ബച്ചന്‍ കയറിയാലും തലതട്ടില്ല! 34 കി.മീ മൈേലജുള്ള ഈ കാര്‍ വാങ്ങാന്‍ 5 ലക്ഷം തികച്ച് മുടക്കേണ്ട

ഇന്ത്യക്കാരുടെ പ്രിയപ്പെട്ട ടോള്‍ബോയ് ഹാച്ച്ബാക്കായ മാരുതി സുസുക്കി വാഗണ്‍ ആറിന്റെ (Maruti Suzuki Wagon R) 2026 മാര്‍ച്ച് മാസത്തിലെ വില്‍പ്പന കണക്കുകള്‍ പുറത്തുവന്നു. മുന്‍ വര്‍ഷത്തെ അപേക്ഷിച്ച് വില്‍പ്പനയില്‍ നേരിയ ഇടിവ് രേഖപ്പെടുത്തിയെങ്കിലും, രാജ്യത്ത് ഏറ്റവും കൂടുതല്‍ വിറ്റഴിക്കപ്പെടുന്ന മികച്ച 10 കാറുകളുടെ പട്ടികയില്‍ വാഗണ്‍ ആര്‍ ആറാം സ്ഥാനം നിലനിര്‍ത്തി. റഷ്‌ലെയ്ന്‍ (Rushlane) പുറത്തുവിട്ട കണക്കുകള്‍ പ്രകാരം 2026 മാര്‍ച്ചില്‍ 17,025 യൂണിറ്റുകളാണ് വിറ്റഴിച്ചത്. 2025 മാര്‍ച്ചില്‍ ഇത് 17,175 യൂണിറ്റുകളായിരുന്നു. ഇതോടെ വാർഷികാടിസ്ഥാനത്തിൽ 0.87 ശതമാനത്തിന്റെ നേരിയ ഇടിവ് രേഖപ്പെടുത്തി.

വില്‍പ്പനയില്‍ 150 യൂണിറ്റുകളുടെ ചെറിയ കുറവുണ്ടായെങ്കിലും മാരുതി സുസുക്കി വാഗണ്‍ ആര്‍ വിപണിയില്‍ കരുത്തറിയിക്കുന്നുണ്ട്. 2026 മാര്‍ച്ചിലെ ഇന്ത്യയിലെ ഏറ്റവും മികച്ച പത്ത് കാറുകളുടെ പട്ടികയില്‍ ആറാം സ്ഥാനം വാഗണ്‍ ആര്‍ സ്വന്തമാക്കി. മാരുതി ഡിസയര്‍, ടാറ്റ പഞ്ച്, ടാറ്റ നെക്‌സോണ്‍, ഹ്യുണ്ടായി ക്രെറ്റ, മാരുതി എര്‍ട്ടിഗ തുടങ്ങിയ വമ്പന്‍മാരാണ് ഈ പട്ടികയില്‍ വാഗണ്‍ ആറിന് മുന്നിലുള്ളത്.

വിളിപ്പേര് സൂചിപ്പിക്കുന്ന പോലെ വാഗണ്‍ ആറിന്റെ ഏറ്റവും വലിയ പ്രത്യേകത അതിന്റെ ഉയരമാണ്. അതായത് 1,675 മില്ലിമീറ്റര്‍ ഉയരമുള്ള ഈ കാറിന് ടാറ്റ നെക്‌സോണ്‍ പോലുള്ള എസ്യുവികളേക്കാള്‍ കൂടുതല്‍ ഉയരമുണ്ടെന്നതാണ് വാസ്തവം. സബ് 4 മീറ്റര്‍ എസ്‌യുവിയായ നെക്‌സോണിന്റെ ഉയരം 1,620 മില്ലിമീറ്റര്‍ മാത്രമാണ്. അതിനാല്‍ തന്നെ ഉയരമുള്ള യാത്രക്കാര്‍ക്കും വളരെ സൗകര്യപ്രദമായി ഇതില്‍ യാത്ര ചെയ്യാന്‍ സാധിക്കും.

ഇടുങ്ങിയ നഗരപാതകളിലൂടെ സുഖകരമായി ഓടിക്കാന്‍ സഹായിക്കുന്ന ചെറിയ ടേണിംഗ് റേഡിയസ് ഈ കാറിന്റെ മെക്കാനിക്കല്‍ മികവാണ്. വെറും 4.7 മീറ്റര്‍ മാത്രമാണ് വാഗണ്‍ ആറിന്റെ ടേണിംഗ് റേഡിയസ്. ഇത് ട്രാഫിക്കിലും മറ്റും എളുപ്പത്തില്‍ യു-ടേണ്‍ എടുക്കുന്നതിനും വളരെ ഇടുങ്ങിയ സ്ഥലങ്ങളില്‍ പാര്‍ക്കിംഗ് ചെയ്യുന്നതിനും ഡ്രൈവര്‍മാരെ സഹായിക്കുന്നു.

സുരക്ഷയുടെ കാര്യത്തിലും കാലികമായ മാറ്റങ്ങളുമായാണ് പുതിയ വാഗണ്‍ ആര്‍ എത്തുന്നത്. യാത്രക്കാരുടെ സുരക്ഷയ്ക്കായി 6 എയര്‍ബാഗുകള്‍, ഇലക്ട്രോണിക് സ്റ്റെബിലിറ്റി പ്രോഗ്രാം (ESP) എന്നിവ ഇതില്‍ സജ്ജീകരിച്ചിട്ടുണ്ട്. ഇതോടൊപ്പം 17.78 സെ.മീറ്റര്‍ ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, ആപ്പിള്‍ കാര്‍പ്ലേ, ആന്‍ഡ്രോയിഡ് ഓട്ടോ തുടങ്ങിയ പ്രീമിയം കണക്റ്റിവിറ്റി സൗകര്യങ്ങളും ഈ ഹാച്ച്ബാക്കില്‍ ലഭ്യമാണ്.

ഇന്ധനക്ഷമതയുടെ കാര്യത്തിലും വാഗണ്‍ ആര്‍ ഇപ്പോഴും വിപണിയില്‍ വിപ്ലവം സൃഷ്ടിക്കുന്നു. വാഗണ്‍ ആര്‍ സിഎന്‍ജി (CNG) വേരിയന്റുകള്‍ക്ക് കിലോഗ്രാമിന് 33.47 കിലോമീറ്റര്‍ വരെ മൈലേജ് ലഭിക്കുമെന്ന് കമ്പനി അവകാശപ്പെടുന്നു. പെട്രോള്‍ പതിപ്പുകളും മികച്ച മൈലേജ് വാഗ്ദാനം ചെയ്യുന്നുണ്ട്. വാഗണ്‍ ആര്‍ പെട്രോള്‍ വേരിയന്റുകള്‍ക്ക് ലിറ്ററിന് 25.19 കിലോമീറ്റര്‍ വരെ മൈലേജ് ലഭിക്കുമെന്ന് മാരുതി സുസുക്കി അവകാശപ്പെടുന്നു.

ദീര്‍ഘദൂര യാത്രകള്‍ക്കും ഹ്രസ്വദൂര യാത്രകള്‍ക്കും ഒരേപോലെ ലാഭകരമാണ് ഈ മൈലേജ് കണക്കുകള്‍. വിലയുടെ കാര്യത്തിലും വാഗണ്‍ ആര്‍ ഇടത്തരം കുടുംബങ്ങള്‍ കൂടുതലുള്ള ഇന്ത്യയിലെ ഉപഭോക്താക്കള്‍ക്ക് വലിയ ആശ്വാസം നല്‍കുന്നു. ഇതിന്റെ ബേസ് മോഡലിന് വെറും 4.99 ലക്ഷം രൂപയാണ് വില. ഉയര്‍ന്ന വേരിയന്റുകള്‍ക്ക് 6.95 ലക്ഷം രൂപ മുടക്കണം. മാരുതി സുസുക്കിയുടെ ഔദ്യോഗിക വെബ്‌സൈറ്റില്‍ നല്‍കിയിരിക്കുന്ന എക്‌സ്‌ഷോറൂം വിലകളാണ് ഇത്.

ഇന്ത്യന്‍ വിപണിയില്‍ ടാറ്റ ടിയാഗോ പോലുള്ള മോഡലുകളുമായാണ് വാഗണ്‍ ആര്‍ പ്രധാനമായും മത്സരിക്കുന്നത്. മതിയായ ക്യാബിന്‍ സ്‌പെയ്‌സും ഉയര്‍ന്ന മൈലേജും ആഗ്രഹിക്കുന്നവര്‍ക്ക് വാഗണ്‍ ആര്‍ ഇപ്പോഴും മികച്ച ഓപ്ഷനാണ്. കുറഞ്ഞ ചിലവില്‍ മികച്ച സൗകര്യങ്ങള്‍ വാഗ്ദാനം ചെയ്യുന്നതിനാല്‍ തന്നെ ഒരുതവണ ഉപയോഗിച്ചവര്‍ അപഗ്രേഡ് ചെയ്യുമ്പോഴും പുതിയ മോഡല്‍ വാഗണ്‍ആര്‍ വാങ്ങുന്നതായി കാണാം. ചെറിയ തിരിച്ചടികളില്‍ നിന്ന് കരകയറി വാഗണ്‍ആര്‍ അതിശക്തമായി തിരിച്ചുവരുമെന്നാണ് കമ്പനിയുടെ പ്രതീക്ഷ.