വ്യാജ വാർത്തകൾക്ക് വിരാമം; ടൊയോട്ടയുടെ ആദ്യ ഇലക്ട്രിക് കാർ നിരത്തിലേക്ക്; ആദ്യം സ്വന്തമാക്കിയ ഭാഗ്യവാൻ ഇതാ

ഇന്ത്യന്‍ വിപണിയിലെ ആദ്യത്തെ ഇലക്ട്രിക് കാര്‍ മോഡലായ അര്‍ബന്‍ ക്രൂയിസര്‍ ഇബെല്ലയുടെ (Toyota Urban Cruiser e Bella EV) രാജ്യത്തെ ആദ്യ ഡെലിവറി പൂര്‍ത്തിയാക്കി ജപ്പാനീസ് വാഹന നിര്‍മ്മാതാക്കളായ ടൊയോട്ട. വിപണിയില്‍ ഇറങ്ങുന്നതിന് മുമ്പ് വലിയ ഹൈപ്പ് സൃഷ്ടിച്ച ഈ വാഹനം ഇന്ത്യയില്‍ എത്തില്ലെന്ന തരത്തില്‍ നിരവധി വ്യാജ വാര്‍ത്തകളും അഭ്യൂഹങ്ങളും ഓണ്‍ലൈനില്‍ പ്രചരിച്ചിരുന്നു. എന്നാല്‍ അത്തരം ഊഹാപോഹങ്ങളെയെല്ലാം കാറ്റില്‍ പറത്തിക്കൊണ്ട് കമ്പനി ഈ പുതിയ വാഹനത്തിന്റെ വിതരണ നടപടികള്‍ രാജ്യത്ത് ആരംഭിച്ചിരിക്കുകയാണ്. ഇന്ത്യയില്‍ ടൊയോട്ടയുടെ ആദ്യ ഇവി മോഡല്‍ സ്വന്തമാക്കിയത് ഒഡീഷയില്‍ നിന്നുള്ള സ്വെയിന്‍ എന്ന് പേരുള്ള ഉപഭോക്താവാണ്.

ഭുവനേശ്വറിലെ 'ക്യാപിറ്റല്‍ ടൊയോട്ട' ഡീലര്‍ഷിപ്പിലാണ് ഈ ആദ്യ കാര്‍ ഡെലിവറി ചടങ്ങ് ഔദ്യോഗികമായി സംഘടിപ്പിച്ചത്. ഷോറൂം അധികൃതര്‍ തങ്ങളുടെ ഔദ്യോഗിക യൂട്യൂബ് ചാനലിലൂടെ ഈ ഡെലിവറി ചടങ്ങിന്റെ മനോഹരമായ വീഡിയോ പുറത്തുവിട്ടതോടെയാണ് ഈ വിവരം പുറംലോകം അറിഞ്ഞത്. ഇതോടെ ഇന്ത്യന്‍ ഇലക്ട്രിക് വാഹന വിപണിയിലെ ടൊയോട്ടയുടെ അരങ്ങേറ്റത്തിന് ഒഡീഷയുടെ മണ്ണില്‍ വെച്ച് തുടക്കമായിരിക്കുകയാണ്.

രണ്ട് ബാറ്ററി പായ്ക്ക് ഓപ്ഷനുകളിലാണ് ടൊയോട്ട അര്‍ബന്‍ ക്രൂയിസര്‍ ഇബെല്ല ഇവി മോഡല്‍ വിപണിയിലെത്തുന്നത്. ഇതില്‍ ചെറിയ 49 kWh ബാറ്ററി പായ്ക്ക് സിംഗിള്‍ ചാര്‍ജില്‍ പരമാവധി 440 കിലോമീറ്റര്‍ വരെ ഡ്രൈവിംഗ് റേഞ്ച് വാഗ്ദാനം ചെയ്യുമ്പോള്‍, വലിയ 61 kWh ബാറ്ററി പതിപ്പുകള്‍ക്ക് 543 കിലോമീറ്റര്‍ വരെ റേഞ്ച് നല്‍കാന്‍ സാധിക്കുമെന്നാണ് കമ്പനി സാക്ഷ്യപ്പെടുത്തുന്നത്.

മികച്ച ഡ്രൈവിംഗ് റേഞ്ചിനൊപ്പം യാത്രക്കാര്‍ക്കായി നിരവധി ലക്ഷ്വറി ഫീച്ചറുകളും ഇതിന്റെ ഇന്റീരിയറില്‍ ടൊയോട്ട ഒരുക്കിയിട്ടുണ്ട്. ഡ്രൈവര്‍ക്ക് കൃത്യമായ വിവരങ്ങള്‍ നല്‍കുന്ന 10.1 ഇഞ്ചിന്റെ ഫുള്‍ ഡിജിറ്റല്‍ ഇന്‍സ്ട്രുമെന്റ് ക്ലസ്റ്ററും, വലിയ 10.25 ഇഞ്ചിന്റെ സെന്‍ട്രല്‍ ഇന്‍ഫോടെയിന്‍മെന്റ് ടച്ച്സ്‌ക്രീന്‍ സിസ്റ്റവും ഇതില്‍ ലഭ്യമാക്കിയിട്ടുണ്ട്. കൂടാതെ വയര്‍ലെസ് ആപ്പിള്‍ കാര്‍പ്ലേ, ആന്‍ഡ്രോയിഡ് ഓട്ടോ കണക്റ്റിവിറ്റി, ഓട്ടോമാറ്റിക് ക്ലൈമറ്റ് കണ്‍ട്രോള്‍, വെന്റിലേറ്റഡ് ഫ്രണ്ട് സീറ്റുകള്‍ എന്നിവ ഇതിലുണ്ട്.

പ്രീമിയം ശ്രവ്യാനുഭവം സമ്മാനിക്കാനായി പ്രശസ്തമായ ജെബിഎല്‍ (JBL) സൗണ്ട് സിസ്റ്റവും ക്യാബിന്‍ ഭംഗി കൂട്ടാന്‍ 12 നിറങ്ങളിലുള്ള ആംബിയന്റ് ലൈറ്റിംഗും നല്‍കിയിട്ടുണ്ട്. സുരക്ഷയുടെ കാര്യത്തിലും ടൊയോട്ട ഈ പ്രീമിയം എസ്യുവി മോഡലില്‍ യാതൊരുവിധ വിട്ടുവീഴ്ചയും വരുത്തിയിട്ടില്ല. യാത്രക്കാരുടെ ഉയര്‍ന്ന സുരക്ഷയ്ക്കായി ആകെ 7 എയര്‍ബാഗുകളും എല്ലാ വേരിയന്റുകളിലും ഓള്‍ വീല്‍ ഡിസ്‌ക് ബ്രേക്കുകളും (All 4 Disc Brakes) സ്റ്റാന്‍ഡേര്‍ഡായി ചേര്‍ത്തിട്ടുണ്ട്.

ഇതിനുപുറമെ റോഡുകളില്‍ മികച്ച നിയന്ത്രണം നല്‍കുന്ന അത്യാധുനിക ലെവല്‍-2 ADAS സേഫ്റ്റി പാക്കേജും ഇതിലുണ്ട്. നഗരങ്ങളിലെ പാര്‍ക്കിംഗ് എളുപ്പമാക്കാന്‍ സഹായിക്കുന്ന 360 ഡിഗ്രി ക്യാമറ സംവിധാനം, ഓട്ടോ ഹോള്‍ഡ് ഫങ്ഷനോട് കൂടിയ ഇലക്ട്രോണിക് പാര്‍ക്കിംഗ് ബ്രേക്ക്, പാര്‍ക്കിംഗ് സെന്‍സറുകള്‍ എന്നിവ ഇതിന്റെ സുരക്ഷ വര്‍ദ്ധിപ്പിക്കുന്നു. മൂന്ന് വ്യത്യസ്ത വേരിയന്റുകളിലാണ് ടൊയോട്ട അര്‍ബന്‍ ക്രൂയിസര്‍ ഇബെല്ല ഇവി ലഭ്യമാകുക.

E1, E2, E3 എന്നിങ്ങനെയാണ് ഈ വേരിയന്റുകള്‍ക്ക് കമ്പനി ഔദ്യോഗിക നാമകരണം ചെയ്തിരിക്കുന്നത്. ഇതില്‍ ഉയര്‍ന്ന വേരിയന്റായ E3 പതിപ്പിന്റെ വില വിവരങ്ങള്‍ മാത്രമാണ് ടൊയോട്ട നിലവില്‍ പ്രഖ്യാപിച്ചിട്ടുള്ളത്. ഈ ടോപ്പ് എന്‍ഡ് E3 വേരിയന്റിന്റെ എക്‌സ്-ഷോറൂം വില 23.60 ലക്ഷം രൂപ മുതലാണ് ആരംഭിക്കുന്നത്. ബാക്കി രണ്ട് ബജറ്റ് വേരിയന്റുകളുടെ വില വരും ദിവസങ്ങളില്‍ കമ്പനി ഘട്ടങ്ങളായി പ്രഖ്യാപിക്കുമെന്നാണ് വിവരം.

കൂടുതല്‍ ഉപഭോക്താക്കളെ ആകര്‍ഷിക്കുന്നതിനായി പ്രശസ്തമായ ബാസ് അഥവാ ബാറ്ററി ആസ് എ സര്‍വ്ീസ് സ്‌കീമും ടൊയോട്ട ഈ കാറില്‍ അവതരിപ്പിച്ചിട്ടുണ്ട്. ഈ സ്‌കീം തിരഞ്ഞെടുക്കുന്ന ഉപഭോക്താക്കള്‍ക്ക് കാറിന്റെ പ്രാരംഭ വില വെറും 15.25 ലക്ഷം രൂപയായി കുറഞ്ഞു കിട്ടും. എന്നാല്‍ ഈ സ്‌കീം വഴി വാഹനം വാങ്ങുന്നവര്‍ തങ്ങള്‍ കാര്‍ ഓടിക്കുന്ന ഓരോ കിലോമീറ്ററിനും നിശ്ചിത ബാറ്ററി വാടകയായി 4.99 രൂപ വീതം കമ്പനിക്ക് അധികമായി നല്‍കേണ്ടതുണ്ട്.

കുറഞ്ഞ വിലയില്‍ വാഹനം സ്വന്തമാക്കാന്‍ ആഗ്രഹിക്കുന്ന വലിയൊരു വിഭാഗം വാണിജ്യ, വ്യക്തിഗത ഉപഭോക്താക്കള്‍ക്ക് ഈ പദ്ധതി വലിയ സഹായമാകും. ഇന്ത്യന്‍ ഇലക്ട്രിക് വാഹന വിപണിയില്‍ വരും ദിവസങ്ങളില്‍ കടുത്ത മത്സരങ്ങള്‍ക്കാണ് ഈ പുതിയ ടൊയോട്ട മോഡല്‍ വഴി തുടക്കം കുറിക്കാന്‍ പോകുന്നത്.

പ്രമുഖ മോഡലുകളായ മാരുതി സുസുക്കി ഇ വിറ്റാര (Maruti Suzuki e Vitara), മഹീന്ദ്ര BE 6 എന്നിവയോടായിരിക്കും ഈ കാര്‍ വിപണിയില്‍ പ്രധാനമായും മാറ്റുരയ്ക്കുക. ടൊയോട്ട ബ്രാന്‍ഡിന്റെ വിശ്വസ്തതയും ഈടും ഇഷ്ടപ്പെടുന്ന ഇന്ത്യന്‍ ഉപഭോക്താക്കള്‍ക്ക് തിരഞ്ഞെടുക്കാന്‍ സാധിക്കുന്ന ഏറ്റവും മികച്ച ഇലക്ട്രിക് എസ്യുവിയാണ് അര്‍ബന്‍ ക്രൂയിസര്‍ ഇബെല്ല. കൂടുതല്‍ ഡീലര്‍ഷിപ്പുകളില്‍ ഇലക്ട്രിക് വാഹനത്തിന്റെ ഡെലിവറി ആരംഭിക്കുന്നതോടെ ഇന്ത്യന്‍ നിരത്തുകളില്‍ ഇബെല്ലയുടെ സാന്നിധ്യം ദൃശ്യമാകും.