്രോള് എഞ്ചിനും ശക്തമായ ഹൈബ്രിഡ് സിസ്റ്റവും 173 bhp പവറും 209 Nm ടോര്ക്കും നല്കുന്നു. e-CVT ഗിയര്ബോക്സ് വഴിയാണ് വീലുകളിലേക്ക് പവര് അയക്കുന്നത്. 19.94 ലക്ഷം രൂപ മുതല് 31.34 ലക്ഷം രൂപ വരെയാണ് ഹൈക്രോസിന്റെ വില പോകുന്നത്. പ്രകടനത്തിലോ സവിശേഷതകളിലോ വിട്ടുവീഴ്ച ചെയ്യാത്ത മികച്ച മൈലേജുള്ള 7 സീറ്റര് കാര് തിരയുന്നവര്ക്ക് ഇത് ആകര്ഷകമായ ഓപ്ഷനാണ്.
അത്തരമൊരു മോഡലില് സിഎന്ജി കിറ്റ് ഘടിപ്പിക്കാനുള്ള ബുദ്ധി വാഹനത്തിന്റെ അന്തര്ലീനമായ ഗുണങ്ങള് ത്യജിക്കാതെ കാര്യക്ഷമമായ ബദല് ഇന്ധനങ്ങള് പര്യവേക്ഷണം ചെയ്യുന്നതിനുള്ള ഉടമകളുടെയും പ്രൊഫഷണലുകളുടെയും നിരന്തരമായ ശ്രമങ്ങളെ എടുത്തുകാണിക്കുന്നു. വിദഗ്ദരുടെ സഹായത്തോടെ ഹൈക്രോസില് സിഎന്ജി കിറ്റ് സ്ഥാപിച്ച ഉടമ ഇന്ധനക്ഷമതയെ ആഡംബരവുമായി ലയിപ്പിക്കാനുള്ള ശ്രമം വിജയകരമാക്കി മാറ്റി. ഹൈക്രോസില് സിഎന്ജി കൊണ്ടുവരാന് ഒരുപക്ഷേ ടൊയോട്ടക്ക് പ്രചോദനമായി മാറാം ഈ സംഭവം.
Continue with Google