കൈലാഖ് ഇത് വഴി വാങ്ങിയാൽ 1.10 ലക്ഷം കുറവ്; കാൻ്റീനിലൂടെ ആർക്കൊക്കെ വാങ്ങാൻ സാധിക്കും

ഷോറൂമിൽ ലഭിക്കുന്ന പല വാഹനങ്ങളും നിങ്ങൾക്ക് മറ്റേതെങ്കിലും വഴി വാങ്ങാൻ സാധിക്കുന്നുണ്ടെങ്കിൽ അത് കാൻ്റീൻ സ്റ്റോഴ്സ് വകുപ്പിൽ നിന്നാണ്. സ്കോഡ കൈലാഖ് രാജ്യത്തുളള സിഎസ്‌ഡിയിൽ നിന്ന് സ്വന്തമാക്കാൻ സാധിക്കുന്നു എന്ന സന്തോഷകരമായ വാർത്തയാണ് പങ്കുവയ്ക്കുന്നത്. കരസേന, നാവികസേന, വ്യോമസേന എന്നിവയിലെ സേവനമനുഷ്ഠിക്കുന്നവരും വിരമിച്ചവരുമായ ഉദ്യോഗസ്ഥരും അവരുടെ കുടുംബങ്ങളും സൈനിക ഉദ്യോഗസ്ഥരുടെ വിധവകളും ഉൾപ്പെടുന്ന ഇന്ത്യയിലെ പ്രതിരോധ വിഭാഗത്തിലുളളവർക്കാണ് കാന്റീൻ സ്റ്റോഴ്‌സ് ഡിപ്പാർട്ട്‌മെൻ്റ് വഴി വാഹനങ്ങൾ വാങ്ങാൻ സാധിക്കുക. പലതിൻ്റേയും വിപണി വിലയിൽ നിന്ന് വളരെ കുറഞ്ഞ നിരക്കിലാണ് വാഹനങ്ങൾ സ്വന്തമാക്കാൻ സാധിക്കുന്നത്.

ക്ലാസിക്, സിഗ്നേച്ചർ, സിഗ്നേച്ചർ പ്ലസ്, പ്രസ്റ്റീജ് എന്നിങ്ങനെ നാല് വേരിയൻ്റുകളിൽ വരുന്ന സ്കോഡ കൈലാക് ബ്രില്യൻ്റ് സിൽവർ, കാർബൺ സ്റ്റീൽ, കാൻഡി വൈറ്റ്, ടൊർണാഡോ റെഡ്, ഡീപ് ബ്ലാക്ക്, ലാവ ബ്ലൂ, ഒലിവ് ഗോൾഡ് എന്നീ വൈവിധ്യമാർന്ന നിറങ്ങളിലും സ്വന്തമാക്കാനാവും. 7.89 ലക്ഷം രൂപ മുതൽ 14.40 ലക്ഷം രൂപ വരെയാണ് സ്കോർ കൈലാക്കിനായി മുടക്കേണ്ടി വരുന്ന എക്സ്ഷോറൂം വില.

എന്നാൽ കാൻ്റീൻ വഴി വാങ്ങുകയാണെങ്കിൽ 1.10 ലക്ഷം രൂപയുടെ വരെ കുറവ് എക്സ്ഷോറൂം വിലയിൽ വ്യത്യാസമുണ്ട്. കാഴ്ച്ചയിൽ ബേബി കുഷാഖ് പോലെ തോന്നിക്കുന്നതിനാൽ ആളുകൾ വേഗം ആകൃഷ്‌ടരായിട്ടുമുണ്ട്. സ്പ്ലിറ്റ് ഹെഡ്‌ലാമ്പുകൾ, ബോക്‌സി പ്രൊഫൈൽ, ഷോർട്ട് ഓവർഹാങ്ങുകൾ എന്നിവ ഉൾക്കൊള്ളുന്ന സ്കോഡയുടെ മോഡേൺ-സോളിഡ് ഡിസൈൻ ഭാഷ്യമാണ് പുതിയ കൈലാക്കിൽ അവതരിപ്പിക്കുന്നത്.

ബട്ടർഫ്ലൈ ഗ്രില്ലിന്റെ ആധുനിക രൂപമാണ് മുൻവശത്ത് ഉപയോഗിച്ചിരിക്കുന്നതും. എൽഇഡി ഡിആർഎല്ലുകളും ഹെഡ്‌ലാമ്പുകളും എല്ലാ വേരിയന്റുകളിലും സ്റ്റാൻഡേർഡായിരിക്കും. സ്കോഡയുടെ കുഞ്ഞൻ എസ്‌യുവിയുടെ ടോപ്പ് ട്രിമ്മുകളിൽ 17 ഇഞ്ച് അലോയ് വീലുകളും ലഭിക്കും. ഫീച്ചറുകളുടെ കാര്യത്തിലേക്ക് വന്നാൽ ആരേയും നിരാശപ്പെടുത്താത്ത രീതിയിലാണ് വാഹനത്തെ കമ്പനി ഒരുക്കിയിരിക്കുന്നത്.

താഴ്ന്ന വേരിയന്റുകളിൽ അഞ്ച് ഇഞ്ച് ടച്ച്‌സ്‌ക്രീനും സെമി-ഡിജിറ്റൽ ക്ലസ്റ്ററുമായിരിക്കും ലഭ്യമാവുക. മുൻ നിരയിൽ വെന്റിലേഷനോടുകൂടിയ ഇലക്ട്രിക്കായി ക്രമീകരിക്കാനാവുന്ന സീറ്റുകളാണ് കൈലാക്കിൽ ഉള്ളത്. കൂടാതെ തിരഞ്ഞെടുത്ത വകഭേദത്തെ ആശ്രയിച്ച് ക്യാബിനിൽ സിംഗിൾ, ഡ്യുവൽ-ടോൺ ഓപ്ഷനുകൾ ലഭിക്കും. ക്ലാസിക്, സിഗ്നേച്ചർ, സിഗ്നേച്ചർ പ്ലസ് എന്നിവയിൽ വ്യത്യസ്ത തരം ഫാബ്രിക് അപ്ഹോൾസ്റ്ററിയും ടോപ്പ്-സ്പെക്ക് പ്രെസ്റ്റീജിൽ ലെതറെറ്റ് സീറ്റുകളും ലഭിക്കും.

കൈലാക്കിന്റെ ബൂട്ട് കപ്പാസിറ്റി 446 ലിറ്ററാണെന്നും സ്കോഡ പറയുന്നു. കൂടാതെ പിന്നിലെ സീറ്റുകൾ മടക്കിവെച്ചാൽ ലഗേജ് സ്പേസ് 1,265 ലിറ്ററായി വികസിപ്പിക്കാനുമാവുമെന്നത് പ്രായോഗികത വർധിപ്പിക്കുന്ന സംഗതിയാണ്. സെഗ്മെന്റിലെ പ്രധാന എതിരാളികളെല്ലാം പെട്രോൾ, ഡീസൽ, സിഎൻജി, ഇലക്ട്രിക് എന്നിവയുൾപ്പെടെ നിരവധി എഞ്ചിൻ ഓപ്ഷനുകൾ വാഗ്ദാനം ചെയ്യുമ്പോൾ കൈലാക് ഒരൊറ്റ 1.0 ലിറ്റർ ടിഎസ്ഐ പെട്രോൾ എഞ്ചിനിലാണ് വിപണിയിൽ എത്തുന്നത്.

6-സ്പീഡ് മാനുവൽ അല്ലെങ്കിൽ ടോർക്ക് കൺവെർട്ടർ ഓട്ടോമാറ്റിക് ട്രാൻസ്മിഷൻ ഓപ്ഷനുമായി ജോടിയാക്കിയിരിക്കുന്ന ടിഎസ്ഐ എഞ്ചിന് 113 bhp കരുത്തിൽ പരമാവധി 179 Nm torque വരെ ഉത്പാദിപ്പിക്കാൻ കഴിയും.ആറ് എയർബാഗുകൾ, മൾട്ടി-കൊളീഷൻ ബ്രേക്ക്, റോൾഓവർ പ്രൊട്ടക്ഷൻ, ഇലക്ട്രോണിക് ഡിഫറൻഷ്യൽ ലോക്ക്, ഇബിഡി സഹിതമുള്ള ആന്റി-ലോക്ക് ബ്രേക്കുകൾ, ഇലക്ട്രോണിക് സ്റ്റെബിലിറ്റി കൺട്രോൾ എന്നിവയുൾപ്പെടെ 25 ലധികം ആക്‌ടിവ് ആൻഡ് പാസീവ് സുരക്ഷാ സവിശേഷതകളും കാറിൽ ഉണ്ട്.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു.ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലിഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻ്റ് ചെയ്യാനും മറക്കല്ലേ.