Click it and Unblock the Notifications
ഈ രാജ്യം ലോകകപ്പ് ജയിച്ചാല് 100 ജീപ്പ് റാംഗ്ലര് സമ്മാനം! നിബന്ധന കേട്ടാല് ആശ്ചര്യപ്പെടും
ആഗോള ഫുട്ബോള് മാമാങ്കമായ 2026 ഫിഫ ലോകകപ്പിനോട് അനുബന്ധിച്ച് പ്രമുഖ അമേരിക്കന് എസ്യുവി നിര്മാതാക്കളായ ജീപ്പ് (Jeep) തികച്ചും വിചിത്രവും കൗതുകകരവുമായ ഒരു പ്രമോഷണല് ഓഫര് പ്രഖ്യാപിച്ചിരിക്കുകയാണ്. ലോകകപ്പില് അമേരിക്കന് പുരുഷ ഫുട്ബോള് ടീം കിരീടം നേടുകയാണെങ്കില് 100 ജീപ്പ് റാംഗ്ലര് (Jeep Wrangler) സൗജന്യമായി നല്കുമെന്നാണ് കമ്പനി അറിയിച്ചിട്ടുള്ളത്. എന്നാല് ഈ സമ്മാനം നേടുന്നതിനായി ജീപ്പ് മുന്നോട്ട് വെച്ചിട്ടുള്ള നിബന്ധനകള് കേട്ട് വാഹന ലോകം അത്ഭുതപ്പെട്ടിരിക്കുകയാണ്. ഈ ഓഫറില് പങ്കാളികളാകാന് ആഗ്രഹിക്കുന്ന വ്യക്തികളുടെ നിയമപരമായ പേര് അമേരിക്കയുടെ ആദ്യ പ്രസിഡന്റായ 'ജോര്ജ്ജ് വാഷിംഗ്ടണ്' എന്നായായിരിക്കണം എന്നതാണ് പ്രധാനപ്പെട്ട വ്യവസ്ഥ.
കര്ശന നിബന്ധനകള്
അമേരിക്കയില് സ്ഥിരതാമസമാക്കിയതും ഡ്രൈവിംഗ് ലൈസന്സില് കൃത്യമായി 'ജോര്ജ്ജ് വാഷിംഗ്ടണ്' എന്ന് രേഖപ്പെടുത്തിയതുമായ ആളുകള്ക്ക് മാത്രമേ ഇതിനായി രജിസ്റ്റര് ചെയ്യാന് സാധിക്കുകയുള്ളൂ. പേരിന്റെ അക്ഷരവിന്യാസത്തില് യാതൊരുവിധ മാറ്റങ്ങളും അനുവദിക്കില്ലെന്നും അമേരിക്കന് ടീം ലോകകപ്പ് ജേതാക്കളായാല് മാത്രമേ ഈ എസ്യുവിയുടെ താക്കോല് കൈമാറുകയുള്ളൂ എന്നും കമ്പനി വ്യക്തമാക്കുന്നു.
ആദ്യം വെരിഫിക്കേഷന് പൂര്ത്തിയാക്കുന്ന 100 പേര്ക്ക് മാത്രമായിരിക്കും സമ്മാനമായി എസ്യുവി ലഭിക്കുകയെന്ന് ജീപ്പിന്റെ മാതൃകമ്പനിയായ സ്റ്റെല്ലാന്റിസ് (Stellantis) അറിയിച്ചിട്ടുണ്ട്. നിലവില് അമേരിക്കയില് ജോര്ജ് വാഷിങ്ടണ് എന്ന് പേരുള്ള 300 മുതല് 400 വരെ ആളുകള് മാത്രമുള്ളതെന്നാണ് കണക്കുകള്. അതുകൊണ്ട് തന്നെ മത്സരരംഗത്തുള്ളവരുടെ എണ്ണവും വളരെ കുറവാണ്.
ഫ്രീ റാംഗ്ലര് പതിപ്പിന്റെ പ്രത്യേകതകള്
എല്ലാ നിബന്ധനകളും പൂര്ത്തിയാക്കി വിജയിക്കുന്നവര്ക്ക് ജീപ്പ് റാംഗ്ലറിന്റെ 2026 മോഡല് '2-ഡോര് സ്പോര്ട്സ് എസ്' (2-Door Sport S) എന്ട്രി ലെവല് വേരിയന്റാണ് സമ്മാനമായി നല്കുക. അന്താരാഷ്ട്ര വിപണിയില് ഏകദേശം 39,685 യുഎസ് ഡോളര് (ഏകദേശം 37.44 ലക്ഷം ഇന്ത്യന് രൂപ) വിലവരുന്ന പ്രീമിയം മോഡലാണിത്. സ്റ്റാന്ഡേര്ഡ് മെക്കാനിക്കല് ഫീച്ചറുകളോടെ മാത്രമായിരിക്കും ഈ എസ്യുവികള് വിജയികള്ക്ക് ഡെലിവറി ചെയ്യുകയെന്നും കമ്പനി കൂട്ടിച്ചേര്ത്തിട്ടുണ്ട്.
ഇതിനുപുറമെ ആധുനിക ആക്സസറികളോ ഓഫ്-റോഡ് കിറ്റുകളോ മറ്റ് പ്രീമിയം അപ്ഗ്രേഡുകളോ ആവശ്യമാണെങ്കില് അതിനുള്ള തുക വിജയികള് സ്വന്തം പോക്കറ്റില് നിന്നും നല്കേണ്ടി വരും. പവര്ഫുള് 2.0 ലിറ്റര് ടര്ബോചാര്ജ്ഡ് ഇന്ലൈന് ഫോര്-സിലിണ്ടര് പെട്രോള് എഞ്ചിനാണ് ലോകമെമ്പാടുമുള്ള ഓഫ്-റോഡ് പ്രേമികളുടെ പ്രിയ വാഹനമായ ജീപ്പ് റാംഗ്ലറിന് കരുത്ത് പകരുന്നത്
ഈ ശക്തമായ എഞ്ചിന് പരമാവധി 270 bhp പവറും 400 Nm പീക്ക് ടോര്ക്കും ഉത്പാദിപ്പിക്കാന് ശേഷിയുള്ളതാണ്. ഏത് കഠിനമായ ഭൂപ്രകൃതിയും സുഗമമായി കീഴടക്കാന് സഹായിക്കുന്നതിനായി 8-സ്പീഡ് ഓട്ടോമാറ്റിക് ഗിയര്ബോക്സുമായാണ് എഞ്ചിന് ബന്ധിപ്പിച്ചിരിക്കുന്നത്. ജീപ്പിന്റെ ഐതിഹാസികമായ ഫോര്-ബൈ-ഫോര് (4x4) കമാന്ഡ്-ട്രാക് സിസ്റ്റം, കനത്ത ഷാസി ഡിസൈന്, മികച്ച ഗ്രൗണ്ട് ക്ലിയറന്സ് എന്നിവ ഈ വാഹനത്തിന്റെ ഓഫ്-റോഡ് ശേഷി ഇരട്ടിയാക്കുന്നു.
പരസ്യ പ്രചാരണവും മാര്ക്കറ്റിംഗ് തന്ത്രവും
ഈ ആഗോള ക്യാമ്പയിന് ജനങ്ങളിലേക്ക് എത്തിക്കുന്നതിനായി പ്രമുഖ അമേരിക്കന് ഹാസ്യനടി ഇലിസ ഷ്ലെസിംഗറുമായി (Iliza Shlesinger) ജീപ്പ് കൈകോര്ത്തിരിക്കുകയാണ്. ടിവിയിലും വിവിധ ഡിജിറ്റല് സോഷ്യല് മീഡിയ പ്ലാറ്റ്ഫോമുകളിലും ഇതിനകം തന്നെ ഇവരുടെ 60 സെക്കന്ഡ് ദൈര്ഘ്യമുള്ള പരസ്യ വീഡിയോകള് വന്തോതില് പ്രചരിക്കുന്നുണ്ട്.
രാജ്യസ്നേഹവും തമാശയും ഒരേപോലെ ഒത്തുചേരുന്ന രീതിയിലാണ് ഈ 2026 ഫിഫ ലോകകപ്പിനോട് അനുബന്ധിച്ചുള്ള പുത്തന് മാര്ക്കറ്റിംഗ് തന്ത്രം ആസൂത്രണം ചെയ്തിരിക്കുന്നതെന്ന് സ്റ്റെല്ലാന്റിസ് ഗ്ലോബല് ചീഫ് മാര്ക്കറ്റിംഗ് ഓഫീസര് ഒലിവിയര് ഫ്രാന്സ്വെ വ്യക്തമാക്കി. ടൂര്ണമെന്റിലൂടെ ബ്രാന്ഡിന്റെ വിപണി മൂല്യം ഉയര്ത്താനാണ് കമ്പനി ലക്ഷ്യമിടുന്നത്.
ഈ ക്യാമ്പയിനില് നിന്നും സ്റ്റെല്ലാന്റിസ്, എഫ്സിഎ (FCA) കമ്പനികളിലെ ജീവനക്കാരെയും അവരുടെ അടുത്ത ബന്ധുക്കളെയും പൂര്ണമായും ഒഴിവാക്കിയിട്ടുണ്ട്. ചരിത്രത്തിലാദ്യമായി അമേരിക്കന് ടീം ലോകകപ്പ് ജേതാക്കളായാല് മാത്രമേ ഈ 100 എസ്യുവികള് വിതരണം ചെയ്യുകയുള്ളൂ എന്ന് കമ്പനി ഉറപ്പിച്ചു പറയുന്നു. വരും ദിവസങ്ങളില് ഫുട്ബോള് മൈതാനങ്ങളില് അമേരിക്കന് ടീം നടത്തുന്ന പ്രകടനങ്ങളെ ആശ്രയിച്ചിരിക്കും ഈ വണ്ടികളുടെ ഭാവി.
Continue with Google