ആള്‍ട്ടോയെ 'തീര്‍ത്ത്' ഈ വിലകുറഞ്ഞ ടാറ്റ കാര്‍! വെറും ₹4.5 ലക്ഷത്തിന് കിട്ടും, മൈലേജ് 28KM വരെ

ഇന്ത്യന്‍ ഉപഭോക്താക്കള്‍ക്കിടയില്‍ ഹാച്ച്ബാക്ക് കാറുകള്‍ക്ക് എന്നും വലിയ ഡിമാന്‍ഡാണുള്ളത്. ഇടക്കാലത്ത് എസ്‌യുവി ജ്വരത്തിനിടെയില്‍ ഒന്ന് തളര്‍ന്ന് പോയ ഹാച്ച്ബാക്ക് സെഗ്‌മെന്റിന് അടുത്തിടെ പ്രാബല്യത്തില്‍ വന്ന ജിഎസ്ടി 2.0 പരിഷ്‌കാരങ്ങള്‍ ജീവശ്വാസമേകിയിരുന്നു. പോക്കറ്റ് കീറാത്ത വിലയില്‍ മികച്ച മൈലേജ് നല്‍കുന്ന ഹാച്ച്ബാക്ക് കാറുള്‍ക്ക് എപ്പോഴും ആവശ്യക്കാരുണ്ട്. 2025 ഒക്ടോബര്‍ മാസത്തെ വില്‍പ്പന കണക്കുകള്‍ പുറത്തുവന്നപ്പോള്‍ രാജ്യത്ത് ഏറ്റവും കൂടുതല്‍ വില്‍പ്പന നേടിയ ഹാച്ച്ബാക്ക് മാരുതി സുസുക്കി വാഗണ്‍ആര്‍ ആയിരുന്നു. എന്നാല്‍ വമ്പന്‍ വളര്‍ച്ചയുമായി ഞെട്ടിച്ചത് ടാറ്റ ടിയാഗോയാണ്. ടാറ്റയുടെ എന്‍ട്രി ലെവല്‍ ഹാച്ചിന്റെ പോയ മാസത്തെ വില്‍പ്പന നമുക്ക് വിശദമായി പരിശോധിക്കാം.

നിലവില്‍ ഗാഡിവാഡി വെബ്സൈറ്റില്‍ പ്രസിദ്ധീകരിച്ച വില്‍പ്പന റിപ്പോര്‍ട്ട് അനുസരിച്ച്, 2025 ഒക്ടോബര്‍ മാസത്തില്‍ ടാറ്റ മോട്ടോര്‍സ് ആകെ 8,850 ടിയാഗോ കാറുകള്‍ വിറ്റഴിച്ചു. 2024 ഒക്ടോബറില്‍ ആകെ വിറ്റഴിച്ചത് 4,682 ടാറ്റ ടിയാഗോ കാറുകള്‍ മാത്രമായിരുന്നു. അതായത്, 2024 ഒക്ടോബറുമായി താരതമ്യം ചെയ്യുമ്പോള്‍, 2025 ഒക്ടോബറില്‍ ടാറ്റ 4,168 ടിയാഗോ കാറുകള്‍ അധികം വിറ്റഴിച്ചു.

ഇതിലൂടെ ടിയാഗോ 89 ശതമാനം വാര്‍ഷിക വളര്‍ച്ച രേഖപ്പെടുത്തി. ഏകദേശം 19,000 യൂണിറ്റ് വില്‍പ്പന നടത്തി ഒന്നാം സ്ഥാനത്തെത്തിയ മാരുതി വാഗണ്‍ആറിന് 36 ശതമാനം വാര്‍ഷിക വളര്‍ച്ച മാത്രമാണ് രേഖപ്പെടുത്താന്‍ കഴിഞ്ഞത്. 2025 ഒക്ടോബറില്‍ ഏറ്റവും കൂടുതല്‍ വിറ്റഴിക്കപ്പെട്ട മികച്ച 10 ഹാച്ച്ബാക്ക് കാറുകളുടെ പട്ടികയില്‍ ടാറ്റ ടിയാഗോ നാലാം സ്ഥാനത്താണ്. മാരുതി വാഗണ്‍ ആര്‍, മാരുതി ബലേനോ, മാരുതി സ്വിഫ്റ്റ് എന്നിവയാണ് ഈ പട്ടികയിലെ ആദ്യ 3 സ്ഥാനങ്ങളിൽ.

ടാറ്റ ടിയാഗോയുടെ സവിശേഷതകള്‍, എഞ്ചിന്‍, വില എന്നിവയെ കുറിച്ച് ഇനി പറയാം. നിലവില്‍ ടാറ്റ ടിയാഗോ ഐസി എഞ്ചിന്‍, ഇലക്ട്രിക് പതിപ്പുകളില്‍ ലഭ്യമാണ്. ഐസി എഞ്ചിന്‍ പതിപ്പിന്റെ ബേസ് വേരിയന്റിന് വെറും 4.57 ലക്ഷം രൂപ മാത്രമാണ് വില. ടോപ് സ്‌പെക് വേരിയന്റിന് 8.10 ലക്ഷം രൂപയാണ് വില നിശ്ചയിച്ചിരിക്കുന്നത്.

മറുവശത്ത്, ടാറ്റ ടിയാഗോയുടെ ഇലക്ട്രിക് പതിപ്പിന്റെ ബേസ് വേരിയന്റിന് 7.99 ലക്ഷം രൂപ മാത്രമാണ് വില. അതേസമയം, അതിന്റെ ഉയര്‍ന്ന വേരിയന്റിന് 11.14 ലക്ഷം രൂപ മുടക്കേണ്ടതായുണ്ട്. ഇന്ത്യയില്‍ ഏറ്റവും കുറഞ്ഞ വിലയുള്ള ഇലക്ട്രിക് കാറുകളില്‍ ഒന്ന് കൂടിയാണ് ടിയാഗോ ഇവി. മുകളില്‍ പരാമര്‍ശിച്ചത് ടാറ്റ മോട്ടോര്‍സിന്റെ ഔദ്യോഗിക വെബ്സൈറ്റില്‍ സൂചിപ്പിച്ചിരിക്കുന്ന എക്സ്-ഷോറൂം വിലകളാണ്.

ഈ കാറില്‍ ആന്‍ഡ്രോയിഡ് ഓട്ടോയും ആപ്പിള്‍ കാര്‍പ്ലേയും പിന്തുണയ്ക്കുന്ന 7 ഇഞ്ച് ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം ഉള്‍പ്പെടുത്തിയിട്ടുണ്ട്. കൂടാതെ, റിയര്‍ പാര്‍ക്കിംഗ് ക്യാമറ, പവര്‍ വിന്‍ഡോകള്‍, ഓട്ടോമാറ്റിക് ക്ലൈമറ്റ് കണ്‍ട്രോള്‍, മള്‍ട്ടി-ഫംഗ്ഷന്‍ സ്റ്റിയറിംഗ് വീല്‍ എന്നിവയും ഇതിന്റെ സവിശേഷതകളാണ്. സുരക്ഷയ്ക്കായി ഡ്യുവല്‍ എയര്‍ബാഗുകള്‍, എബിഎസ് സഹിതം ഇബിഡി, കോര്‍ണര്‍ സ്റ്റെബിലിറ്റി കണ്‍ട്രോള്‍ എന്നിവ സ്റ്റാന്‍ഡേര്‍ഡായി ലഭിക്കുന്നു.

ടിയാഗോയില്‍ 1.2 ലിറ്റര്‍ 3-സിലിണ്ടര്‍ പെട്രോള്‍ എഞ്ചിനാണ് തുടിപ്പേകുന്നത്. ഇത് ഏകദേശം 86 bhp പവറും 113 Nm പീക്ക് ടോര്‍ക്കും ഉത്പാദിപ്പിക്കുന്നു. ഈ എഞ്ചിന്‍ 5-സ്പീഡ് മാനുവല്‍ അല്ലെങ്കില്‍ 5-സ്പീഡ് എഎംടി ഗിയര്‍ബോക്സുമായി ഘടിപ്പിച്ചിരിക്കുന്നു. കൂടാതെ, 28 കിലോമീറ്റര്‍ വരെ മൈലേജ് നല്‍കുന്ന സിഎന്‍ജി പവര്‍ട്രെയിന്‍ ഓപ്ഷനും ടിയാഗോയില്‍ ലഭ്യമാണ്.

ഇന്ത്യയില്‍ എഎംടി ട്രാന്‍സ്മിഷന്‍ ഓപ്ഷനില്‍ വാങ്ങാവുന്ന ചുരുക്കം ചില സിഎന്‍ജി കാറുകളില്‍ ഒന്ന് കൂടിയാണ് ടിയാഗോ സിഎന്‍ജി. ഗ്ലോബല്‍ NCAP ക്രാഷ് ടെസ്റ്റുകളില്‍ ടാറ്റ ടിയാഗോ 4-സ്റ്റാര്‍ സേഫ്റ്റി റേറ്റിംഗ് നേടിയിട്ടുണ്ട്. വളരെ കുറഞ്ഞ വിലയ്ക്ക് സുരക്ഷിതമായ കാര്‍ വാങ്ങാന്‍ ആഗ്രഹിക്കുന്ന ഉപഭോക്താക്കള്‍ക്ക് ടാറ്റ ടിയാഗോ ഒരു മികച്ച ഓപ്ഷനാണ്. പോയമാസം ആള്‍ട്ടോയടക്കമുള്ള പല ജനപ്രിയ മോഡലുകളെയും പിന്നിലാക്കിയ ടിയാഗോ വരും മാസങ്ങളിലും ഇതേ പ്രകടനം തുടരുമെന്ന് പ്രതീക്ഷിക്കാം.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു. ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻറ് ചെയ്യാനും മറക്കല്ലേ.