6 എയർബാഗുകൾ, 27 കി.മീ മൈലേജ്! മാരുതി ഒംനിയുടെ പകരക്കാരനെ വാങ്ങാൻ ആള് കൂടുന്നു; കാരണമിതാണ്

ഇന്ത്യന്‍ വാഹന വിപണിയില്‍ സാധാരണക്കാരുടെ പ്രിയപ്പെട്ട വാഹനമായ മാരുതി സുസുക്കി ഈക്കോ 2026 ജനുവരിയിൽ മികച്ച വില്‍പ്പന നേട്ടം കൈവരിച്ചു. പഴയ മാരുതി ഒംനിക്ക് പകരക്കാരനായി എത്തിയ ഈ വാന്‍ മോഡല്‍ 5.90 ശതമാനം വാര്‍ഷിക വളര്‍ച്ചയാണ് രേഖപ്പെടുത്തിയിരിക്കുന്നത്. ബജറ്റ് സൗഹൃദവും മികച്ച മൈലേജും വലിയ കുടുംബങ്ങള്‍ക്ക് അനുയോജ്യമായ സൗകര്യങ്ങളുമാണ് ഈക്കോയുടെ ജനപ്രീതി വര്‍ദ്ധിപ്പിക്കുന്നത്. പുറത്തുവന്ന ഏറ്റവും പുതിയ വില്‍പ്പന റിപ്പോര്‍ട്ട് പ്രകാരം, 2026 ജനുവരിയില്‍ 11,914 യൂണിറ്റ് ഈക്കോ വാനുകളാണ് മാരുതി സുസുക്കി വിറ്റഴിച്ചത്. കഴിഞ്ഞ വര്‍ഷം ഇതേ കാലയളവില്‍ (2025 ജനുവരി) 11,250 യൂണിറ്റുകള്‍ മാത്രമാണ് വില്‍ക്കാന്‍ സാധിച്ചിരുന്നത്.

അതായത്, മുന്‍വര്‍ഷത്തെ അപേക്ഷിച്ച് 664 വാഹനങ്ങള്‍ അധികം വില്‍ക്കാന്‍ മാരുതിക്ക് സാധിച്ചു. നിലവില്‍ 5.21 ലക്ഷം രൂപ മുതല്‍ 6.36 ലക്ഷം രൂപ വരെയാണ് മാരുതി ഈക്കോയുടെ എക്‌സ്-ഷോറൂം വില. കുറഞ്ഞ വിലയില്‍ 5 സീറ്റര്‍, 6 സീറ്റര്‍ ഓപ്ഷനുകളില്‍ ഈ വാഹനം ലഭ്യമാണ്. ഫാമിലി ട്രിപ്പുകള്‍ക്ക് പുറമെ വാണിജ്യ ആവശ്യങ്ങള്‍ക്കും ഈക്കോ വ്യാപകമായി ഉപയോഗിക്കപ്പെടുന്നുണ്ട്. ഇതിന് പുറമെ ആംബുലന്‍സ് ഷെല്‍, ആംബുലന്‍സ് വേരിയന്റുകളും കമ്പനി വിപണിയില്‍ എത്തിക്കുന്നു.

ഇന്ധനക്ഷമതയുടെ കാര്യത്തില്‍ ഈക്കോ ഏറെ മുന്നിലാണ്. ഇതിന്റെ പെട്രോള്‍ വേരിയന്റ് ലിറ്ററിന് 19.71 കിലോമീറ്റര്‍ മൈലേജ് നല്‍കുമ്പോള്‍, സിഎന്‍ജി (CNG) വേരിയന്റ് കിലോഗ്രാമിന് 26.78 കിലോമീറ്റര്‍ മൈലേജ് വാഗ്ദാനം ചെയ്യുന്നു. ചെറുകിട സംരംഭകര്‍ക്കും വലിയ കുടുംബങ്ങള്‍ക്കും മികച്ച സാമ്പത്തിക ലാഭം നേടിക്കൊടുക്കുന്ന ഇന്ധനക്ഷമതാ കണക്കുകളാണ് ഇത്.

യാത്രക്കാരുടെ സുരക്ഷ ഉറപ്പാക്കുന്നതിനായി ആധുനികമായ സജ്ജീകരണങ്ങള്‍ ഈക്കോയില്‍ കമ്പനി ഉള്‍പ്പെടുത്തിയിട്ടുണ്ട്. നിലവില്‍ ഈ വാഹനത്തിന്റെ എല്ലാ വേരിയന്റുകളിലും 6 എയര്‍ബാഗുകള്‍ സ്റ്റാന്‍ഡേര്‍ഡായി നല്‍കുന്നു. കൂടാതെ ഇബിഡിയുള്ള (EBD) എബിഎസ് (ABS), റിവേഴ്‌സ് പാര്‍ക്കിംഗ് സെന്‍സറുകള്‍, ഇലക്ട്രോണിക് സ്റ്റെബിലിറ്റി പ്രോഗ്രാം (ESP) എന്നീ സുരക്ഷാ ക്രമീകരണങ്ങളും ഈക്കോയിലുണ്ട്.

അഞ്ച് ആകര്‍ഷകമായ നിറങ്ങളിലാണ് മാരുതി സുസുക്കി ഈക്കോ വിപണിയില്‍ ലഭ്യമാകുന്നത്. വാഹനത്തിന്റെ ലാളിത്യവും പ്രായോഗികതയും തന്നെയാണ് വിപണിയില്‍ ഇതിനെ സജീവമാക്കി നിര്‍ത്തുന്നത്. പെട്രോളിനൊപ്പം സിഎന്‍ജി ഓപ്ഷന്‍ കൂടി ലഭ്യമായത് നഗരങ്ങളിലെയും ഗ്രാമങ്ങളിലെയും ഉപഭോക്താക്കളെ ഒരുപോലെ ഈ വാനിലേക്ക് ആകര്‍ഷിക്കാന്‍ കമ്പനിയെ സഹായിച്ചിട്ടുണ്ട്.

കഴിഞ്ഞ വര്‍ഷം സെപ്റ്റംബറില്‍ പ്രാബല്യത്തില്‍ വന്ന ജിഎസ്ടി ഇളവുകള്‍ ഏറ്റവും കുറഞ്ഞ വിലയില്‍ ഈക്കോ സാധാരണക്കാര്‍ക്ക് ലഭ്യമാക്കി. വിപണിയില്‍ നേരിട്ടുള്ള എതിരാളികള്‍ ഇല്ലെന്നതും ഈക്കോയ്ക്ക് വില്‍പനയില്‍ മുന്‍തൂക്കം നല്‍കുന്നു. ഗതാഗത സൗകര്യങ്ങള്‍ കുറഞ്ഞ ഉള്‍നാടന്‍ ഗ്രാമങ്ങളില്‍ പോലും ഈക്കോയുടെ സാന്നിധ്യം വളരെ കൂടുതലാണെന്ന് മാര്‍ക്കറ്റ് റിപ്പോര്‍ട്ടുകള്‍ സൂചിപ്പിക്കുന്നു.

ആംബുലന്‍സ് വേരിയന്റുകള്‍ക്ക് 6.37 ലക്ഷം മുതല്‍ 8.01 ലക്ഷം രൂപ വരെയാണ് എക്‌സ്-ഷോറൂം വില വരുന്നത്. ആരോഗ്യമേഖലയില്‍ ലാസ്റ്റ് മൈല്‍ കണക്റ്റിവിറ്റിക്കായി ഈ ആംബുലന്‍സ് മോഡലുകള്‍ വ്യാപകമായി ഉപയോഗിക്കപ്പെടുന്നു. തുടര്‍ വളര്‍ച്ചയിലൂടെ മാരുതിയുടെ വിശ്വസ്തമായ മോഡലുകളില്‍ ഒന്നായി ഈക്കോ മാറിക്കഴിഞ്ഞു എന്നാണ് 2026 ജനുവരിയിലെ കണക്കുകള്‍ വ്യക്തമാക്കുന്നത്.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു. ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻറ് ചെയ്യാനും മറക്കല്ലേ.