Volkswagen Virtus വാങ്ങാനിരുന്നവർക്ക് ലോട്ടറി! ബേസ് മോഡലിന് 70,000 രൂപ കുറച്ചു; പുതിയ വില വിവരങ്ങൾ ഇതാ

ജര്‍മ്മന്‍ വാഹന നിര്‍മ്മാതാക്കളായ ഫോക്‌സ്വാഗണ്‍ തങ്ങളുടെ ജനപ്രിയ സെഡാന്‍ മോഡലായ വെര്‍ട്ടിസിന്റെ വേരിയന്റുകളിലും വിലയിലും മാറ്റങ്ങള്‍ വരുത്തി. പുതിയ ടൈറോണ്‍ എസ്‌യുവി വിപണിയിലെത്തിക്കാനുള്ള തയാറെടുപ്പുകള്‍ക്കിടെയാണ് കമ്പനി നിലവിലെ മോഡല്‍ നിരയില്‍ ഈ പരിഷ്‌കാരം നടപ്പിലാക്കിയത്. ചില എന്‍ട്രി ലെവല്‍ വേരിയന്റുകള്‍ക്ക് വില കുറച്ചപ്പോള്‍ ഭൂരിഭാഗം മോഡലുകള്‍ക്കും വില വര്‍ദ്ധിപ്പിച്ചതായി കാരവാലേയിൽ പ്രസിദ്ധികരിക്കപ്പെട്ട റിപ്പോർട്ടിൽ പറയുന്നു .വെര്‍ട്ടിസ് നിരയിലെ എന്‍ട്രി ലെവല്‍ മോഡലായ കംഫര്‍ട്ട്ലൈന്‍ 1.0 MT-യുടെ വിലയില്‍ വലിയ കുറവുണ്ടായി എന്നതാണ് ശ്രദ്ധേയമായ കാര്യം. ഏകദേശം 70,201 രൂപയാണ് ഈ വേരിയന്റിന് കുറച്ചിരിക്കുന്നത്.

കൂടാതെ ടോപ്ലൈന്‍ ക്രോം 1.0 AT പതിപ്പിന് 3,155 രൂപയുടെ കുറവും കമ്പനി നല്‍കിയിട്ടുണ്ട്. ഈ രണ്ട് വേരിയന്റുകള്‍ക്ക് മാത്രമാണ് നിലവില്‍ വില കുറഞ്ഞിട്ടുള്ളത്. അതേസമയം മറ്റ് വേരിയന്റുകള്‍ക്കെല്ലാം വലിയ തോതിലുള്ള വില വര്‍ദ്ധനവാണ് ഫോക്‌സ്വാഗണ്‍ പ്രഖ്യാപിച്ചിരിക്കുന്നത്. ഇതിനുപുറമെ രണ്ട് പ്രധാന വേരിയന്റുകള്‍ വിപണിയില്‍ നിന്ന് പിന്‍വലിക്കുകയും ചെയ്തു.

GT പ്ലസ് ക്രോം 1.5 MT, GT പ്ലസ് സ്‌പോര്‍ട് 1.5 MT എന്നീ വേരിയന്റുകളാണ് കമ്പനി നിര്‍ത്തലാക്കിയത്. മാനുവല്‍ ഗിയര്‍ബോക്‌സ് ഇഷ്ടപ്പെടുന്നവര്‍ക്ക് ഇതൊരു തിരിച്ചടിയാണ്. വില വര്‍ദ്ധനവ് വിശദമായി പരിശോധിച്ചാല്‍ വെര്‍ട്ടിസ് 1.0 MT ജിടി ലൈന്‍ പതിപ്പിന് 45,236 രൂപ കൂടിയിട്ടുണ്ട്. ഹൈലൈന്‍ പ്ലസ് 1.0 MT, ഹൈലൈന്‍ പ്ലസ് 1.0 AT എന്നിവയ്ക്ക് യഥാക്രമം 40,541 രൂപയും 39,339 രൂപയുമാണ് വര്‍ദ്ധിച്ചത്.

ഉപഭോക്താക്കളുടെ ആവശ്യങ്ങള്‍ക്കനുസരിച്ച് വേരിയന്റുകളില്‍ വരുത്തിയ മാറ്റത്തിന്റെ ഭാഗമായാണ് ഈ വില പുതുക്കല്‍.മറ്റ് മോഡലുകളായ ഹൈലൈന്‍ 1.0 MT, GT ലൈന്‍ 1.0 AT, GT പ്ലസ് ക്രോം 1.5 DSG എന്നിവയ്ക്കും വില ഉയര്‍ന്നിട്ടുണ്ട്. യഥാക്രമം 29,536 രൂപ, 29,034 രൂപ, 25,085 രൂപ എന്നിങ്ങനെയാണ് വര്‍ദ്ധനവ്. ഹൈലൈന്‍ 1.0 AT-ക്ക് 24,032 രൂപയും GT പ്ലസ് സ്‌പോര്‍ട് 1.5 DSG-ക്ക് 21,065 രൂപയും അധികം നല്‍കണം.

ടോപ്ലൈന്‍ ക്രോം 1.0 MT വാങ്ങുന്ന ഉപഭോക്താക്കള്‍ പഴയ വിലയേക്കാള്‍ 5,642 രൂപ അധികം നല്‍കേണ്ടി വരും. ഇതോടെ വെര്‍ട്ടിസ് ശ്രേണിയുടെ പുതുക്കിയ എക്‌സ്-ഷോറൂം വില 10.50 ലക്ഷം രൂപ മുതല്‍ 19 ലക്ഷം രൂപ വരെയായി മാറി. നിര്‍മ്മാണ ചിലവ് വര്‍ദ്ധിച്ചതും വിപണി സാഹചര്യങ്ങളുമാണ് ഈ മാറ്റത്തിന് കാരണമായി ചൂണ്ടിക്കാണിക്കുന്നത്.

1.0 ലിറ്റര്‍ TSI, 1.5 ലിറ്റര്‍ TSI പെട്രോള്‍ എഞ്ചിനുകളിലാണ് വെര്‍ട്ടിസ് ലഭ്യമാകുന്നത്. സുരക്ഷയുടെ കാര്യത്തില്‍ 5-സ്റ്റാര്‍ റേറ്റിംഗ് നേടിയ ഈ ജര്‍മന്‍ കാര്‍ സെഡാന്‍ പ്രേമികളുടെ പ്രിയപ്പെട്ട മോഡലാണ്. വിലയില്‍ മാറ്റം വന്നുവെങ്കിലും ഫീച്ചറുകളിലോ എഞ്ചിന്‍ കരുത്തിലോ മറ്റ് മാറ്റങ്ങളൊന്നും കമ്പനി വരുത്തിയിട്ടില്ല. ഓരോ വേരിയന്റിന്റെയും പുതുക്കിയ നിരക്കുകള്‍ ഇതിനോടകം പ്രാബല്യത്തില്‍ വന്നു.

വിപണിയില്‍ ഹോണ്ട സിറ്റി, ഹ്യുണ്ടായി വെര്‍ണ, സ്‌കോഡ സ്ലാവിയ എന്നിവയുമായാണ് വെര്‍ട്ടിസ് പ്രധാനമായും മത്സരിക്കുന്നത്. എന്‍ട്രി ലെവല്‍ മോഡലിന് വില കുറച്ചത് കൂടുതല്‍ ഉപഭോക്താക്കളെ ആകര്‍ഷിക്കാന്‍ സഹായിക്കുമെന്നാണ് ഫോക്‌സ്വാഗണ്‍ കരുതുന്നത്. വരും മാസങ്ങളില്‍ ടൈറോണ്‍ എസ്‌യുവി കൂടി എത്തുന്നതോടെ ഫോക്‌സ്വാഗണ്‍ തങ്ങളുടെ ഇന്ത്യന്‍ വിപണിയിലെ സാന്നിധ്യം കൂടുതല്‍ ശക്തമാക്കും.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു. ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻറ് ചെയ്യാനും മറക്കല്ലേ.