Click it and Unblock the Notifications
ഡസ്റ്റര് വാങ്ങുന്നവര്ക്ക് 3 വര്ഷം സര്വീസ് ഫ്രീ! ശരവേഗത്തിൽ വില്പ്പന നാഴികക്കല്ല് പിന്നിട്ട സന്തോഷം
ഇന്ത്യന് വിപണിയില് വന് തരംഗം സൃഷ്ടിച്ചുകൊണ്ട് ഫ്രഞ്ച് വാഹന നിര്മാതാക്കളായ റെനോയുടെ പുതു തലമുറ ഡസ്റ്റര് എസ്യുവി മികച്ച മുന്നേറ്റം തുടരുന്നു. വിപണിയില് അവതരിപ്പിച്ച് ചുരുങ്ങിയ മാസങ്ങള്ക്കുള്ളില് തന്നെ 5000 യൂണിറ്റുകളുടെ വില്പ്പനയാണ് ഈ മിഡ്-സൈസ് എസ്യുവി സ്വന്തമാക്കിയത്. ഈ വലിയ വിപണി നേട്ടത്തിന്റെ പശ്ചാത്തലത്തില് പുതിയ ഡസ്റ്റര് വാങ്ങാന് ആഗ്രഹിക്കുന്ന ഉപഭോക്താക്കള്ക്കായി ആകര്ഷകമായ പുതിയൊരു സവിശേഷ ആനുകൂല്യ പദ്ധതിയും കമ്പനി ഇപ്പോള് പ്രഖ്യാപിച്ചിട്ടുണ്ട്. പുതിയ ഡസ്റ്റര് സ്വന്തമാക്കാന് ആഗ്രഹിക്കുന്ന ഉപഭോക്താക്കള്ക്ക് കൂടുതല് ആശ്വാസം നല്കുന്നതിനായി 'ഡിസ്കവറി ഡേയ്സ്' എന്ന പേരില് പ്രത്യേക ക്യാമ്പയിനാണ് റെനോ ഇന്ത്യ ആരംഭിച്ചിരിക്കുന്നത്.
ഇക്കഴിഞ്ഞ മാര്ച്ച് മാസത്തിലാണ് പുതിയ തലമുറ ഡസ്റ്റര് രാജ്യത്ത് ഔദ്യോഗികമായി കമ്പനി അവതരിപ്പിച്ചത്. ഇന്ത്യന് എസ്യുവി വിപണിക്ക് ഏറെ സുപരിചിതമായ ഡസ്റ്റര് എന്ന ഐതിഹാസിക മോഡലിന്റെ വളരെ ശക്തമായ ഒരു തിരിച്ചുവരവാണ് ഇതിലൂടെ ഇന്ത്യന് ഓട്ടോമൊബൈല് രംഗം സാക്ഷ്യം വഹിക്കുന്നത്. ഈ പുതിയ ഡിസ്കവറി ഡേയ്സ് ക്യാമ്പയിന്റെ ഭാഗമായി ജൂണ് 30 വരെ പുതിയ ഡസ്റ്റര് വാങ്ങുന്ന എല്ലാ ഉപഭോക്താക്കള്ക്കും മൂന്ന് വര്ഷത്തെ സൗജന്യ സര്വീസും മെയിന്റനന്സും ലഭിക്കുന്നതാണ്.
മിഡ്-സൈസ് എസ്യുവി സ്വന്തമാക്കാന് ആഗ്രഹിക്കുന്നവര്ക്ക് വലിയ സാമ്പത്തിക ലാഭവും മികച്ച ഓണര്ഷിപ്പ് എക്സ്പീരിയന്സും നല്കുന്നതാണ് കമ്പനിയുടെ ഈ പരിമിതകാല ഓഫര്. വാഹനത്തിന്റെ മൊത്തത്തിലുള്ള റണ്ണിംഗ് കോസ്റ്റ് കുറയ്ക്കാന് ഈ സൗജന്യ സര്വീസ് സഹായിക്കും. വിപണിയിലെത്തിയ മാര്ച്ച് മാസം മുതല് മെയ് വരെയുള്ള ചുരുങ്ങിയ കാലയളവില് 5,028 ഡസ്റ്റര് എസ്യുവികളാണ് കമ്പനി ഇന്ത്യയിലുടനീളമുള്ള തങ്ങളുടെ ഡീലര്ഷിപ്പുകളിലേക്ക് അയച്ചത്.
മാര്ച്ചില് 1,402 യൂണിറ്റുകളും ഏപ്രിലില് 2,359 യൂണിറ്റുകളും മെയ് മാസത്തില് 1,267 യൂണിറ്റുകളുമാണ് വിറ്റഴിച്ചത്. നിലവില് വിപണി ഭരിക്കുന്ന ഹ്യുണ്ടായി ക്രെറ്റ, മാരുതി ഗ്രാന്ഡ് വിറ്റാര, കിയ സെല്റ്റോസ്, ടൊയോട്ട ഹൈറൈഡര് തുടങ്ങിയ പ്രമുഖ മാഡലുകളോടാണ് ഡസ്റ്റര് മത്സരിക്കുന്നത്. മികച്ച റൈഡിംഗ് ക്വാളിറ്റിയും കരുത്തുറ്റ ഡ്രൈവിംഗ് ഡൈനാമിക്സും കൊണ്ട് പുതിയ ഡസ്റ്റര് ഇതിനകം തന്നെ ഇന്ത്യന് വാഹന പ്രേമികളുടെയും വിദഗ്ദ്ധരുടെയും ശ്രദ്ധ ഒരുപോലെ ആകര്ഷിച്ചിട്ടുണ്ട്.
റെനോയുടെ പ്രത്യേക 'ആര്-പാസ്' പ്രോഗ്രാം വഴി വാഹനം മുന്കൂട്ടി ബുക്ക് ചെയ്ത ഉപഭോക്താക്കളുമായി വിവിധ ഡീലര്ഷിപ്പുകള് ഇപ്പോള് നിരന്തരം ബന്ധപ്പെടുന്നുണ്ട്. തങ്ങള്ക്ക് ആവശ്യമായ വേരിയന്റുകള് തിരഞ്ഞെടുക്കാനും ബുക്കിംഗ് നടപടികള് വേഗത്തില് പൂര്ത്തിയാക്കാനും ഡീലര്മാര് ഇപ്പോള് മുന്കൈ എടുക്കുന്നുണ്ട്. ധാരാളം ആധുനിക സവിശേഷതകള് നിറഞ്ഞ പ്രീമിയം ക്യാബിനും മസ്കുലാര് ഡിസൈനും ആകര്ഷകമായ റോഡ് പ്രസന്സുമാണ് പുതിയ റെനോ ഡസ്റ്ററിന്റെ പ്രധാന ഹൈലൈറ്റുകള്.
ആകര്ഷകമായ വിലയും മികച്ച സസ്പെന്ഷന് സെറ്റപ്പും ഇന്ത്യന് റോഡുകള്ക്ക് ഏറ്റവും അനുയോജ്യമായ മെക്കാനിക്കല് പെര്ഫോമന്സും എഞ്ചിന് കരുത്തും ഈ വാഹനത്തിനുണ്ട്. നിലവില് 10.40 ലക്ഷം രൂപ മുതലാണ് ഡസ്റ്ററിന്റെ എക്സ്ഷോറൂം വില ആരംഭിക്കുന്നത്. വരും മാസങ്ങളില് കൂടുതല് കരുത്തോടെയും വൈവിധ്യത്തോടെയും ഡസ്റ്റര് മോഡല് നിര വിപുലീകരിക്കാന് റെനോ ഇന്ത്യ പദ്ധതിയിടുന്നുണ്ട്.
ഇതില് ഇന്ത്യന് വാഹന വിപണിയും ഉപഭോക്താക്കളും ഏറ്റവും കൂടുതല് ആകാംഷയോടെ കാത്തിരിക്കുന്നത് ഉടന് പുറത്തിറങ്ങാനിരിക്കുന്ന ഡസ്റ്റര് ഹൈബ്രിഡ് മോഡലിനായാണ്. ഈ ഇലക്ട്രിക് ഹൈബ്രിഡ് പതിപ്പിനായുള്ള പ്രാരംഭ ബുക്കിംഗുകള് ഇതിനകം തന്നെ കമ്പനി വിജയകരമായി പൂര്ത്തിയാക്കിയതാണ്. ഈ വര്ഷം പുറത്തിറങ്ങാനുള്ള ഡസ്റ്റര് ഹൈബ്രിഡിന്റെ മുഴുവന് യൂണിറ്റുകളും ഇതിനോടകം വിറ്റുപോയി.
ഏറെ ജനപ്രിയമാകാന് സാധ്യതയുള്ള ഡസ്റ്റര് ഹൈബ്രിഡിന്റെ ഔദ്യോഗിക വില പ്രഖ്യാപനവും വിതരണവും വരുന്ന ഉത്സവ സീസണിനോട് അനുബന്ധിച്ച് നടത്താണ് കമ്പനി ലക്ഷ്യമിടുന്നത്. നിലവില് മിഡ്-സൈസ് എസ്യുവി സെഗ്മെന്റില് അരങ്ങേറിക്കൊണ്ടിരിക്കുന്ന കടുത്ത മത്സരം നേരിടാനായി ഡസ്റ്ററിന്റെ മൂല്യം വര്ധിപ്പിക്കേണ്ടതുണ്ട്. പുതിയ സര്വീസ് ഓഫറുകളിലൂടെ അതിന് സാധിക്കുമെന്നാണ് റെനോ കരുതുന്നത്. വരും ദിവസങ്ങളില് കൂടുതല് പുതിയ ഉപഭോക്താക്കളെ തങ്ങളിലേക്ക് ആകര്ഷിക്കാന് ഈ വിപണന തന്ത്രത്തിലൂടെ സാധിക്കുമെന്നാണ് കമ്പനി വിലയിരുത്തുന്നത്.
Continue with Google