ഫോർച്യൂണറിന് പറ്റുമോ? 406 ടൺ ട്രെയിൻ വലിച്ച് എംജി മജസ്റ്ററിന് പുതിയ ഗിന്നസ് വേൾഡ് റെക്കോർഡ്

ഇന്ത്യയിലെ ആദ്യത്തെ ഡി+ എസ്‌യുവി (D+ SUV) ആയ എംജി മജസ്റ്റര്‍, ഗിന്നസ് വേള്‍ഡ് റെക്കോര്‍ഡ് നേട്ടത്തിലൂടെ തങ്ങളുടെ കരുത്ത് തെളിയിച്ചിരിക്കുകയാണ്. റെയില്‍ പാളത്തിലൂടെ ലോകത്തിലെ ഏറ്റവും ഭാരമേറിയ ട്രെയിന്‍ വലിച്ച എസ്‌യുവി എന്ന നേട്ടമാണ് മജസ്റ്റര്‍ സ്വന്തമാക്കിയത്. ഗുഡ്സ് ലോക്കോമോട്ടീവ്, പാസഞ്ചര്‍ കോച്ചുകള്‍ എന്നിവയടക്കം 406.4 ടണ്‍ ഭാരമാണ് വാഹനം വലിച്ചത്. ജമ്മു കശ്മീരിലെ കാക്കാപോറ, അവന്തിപുര റെയില്‍വേ സ്റ്റേഷനുകള്‍ക്കിടയിലുള്ള ട്രാക്കിലായിരുന്നു ഈ അസാധാരണ പ്രകടനം അരങ്ങേറിയത്. ഏകദേശം 300 അടി ദൂരമാണ് എംജി മജസ്റ്റര്‍ ഇത്രയും വലിയ ഭാരം വഹിച്ചുകൊണ്ട് സഞ്ചരിച്ചത്.

ഗിന്നസ് റെക്കോര്‍ഡിന് ആവശ്യമായ 400 ടണ്‍ ഭാരം, 100 അടി ദൂരം എന്നീ മാനദണ്ഡങ്ങളെ മജസ്റ്റര്‍ അനായാസം മറികടന്നു. ഈ പരീക്ഷണത്തിനായി ഉപയോഗിച്ചത് എഞ്ചിനിലോ ഡ്രൈവ് ട്രെയിനിലോ മാറ്റങ്ങള്‍ വരുത്താത്ത സാധാരണ പ്രൊഡക്ഷന്‍ വാഹനമായിരുന്നു എന്നതും ശ്രദ്ധേയമാണ്. വാഹനത്തിന്റെ ട്രാക്ഷന്‍ മാനേജ്മെന്റ്, ടോര്‍ക്ക് ഡെലിവറി, സ്ട്രക്ചറല്‍ ഇന്റഗ്രിറ്റി എന്നിവ കടുത്ത സമ്മര്‍ദ്ദത്തില്‍ പരിശോധിക്കപ്പെട്ടു.

സ്വതന്ത്ര ഓട്ടോമോട്ടീവ് വിദഗ്ധരുടെ മേല്‍നോട്ടത്തിലാണ് ഗിന്നസ് പ്രോട്ടോക്കോള്‍ പ്രകാരം എല്ലാ നടപടിക്രമങ്ങളും പൂര്‍ത്തിയാക്കിയത്. മജസ്റ്ററിന്റെ 2.0 ലിറ്റര്‍ ട്വിന്‍ ടര്‍ബോ ഡീസല്‍ എഞ്ചിനാണ് ഈ കരുത്തുറ്റ പ്രകടനത്തിന് പിന്നില്‍ പ്രവര്‍ത്തിച്ചത്. 215.5 PS പവറും 478.5 Nm ടോര്‍ക്കും ഉത്പാദിപ്പിക്കാന്‍ ശേഷിയുള്ളതാണ് ഈ എഞ്ചിന്‍. കൃത്യമായ നിയന്ത്രണത്തോടും സ്ഥിരതയോടും കൂടിയാണ് എസ്‌യുവി ഇത്രയും ദൂരം ട്രെയിന്‍ വലിച്ചുനീക്കിയത് എന്ന് വിദഗ്ധര്‍ സാക്ഷ്യപ്പെടുത്തുന്നു.

എംജി മജസ്റ്ററില്‍ മികച്ച ഇന്ധനക്ഷമതയും സുഗമമായ യാത്രയും ഉറപ്പാക്കാന്‍ 8-സ്പീഡ് ഓട്ടോമാറ്റിക് ട്രാന്‍സ്മിഷനാണ് നല്‍കിയിരിക്കുന്നത്. കൂടാതെ, ഓഫ്-റോഡ് യാത്രകള്‍ക്കായി ട്രിപ്പിള്‍ ഡിഫറന്‍ഷ്യല്‍ ലോക്കുകള്‍ (ഫ്രണ്ട്, റിയര്‍, സെന്റര്‍), അഡ്വാന്‍സ്ഡ് 4WD സിസ്റ്റം എന്നിവയും ഒരുക്കിയിട്ടുണ്ട്. 219 mm ഗ്രൗണ്ട് ക്ലിയറന്‍സും 810 mm വാട്ടര്‍ വേഡിംഗ് കപ്പാസിറ്റിയും ഇതിനുണ്ട്.

സുരക്ഷയുടെ കാര്യത്തിലും എംജി മജസ്റ്റര്‍ വിട്ടുവീഴ്ചകള്‍ ചെയ്യുന്നില്ല എന്നതാണ് കമ്പനിയുടെ നിലപാട്. ലെവല്‍ 2 ADAS സാങ്കേതികവിദ്യയോടെ എത്തുന്ന ഇന്ത്യയിലെ ആദ്യ ഡി+ എസ്‌യുവി ആണിത്. മജസ്റ്ററിന്റെ ആഡംബരപൂര്‍ണമായ ഉള്‍ഭാഗവും അത്യാധുനിക ഇന്‍ഫോടെയ്ന്‍മെന്റ് സംവിധാനങ്ങളും ഉപഭോക്താക്കള്‍ക്ക് പ്രീമിയം അനുഭവം വാഗ്ദാനം ചെയ്യുന്നു.

എസ്‌യുവിയുടെ പ്രീ-ബുക്കിംഗ് നിലവില്‍ 41,000 രൂപയ്ക്ക് ഔദ്യോഗിക വെബ്സൈറ്റ് വഴി ആരംഭിച്ചു കഴിഞ്ഞു. ആദ്യ 3,000 ഉപഭോക്താക്കള്‍ക്കായി 'എംജി കംപ്ലീറ്റ് പീസ് ഓഫ് മൈന്‍ഡ്' പ്രോഗ്രാം കമ്പനി വാഗ്ദാനം ചെയ്യുന്നു. ഇതില്‍ 5 വര്‍ഷത്തെ അണ്‍ലിമിറ്റഡ് വാറണ്ടി, റോഡ് സൈഡ് അസിസ്റ്റന്‍സ്, 5 സൗജന്യ സര്‍വീസുകള്‍ എന്നിവ ഉള്‍പ്പെടുന്നു.

കരുത്തും ആധുനിക സാങ്കേതികവിദ്യയും ആഗ്രഹിക്കുന്ന ഉപഭോക്താക്കള്‍ക്കായിട്ടാണ് മജസ്റ്റര്‍ രൂപകല്‍പ്പന ചെയ്തിരിക്കുന്നത്. ഈ ഗിന്നസ് റെക്കോര്‍ഡ് നേട്ടം മജസ്റ്ററിന്റെ വിപണിയിലെ സ്വീകാര്യത വര്‍ദ്ധിപ്പിക്കുമെന്ന് ജെഎസ്ഡബ്ല്യു എംജി മോട്ടോര്‍ ഇന്ത്യ മാനേജിംഗ് ഡയറക്ടര്‍ അനുരാഗ് മെഹ്റോത്ര പറഞ്ഞു. ഏപ്രില്‍ 20-ന് എംജി മജസ്റ്ററിന്റെ വില പ്രഖ്യാപിക്കും. ഏകദേശം 40 മുതല്‍ 46 രൂപയ്ക്കിടയില്‍ എക്‌സ്‌ഷോറൂം വില പ്രതീക്ഷിക്കാം.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു. ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻറ് ചെയ്യാനും മറക്കല്ലേ.