കിയയുടെ മൂന്ന് പുതിയ താരങ്ങൾ; ബുക്കിംഗ് തുടങ്ങി, വിലയും പ്രത്യേകതകളും അറിയാം

കിയ ഇന്ത്യയുടെ മൂന്ന് പുതിയ എംപിവ മോഡലുകളായ കാരൻസ് സിഎൻജി, കാരൻസ് ക്ലാവീസ് സിഎൻജി, കാർണിവൽ ഹൈബ്രിഡ് എന്നിവയുടെ പ്രീ-ബുക്കിംഗ് ഇന്ന് (സെപ്റ്റംബർ 14) മുതൽ ആരംഭിച്ചു. കിയയുടെ ഔദ്യോഗിക ഡീലർഷിപ്പുകൾ വഴിയും ഓൺലൈൻ ബുക്കിംഗ് പോർട്ടൽ വഴിയും ഇപ്പോൾ വാഹനം റിസർവ് ചെയ്യാം. നഗരയാത്രകളിലെ ഇന്ധനച്ചെലവ് കുറയ്ക്കാനും കൂടുതൽ മൈലേജ് നൽകാനുമാണ് ഫാക്ടറി ഫിറ്റഡ് സിഎൻജി, സ്ട്രോംഗ്-ഹൈബ്രിഡ് ഓപ്ഷനുകൾ കിയ വിപണിയിൽ അവതരിപ്പിക്കുന്നത്.

കാരൻസ്, ക്ലാവീസ് സിഎൻജി മോഡലുകളിൽ കിയയുടെ G1.5 പെട്രോൾ എഞ്ചിനൊപ്പം 6-സ്പീഡ് മാനുവൽ ഗിയർബോക്സും 60 ലിറ്ററിന്റെ ഫാക്ടറി ഫിറ്റഡ് ടാങ്കുമാണുള്ളത്. പ്രത്യേക സിഎൻജി ട്യൂണിംഗ്, പരിഷ്കരിച്ച സസ്പെൻഷൻ, 16-ഇഞ്ച് വീലുകൾ, ഫ്യുവൽ-ചേഞ്ച് സ്വിച്ച്, ടിഎഫ്ടി ഡിസ്പ്ലേയിലെ ഡിടിഇ (ഡിസ്റ്റൻസ് ടു എംപ്റ്റി) എന്നിവയാണ് പ്രധാന സവിശേഷതകൾ. കാരൻസ് സിഎൻജി പ്രീമിയം (O); ക്ലാവീസ് സിഎൻജി HTE, HTE (O); B2B എം-ഡ്രൈവ്, എച്ച്ടിഎം എന്നീ വേരിയന്റുകളിൽ ലഭ്യമാണ്. കാർണിവൽ ഹൈബ്രിഡ് 'ലിമോസിൻ+ G1.6T HEV 6AT' മോഡലായാണ് എത്തുത്തുന്നത്.

ബുക്കിംഗ് & ടൈംലൈൻ: Carens CNG, Clavis CNG, Carnival Hybrid

ഡീലർഷിപ്പ് നെറ്റ്‌വർക്ക് വഴിയാണ് പ്രധാനമായും ബുക്കിംഗ് നടക്കുന്നത്. ഔദ്യോഗിക ബുക്കിംഗ് തുക കിയ പുറത്തുവിട്ടിട്ടില്ല; ഡീലർമാർക്കനുസരിച്ച് തുകയിൽ വ്യത്യാസമുണ്ടാകാം. സെപ്റ്റംബർ അവസാനത്തോടെയോ ഒക്ടോബർ ആദ്യവാരത്തിലോ വില പ്രഖ്യാപിക്കുമെന്നാണ് പ്രതീക്ഷിക്കുന്നത്. ഇതിന് പിന്നാലെ ഡെലിവറിയും ആരംഭിക്കും. ദില്ലിയിൽ ഏകദേശം 13.33 ലക്ഷം രൂപയും കൊച്ചിയിൽ 13.83 ലക്ഷം രൂപയും ബംഗളൂരുവിൽ ക്ലാവീസിന് 13.87 ലക്ഷം രൂപയുമാണ് നിലവിൽ പ്രതീക്ഷിക്കുന്ന ഓൺ-റോഡ് ആരംഭ വില. കണക്കുകൂട്ടലുകൾ താഴെ നൽകുന്നു.

നഗരം	സിഎൻജി ₹/കി.മീ	പെട്രോൾ ₹/കി.മീ
ദില്ലി	3.78	7.86
ബംഗളൂരു	4.22	8.53

സെപ്റ്റംബർ 11–12 തീയതികളിലെ ഇന്ധനവിലയും സിഎൻജിക്ക് കിലോയ്ക്ക് 23 കിലോമീറ്ററും പെട്രോളിന് ലിറ്ററിന് 13 കിലോമീറ്ററും മൈലേജും അടിസ്ഥാനമാക്കിയാണ് ഈ കണക്കുകൾ തയ്യാറാക്കിയിട്ടുള്ളത്. ദില്ലിയിൽ സിഎൻജിക്ക് കിലോയ്ക്ക് ₹86.98, പെട്രോളിന് ലിറ്ററിന് ₹102.12 എന്നിങ്ങനെയാണ് നിരക്ക്. ബംഗളൂരുവിൽ ഇത് യഥാക്രമം ₹97, ₹110.93 എന്നിങ്ങനെയാണ്. കേരളത്തിൽ പലയിടത്തും സിഎൻജി ലഭ്യത കുറവായതിനാൽ വാഹനം തിരഞ്ഞെടുക്കുന്നതിന് മുൻപ് നിങ്ങളുടെ പ്രദേശത്തെ ഗ്യാസ് നെറ്റ്‌വർക്ക് ഉറപ്പുവരുത്തുക. നിശബ്ദമായ ഡ്രൈവിംഗും കുറഞ്ഞ ഇന്ധനച്ചെലവും ആഗ്രഹിക്കുന്ന ഇന്നോവ ഹൈക്രോസ് ഉപഭോക്താക്കളെ ലക്ഷ്യമിട്ടാണ് കാർണിവൽ ഹൈബ്രിഡ് വിപണിയിലെത്തുന്നത്.

വിലയും ഇഎംഐയും: വാങ്ങുന്നവർ അറിയേണ്ട കാര്യങ്ങൾ

13.5 ലക്ഷം രൂപ ഓൺ-റോഡ് വില കണക്കാക്കിയാൽ, 15 ശതമാനം ഡൗൺ പേയ്‌മെന്റിൽ 10.5 ശതമാനം പലിശ നിരക്കിൽ 60 മുതൽ 84 മാസത്തേക്ക് മാസം ₹19,000 മുതൽ ₹25,000 വരെയായിരിക്കും ഇഎംഐ വരിക. പ്രൈസ് പ്രൊട്ടക്ഷൻ, മുൻഗണനാ ക്രമത്തിലുള്ള അലോട്ട്മെന്റ്, ക്യാൻസലേഷൻ നിരക്കുകൾ എന്നിവയെക്കുറിച്ച് ഡീലറോട് കൃത്യമായി ചോദിച്ചറിയുക. കാർണിവൽ ബുക്കിംഗ് റദ്ദാക്കിയാൽ തുക ഈടാക്കുമെന്ന് കിയയുടെ നിബന്ധനകളിൽ വ്യക്തമാക്കുന്നുണ്ട്. സെപ്റ്റംബർ അവസാനത്തോടെ ഉണ്ടാകുന്ന വില പ്രഖ്യാപനം, സർട്ടിഫൈഡ് മൈലേജ്, ആദ്യ ബാച്ച് ഡെലിവറി തീയതികൾ എന്നിവ പ്രത്യേകം ശ്രദ്ധിക്കുക.