ക്രെറ്റക്ക് വെച്ച 'കെണിയില്‍' ഗ്രാന്‍ഡ് വിറ്റാര വീണോ? 13,000 കടന്ന് വിക്ടോറിസ്, പകുതിയായി ഗ്രാന്‍ഡ് വിറ്റാര

ഇന്ത്യയിലെ നമ്പര്‍ വണ്‍ കാര്‍ ബ്രാന്‍ഡ് ആയ മാരുതി സുസുക്കിയുടെ 2026 ഫെബ്രുവരിയിലെ വില്‍പ്പന കണക്കുകള്‍ പുറത്തുവരുമ്പോള്‍ എസ്‌യുവി സെഗ്മെന്റില്‍ വലിയ അഴിച്ചുപണികള്‍ ദൃശ്യമായി. കമ്പനിയുടെ പ്രീമിയം മോഡലായ ഗ്രാന്‍ഡ് വിറ്റാരയുടെ (Maruti Suzuki Grand Vitara) വില്‍പ്പനയില്‍ വലിയ ഇടിവ് രേഖപ്പെടുത്തിയപ്പോള്‍, പുതുതായി വിപണിയിലെത്തിയ വിക്ടോറിസ് (Maruti Suzuki Victoris) മികച്ച മുന്നേറ്റമാണ് നടത്തുന്നത്. വിപണിയിലെ ഈ മാറ്റം വാഹന പ്രേമികള്‍ക്കിടയില്‍ വലിയ ചര്‍ച്ചയായിട്ടുണ്ട്. കഴിഞ്ഞ വര്‍ഷം ഫെബ്രുവരിയില്‍ 10,669 യൂണിറ്റുകള്‍ വിറ്റഴിച്ച ഗ്രാന്‍ഡ് വിറ്റാരയ്ക്ക് ഇത്തവണ വെറും 5,859 യൂണിറ്റുകള്‍ മാത്രമേ വില്‍ക്കാന്‍ സാധിച്ചുള്ളൂ.

ഏകദേശം 45 ശതമാനത്തോളം ഇടിവാണ് ഈ നെക്‌സ മോഡലിന്റെ വില്‍പ്പനയില്‍ ഉണ്ടായിരിക്കുന്നത്. മിഡ്-സൈസ് എസ്‌യുവി നിരയില്‍ ദീര്‍ഘകാലമായി മാരുതിക്കായി പോരാടിയ ഗാന്‍ഡ് വിറ്റാരയ്ക്ക് നേരിട്ട ഈ തിരിച്ചടി കമ്പനിയെ സംബന്ധിച്ചിടത്തോളം നിര്‍ണായകമാണ്. അതേസമയം, ഏതാനും മാസങ്ങള്‍ക്ക് മുമ്പ് മാത്രം വിപണിയില്‍ എത്തിയ വിക്ടോറിസ് വിസ്മയിപ്പിക്കുന്ന പ്രകടനമാണ് കാഴ്ചവെക്കുന്നത്.

ഫെബ്രുവരി മാസത്തില്‍ മാത്രം 13,021 യൂണിറ്റ് വിക്ടോറിസ് എസ്‌യുവികളാണ് നിരത്തിലിറങ്ങിയത്. വിപണിയില്‍ എത്തിയ ആദ്യ മാസങ്ങളില്‍ തന്നെ ഇത്രയും വലിയ വില്‍പ്പന സംഖ്യ സ്വന്തമാക്കാന്‍ സാധിച്ചത് വിക്‌ടോറിസിന് ലഭിച്ച ജനപ്രീതിയുടെ തെളിവാണ്. മാരുതിയുടെ എസ്‌യുവി വില്‍പ്പനയുടെ വലിയൊരു ഭാഗം ഇപ്പോള്‍ വിക്ടോറിസ് കൈക്കലാക്കിയിരിക്കുകയാണ്. ഗ്രാന്‍ഡ് വിറ്റാരയുടെ വില്‍പ്പന കുറയാന്‍ പ്രധാന കാരണം വിക്ടോറിസിന്റെ വരവാണെന്നാണ് വിപണിയിലെ പ്രാഥമിക വിശകലനങ്ങള്‍ സൂചിപ്പിക്കുന്നത്.

ഗ്രാന്‍ഡ് വിറ്റാരയിലുള്ള ആധുനികമായ സാങ്കേതിക വിദ്യകള്‍ താരതമ്യേന കുറഞ്ഞ വില പരിധിയില്‍ കൊണ്ടുവന്നതിനാലാകും ഉപഭോക്താക്കള്‍ വിക്ടോറിസിലേക്ക് തിരിഞ്ഞത്. ഒരേ ബ്രാന്‍ഡിന് കീഴിലുള്ള രണ്ട് സമാന മോഡലുകള്‍ തമ്മിലുള്ള മത്സരമാണ് ഇവിടെ പ്രതിഫലിക്കുന്നത്. ഇത് പക്ഷേ ബാധിച്ചത് ഗ്രാന്‍ഡ് വിറ്റാരയെ ആണെന്ന് മാത്രം.

സാങ്കേതിക വശങ്ങളിലേക്ക് നോക്കിയാല്‍, ഗ്രാന്‍ഡ് വിറ്റാരയും വിക്ടോറിസും മികച്ച ഇന്ധനക്ഷമതയുള്ള സ്‌ട്രോംഗ് ഹൈബ്രിഡ് പവര്‍ട്രെയിനുകളാണ് വാഗ്ദാനം ചെയ്യുന്നത്. ലിറ്ററിന് 28.56 കിലോമീറ്ററാണ് വിക്ടോറിന്റെ സ്ട്രോംഗ് ഹൈബ്രിഡ് പതിപ്പിന്റെ ARAI ക്ലെയിംഡ് മൈലേജ്. ഗ്രാന്‍ഡ് വിറ്റാരയിലെ സുസജ്ജമായ സംവിധാനങ്ങളെക്കാള്‍ ഒരുപടി മുന്നില്‍ നില്‍ക്കുന്ന ഫീച്ചറുകള്‍ വിക്ടോറിസില്‍ ഉള്‍പ്പെടുത്തിയിട്ടുണ്ട്. ഇത് പ്രീമിയം എസ്‌യുവി ഉപഭോക്താക്കളെ വിക്ടോറിസിലേക്ക് നയിച്ചു.

രൂപകല്‍പ്പനയിലും സൗകര്യങ്ങളിലും വിക്ടോറിസ് കൊണ്ടുവന്ന പുതുമകള്‍ യുവാക്കളെയും കുടുംബങ്ങളെയും ഒരുപോലെ സ്വാധീനിച്ചിട്ടുണ്ട്. ഗ്രാന്‍ഡ് വിറ്റാരയെ അപേക്ഷിച്ച് കൂടുതല്‍ വലിപ്പമേറിയ ക്യാബിനും അത്യാധുനിക ഇന്‍ഫോടെയ്ന്‍മെന്റ് സിസ്റ്റവും വിക്ടോറിസിന്റെ പ്രത്യേകതയാണ്. ഒരേ സെഗ്മെന്റില്‍ മാരുതി തന്നെ മികച്ചൊരു ബദല്‍ അവതരിപ്പിച്ചപ്പോള്‍ സ്വാഭാവികമായും വിപണി വിഹിതം പുതിയ മോഡലിലേക്ക് കൈമാറ്റം ചെയ്യപ്പെട്ടു. ഇത് വില്‍പ്പന കണക്കുകളില്‍ വ്യക്തമായി പ്രതിഫലിക്കുന്നു.

മാരുതിയുടെ മൊത്തത്തിലുള്ള വില്‍പ്പന വര്‍ദ്ധനവില്‍ വിക്ടോറിസ് വലിയ പങ്കുവഹിക്കുന്നുണ്ടെങ്കിലും ഗ്രാന്‍ഡ് വിറ്റാരയുടെ വിപണി നിലനിര്‍ത്തുക എന്നത് കമ്പനിക്ക് വെല്ലുവിളിയാകും. വിക്ടോറിസ് ഗ്രാന്‍ഡ് വിറ്റാരയുടെ വില്‍പ്പന കവര്‍ന്നെടുക്കുന്നു എന്ന നിഗമനത്തിലേക്കാണ് നിലവിലെ കണക്കുകള്‍ വിരല്‍ ചൂണ്ടുന്നത്. വരും മാസങ്ങളിലും വിക്ടോറിസ് ഈ മുന്നേറ്റം തുടരുകയാണെങ്കില്‍ ഗ്രാന്‍ഡ് വിറ്റാരയുടെ സ്ഥാനം കൂടുതല്‍ പരുങ്ങലിലാകാന്‍ സാധ്യതയുണ്ട്. ഗ്രാന്‍ഡ് വിറ്റാരയുടെ പ്രകടനം മെച്ചപ്പെടുത്താന്‍ മാരുതി പുതിയ പദ്ധതികള്‍ ആവിഷ്‌കരിച്ചേക്കാം.

നിലവിൽ മാരുതി സുസുക്കി ഗ്രാൻഡ് വിറ്റാരയുടെ വില 10.76 ലക്ഷം മുതൽ 19.72 ലക്ഷം രൂപ വരെ പോകുന്നു. അതേസമയം, പുതിയ വിക്ടോറിസിന്റെ എക്‌സ്-ഷോറൂം വില 10.50 ലക്ഷം മുതൽ 19.99 ലക്ഷം രൂപ വരെയാണ്. ഇത് അരീന മോഡലിനെ നെക്സ സഹോദരനെ അപേക്ഷിച്ച് കുറഞ്ഞ എൻട്രി പോയിന്റിൽ വാങ്ങാനുള്ള അവസരം ഒരുക്കുന്നു.

ചുരുക്കത്തില്‍, 2026 ഫെബ്രുവരിയിലെ കണക്കുകള്‍ പ്രകാരം മാരുതി വിക്ടോറിസ് എസ്‌യുവി വിപണിയിലെ പുതിയ തരംഗമായി മാറിയിരിക്കുകയാണ്. ഗ്രാന്‍ഡ് വിറ്റാരയുടെ പഴയ പ്രതാപം വീണ്ടെടുക്കാന്‍ കമ്പനി ഉടന്‍ തന്നെ പുതിയ വേരിയന്റുകളോ അപ്‌ഡേറ്റുകളോ അവതരിപ്പിക്കുമോ എന്ന് വാഹന ലോകം ഉറ്റുനോക്കുന്നു. വിക്ടോറിസിന്റെ ഈ വമ്പിച്ച വില്‍പ്പന മാരുതി സുസുക്കിയുടെ ഭാവി തന്ത്രങ്ങളില്‍ മാറ്റങ്ങള്‍ വരുത്തിയേക്കാം. മാരുതിയിലെ ഈ 'ആഭ്യന്തര' യുദ്ധം ഉപഭോക്താക്കള്‍ക്ക് കൂടുതല്‍ ഗുണകരമാകും.