തല അജിത് ബിഎംഡബ്ല്യു ഐ8 വാങ്ങി: ചിത്രങ്ങള്‍ വൈറലാകുന്നു

പ്രായോഗികതയ്ക്ക് വലിയ മുന്‍തൂക്കം നല്‍കി നിര്‍മിച്ച ഹൈബ്രിഡ് വാഹനമാണിത്. പ്രായോഗികത സംബന്ധിച്ച ബിഎംഡബ്ല്യുവിന്റെ കണക്കുകൂട്ടല്‍ അങ്ങേയറ്റം കൃത്യതയുള്ളതായിരുന്നുവെന്ന് ആഗോള അവതരണത്തിനു ശേഷമുണ്ടായ സംഭവങ്ങളിലൂടെ നമ്മളറിഞ്ഞു. ലോഞ്ചിനു മുമ്പുതന്നെ വാഹനം വിറ്റുതീരുകയാണുണ്ടായത്!

മണിക്കൂറില്‍ 100 കിലോമീറ്റര്‍ വേഗത പിടിക്കാന്‍ വെറും 4.4 സെക്കന്‍ഡ് നേരം മാത്രമേ ബിഎംഡബ്ല്യു ഐ8 എടുക്കൂ. ബാറ്ററിയില്‍ മാത്രം ഓടുകയാണെങ്കില്‍ മണിക്കൂറില്‍ പരമാവധി 120 കിലോമീറ്റര്‍ വേഗത പിടിക്കാനാവും ഐ8ന്. പെട്രോള്‍ എന്‍ജിനും ഇലക്ട്രിക് മോട്ടോറും ചേര്‍ന്നാണെങ്കില്‍ പരമാവധി വേഗത മണിക്കൂറില്‍ 250 കിലോമീറ്ററായി ഉയരും.

ഉരുക്കിനെക്കാള്‍ കരുത്തുള്ളതും ഭാരം വളരെ കുറഞ്ഞതുമായ കാര്‍ബണ്‍ ഫൈബറിലാണ് ബിഎംഡബ്ല്യു ഐ8ന്റെ നിര്‍മാണം. ലേസര്‍ ലൈറ്റുകളുടെ ധാരാളിത്തം നിറഞ്ഞ ഉപയോഗം ഇന്റീരിയറിലും എക്‌സ്റ്റീരിയറിലുമുണ്ട്. ലേസര്‍ ലൈറ്റുകള്‍ ഹെഡ്‌ലാമ്പിലുപയോഗിക്കുന്ന ലോകത്തിലെതന്നെ ആദ്യത്തെ കാറാണിത്!

ദില്ലി എക്‌സ്‌ഷോറൂം നിരക്ക് പ്രകാരം 2.29 കോടി രൂപയാണ് ബിഎംഡബ്ല്യു ഐ8 ഹൈബ്രിഡ് സൂപ്പര്‍കാറിന്റെ വില.

1.5 ലിറ്റര്‍ ശേഷിയുള്ള 3 സിലിണ്ടര്‍ ടര്‍ബോ പെട്രോള്‍ എന്‍ജിനും ഒരു ലിതിയം അയണ്‍ ബാറ്ററി ഇലക്ട്രിക് മോട്ടോറും ചേര്‍ന്നാണ് ഐ8 സ്‌പോര്‍ട്‌സ് കാറിന് കരുത്തു പകരുന്നത്.

പെട്രോള്‍ എന്‍ജിന്‍ 231 കുതിരശക്തിയും ഇലക്ട്രിക് മോട്ടോര്‍ 131 കുതിരശക്തിയും ഉല്‍പാദിപ്പിക്കുന്നു.

പെട്രോള്‍ എന്‍ജിനും ഇലക്ട്രിക് മോട്ടോറും ചേര്‍ന്നുല്‍പാദിപ്പിക്കുന്ന കുതിരശക്തി പിന്‍വീലുകളിലേക്കെത്തിക്കുന്നത് ഒരു 6 സ്പീഡ് ഓട്ടോമാറ്റിക് ഗിയര്‍ബോക്‌സാണ്. പൂര്‍ണമായും ഇലക്ട്രിക് ഉര്‍ജത്തിലോടാനും ഈ ഹൈബ്രിഡ് കാറിന് സാധിക്കും.

പൂര്‍ണമായും തുകല്‍ കൊണ്ട് നിര്‍മിച്ചതാണ് വാഹനത്തിനകത്തെ അപ്‌ഹോള്‍സ്റ്ററി പണികള്‍. 8.8 ഇഞ്ച് ഐഡ്രൈവ് ഇന്‍ഫോടെയ്ന്‍മെന്റ് സിസ്റ്റമാണ് ഐ8ല്‍ ചേര്‍ത്തിട്ടുള്ളത്. ഗെയ്ജുകള്‍ പൂര്‍ണമായും ഡിജിറ്റലാണ്.

കൂട്ടിയിടി സാധ്യതകള്‍ തിരിച്ചറിഞ്ഞ് വാണിങ് നല്‍കുന്ന സംവിധാനം ഈ കാറിലുണ്ട്. മുന്നിലും പിന്നിലും പാര്‍ക്കിങ് സെന്‍സറുകള്‍ ചേര്‍ത്തിരിക്കുന്നു.

ഡ്യുവല്‍ ഫ്രണ്ട്, സൈഡ്, കര്‍ട്ടന്‍ എയര്‍ബാഗുകള്‍ വാഹനത്തിലുണ്ട്. എബിഎസ്, കോര്‍ണറിങ് ബ്രേക്കിങ് കണ്‍ട്രോള്‍, ഡൈനമിക് സ്റ്റബിലിറ്റി കണ്‍ട്രോള്‍ തുടങ്ങിയ സന്നാഹങ്ങളും വാഹനത്തില്‍ കാണാം.