ടാറ്റ പഞ്ച് ഇവി വാങ്ങാൻ പ്ലാനുണ്ടോ? വിലയിൽ വൻ മാറ്റം, പുതിയ നിരക്കുകൾ അറിയാം

ടാറ്റ പഞ്ച് ഇവി സ്വന്തമാക്കാൻ പദ്ധതിയിടുന്നവർക്ക് ഒരു പ്രധാന അറിയിപ്പ്. രാജ്യത്തുടനീളം പഞ്ച് ഇവിയുടെ (Punch EV) വില ഉയർത്തിയിരിക്കുകയാണ് ടാറ്റ ഇവി. 2026 സെപ്റ്റംബർ 14 മുതൽ പുതിയ നിരക്കുകൾ പ്രാബല്യത്തിൽ വന്നു. ബാറ്ററി പാക്കും വേരിയന്റും അനുസരിച്ച് 20,000 രൂപ വരെയാണ് വർദ്ധനവ്. കമ്പനിയുടെ സെപ്റ്റംബറിലെ മോഡൽ പരിഷ്കരണത്തിന്റെ ഭാഗമായാണ് ഈ നടപടി. വരും മാസങ്ങളിലെ ഉത്സവകാല തിരക്കിന് മുൻപായി വാഹനം ബുക്ക് ചെയ്യാൻ ആഗ്രഹിക്കുന്നവർ പുതിയ ഇഎംഐ നിരക്കുകളും ഓൺ-റോഡ് വിലയും ഡെലിവറി സമയവും ഒന്നുകൂടി പരിശോധിക്കുന്നത് നന്നായിരിക്കും.

വില പരിഷ്കരണത്തോടെ പഞ്ച് ഇവിയുടെ എക്സ്-ഷോറൂം നിരക്ക് 9.79 ലക്ഷം മുതൽ 12.99 ലക്ഷം രൂപ വരെയായി ഉയർന്നു. സ്മാർട്ട് 30, സ്മാർട്ട്+ 30 വേരിയന്റുകൾക്ക് 10,000 രൂപയാണ് കൂടിയത്. അതേസമയം 40 kWh ബാറ്ററിയുള്ള എല്ലാ ട്രിമ്മുകൾക്കും 20,000 രൂപ വർദ്ധിച്ചു. പുതിയ വേരിയന്റ് തി തിരിച്ചുള്ള വില അറിയാം: സ്മാർട്ട് 30 (₹9.79 ലക്ഷം), സ്മാർട്ട്+ 30 (₹10.39 ലക്ഷം), സ്മാർട്ട്+ 40 (₹11.19 ലക്ഷം), അഡ്വഞ്ചർ 40 (₹11.94 ലക്ഷം), എംപവേർഡ് 40 (₹12.69 ലക്ഷം), എംപവേർഡ്+ S (₹12.99 ലക്ഷം).

പ്രധാന വിവരങ്ങൾ: Tata Punch EV വിലയും ഇഎംഐയും ഓൺ-റോഡ് നിരക്കുകളും

വേരിയന്റ്	പുതിയ എക്സ്-ഷോറൂം വില
Smart 30	₹9.79 ലക്ഷം
Smart+ 30	₹10.39 ലക്ഷം
Smart+ 40	₹11.19 ലക്ഷം
Adventure 40	₹11.94 ലക്ഷം
Empowered 40	₹12.69 ലക്ഷം
Empowered+ S	₹12.99 ലക്ഷം

വില വർദ്ധനവോടെ പ്രതിമാസ ഇഎംഐ തുകയിലും ചെറിയ വ്യത്യാസം വരും. 10 ശതമാനം പലിശനിരക്കിൽ 60 മാസത്തേക്ക് എടുത്ത ലോണിൽ, 20,000 രൂപയുടെ വർദ്ധനവ് മാസം ഏകദേശം 425 രൂപയുടെ അധിക ബാധ്യത ഉണ്ടാക്കും. 10,000 രൂപയുടെ വർദ്ധനവാണെങ്കിൽ പ്രതിമാസം 212 രൂപയാണ് കൂടുതൽ അടയ്ക്കേണ്ടി വരിക. എന്നാൽ 'ബാറ്ററി-ആസ്-എ-സർവീസ്' (BaaS) ഓപ്ഷൻ തിരഞ്ഞെടുക്കുന്നവർക്ക് 6.49 ലക്ഷം രൂപ എന്ന തുടക്കവിലയിൽ വാഹനം സ്വന്തമാക്കാനാകും. ഇതിൽ ഉപയോഗത്തിനനുസരിച്ച് കിലോമീറ്ററിന് 2.6 രൂപ നിരക്കിലാണ് ബാറ്ററി ചാർജ് ഈടാക്കുക. ബാങ്ക് വായ്പ അനുവദിച്ചവരാണെങ്കിൽ, ഇൻവോയ്‌സിംഗിന് മുൻപ് പുതുക്കിയ ഓഫർ ലെറ്റർ ആവശ്യപ്പെടാൻ ശ്രദ്ധിക്കുക.

വില കൂടിയതോടെ പ്രമുഖ നഗരങ്ങളിലെ ഓൺ-റോഡ് നിരക്കുകളിലും ചെറിയ വ്യത്യാസങ്ങൾ വന്നിട്ടുണ്ട്. കൊച്ചിയിൽ എട്രി ലെവൽ ഓൺ-റോഡ് വില നിലവിൽ 10.9 ലക്ഷം രൂപയിലും ബെംഗളൂരുവിൽ 11.0 ലക്ഷം രൂപയിലുമാണ് ആരംഭിക്കുന്നത്. ഡൽഹിയിൽ 10.4 ലക്ഷം രൂപയാണ് തുടക്ക നിരക്ക്. ഇൻഷുറൻസ് ആഡ്-ഓണുകളും പ്രാദേശിക രജിസ്ട്രേഷൻ നിരക്കുകളും അനുസരിച്ച് ബെംഗളൂരുവിൽ ടോപ്പ്-എൻഡ് മോഡലുകളുടെ നിരക്ക് 14.8 ലക്ഷം രൂപ വരെ ഉയരാം. ഓരോ സംസ്ഥാനത്തെയും നികുതി വ്യത്യാസങ്ങളും ഇവി ആനുകൂല്യങ്ങളും അനുസരിച്ച് മൊത്തം തുകയിൽ മാറ്റമുണ്ടാകാൻ സാധ്യതയുണ്ട്.

ബുക്കിംഗ്: Tata Punch EV വെയ്റ്റിംഗ് പീരിയഡും ഡെലിവറി മുൻഗണനയും

പഞ്ച് ഇവിയുടെ ജനപ്രിയ ലോംഗ് റേഞ്ച് മോഡലുകൾക്ക് നിലവിൽ മികച്ച ഡിമാൻഡാണ് അനുഭവപ്പെടുന്നത്. പല നഗരങ്ങളിലും വാഹനം കൈയിൽ കിട്ടാൻ നാല് മുതൽ ആറ് മാസം വരെ കാത്തിരിക്കേണ്ടി വരുമെന്നാണ് ഡീലർമാർ നൽകുന്ന സൂചന. എന്നാൽ ഓർഡർ ക്യാൻസലേഷനുകളോ യാർഡ് സ്റ്റോക്കോ ലഭ്യമായാൽ കാത്തിരിപ്പ് സമയം കുറഞ്ഞേക്കാം. തിരഞ്ഞെടുക്കുന്ന വേരിയന്റ്, കളർ, ഡീലർഷിപ്പിലെ സ്റ്റോക്ക് എന്നിവയെ ആശ്രയിച്ചായിരിക്കും വെഹിക്കിൾ അലോക്കേഷൻ ലഭിക്കുക. അതിനാൽ ബുക്കിംഗിന് മുൻപ് ഒന്നിലധികം ഡീലർഷിപ്പുകളിൽ അന്വേഷിക്കുന്നത് നന്നായിരിക്കും.

വില വർദ്ധിച്ചെങ്കിലും വിപണിയിൽ ഇപ്പോഴും മികച്ച മൂല്യമാണ് പഞ്ച് ഇവി വാഗ്ദാനം ചെയ്യുന്നത്. ടാറ്റ നെക്സോൺ ഇവി ഇപ്പോഴും 12.49 ലക്ഷം രൂപ എക്സ്-ഷോറൂം തുടക്കവിലയിൽ ലഭ്യമാണ്. ഹ്യുണ്ടായി ക്രെറ്റ ഇലക്ട്രിക്കിന്റെ 'ബാറ്ററി-ആസ്-എ-സർവീസ്' ഓപ്ഷനിൽ എട്രി പ്രൈസ് 10.99 ലക്ഷം രൂപയാണെങ്കിലും, ഫുൾ ഓണർഷിപ്പിന് 18.03 ലക്ഷം മുതൽ 23.82 ലക്ഷം രൂപ വരെ ചെലവാകും. ഇതിനിടെ പഞ്ച് പെട്രോൾ, സിഎൻജി വേരിയന്റുകൾക്കും 10,000 രൂപ വരെ വില ഉയർന്നിട്ടുണ്ട്.