വെറും ₹12.84 ലക്ഷത്തിന് 7-സീറ്റര്‍ ഇലക്ട്രിക് എംപിവി! 51520 രൂപയുണ്ടെങ്കിൽ വണ്ടി ഇറക്കാം, 490KM വരെ റേഞ്ച്

ബാറ്ററി വില ഓര്‍ത്ത് ഇലക്ട്രിക് കാര്‍ വാങ്ങാന്‍ മടിക്കുന്ന വാഹനപ്രേമികളുടെ എല്ലാ ആശങ്കകളും തീര്‍ത്തുകൊണ്ട് കിയ ഇന്ത്യ തങ്ങളുടെ ഇലക്ട്രിക് എംപിവിയായ കാരെന്‍സ് ക്ലാവിസ് ഇവി (Kia Carens Clavis EV) ബാറ്ററി ആസ് എ സര്‍വീസ് (BaaS) സ്‌കീമിന് കീഴില്‍ വിപണിയിലിറക്കി. ഇന്ത്യയില്‍ തന്നെ നിര്‍മ്മിച്ച ഈ വാഹനത്തെ കൂടുതല്‍ ജനകീയമാക്കാനാണ് ഇതിനോടകം തന്നെ ഇന്ത്യയില്‍ മറ്റ് കമ്പനികള്‍ പരീക്ഷിച്ച് വിജയിച്ച ബാസ് പദ്ധതിയുമായി കിയ എത്തിയിരിക്കുന്നത്. ഇതിലൂടെ ഇവി വാങ്ങാനുള്ള പ്രാരംഭ ചെലവ് വന്‍തോതില്‍ കുറച്ച് ഒരു സാധാരണക്കാരന് പോലും ഈ പ്രീമിയം ഇവി അനായാസം സ്വന്തമാക്കാന്‍ സാധിക്കും.

വാഹനത്തിന്റെ ബോഡിയും ബാറ്ററിയും രണ്ട് വ്യത്യസ്ത ലോണ്‍ അക്കൗണ്ടുകളായി തിരിച്ച് സാമ്പത്തിക സഹായം നല്‍കുന്ന ഡ്യുവല്‍-ലോണ്‍ ഘടനയാണ് പുതിയ ബാസ് പ്ലാന്‍ വഴി കിയ ഒരുക്കിയിരിക്കുന്നത്. ഇതിനായി രാജ്യത്തെ പ്രമുഖ ധനകാര്യ സ്ഥാപനങ്ങളായ ഐസിഐസിഐ ബാങ്ക്, എച്ച്ഡിഎഫ്‌സി ബാങ്ക്, ആക്‌സിസ് ബാങ്ക്, കൊട്ടക് മഹീന്ദ്ര ബാങ്ക്, ബജാജ് ഫിന്‍സെര്‍വ് എന്നിവയുമായി കിയ കൈകോര്‍ത്തു കഴിഞ്ഞു.

ഇവി വാങ്ങാന്‍ ആഗ്രഹിക്കുന്നവര്‍ക്ക് കൂടുതല്‍ സുതാര്യതയും മികച്ച സാമ്പത്തിക സ്വാതന്ത്ര്യവും നല്‍കാന്‍ ഈ സംവിധാനം സഹായിക്കും. ഈ സ്മാര്‍ട്ട് വായ്പ പദ്ധതി പ്രകാരം കാരന്‍സ് ക്ലാവിസ് ഇവി സ്റ്റാന്‍ഡേര്‍ഡ് പായ്ക്കിന്റെ വില വെറും 12.84 ലക്ഷം രൂപയായി കുറയും. വെറും 51,520 രൂപ മുതല്‍ ആരംഭിക്കുന്ന ചുരുങ്ങിയ ഡൗണ്‍ പേയ്മെന്റില്‍ ഉപഭോക്താക്കള്‍ക്ക് ഈ ഫാമിലി ഇവി സ്വന്തമാക്കാന്‍ സാധിക്കും.

ഇലക്ട്രിക് വാഹനത്തിന്റെ ബാറ്ററിക്ക് കിലോമീറ്ററിന് 3.3 രൂപ എന്ന നിരക്കിലാണ് സബ്സ്‌ക്രിപ്ഷന്‍ തുക നിശ്ചയിച്ചിരിക്കുന്നത്. ഇത് പ്രതിമാസ യാത്രാ ചെലവുകള്‍ കൃത്യമായി ക്രമീകരിക്കാന്‍ ഉപഭോക്താക്കളെ സഹായിക്കും. വാഹനത്തിന്റെ ഷാസിക്ക് പരമാവധി 60 മാസം വരെയും ബാറ്ററി ഘടകങ്ങള്‍ക്ക് 96 മാസം വരെയും ദീര്‍ഘിച്ച തിരിച്ചടവ് കാലാവധി ഉപഭോക്താക്കള്‍ക്ക് തിരഞ്ഞെടുക്കാവുന്നതാണ്. ഇത് പ്രതിമാസ ഇഎംഐ (EMI) ഭാരം ഗണ്യമായി കുറയ്ക്കാന്‍ സഹായിക്കും.

രാജ്യത്ത് സുസ്ഥിരമായ ഇവി ഇക്കോ സിസ്റ്റം വളര്‍ത്തിയെടുക്കുന്നതിന്റെ ഭാഗമായാണ് കുറഞ്ഞ പ്രാരംഭ വിലയിലുള്ള ഈ പദ്ധതിയെന്ന് കിയ ഇന്ത്യ ചീഫ് സെയില്‍സ് ഓഫീസറായ സണ്‍ഹാക്ക് പാര്‍ക്ക് വ്യക്തമാക്കി. സാങ്കേതിക വശങ്ങള്‍ നോക്കിയാല്‍, രണ്ട് വ്യത്യസ്ത ബാറ്ററി പായ്ക്ക് ഓപ്ഷനുകളിലാണ് കിയ കാരെന്‍സ് ക്ലാവിസ് ഇവി വിപണിയിലെത്തുന്നത്.

42 kWh ശേഷിയുള്ള സ്റ്റാന്‍ഡേര്‍ഡ് ബാറ്ററിയും 51.4 kWh ശേഷിയുള്ള എക്‌സ്റ്റെന്‍ഡഡ് റേഞ്ച് (Extended Range) ബാറ്ററിയുമാണ് ഇതിലുള്ളത്. ഇതിനൊപ്പം ഘടിപ്പിച്ചിരിക്കുന്ന 99 kW, 126 kW ശേഷിയുള്ള ഇലക്ട്രിക് മോട്ടോറുകള്‍ പരമാവധി 255 Nm ടോര്‍ക്ക് വരെ ഉല്‍പ്പാദിപ്പിക്കാന്‍ ശേഷിയുള്ളതാണ്. റേഞ്ചിന്റെ കാര്യത്തില്‍ വിട്ടുവീഴ്ചയില്ലാത്ത പ്രകടനമാണ് ഈ ഇലക്ട്രിക് എംപിവി കാഴ്ചവെക്കുന്നത്.

42 kWh ബാറ്ററി പായ്ക്ക് മോഡലുകള്‍ ഒറ്റത്തവണ ചാര്‍ജ് ചെയ്താല്‍ 404 കിലോമീറ്റര്‍ദൂരം സഞ്ചരിക്കുമെന്ന് ARAI സാക്ഷ്യപ്പെടുത്തിയിരിക്കുന്നു. അതേസമയം വലിയ 51.4 kWh ബാറ്ററി പായ്ക്ക് മോഡലുകളുടെ ക്ലെയിംഡ് റേഞ്ച് ഫുള്‍ ചാര്‍ജില്‍ 490 കിലോമീറ്റര്‍ വരെയാണ്. കുടുംബവുമായി ദീര്‍ഘദൂര യാത്രകള്‍ പോകാന്‍ ഈ റേഞ്ച് കണക്കുകള്‍ ഏറെ അനുയോജ്യമാണ്.

ഇന്റീരിയര്‍ ഡിസൈനിന്റെയും സവിശേഷതകളുടെയും കാര്യത്തില്‍ കാരെന്‍സ് ക്ലാവിസ് ഇവി കിയയുടെ പരമ്പരാഗത ആഡംബരം നിലനിര്‍ത്തിയിട്ടുണ്ട്. വിശാലമായ മൂന്ന് വരി സീറ്റിംഗ് ക്രമീകരണവും അത്യാധുനിക ടച്ച്‌സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റവും ഡിജിറ്റല്‍ ഇന്‍സ്ട്രുമെന്റ് ക്ലസ്റ്ററും ഇതിലുണ്ട്. കൂടാതെ, ചാര്‍ജിംഗ് കൂടുതല്‍ എളുപ്പമാക്കാന്‍ കമ്പനിയുടെ 'മൈകിയ' (MyKia) ആപ്പ് വഴിയുള്ള കെ-ചാര്‍ജ് പ്ലാറ്റ്ഫോമിലൂടെ രാജ്യത്തുടനീളമുള്ള 15,000-ലധികം ചാര്‍ജിംഗ് പോയിന്റുകളിലേക്ക് ഉപഭോക്താക്കള്‍ക്ക് തത്സമയ ആക്‌സസ് ലഭിക്കും.

യഥാര്‍ത്ഥ എക്‌സ്-ഷോറൂം വില പ്രകാരം സ്റ്റാന്‍ഡേര്‍ഡ് പായ്ക്കിന് 17.99 ലക്ഷം രൂപയും എക്‌സ്റ്റെന്‍ഡഡ് റേഞ്ചിന് 21.99 ലക്ഷം രൂപയുമാണ് വില വരുന്നത്. എന്നാല്‍ ബാസ് പ്ലാന്‍ തിരഞ്ഞെടുക്കുമ്പോള്‍ ഷാസി വില യഥാക്രമം 12.84 ലക്ഷം രൂപയും 15.94 ലക്ഷം രൂപയുമായി കുറയും. അത്യാധുനിക ഫീച്ചറുകളും പ്രായോഗികതയും ഒത്തിണങ്ങിയ കാരെന്‍സ് ക്ലാവിസ് ഇവി കുറഞ്ഞ വിലയില്‍ കിട്ടുന്നതോടെ കിയയുടെ വിപണി വിഹിതം ഉയരുമെന്നാണ് പ്രതീക്ഷിക്കുന്നത്.