ക്രെറ്റ ഇലക്ട്രിക് വാങ്ങാൻ പ്ലാനുണ്ടോ? ഹ്യുണ്ടായിയുടെ ഈ നീക്കം ബജറ്റ് തെറ്റിക്കും; ഇനി 2 ലക്ഷം അധികം നൽകണം!

കഴിഞ്ഞ വര്‍ഷം 2025 ഓട്ടോ എക്‌സ്‌പോയിലാണ് ഹ്യുണ്ടായി തങ്ങളുടെ ജനപ്രിയ എസ്‌യുവിയായ ക്രെറ്റയുടെ ഇലക്ട്രിക് പതിപ്പ് വിപണിയില്‍ എത്തിച്ചത്. ഇപ്പോള്‍ കൊറിയന്‍ കമ്പനി ക്രെറ്റയുടെ ഇലക്ട്രിക് പതിപ്പില്‍ നിര്‍ണായക മാറ്റങ്ങള്‍ വരുത്തിയിരിക്കുകയാണ്. 2026 മോഡല്‍ ഇയര്‍ പരിഷ്‌കാരങ്ങളുടെ ഭാഗമായി ക്രെറ്റ ഇലക്ട്രിക്കിന്റെ 42kWh ബാറ്ററി പായ്ക്കില്‍ ലഭ്യമായിരുന്ന 'സ്മാര്‍ട്ട്' (Smart) വേരിയന്റുകള്‍ കമ്പനി നിര്‍ത്തലാക്കി. യാതൊരു മുന്‍കൂര്‍ അറിയിപ്പുമില്ലാതെയാണ് ഹ്യുണ്ടായി ഈ വിലകുറഞ്ഞ മോഡലുകള്‍ ലൈനപ്പില്‍ നിന്ന് നീക്കം ചെയ്തിരിക്കുന്നത്. V3 Cars ആണ് ഇത് റിപ്പോര്‍ട്ട് ചെയ്തിരിക്കുന്നത്.

നേരത്തെ സ്മാര്‍ട്ട്, സ്മാര്‍ട്ട് (O), സ്മാര്‍ട്ട് (O) HC, സ്മാര്‍ട്ട് (O) HC ഡ്യുവല്‍ ടോണ്‍ എന്നീ ട്രിമ്മുകളില്‍ 42kWh ബാറ്ററി പായ്ക്ക് ലഭ്യമായിരുന്നു. കുറഞ്ഞ നിരക്കില്‍ പ്രീമിയം ഫീച്ചറുകള്‍ ആഗ്രഹിക്കുന്നവരെ ലക്ഷ്യമിട്ടാണ് ഈ മോഡലുകള്‍ എത്തിയിരുന്നത്. എന്നാല്‍ പുതിയ അപ്‌ഡേറ്റ് പ്രകാരം സ്മാര്‍ട്ട് വേരിയന്റുകള്‍ ഇനി വലിയ 51.4kWh ബാറ്ററി പായ്ക്കില്‍ മാത്രമേ ലഭ്യമാകൂ. ഈ മാറ്റം ക്രെറ്റ ഇലക്ട്രിക് വാങ്ങാന്‍ ആഗ്രഹിക്കുന്നവരുടെ ബജറ്റിനെ കാര്യമായി ബാധിക്കും.

സ്മാര്‍ട്ട് വേരിയന്റുകള്‍ വലിയ ബാറ്ററിയിലേക്ക് മാറിയതോടെ വാഹനത്തിന്റെ മിഡ്‌സ്‌പെക് വേരിയന്റുകളുടെ പ്രാരംഭ വിലയില്‍ ഏകദേശം രണ്ട് ലക്ഷം രൂപയോളം വര്‍ദ്ധനവ് ഉണ്ടാകാനാണ് സാധ്യത. മിതമായ നിരക്കില്‍ ഒരു ഇലക്ട്രിക് എസ്‌യുവി സ്വപ്നം കണ്ടിരുന്ന ഉപഭോക്താക്കള്‍ക്ക് ഇത് വലിയ തിരിച്ചടിയായി മാറും. ദിവസേന നഗരപരിധിക്കുള്ളില്‍ മാത്രം യാത്ര ചെയ്യുന്നവര്‍ക്കും വലിയ റേഞ്ച് ആവശ്യമില്ലാത്തവര്‍ക്കും 42kWh ബാറ്ററി പായ്ക്ക് മികച്ച ഓപ്ഷനായിരുന്നു.

കുറഞ്ഞ വിലയില്‍ സ്മാര്‍ട്ട് (O) പോലുള്ള മോഡലുകള്‍ തിരഞ്ഞെടുക്കാന്‍ ഇവര്‍ക്ക് സാധിക്കുമായിരുന്നു. എന്നാല്‍ പുതിയ തീരുമാനത്തിലൂടെ, ആവശ്യമുണ്ടെങ്കിലും ഇല്ലെങ്കിലും ഉപഭോക്താക്കള്‍ വലിയ ബാറ്ററി പായ്ക്കിനായി കൂടുതല്‍ തുക മുടക്കേണ്ടി വരുന്ന സാഹചര്യമാണ് നിലവിലുള്ളത്. ഉത്പാദന പ്രക്രിയ ലളിതമാക്കുന്നതിനും ലാഭം വര്‍ദ്ധിപ്പിക്കുന്നതിനുമുള്ള തന്ത്രത്തിന്റെ ഭാഗമായാണ് ഹ്യുണ്ടായുടെ ഈ നീക്കം വിലയിരുത്തപ്പെടുന്നത്.

നിലവില്‍ വിപണിയില്‍ മത്സരം കടുക്കുന്ന സാഹചര്യത്തില്‍ കൂടുതല്‍ റേഞ്ച് നല്‍കുന്ന വലിയ ബാറ്ററി പായ്ക്കുകളിലേക്ക് ഉപഭോക്താക്കളെ ആകര്‍ഷിക്കുക എന്നതാണ് കമ്പനിയുടെ പ്രധാന ലക്ഷ്യം. ഇത് വിപണിയില്‍ ക്രെറ്റയ്ക്ക് കരുത്തേകുമെന്നും കമ്പനി കരുതുന്നു. കുറഞ്ഞ ബജറ്റില്‍ ക്രെറ്റ ഇലക്ട്രിക് സ്വന്തമാക്കാന്‍ ആഗ്രഹിക്കുന്നവര്‍ക്ക് ഇനി താഴെയുള്ള വേരിയന്റുകളെ മാത്രമേ ആശ്രയിക്കാന്‍ കഴിയൂ. എന്നാല്‍ സ്മാര്‍ട്ട് വേരിയന്റിലെ പ്രീമിയം സൗകര്യങ്ങള്‍ വേണമെന്നുണ്ടെങ്കില്‍ 51.4kWh ബാറ്ററി പായ്ക്കിന്റെ ഉയര്‍ന്ന വില നല്‍കുകയല്ലാതെ മറ്റ് മാര്‍ഗങ്ങളില്ല.

ഈ മാറ്റം കമ്പനിയുടെ ഔദ്യോഗിക വെബ്സൈറ്റിലും ബ്രോഷറുകളിലും ഇതിനോടകം പ്രതിഫലിച്ചു കഴിഞ്ഞു. ഇന്ത്യന്‍ വിപണിയില്‍ ടാറ്റ കര്‍വ് ഇവി, എംജി ZS ഇവി എന്നിവയുമായാണ് ക്രെറ്റ ഇലക്ട്രിക്ക് പ്രധാനമായും മത്സരിക്കുന്നത്. 51.4kWh ബാറ്ററി പായ്ക്ക് ഒറ്റ ചാര്‍ജില്‍ കൂടുതല്‍ ദൂരം സഞ്ചരിക്കാന്‍ സഹായിക്കുമെങ്കിലും, വില വര്‍ദ്ധനവ് ഇടത്തരക്കാരായ ഉപഭോക്താക്കളെ എങ്ങനെയൊക്കെ സ്വാധീനിക്കുമെന്ന് വരും ദിവസങ്ങളില്‍ കണ്ടറിയണം.

ക്രെറ്റയുടെ വിശ്വാസ്യതയില്‍ ഉപഭോക്താക്കള്‍ ഉറച്ചുനില്‍ക്കുമെന്നാണ് കമ്പനിയുടെ പ്രതീക്ഷ. ഹ്യുണ്ടായി ക്രെറ്റ ഇലക്ട്രിക് വാങ്ങാന്‍ പദ്ധതിയിടുന്നവര്‍ തങ്ങളുടെ ആവശ്യങ്ങളുടെയും ബജറ്റിന്റെയും കാര്യത്തില്‍ പുനര്‍വിചിന്തനം നടത്താനുള്ള സമയമാണിത്. സാങ്കേതികമായി മികച്ച വാഹനമാണെങ്കിലും, വേരിയന്റ് ലിസ്റ്റിലെ ഈ മാറ്റം ശ്രദ്ധാപൂര്‍വ്വം വിശകലനം ചെയ്ത് മാത്രം തീരുമാനമെടുക്കുക. കൂടുതല്‍ റേഞ്ച് ആവശ്യമായവര്‍ക്ക് ഈ തീരുമാനം ഗുണകരമാണെങ്കിലും സാമ്പത്തിക ലാഭം നോക്കുന്നവര്‍ക്ക് ഇതൊരു വെല്ലുവിളിയാണ്.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു. ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻറ് ചെയ്യാനും മറക്കല്ലേ.