മാരുതിയുടെ ആദ്യ ഇലക്ട്രിക് കാറിനെക്കുറിച്ച് ഇതൊന്നും ആര്‍ക്കുമറിയില്ല! രഹസ്യവിവരങ്ങള്‍ ചോര്‍ന്നു

രാജ്യം ഏറെ പ്രതീക്ഷയോടെ കാത്തിരിക്കുന്ന മാരുതി സുസുക്കി ഇ-വിറ്റാര ഏതാനും ആഴ്ചകള്‍ക്കുള്ളില്‍ പുറത്തിറങ്ങാന്‍ പോകുകയാണ്. ഇന്ത്യയിലെ നമ്പര്‍ 1 കാര്‍ നിര്‍മാതാക്കളുടെ ആദ്യത്തെ ഇലക്ട്രിക് കാര്‍ എന്നത് തന്നെയാണ് ഇ-വിറ്റാരയ്ക്ക് ഇത്രയധികം ഹൈപ്പ് ലഭിക്കാനുള്ള കാരണം. 2025 ഓട്ടോ എക്‌സ്‌പോയില്‍ പ്രദര്‍ശിപ്പിക്കപ്പെട്ട ഇലക്ട്രിക് എസ്‌യുവി ഇതിനോടകം രാജ്യത്തിന്റെ ചില ഭാഗങ്ങളിലുള്ള നെക്‌സ ഷോറൂമുകളില്‍ പ്രദര്‍ശനത്തിനെത്തിയിട്ടുണ്ട്. ചില ഡീലര്‍ഷിപ്പുകള്‍ അനൗദ്യോഗികമായി കാറിന്റെ ബുക്കിംഗും ആരംഭിച്ചു. ഡെല്‍റ്റ, സീറ്റ, ആല്‍ഫ എന്നീ മൂന്ന് വേരിയന്റുകളിലാണ് വാഹനം പുറത്തിറങ്ങുക. ഓരോന്നും വ്യത്യസ്ത സവിശേഷതകള്‍ പായ്ക്ക് ചെയ്താണ് എത്തുക. ലോഞ്ചിന് മുന്നോടിയായി ഇ-വിറ്റാരയുടെ ഫീച്ചര്‍ ലിസ്റ്റ് പുറത്തായിട്ടുണ്ട്.

ഇ-വിറ്റാരയുടെ ബേസ് വേരിയന്റായ ഡെല്‍റ്റയില്‍ 18 ഇഞ്ച് അലോയ് വീലുകള്‍, എല്‍ഇഡി ഡിആര്‍എല്ലുകളാല്‍ ഫ്രെയിം ചെയ്ത ഓട്ടോ എല്‍ഇഡി ഹെഡ്ലൈറ്റുകള്‍, എല്‍ഇഡി ടെയില്‍ ലൈറ്റുകള്‍ എന്നിവയുള്‍പ്പെടെ നിരവധി ഫീച്ചറുകള്‍ ലഭിക്കും. ടു-ടോണ്‍ കളര്‍ സ്‌കീമിലുള്ള ഇന്റീരിയറാണ് ഡെല്‍റ്റ ട്രിമ്മില്‍ വരിക. ഫാബ്രിക് സീറ്റ് കവറുകളും ഡോര്‍ പാനലുകളില്‍ സോഫ്റ്റ്-ടച്ച് മെറ്റീരിയലും ഇതില്‍ ഉപയേഗിക്കുന്നു.

സ്ലൈഡുചെയ്യാനും ചാരിയിരിക്കാനും കഴിയുന്ന പിന്‍ സീറ്റുകള്‍ എല്ലാ യാത്രക്കാര്‍ക്കും സുഖകരമായ യാത്ര ഉറപ്പാക്കുന്നു. വയര്‍ലെസ് ആപ്പിള്‍ കാര്‍പ്ലേ, ആന്‍ഡ്രോയിഡ് ഓട്ടോ പിന്തുണയുള്ള 10.1 ഇഞ്ച് ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റവും 10.25 ഇഞ്ച് ഡിജിറ്റല്‍ ഇന്‍സ്ട്രുമെന്റ് ക്ലസ്റ്ററും ഇ-വിറ്റാരയ്ക്ക് ലഭിക്കുന്നു. ഡെല്‍റ്റ വേരിയന്റില്‍ മുന്നിലും പിന്നിലും ഒരു PM 2.5 എയര്‍ ഫില്‍ട്ടറും യുഎസ്ബി ടൈപ്പ്-എ, ടൈപ്പ്-സി ചാര്‍ജിംഗ് പോര്‍ട്ടുകളും ഉണ്ട്.

ഇ-വിറ്റാര ഡെല്‍റ്റയില്‍ നല്‍കിയിരിക്കുന്ന സുരക്ഷ സവിശേഷതകളും ശ്രദ്ധേയമാണ്. ഡ്രൈവര്‍മാരുടെ കാല്‍മുട്ട് സംരക്ഷിക്കാനുള്ള എയര്‍ബാഗ് ഉള്‍പ്പെടെ ഏഴ് എയര്‍ബാഗുകള്‍ ഇതിലുണ്ട്. മുന്നിലും പിന്നിലും പാര്‍ക്കിംഗ് സെന്‍സറുകള്‍, ഇഎസ്പി, റെയിന്‍ സെന്‍സിംഗ് വൈപ്പറുകള്‍, ഇലക്ട്രോണിക് പാര്‍ക്കിംഗ് ബ്രേക്ക് എന്നിവ അധിക സുരക്ഷാ ഫീച്ചറുകളില്‍ ഉള്‍പ്പെടുന്നു.

ഡെല്‍റ്റ വേരിയന്റില്‍ 48.8 kWh LFP ബാറ്ററി പായ്ക്കാണ് ലഭിക്കുന്നത്. ഇത് 105.8 kW (142 hp) പവറും 192.5 Nm ടോര്‍ക്കും ഉത്പാദിപ്പിക്കുന്ന ഒരു പെര്‍മനെന്റ് മാഗ്‌നറ്റിക് മോട്ടോറുമായി ചേരുന്നു. ഇതൊരു ബേസ് മോഡലാണെങ്കിലും 7 kW (AC)/70 kW (DC) ചാര്‍ജിംഗ് ശേഷി വാഗ്ദാനം ചെയ്യുന്നതിനാല്‍ ഇലക്ട്രിക് എസ്‌യുവി വിപണിയില്‍ നല്ലൊരു ഓപ്ഷനാക്കി മാറ്റുന്നു.

സീറ്റ വേരിയന്റിനെ സംബന്ധിച്ചിടത്തോളം, ഇത് ഒരു വയര്‍ലെസ് സ്മാര്‍ട്ട്ഫോണ്‍ ചാര്‍ജറും റിവേഴ്സ് പാര്‍ക്കിംഗ് ക്യാമറയും അതിന്റെ സവിശേഷതകളുടെ പട്ടികയില്‍ ചേര്‍ക്കുന്നു. സീറ്റയില്‍ 61.1 kWh LFP ബാറ്ററി പായ്ക്കും 128 kW (172 hp) പവറും 192.5 Nm ടോര്‍ക്കും ഉത്പാദിപ്പിക്കുന്ന ശക്തമായ ഒരു പെര്‍മനന്റ് മാഗ്‌നറ്റ് മോട്ടോറും സജ്ജീകരിച്ചിരിക്കുന്നു. ഈ പവര്‍ട്രെയിന്‍ 500 കിലോമീറ്ററിലധികം ദൂരം സഞ്ചരിക്കുമെന്ന് ഉറപ്പാക്കുന്നു.

ഇത് ബാറ്ററി ലൈഫിനെയും പെര്‍ഫോമന്‍സിനെയും കുറിച്ച് ആശങ്കയുള്ളവര്‍ക്ക് നല്ലൊരു ഓപ്ഷനാക്കി മാറ്റുന്നു. ഏറ്റവും ഉയര്‍ന്ന ആല്‍ഫ വേരിയന്റില്‍ സണ്‍റൂഫ്, 10-വേ പവര്‍ അഡ്ജസ്റ്റബിള്‍ വെന്റിലേറ്റഡ് ഫ്രണ്ട് സീറ്റുകള്‍ തുടങ്ങിയ എക്‌സ്‌ക്ലൂസീവ് ഓപ്ഷനുകള്‍ മാരുതി നല്‍കുന്നുണ്ട്. സിന്തറ്റിക് ലെതറിന്റെയും ഫാബ്രിക് അപ്‌ഹോള്‍സ്റ്ററിയുടെയും മനോഹരമായ കോംബിനേഷന്‍ ഇന്റീരിയറില്‍ കാണാം. ഇത് കാറിനകത്തെ ലക്ഷ്വറി ഫീല്‍ ഉയര്‍ത്തുന്നു.

കൂടാതെ ആല്‍ഫ വേരിയന്റ് ഒരു സബ് വൂഫര്‍ ഉള്‍പ്പെടെയുള്ള ഒരു നൂതന ശബ്ദ സംവിധാനത്തോടെയാണ് വരുന്നത്. സുരക്ഷയ്ക്കും സാങ്കേതികവിദ്യയ്ക്കും മുന്‍ഗണന നല്‍കുന്നവരെ ഇ വിറ്റാര ആല്‍ഫ വേരിയന്റ് നിരാശപ്പെടുത്തില്ല. സുരക്ഷിതമായ ഡ്രൈവിംഗ് അനുഭവം ഉറപ്പാക്കുന്നതിനായി ഫ്രണ്ട് ഫോഗ് ലൈറ്റുകള്‍, 360-ഡിഗ്രി ക്യാമറ സിസ്റ്റം, അഡ്വാന്‍സ്ഡ് ഡ്രൈവര്‍ അസിസ്റ്റന്‍സ് സിസ്റ്റങ്ങള്‍ (ADAS) എന്നിവ ഇതില്‍ ഉള്‍പ്പെടുന്നു.

മാരുതി സുസുക്കി ഇ-വിറ്റാര ഇലക്ട്രിക് വാഹന വിപണിയില്‍ തരംഗം സൃഷ്ടിക്കാനുറച്ചാണ് വരുന്നത്. അതിന്റെ വേരിയന്റുകളിലുടനീളം വൈവിധ്യമാര്‍ന്ന സവിശേഷതകള്‍ ഇത് വാഗ്ദാനം ചെയ്യുന്നു. നൂതന സുരക്ഷാ സംവിധാനങ്ങള്‍, ആഡംബരപൂര്‍ണമായ ഇന്റീരിയറുകള്‍, ശക്തമായ പവര്‍ട്രെയിനുകള്‍, മുന്‍നിര സാങ്കേതികവിദ്യ എന്നിവയുമായി വരുന്ന ഈ മാരുതി മോഡല്‍ ഇന്ത്യയിലെ ഇലക്ട്രിക് എസ്‌യുവി വിഭാഗത്തിന്റെ ഗതി തന്നെ മാറ്റുമെന്ന് പ്രതീക്ഷിക്കാം. ഇനി വില അറിയാനുള്ള കാത്തിരിപ്പാണ്.