30 കി.മീ മൈലേജ് തരുന്ന ഈ മാരുതി വാങ്ങുന്നവരുടെ പോക്കറ്റ് ചോരും! ബേസ് വേരിയന്റ് പഴയ വിലയില്‍ കിട്ടും

രാജ്യത്ത് ഏറ്റവും കൂടുതല്‍ വിറ്റഴിക്കപ്പെടുന്ന പ്രീമിയം ഹാച്ച്ബാക്ക് മോഡലായ ബലേനോയുടെ (Maruti Suzuki Baleno) തിരഞ്ഞെടുത്ത വേരിയന്റുകളുടെ വില വര്‍ദ്ധിപ്പിച്ച് മാരുതി സുസുക്കി. പുതുക്കിയ നിരക്കുകള്‍ ഉടനടി പ്രാബല്യത്തില്‍ വരുമെന്ന് കമ്പനി അറിയിച്ചിട്ടുണ്ട്. ഇന്ത്യയില്‍ വില്‍ക്കുന്ന തങ്ങളുടെ വിവിധ ജനപ്രിയ മോഡലുകളുടെ വില വര്‍ദ്ധിപ്പിക്കുന്നതിന്റെ ഭാഗമായാണ് ഇപ്പോള്‍ ബലേനോ നിരയിലും കമ്പനി മാറ്റങ്ങള്‍ വരുത്തിയിരിക്കുന്നത്. കഴിഞ്ഞ ദിവസങ്ങളിലായി മാരുതി ഡിസയര്‍, എര്‍ട്ടിഗ, ജിംനി, സ്വിഫ്റ്റ് തുടങ്ങിയ മറ്റ് ജനപ്രിയ കാറുകളുടെയും വില വര്‍ദ്ധിപ്പിച്ചിരുന്നു.

ബലേനോയുടെ ഡെല്‍റ്റ സിഎന്‍ജി മാനുവല്‍, സീറ്റ സിഎന്‍ജി മാനുവല്‍, ആല്‍ഫ പെട്രോള്‍ മാനുവല്‍, ആല്‍ഫ പെട്രോള്‍ എഎംടി എന്നിവയ്ക്ക് 7,500 രൂപ വീതമാണ് ഇപ്പോള്‍ കൂട്ടിയത്. ഈ പ്രത്യേക പതിപ്പുകള്‍ വാങ്ങാന്‍ ഉദ്ദേശിക്കുന്നവര്‍ ഇനി മുതല്‍ ഈ അധിക തുക കൈയ്യില്‍ കരുതണം. എന്നാല്‍ ബലേനോയുടെ ബേസ് വേരിയന്റായ 'സിഗ്മ പെട്രോള്‍ മാനുവല്‍' പതിപ്പിന്റെ വിലയില്‍ കമ്പനി ഇത്തവണ മാറ്റമൊന്നും വരുത്തിയിട്ടില്ല.

ആദ്യമായി കാര്‍ വാങ്ങുന്ന ബജറ്റ് ഉപഭോക്താക്കളെ ബാധിക്കാത്ത രീതിയിലാണ് എന്‍ട്രി ലെവല്‍ വേരിയന്റിന്റെ വിലയില്‍ മാറ്റമില്ലാതെ നിലനിര്‍ത്താന്‍ മാരുതി സുസുക്കി തയാറായിരിക്കുന്നത്. മുകളില്‍ സൂചിപ്പിച്ചവ ഒഴികെയുള്ള ബലേനോയുടെ മറ്റെല്ലാ പെട്രോള്‍, സിഎന്‍ജി വേരിയന്റുകള്‍ക്കും 5,000 രൂപയുടെ വില വര്‍ദ്ധനവാണ് ഇപ്പോള്‍ നടപ്പാക്കിയിരിക്കുന്നത്.

ഇതോടെ ഈ പ്രീമിയം ഹാച്ച്ബാക്കിന്റെ മൊത്തത്തിലുള്ള പ്രാരംഭ നിരക്കുകളിലും ചെറിയ വ്യത്യാസങ്ങള്‍ പ്രകടമായിട്ടുണ്ട്. ഈ വില പരിഷ്‌കരണത്തോടെ മാരുതി സുസുക്കി ബലേനോയുടെ എക്‌സ്-ഷോറൂം വില ഇപ്പോള്‍ 5.99 ലക്ഷം രൂപ മുതല്‍ 9.17 ലക്ഷം രൂപ വരെയായി ഉയര്‍ന്നു. ഇന്ത്യന്‍ വിപണിയില്‍ നിലവില്‍ ടാറ്റ ആള്‍ട്രോസ്, ഹ്യുണ്ടായ് i20 എന്നിവയുമായാണ് മാരുതി ബലേനോ നേരിട്ട് ഏറ്റുമുട്ടുന്നത്.

സാങ്കേതിക വശങ്ങളിലേക്ക് നോക്കിയാല്‍ മികച്ച പെര്‍ഫോമന്‍സും ഉയര്‍ന്ന ഇന്ധനക്ഷമതയും നല്‍കുന്ന 1.2 ലിറ്റര്‍ ഫോര്‍-സിലിണ്ടര്‍ ഡ്യുവല്‍ജെറ്റ് പെട്രോള്‍ എഞ്ചിനാണ് ബലേനോക്ക് കരുത്ത് പകരുന്നത്. സുഗമമായ ഡ്രൈവിംഗിനായി 5-സ്പീഡ് മാനുവല്‍, 5-സ്പീഡ് എഎംടി ഓട്ടോമാറ്റിക് ഗിയര്‍ബോക്‌സ് ഓപ്ഷനുകള്‍ ഇതിലുണ്ട്. പെട്രോളിന് പുറമെ ഫാക്ടറി ഫിറ്റഡ് സിഎന്‍ജി (CNG) കിറ്റുമായും ഈ പ്രീമിയം ഹാച്ച്ബാക്ക് മോഡല്‍ രാജ്യത്ത് ലഭ്യമാണ്.

ഉയര്‍ന്ന മൈലേജും കുറഞ്ഞ പരിപാലന ചെലവുമുള്ള ബലേനോയുടെ ഈ സിഎന്‍ജി പതിപ്പുകള്‍ക്ക് ഇന്ത്യന്‍ നഗരങ്ങളിലെ ഉപഭോക്താക്കള്‍ക്കിടയില്‍ വലിയ ആവശ്യക്കാരുണ്ട്. പെട്രോള്‍ വേരിയന്റുകളില്‍ മാരുതി സുസുക്കി ബലേനോ മണിക്കൂറില്‍ 20 മുതല്‍ 22 കിലോമീറ്റര്‍ വരെ ഇന്ധനക്ഷമത വാഗ്ദാനം ചെയ്യുന്നു, കിലോഗ്രാമിന് 30.61 കിലോമീറ്റര്‍ ആണ് ബലേനോ സിഎന്‍ജിയുടെ കമ്പനി അവകാശപ്പെടുന്ന ഇന്ധനക്ഷമത.
കൂടാതെ, മാരുതി ബലേനോയില്‍ നിരവധി ആധുനിക സവിശേഷതകളും സജ്ജീകരിച്ചിരിക്കുന്നു.

9 ഇഞ്ച് ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, വയര്‍ലെസ് ചാര്‍ജര്‍, ക്രൂയിസ് കണ്‍ട്രോള്‍, ഓട്ടോ ക്ലൈമറ്റ് കണ്‍ട്രോള്‍, ആപ്പിള്‍ കാര്‍പ്ലേ, ആന്‍ഡ്രോയിഡ് കണക്റ്റിവിറ്റി, എല്‍ഇഡി പ്രൊജക്ടര്‍ ഹെഡ്ലൈറ്റുകള്‍ എന്നിവയുമായാണ് കാര്‍ വരുന്നത്. സുരക്ഷയ്ക്കായി, ആറ് എയര്‍ബാഗുകള്‍, 360-ഡിഗ്രി ക്യാമറ തുടങ്ങിയ സവിശേഷതകളും കാറിലുണ്ട്. സാധാരണക്കാര്‍ അധികവും വാങ്ങുന്ന എന്‍ട്രി ലെവല്‍ വേരിയന്റില്‍ കൈവെച്ചിട്ടില്ലാത്തതിനാല്‍ ഈ പുതിയ വില വര്‍ധനവ് ബലേനോയുടെ വില്‍പ്പനയെ ബാധിക്കില്ലെന്ന് പ്രതീക്ഷിക്കാം.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു. ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻറ് ചെയ്യാനും മറക്കല്ലേ.