മിഡില്‍ക്ലാസുകാരനും ഔഡി മുതലാളിയാകാം! വില കുറഞ്ഞ ഇലക്ട്രിക് എസ്‌യുവി 'A2 ഇ-ട്രോൺ' ഉടൻ വിപണിയിലേക്ക്

ജര്‍മ്മന്‍ ആഡംബര വാഹന നിര്‍മ്മാതാക്കളായ ഔഡി തങ്ങളുടെ ഇലക്ട്രിക് വാഹന ശ്രേണി വിപുലീകരിക്കുന്നതിന്റെ ഭാഗമായി പുതിയ A2 ഇ-ട്രോണ്‍' (A2 e-Tron) ഇലക്ട്രിക് എസ്‌യുവിയുടെ ടീസര്‍ പുറത്തുവിട്ടു. ആഗോള വിപണിയില്‍ ബ്രാന്‍ഡിന്റെ ഏറ്റവും പുതിയ എന്‍ട്രി ലെവല്‍ മോഡലായാണ് ഈ വാഹനം എത്തുന്നത്. നിലവിലുള്ള A1 ഹാച്ച്ബാക്കിനും Q2 എസ്‌യുവിക്കും പകരക്കാരനായാണ് A2 ഇ-ട്രോണ്‍ അവതരിപ്പിക്കുന്നത്. ഏകദേശം രണ്ട് പതിറ്റാണ്ടുകള്‍ക്ക് ശേഷമാണ് ഔഡി തങ്ങളുടെ 'A2' എന്ന ഐതിഹാസിക നെയിംപ്ലേറ്റ് വീണ്ടും വിപണിയില്‍ എത്തിക്കുന്നത്.

ഈ വര്‍ഷം അവസാനത്തോടെ ആഗോളതലത്തില്‍ അരങ്ങേറ്റം കുറിക്കുന്ന ഈ മോഡല്‍, ഔഡിയുടെ ഇലക്ട്രിക് വാഹന നിരയിലെ ഏറ്റവും താങ്ങാനാവുന്ന വിലയുള്ള വാഹനമായിരിക്കും. വരും വര്‍ഷങ്ങളില്‍ A2, Q2 മോഡലുകള്‍ ഘട്ടംഘട്ടമായി നിര്‍ത്തലാക്കാനാണ് കമ്പനിയുടെ പദ്ധതി. ഫോക്‌സ്‌വാഗണ്‍ ഗ്രൂപ്പിന്റെ പ്രശസ്തമായ MEB പ്ലാറ്റ്ഫോമിനെ അടിസ്ഥാനമാക്കിയാണ് A2 ഇ-ട്രോണ്‍ നിര്‍മ്മിക്കുന്നത്.

ഫോക്‌സ്‌വാഗണ്‍ ID.3 പോലുള്ള മുന്‍നിര മോഡലുകള്‍ക്ക് അടിത്തറയാകുന്നതും ഇതേ പ്ലാറ്റ്ഫോമാണ്. ജര്‍മ്മനിയിലെ ഇന്‍ഗോള്‍സ്റ്റാഡ്റ്റിലുള്ള പ്ലാന്റിലാകും വാഹനത്തിന്റെ നിര്‍മ്മാണം നടക്കുക. ഇത് ജര്‍മ്മനിയിലെ തൊഴിലവസരങ്ങള്‍ വര്‍ദ്ധിപ്പിക്കുമെന്നും കമ്പനി അധികൃതര്‍ വ്യക്തമാക്കിയിട്ടുണ്ട്. യഥാര്‍ത്ഥ A2 മോഡലിന്റെ ഡിസൈന്‍ ശൈലിയില്‍ നിന്നും പ്രചോദനം ഉള്‍ക്കൊണ്ടാണ് പുതിയ ഇവി രൂപകല്‍പ്പന ചെയ്തിരിക്കുന്നത്.

ലൈറ്റ്‌വെയിറ്റ് നിര്‍മ്മാണ രീതിയും മികച്ച ഏറോഡൈനാമിക്‌സ് ഡിസൈനും ഇതിന്റെ പ്രത്യേകതയാണ്. ഇത് വാഹനത്തിന്റെ പ്രവര്‍ത്തനക്ഷമത വര്‍ദ്ധിപ്പിക്കാനും കൂടുതല്‍ ഡ്രൈവിംഗ് റേഞ്ച് നല്‍കാനും സഹായിക്കും. ആധുനികതയും പാരമ്പര്യവും ഒത്തുചേരുന്ന രൂപഭംഗിയായിരിക്കും ഈ എസ്യുവിക്ക് ഉണ്ടായിരിക്കുക.വാഹനത്തിന്റെ ഉള്‍വശം യാത്രക്കാര്‍ക്ക് മികച്ച സൗകര്യങ്ങള്‍ നല്‍കുന്ന രീതിയില്‍ വിശാലമായാണ് ഒരുക്കിയിരിക്കുന്നത്.

ഫോക്‌സ്‌വാഗണ്‍ ID.3-യുമായി സാങ്കേതിക വശങ്ങള്‍ പങ്കുവെക്കുന്നതിനാല്‍, അത്യാധുനിക ടച്ച്സ്‌ക്രീന്‍ ഇന്‍ഫോടൈന്‍മെന്റ് സിസ്റ്റം ഇതിലുണ്ടാകും. ഡിജിറ്റല്‍ ഇന്‍സ്ട്രുമെന്റ് ക്ലസ്റ്ററും വിപുലമായ കണക്റ്റഡ് കാര്‍ ഫീച്ചറുകളും യാത്ര സുഗമമാക്കാന്‍ സഹായിക്കും. സുരക്ഷാ ക്രമീകരണങ്ങളിലും ഔഡി വിട്ടുവീഴ്ച വരുത്തിയിട്ടില്ല. ഉപഭോക്താക്കളുടെ ആവശ്യങ്ങള്‍ കണ്ടറിഞ്ഞാണ് A2 ഇ-ട്രോണ്‍ വികസിപ്പിച്ചതെന്ന് ഔഡി സിഇഒ ഗെര്‍നോട്ട് ഡോള്‍നര്‍ പറഞ്ഞു.

നിത്യജീവിതത്തില്‍ ഉപയോഗിക്കാന്‍ കഴിയുന്ന കാര്യക്ഷമവും ഒതുക്കമുള്ളതുമായ ഇലക്ട്രിക് വാഹനമാണ് ഉപഭോക്താക്കള്‍ ആഗ്രഹിക്കുന്നത്. ഔഡിയുടെ ആഡംബര ലോകത്തേക്ക് പ്രവേശിക്കുന്നത് കൂടുതല്‍ എളുപ്പമാക്കാന്‍ ഈ മോഡലിലൂടെ സാധിക്കുമെന്നും അദ്ദേഹം പ്രത്യാശ പ്രകടിപ്പിച്ചു. ഈ വര്‍ഷം ആഗോളതലത്തില്‍ അവതരിപ്പിക്കപ്പെട്ടാലും 2027-ഓടെ മാത്രമേ വാഹനം വിപണിയില്‍ ലഭ്യമാകൂ. ഔഡിയുടെ ഏറ്റവും വില കുറഞ്ഞ ഇലക്ട്രിക് മോഡലായതിനാല്‍ ഇന്ത്യന്‍ വിപണിയിലും ഇതിന് വലിയ സാധ്യതകളുണ്ട്.

ഇന്ത്യയിലെ വളര്‍ന്നു വരുന്ന ആഡംബര ഇവി വിപണി ലക്ഷ്യമിട്ട് ഔഡി ഇലക്ട്രിക് വാഹനം രാജ്യത്ത് എത്തിക്കാന്‍ സാധ്യതയുണ്ടെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. ഇവി രംഗത്ത് ടാറ്റയും മഹീന്ദ്രയും ഉള്‍പ്പെടെയുള്ള ബ്രാന്‍ഡുകള്‍ മുന്നേറുമ്പോള്‍, പ്രീമിയം വിഭാഗത്തില്‍ A2 ഇ-ട്രോണ്‍ വലിയ ഓളം സൃഷ്ടിക്കും. ജര്‍മ്മന്‍ സാങ്കേതിക വിദ്യയുടെ കരുത്തും ഔഡിയുടെ ബ്രാന്‍ഡ് വാല്യുവും ഈ മോഡലിന് കരുത്താകും. വരും മാസങ്ങളില്‍ പുതിയ ഔഡി കാറിന്റെ കൂടുതല്‍ സാങ്കേതിക വിവരങ്ങള്‍ കമ്പനി പുറത്തുവിടുമെന്ന് പ്രതീക്ഷിക്കാം.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു. ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻറ് ചെയ്യാനും മറക്കല്ലേ.