31 ദിവസം കൊണ്ട് വിറ്റത് 1 ലക്ഷത്തിനടുത്ത് വാഹനങ്ങൾ! വിപണി വിറപ്പിച്ച് മഹീന്ദ്ര, മെയിൽ 20% വളർച്ച

സ്‌പോര്‍ട് യൂട്ടിലിറ്റി വാഹനങ്ങളുടെ ബലത്തില്‍ ഇന്ത്യന്‍ വിപണി ഭരിക്കുന്ന മഹീന്ദ്ര ആന്‍ഡ് മഹീന്ദ്ര 2026 മെയ് മാസത്തിലും മികച്ച നേട്ടം സ്വന്തമാക്കി. വിതരണ ശൃംഖലയിലെ ചെറിയ തടസങ്ങള്‍ നിലനില്‍ക്കുമ്പോഴും മഹീന്ദ്ര ആഭ്യന്തര വിപണിയിലും കയറ്റുമതിയിലുമായി 1 ലക്ഷത്തിനടുത്ത് യൂണിറ്റുകള്‍ വിറ്റഴിച്ചു. പ്രമുഖ ഓട്ടോമൊബൈല്‍ പോര്‍ട്ടലായ ഗാഡിവാഡി (GaadiWaadi) പുറത്തുവിട്ട ഏറ്റവും പുതിയ വില്‍പ്പന റിപ്പോര്‍ട്ട് പ്രകാരം 2026 മെയ് മാസത്തില്‍ ആകെ 99,636 യൂണിറ്റ് വാഹനങ്ങളാണ് മഹീന്ദ്ര വിറ്റഴിച്ചത്. കഴിഞ്ഞ വര്‍ഷം ഇതേ കാലയളവിലെ വില്‍പ്പനയുമായി താരതമ്യം ചെയ്യുമ്പോള്‍ കമ്പനി 20 ശതമാനം വാര്‍ഷിക വളര്‍ച്ചയാണ് രേഖപ്പെടുത്തിയിട്ടുള്ളത്.

മെയ് മാസത്തില്‍ ആഭ്യന്തര പാസഞ്ചര്‍ വാഹന വിപണിയില്‍ മാത്രം 58,021 യൂട്ടിലിറ്റി വാഹനങ്ങള്‍ (UV) വില്‍ക്കാന്‍ മഹീന്ദ്രയ്ക്ക് സാധിച്ചിട്ടുണ്ട്. 2025 മെയ് മാസത്തില്‍ ഇത് 52,431 യൂണിറ്റുകള്‍ മാത്രമായിരുന്നു. ഇതിലൂടെ ആഭ്യന്തര എസ്‌യുവി വിപണിയില്‍ മാത്രം കമ്പനി 11 ശതമാനത്തിന്റെ മികച്ച വളര്‍ച്ച കൈവരിച്ചു.

വിപണിയില്‍ തരംഗമായ സ്‌കോര്‍പിയോ N, സ്‌കോര്‍പിയോ ക്ലാസിക്, ഥാര്‍, ഥാര്‍ റോക്‌സ് (Thar Roxx), XUV 7XO, XUV 3XO ബോലേറോ ശ്രേണി എന്നിവയ്ക്കുള്ള കനത്ത ഡിമാന്‍ഡാണ് ഈ ആധിപത്യത്തിന് കാരണം. ഇതിനൊപ്പം വിദേശ വിപണികളിലേക്കുള്ള കയറ്റുമതി കൂടി ഉള്‍പ്പെടുത്തിയതോടെ ആകെ യൂട്ടിലിറ്റി വാഹനങ്ങളുടെ വോളിയം 59,573 യൂണിറ്റുകളായി ഉയര്‍ന്നു.

മഹീന്ദ്ര പുതുതായി വിപണിയില്‍ എത്തിച്ച ബോണ്‍ ഇലക്ട്രിക് (Born Electric) വാഹന ശ്രേണിക്കും ഉപഭോക്താക്കള്‍ക്കിടയില്‍ മികച്ച സ്വീകാര്യതയാണ് ലഭിക്കുന്നത്. കമ്പനിയുടെ അത്യാധുനിക സാങ്കേതികവിദ്യയില്‍ നിര്‍മ്മിച്ച BE 6, XEV 9e, XEV 9S എന്നീ പുതിയ ഇലക്ട്രിക് എസ്‌യുവി മോഡലുകള്‍ വിപണിയില്‍ ബ്രാന്‍ഡിന്റെ ഇവി സാന്നിധ്യം ശക്തമാക്കാന്‍ സഹായിക്കുന്നുണ്ട്.

പുതിയ സാമ്പത്തിക വര്‍ഷത്തിന്റെ ആദ്യ രണ്ട് മാസങ്ങളിലെ (ഏപ്രില്‍, മെയ്) മൊത്തം കണക്കുകള്‍ പരിശോധിച്ചാല്‍ മഹീന്ദ്രയുടെ യൂട്ടിലിറ്റി വാഹന വില്‍പ്പന 1.14 ലക്ഷം യൂണിറ്റുകള്‍ പിന്നിട്ടു കഴിഞ്ഞു. കഴിഞ്ഞ വര്‍ഷം ഇതേ കാലയളവിനെ അപേക്ഷിച്ച് എസ്യുവി വിഭാഗത്തില്‍ മാത്രം 9 ശതമാനത്തിന്റെ സ്ഥിരതയാര്‍ന്ന വര്‍ദ്ധനവാണ് കമ്പനി രേഖപ്പെടുത്തിയിട്ടുള്ളത്. പാസഞ്ചര്‍ വാഹനങ്ങള്‍ക്ക് പുറമെ വാണിജ്യ വാഹന (CV) വിഭാഗത്തിലും മഹീന്ദ്ര മികച്ച മുന്നേറ്റമാണ് കാഴ്ചവെക്കുന്നത്.

2026 മെയ് മാസത്തില്‍ 24,079 യൂണിറ്റ് വാണിജ്യ വാഹനങ്ങളാണ് ആഭ്യന്തര വിപണിയില്‍ കമ്പനി വിറ്റഴിച്ചത്. കഴിഞ്ഞ വര്‍ഷം ഇതേ മാസം വിറ്റ 20,298 യൂണിറ്റുകളുമായി താരതമ്യം ചെയ്യുമ്പോള്‍ ഈ വിഭാഗത്തില്‍ 19 ശതമാനത്തിന്റെ വാര്‍ഷിക വളര്‍ച്ച നേടാന്‍ കമ്പനിക്ക് കഴിഞ്ഞിട്ടുണ്ട്. ലൈറ്റ് കൊമേഴ്ഷ്യല്‍ വാഹനങ്ങളുടെയും (LCV) ഇടത്തരം വാണിജ്യ വാഹനങ്ങളുടെയും വിഭാഗങ്ങളില്‍ ഒരേപോലെ ഉണ്ടായ ഡിമാന്‍ഡാണ് ബിസിനസ് വളര്‍ച്ചയ്ക്ക് അടിത്തറ പാകിയത്.

വിപണിയിലെ എന്‍ട്രി ലെവല്‍ വിഭാഗത്തില്‍ മഹീന്ദ്രയുടെ മിനി ട്രക്കുകള്‍ക്കും പിക്കപ്പുകള്‍ക്കും വലിയ ജനപ്രീതിയാണ് നിലവിലുള്ളതെന്ന് ഏറ്റവും പുതിയ റിപ്പോര്‍ട്ടുകള്‍ വ്യക്തമാക്കുന്നു. മഹീന്ദ്രയ്ക്ക് മെയ് മാസത്തില്‍ ഏറ്റവും ഉയര്‍ന്ന വളര്‍ച്ച സമ്മാനിച്ചത് അവരുടെ ത്രീ-വീലര്‍ (Three-wheeler) വിഭാഗമാണ്. കഴിഞ്ഞ വര്‍ഷം മെയ് മാസത്തില്‍ വെറും 6,635 യൂണിറ്റുകള്‍ മാത്രം വിറ്റിരുന്ന സ്ഥാനത്ത് ഇത്തവണ 12,536 ത്രീ-വീലറുകളാണ് കമ്പനി വിറ്റഴിച്ചത്.

വാര്‍ഷിക അടിസ്ഥാനത്തില്‍ 89 ശതമാനത്തിന്റെ റെക്കോര്‍ഡ് വര്‍ദ്ധനവാണ് ഈ ഒറ്റ വിഭാഗത്തില്‍ മാത്രം കമ്പനി രേഖപ്പെടുത്തിയത്. ചരക്കുനീക്കത്തിനും യാത്രാ ആവശ്യങ്ങള്‍ക്കുമായി ഉപയോഗിക്കുന്ന പെട്രോള്‍, ഡീസല്‍, ഇലക്ട്രിക് ത്രീ-വീലര്‍ മോഡലുകളുടെ മികച്ച പെര്‍ഫോമന്‍സും ആകര്‍ഷകമായ ഇന്ധനക്ഷമതയുമാണ് ഈ വലിയ മുന്നേറ്റത്തിന് കാരണമായത്. ആദ്യ രണ്ട് മാസങ്ങളിലെ മൊത്തം കണക്കെടുത്താല്‍ ത്രീ-വീലര്‍ വില്‍പ്പന 85 ശതമാനം ഉയര്‍ന്ന് 22,435 യൂണിറ്റുകളില്‍ എത്തിനില്‍ക്കുകയാണ്.

ആഭ്യന്തര വിപണിക്ക് പുറമെ മഹീന്ദ്രയുടെ കയറ്റുമതിയും മുന്നേറ്റത്തിന്റെ പാതയിലാണ്. കഴിഞ്ഞ വര്‍ഷത്തെ 3,646 യൂണിറ്റുകളില്‍ നിന്നും ഇത്തവണ വിദേശ വിപണികളിലേക്കുള്ള കയറ്റുമതി 37 ശതമാനം വര്‍ദ്ധിച്ച് 5,000 യൂണിറ്റുകളായി ഉയര്‍ന്നു. ആദ്യ രണ്ട് മാസത്തെ ആകെ കയറ്റുമതി പരിശോധിച്ചാല്‍ 42 ശതമാനത്തിന്റെ വളര്‍ച്ചയോടെ അത് 9,970 യൂണിറ്റുകളില്‍ എത്തിയിട്ടുണ്ട്.

നിലവിലുള്ള ജനപ്രിയ മോഡലുകളുടെ പുതുക്കിയ പതിപ്പുകളും അതോടൊപ്പം പുതിയ നിരവധി ഐസിഇ, ഇലക്ട്രിക് എസ്‌യുവിയും വരും വര്‍ഷങ്ങളില്‍ വിപണിയില്‍ എത്തിക്കാന്‍ മഹീന്ദ്രയ്ക്ക് പദ്ധതികളുണ്ട്. പാസഞ്ചര്‍, വാണിജ്യ, ത്രീ-വീലര്‍ വിഭാഗങ്ങളില്‍ ഒരേപോലെ പുലര്‍ത്തുന്ന ഈ ശക്തമായ മുന്നേറ്റം ഈ സാമ്പത്തിക വര്‍ഷത്തിന്റെ ബാക്കി മാസങ്ങളിലും വലിയ വിജയങ്ങള്‍ കൈവരിക്കാന്‍ കമ്പനിയെ സഹായിക്കും എന്ന് ഉറപ്പാണ്.