മിഡിൽ ക്ലാസിന്റെ പ്രിയപ്പെട്ട 7 സീറ്ററിന് ഇനി വിലയേറും; എർട്ടിഗയ്ക്ക് വില കൂട്ടി മാരുതി

ഇന്ത്യന്‍ വിപണിയിലെ ജനപ്രിയ എംപിവി (MPV) മോഡലായ മാരുതി സുസുക്കി എര്‍ട്ടിഗയുടെ (Maruti Suzuki Ertiga) വിവിധ വേരിയന്റുകള്‍ക്ക് രാജ്യത്തുടനീളം വില വര്‍ദ്ധിപ്പിച്ചു. മാരുതി സുസുക്കി തങ്ങളുടെ തിരഞ്ഞെടുത്ത മോഡലുകളുടെ പുതുക്കിയ നിരക്കുകള്‍ കഴിഞ്ഞ ദിവസം ഔദ്യോഗികമായി പ്രഖ്യാപിച്ചതിന് പിന്നാലെയാണ് ഇപ്പോള്‍ എര്‍ട്ടിഗയുടെയും പുതിയ വിലവിവരങ്ങള്‍ പുറത്തുവന്നിട്ടുള്ളത്. നേരത്തെ സ്വിഫ്റ്റ്, ഡിസയര്‍, ജിംനി, ഇവിറ്റാര തുടങ്ങിയ ജനപ്രിയ മോഡലുകളുടെ വില വര്‍ദ്ധനവ് കമ്പനി വിശദമാക്കിയിരുന്നു. ഇതിന് തൊട്ടുപിന്നാലെയാണ് ജനപ്രിയ ഫാമിലി എംപിവിയായ എര്‍ട്ടിഗയുടെ എല്ലാ വേരിയന്റുകള്‍ക്കും ഒരേപോലെ ബാധകമാകുന്ന രീതിയില്‍ നിര്‍മ്മാതാക്കള്‍ ഇപ്പോള്‍ വില പുതുക്കി നിശ്ചയിച്ചിരിക്കുന്നത്.

പുതുക്കിയ വില വിവരങ്ങള്‍ അനുസരിച്ച് എര്‍ട്ടിഗയുടെ വിവിധ മോഡലുകള്‍ക്ക് ആകെ 10000 രൂപ വരെയാണ് വര്‍ദ്ധനവ് വന്നിട്ടുള്ളത്. ഇതില്‍ വിപണിയില്‍ ഏറ്റവും കൂടുതല്‍ വിറ്റഴിക്കപ്പെടുന്ന മോഡലുകളായ VXi സിഎന്‍ജി മാനുവല്‍, ZXi സിഎന്‍ജി മാനുവല്‍ എന്നീ രണ്ട് വേരിയന്റുകള്‍ക്കാണ് നിലവില്‍ 10000 രൂപയുടെ വില വര്‍ധനവ് ഉണ്ടായിരിക്കുന്നത്.

അതേസമയം സിഎന്‍ജി ഒഴികെയുള്ള മറ്റ് പെട്രോള്‍ മാനുവല്‍, ഓട്ടോമാറ്റിക് വേരിയന്റുകള്‍ക്ക് എല്ലാം തന്നെ 5000 രൂപ വീതമാണ് വില വര്‍ദ്ധിപ്പിച്ചിട്ടുള്ളത്. വില പുതുക്കിയതോടെ ഈ ജനപ്രിയ 7 സീറ്റര്‍ എംപിവിയുടെ വിപണിയിലെ പ്രാരംഭ വില 8.85 ലക്ഷം രൂപയായി. ടോപ്പ് എന്‍ഡ് മോഡലുകള്‍ക്ക് ഇനി മുതല്‍ 12.99 ലക്ഷം രൂപ എക്‌സ്‌ഷോറൂം വിലയായി മുടക്കണം.

മെക്കാനിക്കല്‍ വശങ്ങളിലേക്ക് നോക്കിയാല്‍ നിലവില്‍ വിപണിയിലുള്ള അതേ ശക്തമായ എഞ്ചിന്‍ ലൈനപ്പ് തന്നെയാണ് പുതിയ വിലയിലും എര്‍ട്ടിഗ നിലനിര്‍ത്തുന്നത്. മികച്ച പെര്‍ഫോമന്‍സ് നല്‍കുന്ന 1.5 ലിറ്റര്‍, ഫോര്‍-സിലിണ്ടര്‍ നാച്ചുറലി ആസ്പിറേറ്റഡ് പെട്രോള്‍ എഞ്ചിനാണ് ഈ വാഹനത്തിന കരുത്ത് പകരുന്നത്. ഈ എഞ്ചിന്‍ പെട്രോള്‍ മോഡലുകളില്‍ പരമാവധി 102 bhp പവറും 137 Nm ടോര്‍ക്കും ഉത്പാദിപ്പിക്കുന്നു.

ഫാക്ടറി ഫിറ്റഡ് സിഎന്‍ജി (CNG) മോഡലിലേക്ക് മാറുമ്പോള്‍ ഈ എഞ്ചിന്റെ ഔട്ട്പുട്ട് 87 bhp പവറും 121 Nm ടോര്‍ക്കുമായി ക്രമീകരിക്കപ്പെടുന്നു. ഉപഭോക്താക്കളുടെ സൗകര്യത്തിനായി മികച്ച ട്രാന്‍സ്മിഷന്‍ ഓപ്ഷനുകള്‍ ഈ എഞ്ചിനോടൊപ്പം മാരുതി സുസുക്കി നല്‍കുന്നുണ്ട്. ബേസ് വേരിയന്റുകളില്‍ 5-സ്പീഡ് മാനുവല്‍ ഗിയര്‍ബോക്‌സ് നല്‍കുമ്പോള്‍ ഉയര്‍ന്ന മോഡലുകളില്‍ യാത്ര കൂടുതല്‍ സുഗമമാക്കാന്‍ 6-സ്പീഡ് ടോര്‍ക്ക് കണ്‍വെര്‍ട്ടര്‍ ഓട്ടോമാറ്റിക് ഗിയര്‍ബോക്‌സ് ലഭ്യമാണ്.

ദീര്‍ഘദൂര യാത്രകളിലും സിറ്റി ട്രാഫിക്കിലും ഒരുപോലെ മികച്ച ഇന്ധനക്ഷമതയും സുഖപ്രദമായ ഡ്രൈവിംഗും ഉറപ്പാക്കാന്‍ ഈ അത്യാധുനിക ഗിയര്‍ബോക്‌സ് സംവിധാനങ്ങള്‍ എര്‍ട്ടിഗയെ സഹായിക്കുന്നുണ്ട്. ഇതുകൊണ്ട് തന്നെയാണ് ഇന്ത്യന്‍ ടാക്‌സി വിപണിയിലും കുടുംബങ്ങള്‍ക്കിടയിലും ഈ മോഡല്‍ ഇന്നും വിശ്വാസ്യത നിലനിര്‍ത്തുന്നത്. നിലവില്‍ ഇന്ത്യന്‍ വിപണിയില്‍ ആകെ നാല് പ്രധാന വേരിയന്റുകളിലാണ് മാരുതി സുസുക്കി എര്‍ട്ടിഗ വില്‍പനയ്ക്ക് എത്തിക്കുന്നത്.

ബജറ്റ് ഉപഭോക്താക്കള്‍ക്കായി LXi, മിഡ് വേരിയന്റുകളായ VXi, ZXi, ഉയര്‍ന്ന ഫീച്ചറുകളുള്ള ZXi+ എന്നിവയാണ് ഈ മോഡലുകള്‍. ഈ പ്രധാന വേരിയന്റുകളില്‍ പ്രായോഗികമായ ആവശ്യങ്ങള്‍ക്ക് അനുസരിച്ച് സിഎന്‍ജി കിറ്റുകളും ഓട്ടോമാറ്റിക് ട്രാന്‍സ്മിഷനുകളും തിരഞ്ഞെടുക്കാനുള്ള സ്വാതന്ത്ര്യം ഉപഭോക്താക്കള്‍ക്കുണ്ട്. കുറഞ്ഞ മെയിന്റനന്‍സ് ചെലവും മികച്ച റീസെയില്‍ വാല്യുവും കാരണം ഈ വേരിയന്റുകള്‍ക്കെല്ലാം വിപണിയില്‍ ഇന്നും വന്‍ ഡിമാന്‍ഡാണ് അനുഭവപ്പെടുന്നത്.

വര്‍ദ്ധിച്ചുവരുന്ന നിര്‍മ്മാണ ചെലവുകളും പണപ്പെരുപ്പം കൂടുന്നതടക്കമുള്ള സാമ്പത്തിക മാറ്റങ്ങളുമാണ് വില വര്‍ദ്ധിപ്പിക്കാന്‍ കാരണമായി കമ്പനി ചൂണ്ടിക്കാണിക്കുന്നത്. ഉത്സവ സീസണുകള്‍ക്ക് മുന്നോടിയായി ഉണ്ടായ ഈ നേരിയ വിലക്കയറ്റം പുതിയ വാഹനം വാങ്ങാന്‍ കാത്തിരിക്കുന്ന സാധാരണക്കാരായ ഉപഭോക്താക്കളുടെ ബജറ്റിനെ നേരിയ രീതിയില്‍ ബാധിച്ചേക്കാം. എങ്കിലും വിപണിയിലെ മറ്റ് 7 സീറ്റര്‍ വാഹനങ്ങളുമായി താരതമ്യം ചെയ്യുമ്പോള്‍ എര്‍ട്ടിഗ ഇന്നും ഒരു വാല്യു ഫോര്‍ മണി വാഹനമാണ്.