Click it and Unblock the Notifications
കല്ല്യാണത്തിനുള്ള ആള് കൊള്ളുന്ന വാഹനം മുതല് ഗൂര്ഖ വരെ വന് ലാഭത്തിൽ! ജിഎസ്ടി വിലക്കുറവ് നടപ്പാക്കി ഫോഴ്സ്
കേന്ദ്ര സര്ക്കാര് മള്ട്ടി യൂട്ടിലിറ്റി, പാസഞ്ചര് വാഹനങ്ങളുടെ ജിഎസ്ടി (GST Reform) നിരക്ക് കുറച്ചതിനെത്തുടര്ന്ന് ഫോഴ്സ് മോട്ടോര്സ് (Force Motors) തങ്ങളുടെ വാഹനങ്ങളുടെ വില കുറച്ചതായി പ്രഖ്യാപിച്ചു. ജിഎസ്ടി പരിഷ്കാരം വഴി ലഭിക്കുന്ന മുഴുവന് ആനുകൂല്യങ്ങളും ഉപഭോക്താക്കള്ക്ക് കൈമാറുന്നതായി കമ്പനി പ്രഖ്യാപിച്ചതോടെ ഗൂര്ഖ, അര്ബാനിയ, ട്രാക്സ്, മോണോബസ്, ട്രാവലര് തുടങ്ങിയ മോഡലുകള് ഇനി കൂടുതല് താങ്ങാനാവുന്ന വിലയില് ലഭ്യമാകും. ജിഎസ്ടി 2.0 കാരണം ഫോഴ്സ് വാഹനങ്ങള്ക്ക് എത്ര രൂപ വരെ കുറയുമെന്ന് ഈ ലേഖനത്തില് വിശദമായി വായിക്കാം.
ഇന്ത്യക്കാരുടെ ജനപ്രിയ ലൈഫ്സ്റ്റൈല് എസ്യുവികളില് ഒന്നായ ഫോഴ്സ് ഗൂര്ഖക്ക് വമ്പന് വിലക്കുറവ് ലഭിച്ചിട്ടുണ്ട്. ഓഫ്റോഡര് എസ്യുവിയുടെ വില 92,900 മുതല് 1.25 ലക്ഷം രൂപ വരെയാണ് കുറഞ്ഞത്. ഗൂര്ഖ 3 ഡോര് പതിപ്പിന്റെ ബേസ് വേരിയന്റിന്റെ പുതിയ വില 16.87 ലക്ഷം രൂപയാണ്. അതേസമയം ഗൂര്ഖ 5 ഡോറിന്റെ വില ഇപ്പോള് 18.50 ലക്ഷം രൂപ മുതല് ആരംഭിക്കുന്നു. എക്സ്ഷോറൂം വിലകളാണ് ഇത്.
140 bhp പവറും 320 Nm പീക്ക് ടോര്ക്കും ഉത്പാദിപ്പിക്കുന്ന മെര്സിഡീസില് നിന്നുള്ള 2.6 ലിറ്റര് ഡീസല് എഞ്ചിന് സജ്ജീകരിച്ചിരിക്കുന്ന ഗൂര്ഖ ഇലക്ട്രോണിക് ഷിഫ്റ്റ്, 233 mm ഗ്രൗണ്ട് ക്ലിയറന്സ്, 700 mm വാട്ടര് വേഡിംഗ് എബിലിറ്റി, 35-ഡിഗ്രി ഗ്രേഡബിലിറ്റി എന്നിവയ്ക്കൊപ്പം 4×4 വാഗ്ദാനം ചെയ്യുന്നു.
ട്രാവലര് ശ്രേണിയില് കോണ്ഫിഗറേഷന് അനുസരിച്ച് 1.18 ലക്ഷം മുതല് 4.52 ലക്ഷം രൂപ വരെ വിലക്കുറവുണ്ട്. പാസഞ്ചര്, സ്കൂള് ബസ്, ആംബുലന്സ്, കാര്ഗോ പതിപ്പുകളില് ലഭ്യമാകുന്ന ട്രാവലര് ഫോഴ്സ് മോട്ടോഴ്സിന്റെ ഏറ്റവും വിജയകരമായ ഉല്പ്പന്നങ്ങളില് ഒന്നാണ്. വാണിജ്യ വാന് വിഭാഗത്തില് ബ്രാന്ഡിന് ശക്തമായ 65 ശതമാനം വിപണി വിഹിതവും ഇത് സമ്മാനിക്കുന്നു.
ക്രൂയിസര്, തൂഫാന്, സിറ്റിലൈന് തുടങ്ങിയ വേരിയന്റുകള് ഉള്ക്കൊള്ളുന്ന ട്രാക്സ് മോഡലുകള്ക്ക് ഇപ്പോള് 2.54 ലക്ഷം മുതല് 3.21 ലക്ഷം വരെ വിലക്കുറവുണ്ട്. ബോഡി-ഓണ്-ഫ്രെയിം ആര്ക്കിടെക്ചറിലാണ് ട്രാക്സ് വാഹനങ്ങള് നിര്മ്മിച്ചിരിക്കുന്നത്. പരുക്കന് ശൈലിയിലുള്ള രൂപകല്പ്പന, കൂടുതല് സീറ്റിംഗ് കപാസിറ്റി, മള്ട്ടിപര്പ്പസ് ഉപയോഗം എന്നിവ കാരണം ഗ്രാമങ്ങളിലെയും സെമി അര്ബന് മാര്ക്കറ്റുകളിലെ ഓപ്പറേറ്റര്മാര്ക്ക് ഇഷ്ടപ്പെട്ട ചോയ്സാണ്.
ഇന്ത്യയിലെ ഏക മോണോകോക്ക് 33/41 സീറ്റര് ബസായ ഫോഴ്സ് മോണോബസിനും ജിഎസ്ടി 2.0പരിഷ്കരണത്തിന്റെ പ്രയോജനം ലഭിക്കുന്നു. ഫോഴ്സ് മോണോബസിന് 2.25 ലക്ഷം മുതല് 2.66 ലക്ഷം രൂപ വരെ വിലക്കുറവ് ലഭിക്കുന്നു. പാസഞ്ചര്, സ്കൂള് ബസ് ഫോര്മാറ്റുകളില് ഫോഴ്സ് മോണോബസ് ലഭ്യമാണ്.
114 hp പവറും 350 Nm പീക്ക് ടോര്ക്കും ഉത്പാദിപ്പിക്കാന് ശേഷിയുള്ള മെര്സിഡീസില് നിന്നുള്ള 2.6 ലിറ്റര് കോമണ് റെയില് ഡീസല് എഞ്ചിനാണ് മോണോബസിന് കരുത്ത് പകരുന്നത്. ഫോഴ്സ് മോട്ടോര്സിന്റെ പ്രീമിയം പീപ്പിള് മൂവറായ അര്ബാനിയയ്ക്കാണ് ഏറ്റവും കൂടുതല് വില കുറഞ്ഞിരിക്കുന്നത്. സീറ്റിംഗ് കപ്പാസിറ്റി അനുസരിച്ച് ഉപഭോക്താക്കള്ക്ക് 2.47 ലക്ഷം മുതല് 6.81 ലക്ഷം രൂപ വരെ ലാഭിക്കാം.
സീല്ഡ് പനോരമിക് വിന്ഡോകള്, റിക്ലൈനിംഗ് ഹൈബാക്ക് സീറ്റുകള്, ട്രിപ്പിള് എസി വെന്റുകള്, ഇന്ഡിവിജ്വല് റീഡിംഗ് ലാമ്പുകള്, യാത്രക്കാരുടെ സൗകര്യത്തിനായി ഒന്നിലധികം യുഎസ്ബി പോര്ട്ടുകള് തുടങ്ങിയ സവിശേഷതകള് അര്ബാനിയയില് ഫോഴ്സ് ഒരുക്കിയിട്ടുണ്ട്. 10, 13, 16 സീറ്റര് ലേഔട്ടുകളില് അര്ബാനിയ വാങ്ങാവുന്നതാണ്. ഫോഴ്സ് മോട്ടോര്സ് വാഹനങ്ങളുടെ വില പരിഷ്കാരം താഴെ കാണുന്ന പട്ടികയില് നിന്ന് ഒറ്റനോട്ടത്തില് മനസ്സിലാക്കാം.
| മോഡല് / റേഞ്ച് | വിലക്കുറവ് |
| ട്രാവലര് | ₹1.18-4.52 ലക്ഷം |
| ട്രാക്സ് | ₹2.54-3.21 ലക്ഷം |
| മോണോബസ് | ₹2.25-2.66 ലക്ഷം |
| അര്ബാനിയ | ₹2.47-6.81 ലക്ഷം |
| ഗൂര്ഖ | ₹0.93-1.25 lakh |
പല വാഹന നിര്മാതാക്കളും ജിഎസ്ടി 2.0 പ്രാബല്യത്തില് വരുന്ന സെപ്റ്റംബര് 22 മുതലാണ് വിലക്കുറവ് നടപ്പാക്കുന്നത്. എന്നാല് പുതിയ വിലകള് എല്ലാ ഡീലര്ഷിപ്പുകളിലും ഉടനടി പ്രാബല്യത്തില് വരുമെന്ന് ഫോഴ്സ് മോട്ടോര്സ് അറിയിച്ചു. വില വെട്ടിക്കുറച്ചതോടെ വാണിജ്യ, സ്വകാര്യ ഉപഭോക്താക്കള്ക്കിടയില് ഫോഴ്സിന്റെ പ്രധാന മോഡലുകള് കൂടുതല് ആകര്ഷകമാകുന്നു. ഗണ്യമായ വിലക്കുറവുകളോടെ അര്ബാനിയ, ട്രാവലര് ശ്രേണി ഉത്സവ സീസണില് വില്പ്പന ഉയര്ത്താന് ഫോഴ്സ് മോട്ടോര്സിനെ സഹായിക്കും.
Continue with Google