26.78 കി.മീ മൈലേജുള്ള ഫാമിലി കാര്‍ 'സ്റ്റാര്‍' ലുക്കില്‍; അധികം മുടക്കേണ്ടത് വെറും 20000 രൂപ മാത്രം

ഇന്ത്യന്‍ വാന്‍ വിപണിയിലെ ഒന്നാമനായ മാരുതി സുസുക്കി ഈക്കോ ഇനി പുത്തന്‍ ഭാവത്തില്‍. സ്വകാര്യ വാഹന ഉടമകളെ ലക്ഷ്യമിട്ട് ഈക്കോയുടെ പ്രത്യേക പതിപ്പായ 'സ്റ്റാര്‍ എഡിഷന്‍' (Eeco Star Edition) കമ്പനി വിപണിയില്‍ അവതരിപ്പിച്ചു. നിലവില്‍ വിപണിയില്‍ എതിരാളികളില്ലാത്ത ഈക്കോയുടെ വില്‍പ്പന വര്‍ദ്ധിപ്പിക്കാനാണ് മാരുതിയുടെ ഈ പുതിയ നീക്കം. സ്റ്റാന്‍ഡേര്‍ഡ് ഈക്കോയുടെ വിലയേക്കാള്‍ 19,999 രൂപ അധികം നല്‍കിയാല്‍ സ്റ്റാര്‍ എഡിഷന്‍ സ്വന്തമാക്കാം. മുന്‍പ് 37,000 രൂപയായിരുന്ന ആക്സസറി പാക്കേജ് വിലയാണ് ഇപ്പോള്‍ ഏകദേശം 20,000 രൂപയിലേക്ക് മാരുതി താഴ്ത്തിയിരിക്കുന്നത്.

ബജറ്റ് ഉപഭോക്താക്കള്‍ക്ക് കൂടുതല്‍ ആസ്വാദ്യകരമായ രീതിയിലാണ് ഈ പുത്തന്‍ എഡിഷന്‍ കമ്പനി ഇപ്പോള്‍ വിപണിയില്‍ എത്തിച്ചിരിക്കുന്നത്. ഈക്കോ സ്റ്റാര്‍ എഡിഷന്റെ ഏറ്റവും വലിയ പ്രത്യേകത ബോഡി കളറിലുള്ള ബമ്പറുകളാണ്. മെറ്റാലിക് ബ്രിസ്‌ക് ബ്ലൂ, മെറ്റാലിക് ഗ്ലിസ്റ്റനിംഗ് ഗ്രേ എന്നീ നിറങ്ങളില്‍ ഇത് ലഭ്യമാണ്. സാധാരണ ഈക്കോയില്‍ നിന്നും വ്യത്യസ്തമായി പ്രീമിയം ലുക്ക് നല്‍കാന്‍ ഈ മാറ്റം സഹായിക്കുന്നു.

കൂടുതല്‍ മനോഹരമായ എക്‌സ്റ്റീരിയറാണ് സ്റ്റാര്‍ എഡിഷന്‍ വാഗ്ദാനം ചെയ്യുന്നത്. ആകര്‍ഷകമായ 18 ആക്സസറികളാണ് സ്റ്റാര്‍ എഡിഷന്‍ പാക്കേജില്‍ മാരുതി ഉള്‍പ്പെടുത്തിയിരിക്കുന്നത്. സ്‌പോര്‍ട്ടി ലുക്ക് നല്‍കുന്ന റിയര്‍ സ്‌പോയിലര്‍, ഫോഗ് ലാമ്പുകള്‍, സ്‌റ്റൈലിഷ് വീല്‍ കവറുകള്‍ എന്നിവ ഇതില്‍ പ്രധാനമാണ്. കൂടാതെ ഡോര്‍ വൈസറുകള്‍, ക്രോം എംബ്ലം, മഡ് ഫ്‌ലാപ്പുകള്‍ എന്നിവയും വാഹനത്തിന്റെ ബാഹ്യരൂപത്തിന് മാറ്റു കൂട്ടുന്നതിനായി ഈ പാക്കേജില്‍ നല്‍കിയിട്ടുണ്ട്.

വാനിന്റെ ഉള്‍വശം കൂടുതല്‍ മികച്ചതാക്കാന്‍ ഇന്റീരിയര്‍ സ്‌റ്റൈലിംഗ് കിറ്റും സീറ്റ് കവറുകളും ഇതില്‍ ലഭ്യമാണ്. ഡീലര്‍ തലത്തിലായിരിക്കും ഈ ആക്സസറികള്‍ ഘടിപ്പിക്കുന്നതെന്നാണ് സൂചനകള്‍. നിലവിലുള്ള 5 സീറ്റര്‍, 6 സീറ്റര്‍ വേരിയന്റുകളില്‍ ഈ സ്റ്റാര്‍ എഡിഷന്‍ പാക്കേജ് ലഭ്യമാകുമോ എന്ന കാര്യത്തില്‍ കമ്പനി ഔദ്യോഗിക സ്ഥിരീകരണം നല്‍കിയിട്ടില്ല.

മെക്കാനിക്കല്‍ വശങ്ങളില്‍ മാറ്റമില്ലാതെയാണ് ഈക്കോ സ്റ്റാര്‍ എഡിഷന്‍ എത്തുന്നത്. 1.2 ലിറ്റര്‍ നാച്ചുറലി ആസ്പിറേറ്റഡ് പെട്രോള്‍ എഞ്ചിനാണ് വാനിന് കരുത്തേകുന്നത്. ഇത് 81 bhp പവറും 105.5 Nm പീക്ക് ടോര്‍ക്കും ഉല്‍പ്പാദിപ്പിക്കുന്നു. 5 സ്പീഡ് മാനുവല്‍ ഗിയര്‍ബോക്‌സ് മാത്രമാണ് ഈ മോഡലില്‍ ലഭ്യമാക്കിയിരിക്കുന്നത്. ഇത് മികച്ച പെര്‍ഫോമന്‍സ് റോഡുകളില്‍ നല്‍കുന്നു.

പെട്രോള്‍ മോഡലുകള്‍ക്ക് ലിറ്ററിന് 19.71 കിലോമീറ്ററും സിഎന്‍ജി മോഡലുകള്‍ക്ക് കിലോയ്ക്ക് 26.78 കിലോമീറ്ററുമാണ് കമ്പനി വാഗ്ദാനം ചെയ്യുന്ന മൈലേജ്. ലാഡര്‍ ഫ്രെയിം ഷാസിയില്‍ നിര്‍മ്മിച്ച ഈ വാഹനം റിയര്‍ വീല്‍ ഡ്രൈവ് (RWD) സംവിധാനത്തിലാണ് പ്രവര്‍ത്തിക്കുന്നത്. യാത്രക്കാരുടെ സൗകര്യത്തിനായി മാനുവല്‍ സ്ലൈഡിംഗ് ഡോറുകളും ഈക്കോ വാനില്‍ നല്‍കിയിട്ടുണ്ട്.

5.21 ലക്ഷം മുതല്‍ 6.36 ലക്ഷം രൂപ വരെയാണ് നിലവില്‍ ഈക്കോയുടെ എക്‌സ്-ഷോറൂം വില. കുറഞ്ഞ ചിലവില്‍ കൂടുതല്‍ സൗകര്യങ്ങള്‍ ആഗ്രഹിക്കുന്ന കുടുംബങ്ങള്‍ക്ക് സ്റ്റാര്‍ എഡിഷന്‍ മികച്ച ഓപ്ഷനായിരിക്കും. മാരുതിയുടെ ഈ സ്‌പെഷ്യല്‍ എഡിഷന്‍ വരും മാസങ്ങളില്‍ ഈക്കോയുടെ വില്‍പ്പനയില്‍ വലിയ മുന്നേറ്റമുണ്ടാക്കുമെന്നാണ് വിപണിയിലെ പൊതുവായ വിലയിരുത്തല്‍.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു. ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻറ് ചെയ്യാനും മറക്കല്ലേ.