Click it and Unblock the Notifications
ടൊയോട്ട ഫോര്ച്യൂണര് vs എംജി ഗ്ലോസ്റ്റര്; പോരിനിറങ്ങിയാല് അടിയറവില്ലെന്ന് രണ്ട് കൊമ്പന്മ്മാരും
ദൈനംദിന യാത്രകള്, ദീര്ഘദൂര യാത്രകള്, ഫാമിലി ട്രിപ്പുകള് എന്നിവയെല്ലാം നമ്മുടെ ജീവിതശൈലിയില് ഒരുപാട് മാറ്റങ്ങള് സൃഷ്ടിക്കാറുണ്ട്. ഇതിലെല്ലാം പ്രധാന ഘടകമായി വരുന്നത് നമ്മള് സഞ്ചരിക്കുന്ന വാഹനങ്ങള് തന്നെയാണ്. വീട്ടുമുറ്റത്തൊരു കാര് വാങ്ങിയിടുക, അതില് യാത്രചെയ്യുക എന്നതായിരിക്കും ഇന്നത്തെ കാലത്ത് പലരുടെയും ലക്ഷ്യം. അതില് തന്നെ ഫുള്സൈസ് എസ്യുവികളോട് പ്രത്യേക ഇഷ്ടം സൂക്ഷിക്കുന്നവര് ഉണ്ട്. പഴയ കാര് മാറ്റി പുതിയ ഫുള്സൈസ് എസ്യുവി വാങ്ങാന് പ്ലാനിടുന്നവര്ക്ക് ഏറ്റവും മികച്ച ഓപ്ഷന് ടൊയോട്ട ഫോര്ച്യൂണര് അല്ലെങ്കില് എംജി ഗ്ലോസ്റ്റര് ആയിരിക്കും. ഇവരില് ആരാണ് ഏറ്റവും മികച്ചവനെന്ന ചോദ്യം പലരിലുമുണ്ട്. അതിനുളള ഉത്തരത്തിനായി ഈ ലേഖനം തുടര്ന്ന് വായിച്ചോളൂ.
ലോകത്തിലെ ഏറ്റവും വലുതും ജനപ്രിയവുമായ വാഹന നിര്മ്മാതാക്കളില് ഒന്നാണ് ടൊയോട്ട. മികച്ച പെര്ഫോമന്സ്, ഇന്ധനക്ഷമത, രൂപകല്പ്പന എന്നിവയുമായി വരുന്ന വാഹനങ്ങള് നിര്മ്മിക്കുന്നതിലൂടെ ആഗോള പ്രശസ്തി നേടിയവരാണിവര്. ഇന്ന് വിപണിയില് തിളങ്ങിനില്ക്കുന്ന ടൊയോട്ട വാഹനങ്ങളില് ഏറ്റവും മികച്ച ഒന്നാണ് ടൊയോട്ട ഫോര്ച്യൂണര്. അതിവേഗം വികസിച്ചുക്കൊണ്ടിരിക്കുന്ന ഇന്ത്യന് എസ്യുവി വിപണിയിലെ കരുത്തന്മാരില് ഒരാള് കൂടിയാണ് ഫോര്ച്യൂണര്.
2.8 ലിറ്റര് ടര്ബോ-ഡീസല് എഞ്ചിനാണ് ഇതിന് കരുത്ത് പകരുന്നത്. ലിറ്ററിന് 14 കിലോമീറ്റര് വരെയാണ് ഈ മോഡലിന്റെ ഇന്ധനക്ഷമത പറയുന്നത്. അതേസമയം ട്രാഫിക്, ഡ്രൈവിംഗ് ശൈലി എന്നിവയെ ആശ്രയിച്ച് ലിറ്ററിന് 11 മുതല് 13 കിലോമീറ്റര് വരെയാകും മൈലേജ് ലഭിക്കുക. പെട്രോള് മോഡലിന് അല്പ്പം കാര്യക്ഷമത കുറവാണ്. കൂടുതല് പവര് ആവശ്യമുള്ളതിനാല് ലിറ്ററിന് 10 മുതല് 11 കിലോമീറ്ററിനടുത്താണ് ഇന്ധനക്ഷമത. ഇതിന് 80 ലിറ്റര് വലിയ ഇന്ധന ടാങ്കും ഉണ്ട്.
മുന്വശത്തായി ബൈ-എല്ഇഡി ഹെഡ്ലാമ്പുകളും സ്റ്റൈലിഷ് സീക്വന്ഷ്യല് ടേണ് ഇന്ഡിക്കേറ്ററുകളും ഉള്ള ഗ്രില് എസ്യുവിക്ക് പ്രീമിയം ആകര്ഷണം നല്കാന് സഹായിക്കുന്നുണ്ട്. ഉയര്ന്ന ഗ്രൗണ്ട് ക്ലിയറന്സ്, ബോണറ്റ് ലൈനുകള്, വീതിയേറിയ ബമ്പര് ഡിസൈന് എന്നിവയും പ്രധാന ആകര്ഷണങ്ങളില് ഉള്പ്പെടുന്നുണ്ട്. പിന്നില് സ്ലീക്ക് എല്ഇഡി ടെയില്ലൈറ്റുകളും ക്രോം ആക്സന്റുകളുമുണ്ട്.
ഫോര്ച്യൂണറിന്റെ 7-സീറ്റര് ക്യാബിന് വളരെയധികം വിശാലമാണ്. ഇത് സുഖസൗകര്യങ്ങള് തേടുന്ന കുടുംബങ്ങള്ക്ക് അനുയോജ്യമായ എസ്യുവിയാക്കി മാറ്റുന്നു. ലെതര് അപ്ഹോള്സ്റ്ററി, ഒരു വലിയ ടച്ച്സ്ക്രീന് ഇന്ഫോടെയ്ന്മെന്റ് സിസ്റ്റം, മെറ്റാലിക്, സോഫ്റ്റ്-ടച്ച് ഘടകങ്ങളുള്ള നന്നായി രൂപകല്പ്പന ചെയ്ത ഡാഷ്ബോര്ഡ് എന്നിവ ഇതില് ഉള്പ്പെടുന്നു. ഇവയെല്ലാം കോര്ത്തിണക്കിയ ടൊയോട്ട ഫോര്ച്യൂണര് കണ്ണുംപ്പൂട്ടി വാങ്ങാന് സാധിക്കുന്ന ഒരു കിടിലന് ഓപ്ഷനാണ്.
ഇനി എംജി ഗ്ലോസ്റ്ററിന്റെ കാര്യത്തിലേക്ക് വരാം. ചൈനയിലെ ഏറ്റവും വലിയ ഓട്ടോമോട്ടീവ് ഗ്രൂപ്പുകളില് ഒന്നായ എസ്എഐസി മോട്ടോറിന്റെ ഉടമസ്ഥതയിലുള്ള എംജി ഇന്ത്യ ഉള്പ്പെടെയുള്ള ആഗോള വിപണികളില് അതിവേഗമാണ് വികസിച്ചത്. യൂത്ത്ഫുള് ബ്രാന്ഡിംഗും ബോള്ഡ് ഫീച്ചറുകളും നിറഞ്ഞ പ്രീമിയം, ഫ്യൂച്ചറിസ്റ്റിക് ഡ്രൈവിംഗ് അനുഭവം തേടുന്ന പുതുതലമുറ എസ്യുവി പ്രേമികളെ എന്നും ആകര്ഷിക്കുന്ന ഒരു മോഡലാണ് എംജി ഗ്ലോസ്റ്റര്.
ശക്തമായ 2.0 ലിറ്റര് ടര്ബോ/ട്വിന്-ടര്ബോ ഡീസല് എഞ്ചിനാണ് എംജി ഗ്ലോസ്റ്ററിന് കരുത്തു പകരുന്നത്. ട്രാഫിക് സാഹചര്യങ്ങള്, ഡ്രൈവിംഗ് ശൈലി, 4x4 സിസ്റ്റം എത്ര തവണ ഉപയോഗിക്കുന്നു എന്നിവയെ ആശ്രയിച്ച് ലിറ്ററിന് ഏകദേശം 9 മുതല് 11 കിലോമീറ്റര് വരെ മൈലേജ് വാഗ്ദാനം ചെയ്യുന്നു. അതേസമയം തിരക്കേറിയ സിറ്റി റോഡുകളില് 8 മുതല് 9 കിലോമീറ്റര്/ലിറ്ററിലേക്ക് കുറയാനും സാധ്യതയുണ്ട്. ഇടക്കിടെയുള്ള ബ്രേക്കിംഗിനും ആക്സിലറേഷനും കൂടുതല് ഇന്ധനം ആവശ്യമാണ് എന്നതാണ് ഇതിന് കാരണം.
എംജി ഗ്ലോസ്റ്ററിനെ മറ്റ് എസ്യുവികളില് നിന്ന് വ്യത്യസ്തനാക്കുന്നത് അതിന്റെ മികച്ച രൂപകല്പ്പനയാണ്. വിശാലമായ ഒക്ടാഗോണല് ഗ്രില്, എല്ഇഡി ഹെഡ്ലാമ്പുകള്, ക്രോം ഡീറ്റെയിലിംഗ് എന്നിവയാണ് മുന്വശത്തെ പ്രധാന ഹൈലൈറ്റുകള്. അകത്ത് ലെതര് അപ്ഹോള്സ്റ്ററി, ഒരു വലിയ ടച്ച്സ്ക്രീന്, ആംബിയന്റ് ലൈറ്റിംഗ്, സുഖസൗകര്യങ്ങള് വര്ധിപ്പിക്കുന്നതിനായി ക്രമീകരിച്ച കണ്ട്രോളുകള് എന്നിവയാല് ക്യാബിന് ആഡംബരപൂര്ണമാണ്.
ടൊയോട്ട ഫോര്ച്യൂണറിന്റെ ബേസ് വേരിയന്റിന്റെ വില 39.51 ലക്ഷം രൂപയാണ്. ടോപ്സ്പെക് വേരിയന്റിന് 57.11 ലക്ഷം രൂപ മുടക്കണം. മറുവശത്ത് എംജി ഗ്ലോസ്റ്ററിന്റെ വില 44.94 ലക്ഷം മുതല് 51.20 ലക്ഷം രൂപ വരെ പോകുന്നു. എക്സ്ഷോറൂം വിലകളാണ് ഇത്. മൊത്തത്തില് പറഞ്ഞാല് ഡിസൈന്, ഇന്റീരിയര്, ഇന്ധനക്ഷമത, സുരക്ഷാസംവിധാനങ്ങള് എന്നിവ കോര്ത്തിണക്കിയ ഒരു എസ്യുവി വാങ്ങാന് പദ്ധതിയുള്ളവര്ക്ക് പരിഗണിക്കാവുന്ന ഏറ്റവും മികച്ച ഒപ്ഷനുകളാണ് ടൊയോട്ട ഫോര്ച്യൂണറും എംജി ഗ്ലോസ്റ്ററും.
Continue with Google